Ennaan An Ritōl an Eria
Inaaj Ami Meram
Irooj ej ļōmņak iien otemjej kōn ro ri-karejeran im ej kōm̧m̧an kallim̧ur n̄an er. Ekar kōm̧m̧an kallim̧ur kein kōn bujen ko.
N̄an Joshua Irooj ear ba, “. . . Āinwōt Iar pād ippān Moses, āindein inaaj pād ippam̧. I jāmin likjab jān eok ak ilo̧k jān eok. Men in wōt, kwōn kajoor, im kanooj peran.”
N̄an baam̧le eo an Liai ke raar ito itak ļo̧k n̄an āneen kallim̧ur eo, Irooj ear ba, “Inaaj barāinwōt ami meram ilo āne jem̧aden . . . kom̧ naaj jeļā bwe ej kōn Eō kar tōl kom̧.”
Rainin ilo Pacific Eria, elōn̄ ippād armej ro raan kein rej āinwōt Liai kab Joshua me rej keememej jouj eo an Irooj im kōjeraam̧m̧an ko ilo mour ko aer jān m̧okta im raan kein. Em̧ōj ba bwe “keememej ej juon kakōļļein kam̧m̧oolol”. Ilo aolepān eria in ad em̧ōj am karuwaineneik jet ripālele ro rej mijenede bwe ren itok im jerbal ilo jikin ko ilo Pacific in me Kabun̄ eo ej eddōkļo̧k wōt. N̄an ro em̧ōj aer jerbal kab ro rej jerbal wōt, en̄in ej wāween aer bar leļo̧k n̄an rioktak ro rej kab oktaktok n̄an Kabun̄ in. Bwebwenato ko an mijenede rein ikijjien Kabun̄ in remaron̄ kar ijjino elōn̄ iiō ko remootļo̧k, ke mijenede ro jān Amedka raar itok im katakin rūtto ro jibūer im jim̧aer me raar bōk gospel eo. Rioktak ro m̧oktata ilo āne kein, ilo jinoin rekar jab lukkuun jeļā kōn tōmak eo aer ekāāl, ainļo̧k wōt ro uwaan Kabun̄ rej kab oktaktok im eddōkļo̧k wōt. Kiiō kōmij kūr ripālele ro rej mijenede jān jikin ko im ekajoor Kabun̄ ie ilo tōrein bwe ren itok im jipan̄ kōkajoorļo̧k ro jeier im jatier ilo jikin ko im Kabun̄ eo ej eddōkļo̧k wōt. Em̧ool, rej “kwaļo̧k meram eo”. Jetōb an Irooj enaaj kam̧ool kōn waanjon̄ak eo aer, bwe rej tōl jān kajoor an Irooj.
Ripālele ro rej mijenede rej kōm̧m̧an juon oktak ilo aer kōjerbal jeļāļo̧kjeņ eo aer im katakin ro uwaan Kabun̄ in ilo jikin ko Kabun̄ in ej eddōkļo̧k wōt ie kilen tōl Kabun̄ eo, im wāween aer mour kōn gospel eo ilo mour ko aer. M̧anit ko an armej ro ilo ijōkeen āinwōt Papua New Guinea, Solomon Islands, Vanuatu, Marshall Islands, im Kiribati rej epaake doon. Ripālele ro ad rej mijenede rej itok jān Samoa kab Tonga, im ebar lōn̄ Risamoa im Ritonga ro me rej jokwe ilo Amedka, New Zealand im Australia. Ebar wōr juon brother jān Papua New Guinea, kab lio pāleen, im raar jerbal.
