Te mau ’api nō Pātifita
I muri iho i te a’o a te peropheta
’Ua fa’aoti te mau vahine nā Patifita i tā rātou 10 mahana ha’apaera’a i te rāve’a tūreiara’a tōtiare.
I roto i te ’āmuira’a rahi nō ’Ātopa 2018, ’ua ani manihini te peresideni Russell M. Nelson i te mau vahine o te ’Ēkālesia ’ia ’āmui mai i roto i te hō’ē ha’apaera’a 10 mahana i te rave’a tūreiara’a tōtiare.
« Tē ani nei au ia ’outou ’ia rave i te hō’ē ha’apaera’a i te mau rāve’a tūreiara’a tōtiare, e 10 mahana, ha’apae i te mau rāve’a ha’apararera’a ato’a e fa’atae i te mana’o ’ino ’e te vi’ivi’i i tō ’outou nei ferurira’a. ’A pure ’ia ’ite mai ’outou e aha terā mau mea e vaiiho atu i roto i tā ’outou ha’apaera’a. E hitimahuta ’outou i te maita’i o terā 10 mahana ha’apaera’a. E aha te mea tā ’outou e ’ite ra i muri mai i te ha’apaera’a i te mau hi’ora’a o te ao tei ha’apēpē noa na i tō ’outou vārua ? Tē vai ra ānei te tauira’a i teienei i roto i te mea tā ’outou e hina’aro e tu’u i tō ’outou taime ’e tō ’outou pūai ? ’Ua taui ānei tā ’outou mau ’ohipa e rave mātāmua roa—noa atu e tauira’a na’ina’i ? Tē a’o nei au ia ’outou ’ia pāpa’i i te mau mana’o e tae mai ’e ’ia rave i te reira ».1
Peresideni Russell M. Nelson (’Āmuira’a rahi nō ’Ātopa 2018, tuha’a purera’a rahi a te mau vahine)
’Ua riro te pe’era’a i te anira’a fa’auruhia a te peropheta ’ei ha’amaita’ira’a fa’ahiahia rahi mau i roto i te orara’a o te mau tuahine nō Pātifita Teie te tahi ’o tō rātou mau ’itera’a :
Adeline Akaiti—Hau atu i te ’oa’oa
I roto i te reira taime, ’ua ’oa’oa hau atu vau. Te fa’a’orera’a i te hi’o pinepine i tā’u niuniu ’ua riro ’ei ’ohipa ’ōhie ’e ’ua nehenehe iā’u ’ia fāri’i-maita’i-a’e i te Vārua. ’Ua rahi a’e tō’u taime nō te rave maita’i i tō’u mau pi’ira’a ’e e tae mai te hau iā’u i te reira mahana.
’Ua mana’o vau e rave fa’ahou e 10 mahana, penei a’e e 10 hepetona, penei a’e hau atu.
Anna Vaipulu—Hō’ē aura’a pūai ’e tō’u Fa’aora
’Ua tae mai te arata’ira’a a te Vārua ma te vitiviti ’e te pāpū : Facebook, Instagram, Snapchat ’e Youtube. ’Ua ani mai te peropheta ia tātou ’ia pure nō te ’ite e aha te rāve’a tūreiara’a e fa’a’ore i nā 10 mahana, e au ra e mea rahi.
« 10 mahana mea roa roa ! Nāhea te mau ta’ata e fārerei mai iā’u ? E aha te mea tā’u e ’ore e ’ite ? ’E mai te mea e ho’i tō’u metua tāne i te fare ma’i ’e ’aita vau e ’ite hou nā 10 mahana ! »
’A fa’aī noa ai te ’enemi i tō’u ’ā’au i te fe’a’a ’e te pe’ape’a, ’ua ti’aoro vau i te Metua i te Ao ra ’ia hōro’a mai iā’u i te pūai ’e te hina’aro ’ia rave i teie anira’a. I muri noa mai, mai te hō’ē uira, ’ua ha’amāramahia tō’u vārua ’e tō’u ’ā’au i te tāra’ehara a Iesu Mesia ’e tōna here nō’u ’e i te reira taime, ’aita vau i feruri fa’ahou i te tahi atu mea. ’Ua tāmarūhia tō’u vārua ’e ’ua fa’atumuhia ’e ’ua hau.
’Ua ’ite au ē teie mau parau ri’i ’e teie mau video tei riro nā ’ei mea faufa’a ’ua fa’a’ārepurepu i tō’u vārua ’e ’ua ’opani i te ’ē’a e arata’i i te hō’ē aura’a o te ta’ata iho ’e tō’u Fa’aora ’e te tahi mau ’itera’a mai teie. ’Ua ’ite au ē e ti’a iā’u ’ia fa’aāteatea i teie ’ē’a, ’ua māere roa rā vau i te rahira’a ’ohipa e ti’a ’ia fa’aāteatea.
’Aita vau i ātea roa hou tō’u nā mata i araara ai i ni’a i te mau hora e rave rahi tā’u i māu’a i te fa’aterera’a i tā’u rēni ha’apararera’a ’aore rā te hi’ora’a i tā’u mau video i auhia mai te ‘e aha to roto i te hō’ē pōro bowling.’ Nā te rāve’a tūreiara’a tōtiare e arata’i tō’u orara’a ’e ’ua hina’aro vau e rave i te arata’ira’a.
