Bwebwenato ko an Ijo Jokwe ie
Juon Ettōņak Ekūrm̧ool
Maria Kupun Mael, eo kar ļotak ilo Papau New Guinea ear aolep iien kōņaan bōk juon tikrii jān juon university ak ear jaje ewi wāween an naaj kakūrm̧ool ettōņak in. Inepata kōn jāān im men ko jet ear kōm̧m̧an bwe an bōk jeļāļo̧kjeņ ear juon iaļ epen n̄an jibadek, ak ear jino an oktak ke ear kobatok ippān Kabun̄ eo an Jisōs Kraist im Armej Ro Rekwoojarjar ilo Raan Ko Āliktata ilo 2004.
Ilōn̄inļak ruwalitōk iiō ko, Maria ear jerbale juon mijen ilo Vanuatu, ear m̧areiki ļeo pāleen Luke Robert Mael im ro̧o̧l n̄an Vanuatu ijo raar jino juon baam̧le. Jān aolepān men kein, ettōņak eo an n̄an pukot juon tikrii ear jab jakoļak.
“Iar jar kake aolep iien. Iar jeļā ke juon raan ettōņak eo aō enaaj kar kūrm̧ool,” ear ba.
Ilo 2012 Maria ear iioone juon sister mijenede eo erūtto im ej jipan̄ armej ikijjien aer bōk jeļāļo̧kjeņ jān New Zealand etan in Ruth Maha. Ruth ear leļo̧k n̄an e juon peba in kanne kōn Perpetual Education Fund an Kabun̄ eo. Sister Maha ear ba n̄an Maria bwe enaaj maron̄ in bōk jipan̄ in im bōk tikrii eo an.
Perpetual Education Fund eo (PEF) an Kabun̄ eo an Jisōs Kraist im Armej Ro Rekwojarjar ilo Raan-ko Āliktata ej jipan̄ ro uwaan Kabun̄ eo dik im rūtto jim̧or n̄an aer bōk jeļāļo̧kjeņ. Program in em̧ōj an jipan̄ elōn̄ļo̧k jān 90,000 armej ro āinwōt Maria, ijoko jabdewōt ipeļaakin laļ in, jān an ijjino ilo 2001.
Kōn jipan̄ an PEF eo, Maria ear jino an katak ilo University of the South Pacific Emalus Campus ilo Vanuatu ilo 2013. Ālikin elōn̄ iiō in an ettōņak, Maria ear pād ilo jinoin iaļ eo, ak iaļ eo im̧aan maron̄ obrak wōt kōn māllejon̄ ko.
Ajri eo nejin Maria kein kajilu ear ļotak ke ear jerbal n̄an bōk tikrii eo an. Ear bōk emān kūlaaj ko kajjojo semester, im ear “jab lukkuun pidodo,” ear ba.
Ekkā an etetal n̄an kilaaj ko an, juon awa in etetal, ijellọkin an bōk baj eo n̄an an kōjparok an jāān bwe ajri ro nejin ren jab kwōle.
Elōn̄ iaan ro m̧ōttan im ro nukwin raar kōraate Maria kōn an pukot jeļāļo̧kjeņ, im kar ba bwe ej aikuj in pād wōt ilo m̧weo im lale baam̧le eo an. Naan in kōraat kein raar kabūrom̧ōj Maria, ak ear jab ebweer. Ear oktakļo̧k n̄an Irooj ilo jar bwe en pukōt aenōm̧m̧an. Kōn Jetōb Kwōjarjar ear lo lōke ke emaron̄ kar tōprak im ear tōmak ilo e make ilo an wōnm̧aanļo̧k.
Cyclone Pam ear kōjorāān Vanuatu ilo 2015 im ear ko̧kkure m̧weo im̧ōn Maria im kōm̧m̧an bwe en ejjeļo̧k an jikin kiki ium̧win juon wiik.
“Aolep bok in ekkatak ko aō raar jako,” Maria ear ba.
Pen im dim wōt, ear kōjerbal bok ko jān ḷāibrāre eo im ear wōnm̧aanļo̧k ilo katak ko an. Kar ejjeļo̧k an Maria internet ilo m̧weo im̧ōn, kōn menin ear kōjerbal internet eo an jikin jikuuļ eo n̄an katak im riiti note ko an.
Kōn jipan̄ eo an ļeo pāleen, Maria ear anjo̧ ioon aolep māllejon̄ ko me raar pinej iaļ eo an.
“Ļeo pāleō ear lukkuun jipan̄ eō ilo aō katak,” ear ba, “kōjekdo̧o̧n men ko repen, ear ba bwe in jab ebweer. Ear lale ajri ro ilo ien aō etal n̄an jikin jikuuļ eo n̄an katak ilo kilaaj ko aō im n̄an kōdedeļo̧k pepa ko aō.”
Maria ear barāinwōt lo aenōm̧m̧an ilo naan ko an ri-kanaan ro. “Rikanaan ro im rijelōk ro rej katakin bwe jeļāļo̧kjeņ ej juon katak me ej n̄an indeeo,” ear ba, Elder Dieter F. Uchtdorf ej ba: “N̄an ro uwaan Kabun̄ eo, jeļāļo̧kjeņ ej jab baj juon ļōmņak em̧m̧an—ej juon kien.”
Maria ear kadiwōjļo̧k ilo 30 Nobōṃba 2018, ļalem iiō jān an kar jino an ekkatak. Ear bōk juon bachelor’s tikrii ilo commerce, im ear katak kōn Management kab Public Administration, im Sociology jim̧or. Ej ļōmņak in wōnm̧aanļo̧k n̄an an bōk juon masters tikrii im juon PhD.
“Ikōņaan bwe in juon waan jon̄ak em̧m̧an n̄an ajri ro nejū ioon aelon̄ in,” ear ba. “Meļeļein bwe in pojak, bōk jerbal me enaaj em̧m̧an, erom juon eo me emaron̄ kōjparok e make im jerbal n̄an ro jet. Ij tōmak bwe Irooj enaaj kōpooj juon iaļ n̄an aō kadedeļak men in. Irooj ekōņaan bwe jen m̧ōņōņō ilo mour in im eļan̄n̄e jenaaj m̧ōņōņō jej aikuj in tōmak ilo kōj make, wōnm̧aanļo̧k, anjo̧ ioon māllejon̄ ko im tōpar ettōņak ko ad.”
Rej ļōmņak bwe Maria ej juon iaan kōrā ro uwaan Kabun̄ eo m̧oktata ilo Vanuatu im em̧ōj an kadiwōjļo̧k jān juon university.