Bwebwenato ko an Ijo Jokwe ie
Anij Enaaj Kōpooj Juon Iaļ N̄an Ad Kōjparok Kien Ko An
Iar ron̄ kōn Pathway Program m̧oktata ilo juon kweilo̧k an Stake eo am. Elder Villa ear kōnono kake im iar jeļā ke iaikuj in kōm̧m̧ane.
Jeļāļo̧kjeņ ear aolep iien juon aō kōttōpar. Ilo 2009 iar riiti naan ko an Elder Dieter F. Uchtdorf ilo Ensign eo im naan ko an raar pād ippa tok n̄an kiiō.
“N̄an ro uwaan Kabun̄ eo, jeļāļo̧kjeņ ej jab baj juon ļōmņak em̧m̧an—ej juon kien. Jej aikuj in katak kōn men ko jim̧or ilo lan̄ im ilo laļ, im ium̧win laļ; men ko me rekar pād, men ko repād kiiō, men ko me ejjab etto an jejjet kūtier; men ko ilo laļ eo ami, men ko ilo laļ ko jet” (Dieter F. Uchtdorf, “Two Principles for Any Economy”, Oktoba 2009 Kweilo̧k eo Eļap; www.lds.org/study/general-conference/2009/10/two-principles-for-any-economy?lang=mah).
Iar jeļā ke ikdeelel eo aō n̄an ekkatak ear juon ikdeelel ejim̧we. Ilukkuun tōmak bwe aolep men ko jej katak ilo mour in renaaj pād ippād ilo mour eo ej itok im iar kōņaan bōk jeļāļo̧kjeņ jon̄an wōt aō maron̄.
Iar ļōmņak in katak elōn̄ kōttan, ak em̧ōj aō kar m̧are im ej kab ļotak ruo nejū bo. Iar pād wōt ilo aō kōjatdikdik ke kōm ar etaļe aolep jekjek ko roktak ak em̧ōkaj am kile ke kōm ban kar maron̄ kōļļā wōnāān juon rilale ajri ro ak maron̄ e n̄an an ļeo pāleeō jab jerbal bwe en maron̄̄ in lale er. Iar lukkuun ļōmņak bwe in kōm̧m̧an kūlaaj ko ilo online ak ke iar kanne aolep pepa ko, iar lo ke ebar ļap wōnāān kōm̧m̧ane. Eļap an kar kabūrom̧ōjm̧ōj ak iar lukkuun tōmak, ilo iien eo, bwe maron̄ eo aō ilo bōk jeļāļo̧kjeņ ekar kiō jako. Lukkuun kam̧m̧oolol, bwe Anij ejeļā ke iar koņaan kōjparok kien eo n̄an bōk jeļāļo̧kjeņ im n̄e Irooj ej kakien ej iien otemjej kōpooj juon iaļ.
Ejjap to jān iien eo iaar joļo̧k aō ļōmņak in ekkatak, n̄a kab baam̧le eo aō kar bar ro̧o̧l ļo̧k n̄an Marshall Islands n̄an am jipan̄ jema im jinō. Ke iar jijet ilo kweilo̧k eo eļap an stake eo im ron̄jake an Elder Villa kōnono kōn Pathway Program eo, iar jeļā ke Irooj ear kōjparok kallim̧ur eo An bwe iien otemjej enaaj kōpooj juon iaļ n̄an ad kōjparok kien ko an. Iar lukkuun m̧ōņōņō im iar kajju kanne aō peba n̄an deļo̧n̄e.
Aaet, ij juon mama wōt n̄an ruo ajri bo me relukkuun dik im emmourur, im barāinwōt juon nin̄nin̄ leddik, im dāpdep ilo elōn̄ men ko ej juon men epen.
Aolep jibbon̄ ij ruj ilo 6 awa jejjet, ij jar innām n̄a ij katak kilaaj eo ao n̄an raan eo m̧̧okta jān an ajri ro ruj. N̄e reruj, ij najidik er, kōm̧m̧an aer nuknuk im kepooj er n̄an raan eo. Ekkā am etal n̄an parijet bwe ren ikkure im ijo ij wōnm̧aanļo̧k im katak ilo cell phone eo aō me ej pād ippa jabdewōt jikin n̄a im arji ro rej etal n̄an e. Itōrerein lak 11 awa jibbon̄ kōmij ro̧o̧l n̄an m̧weo im m̧ōn̄ā in raelep im pād ippān doon m̧ae aer kiki ilo ruo awa ālikin raelep. Ilo ien eṇrej kiki, ij kadedeļo̧k pepa ko aō, kōpooj katak in seminary n̄an raan eo ilju im jerbal jon̄an wōt eo imaron̄ kam̧ōje m̧okta jān aer ruj. Jūkeejul in emaron̄ kam̧ōkm̧ōk jet iien ak n̄e itōn ebweer, ij kalimjek ajri ro nejū reaorōk im keememej bwe n̄a ij kōm̧m̧an waan jon̄ak n̄an er. Jema im Jinō aolepen ien rej kakeememej eō bwe eļan̄n̄e ij mijak Anij im pukōt an tōl ilo men otemjej, enaaj wōr aō kajoor in kadedeļo̧k program eo im ilo aō barāinwōt likūt baam̧le eo ao m̧oktata.
Ikōņaan bwe ajri ro nejū ren jeļā ke aer maron̄ in bōk jeļāļo̧kjeņ eban jako. Jemedwōj Ilan̄ ejeļā kōn jekjek ko jej pād ie k im kōn jouj eo An, kab program ko raorōk an Kabun̄ in, em̧ōj an kōpooj elōn̄ iaļ in ad bōk jeļāļo̧kjeņ. eo pāleō ej juon jipan̄ eo elap n̄an eō. Aolep raan ej kōm̧m̧an jon̄an wōt an maron̄, ekoba karreo m̧weo im ikkure ippān ajri ro, n̄an an jipan̄ eō tōpar kōttōpar ko aō.
Jān raan eo kein kajuon in aō kōm̧m̧ane Pathway Program eo iar en̄jake an naan in kam̧ool eo aō eddōkļo̧k. Program in ej kōjeraam̧m̧an mour eo aō jim̧or ilo kanniōk im jetōb im ij ļōmņak in wōnm̧aanļo̧k ilo katak ko aō jon̄an aō maron̄. Ikōņaan kwaļo̧k n̄an ajri ro nejū bwe kōn Anij ejjeļo̧k men ko renaaj bane. N̄e jineer emaron̄ kōm̧m̧ane, remaron̄ bar kōm̧m̧ane.