Lin̄ōri naan in kam̧ool kein an mijenede ro im em̧ōj aer jerbal, kab ro rej jerbal wōt:
“Mijen eo am n̄an Soloman Islands ium̧win ruo iiō ear juon iaan men ko em̧m̧an tata me em̧ōj amro kōm̧m̧ane ippān doon ilo mour in, . . . em̧ōj an jipan̄ kōmro bōk juon naan in kam̧ool ekajoor . . . n̄an amro meļeļe kōn iakwe eo an Jemād Ilan̄ im ad Rilo̧mo̧o̧r n̄an kōm, kab aolep ajri ro nejin. Em̧ōj amro en̄jake em̧m̧anļo̧k im kajoorļo̧k im kōmij ‘etetal im jab parōk’. Kōm ar lo men in kabwilōn̄lōn̄ ko im pein Irooj ilo mour ko amro im mour ko an ro uwaan Kabun̄ eo ilo an jerbal eo wōnm̧aanļo̧k.” —Brother Viiga im Sister Lupe Fuimaono, Pesega Samoa Stake
“Ium̧win elōn̄ iiō ko, Iar jerbal ium̧win tōl eo an elōn̄ stake būreejtōn ro āinwōt juon ri-jeje an stake eo. Jeļāļo̧kjeņ eo iar bōke, em̧ōj an kōpooj kōm n̄an amro jerbal im jipan̄ ritōl ro an priesthood eo im ritōl ro jet ilo stake eo an Daru Papua New Guinea. Kōmij watōke juon men in jeraam̧m̧an. Aō jerbal n̄an Irooj ippān lio me enaaj pāleeō n̄an indeeo Sister Taala, ej juon jeraam̧m̧an iien otemjej.” —Brother Lamese im Sister Loreta Taala, Pago Pago Samoa West Stake
“Jerbal eo amro ilo Papua New Guinea eļap tokjān n̄an kōm, eļaptata n̄an Brother Jackson, āinwōt juon eo ej itok jān ijo. Jerbal in am ear juon jepļaak n̄an PNG, ijo kōmar on̄ kake, n̄an kwaļo̧k gospel eo an Jisōs Kraist em̧ōj an jepļaaktok n̄an baam̧le eo am kab armej ro am. Am ekkōnak badge in mijenede ko amro kajjojo raan ear letok eļap kajoor in tōmak im kōjatdikdik. . . .” —Brother Peter im Sister Serena Jackson, Eight Mile Plains Australia Stake
“Kom̧m̧ool kōn ami kōm̧m̧an bwe ripālele rein ren jerbel ijin ilo PNG. Eļap aer jipan̄ ilo an Kabun̄ in eddōkļo̧k im ilo aer kōkajoorļo̧k ro uwaan Kabun̄ ijin. Rej jerbal āinwōt ritōl ro, rikakpilōk ro, rijipan̄ ro im rūkaki ro ilo branch ko im ward ko aer. Rej barāinwōt jipan̄ Elder ro rej jerbal aolep raan ilo aer jerbal in karejar n̄an ro rejjab uwaan Kabun̄ in kab ro uwaan Kabūn̄ rejaniknik bar ro̧o̧ltok n̄an m̧akūtkūt ko an Kabun̄ in. Āinwōt juon tōprak, n̄aij loe juon oran ej eddōkļo̧k rej etal n̄an kweilo̧k in kwojkwoj eo. Kōrā ro jeid im jatid rej jipan̄ ilo Būraimere, Doulul eo an Jiron̄ ro im Doulul eo an Kōrā ro, n̄an kōkajoorļo̧k radik kein”. —Mission Būreejtōn Finau Hafoka, Papua New Guinea Port Moresby Mission
Kōn aer jipan̄, ripālele ro ad rej mijenede rej kalōk Kabun̄ in. Rej jipan̄ ko ilo wāween an Irooj bōktok meram in gospel eo an n̄an armej im n̄an juon aelōn̄. Ine ko rej kalbwini ilo bōro ko im ļōmņak ko repojak. Kallim̧ur eo an Irooj ealikkar, “Enaaj pād ianbwijmaron̄imi im ianmiin̄imi, im An Jetōb enaaj pād ibūruōmi, im enjeļ ro An ipeļaakimi, n̄an kotak kom̧”.