’Ua ha’amata vau i te hi’o i te ao e hā’ati ra iā’u nā roto i tō’u iho mata maori nā roto i te hi’o o tā’u niuniu ’aore rā te mata o te tahi mau ta’ata e hi’o ra i tā’u mau hōho’a ’e tē tu’u ra i tō rātou mau mana’o
’Aita vau i ti’aturi i te rahira’a taime ’e te itoito tō’u e vai ra i reira iho. E mea māere i te hi’ora’a ē e mea rohirohi roa te paura’a o te rāve’a tūreiara’a sōtiare ’aita ana’e e tītauhia te tauto’ora’a i te pae tino.
’Ua ’ite au ē te mo’era’a te rāve’a tūreiara’a tōtiare ’e te māra’ara’a o te vārua ’ua fa’aiti te reira iā’u ’ia ha’avā i te ta’ata, ’ua ha’amaita’i i tō’u mau aura’a ato’a.
Linda Tagiloa—Hō’ē tauiraʼa o te ʼāʼau
’Ua ’ite au ē ’ua fa’auruhia teie a’o nō te mau vahine ato’a o te ’Ēkālesia, i te fa’aro’ora’a rā i te reo o te peropheta, ’ua ’ite au i te hō’ē parau poro’i o te ta’ata iho ta’a ’ē a te Vārua Maita’i i te ha’aputapūra’a i tō’u ’ā’au. « Linda, ’a pure nō te ’ite e aha te mau mana au ’ore e tāpe’a nei ia ’oe ’ia tāvini ia vetahi ’ē ».
’Ua parau te peresideni Nelson : « E hitimahuta ’outou i te maita’i o terā 10 mahana ha’apaera’a ».
’Ua hitimahuta mau vau i te fa’a’ara’arara’a te vārua i tō’u nā mata i ni’a e rave rahi ’ohipa ’o tā’u i ’ore nā i mana’o, ’oia ho’i te mau mana e ha’amou i tō’u ’aravihi nō te tāvini. ’Ua ’ite au ē tē ha’avā nei au i te mau ta’ata nō ni’a i tā rātou rāve’a tūreiara’a tōtiare. ’Ua mana’o vau ē te ’itera’a i tō rātou ti’ara’a ’ua ’ite maita’i ïa ia rātou ’e ’ua fāri’i ’ōhie au i tō’u hi’ora’a ’āma’ua ia rātou. ’Ua ’ite mai au ē tē ’imi nei au ma te mana’o ’ore i te mau hape o vetahi ’ē ’aore rā te mau tumu nō te ’āfa’ifa’i parau. Noa atu tei ni’a rātou i tā’u tāpura nō te ‘mau hoa’ i te tahi taime e hi’o noa vau ia rātou mai te hō’ē ti’ara’a ’ia fa’a’āpīhia ’aore rā hō’ē ha’apararera’a.
’Ua fāri’i au i te hina’aro ’ai taui i te rahira’a i roto i tō’u ’ā’au. ’Ua hina’aro pāpū vau e māramarama e aha mau te aura’a te tāvinira’a. ’Ua hina’aro vau i te tāvinira’a ’ia haere mai iā’u ma te huru mau.
’Ua ha’apau te rāve’a tūreiara’a tōtiare i te rahira’a o tō’u orara’a. I te rahira’a o te taime, te hi’ora’a i te mau rāve’a tūreiara’a tōtiare o te ’ohipa mātāmua ’e te hope’a tā’u i rave. ’Ua fa’ati’a vau i teie paura’a ma te parau iā’u iho ē e tāmata noa vau e fa’aea piri i tō’u ’utuāfare ’e te mau hoa nā te ara ’e ’aita roa vau i hina’aro e ma’iri i tā rātou parau poro’i. ’Ua tāmata ato’a vau i te parau iā’u iho ē ’ua fa’ateitei te memes iā’u ’e ’ua ha’api’i rahi mai au nā roto mai i te a’ora’a fa’aitoito i ni’a te rēni. ’Ua fa’ati’a vau i te pehe ’o tā’u e fa’aro’o nei noa atu e ’ere te mau parau poro’i i te mea maita’i noa. ’Ua fa’ati’a te ’āmuira’a atu i te ha’apaera’a i te vārua ’ia fa’aō mai i roto i tā’u mau fa’ati’ara’a ’e ’ua fa’a’ite mai iā’u i te parau mau.
« E aha te mea tā ’outou e ’ite ra i muri mai i te ha’apaera’a i te mau hi’ora’a o te ao nei tei ha’apēpē noa na i tō ’outou vārua ? »
’Ua ’ite mai au ē ’ua riro vau ’ei tītī nō te rāve’a tūreiara’a tōtiare ’e ’aita vau i tītauhia ’ia riro. ’Ua riro te taime ’ei tao’a hōro’a ’o tā te ha’apaera’a i hōro’a nā’u. E taime tō’u i teienei nō te tai’o i te mau pāpa’ira’a mo’a. E taime tō’u nō te pure. E taime tō’u nō te fa’aineine i tā’u ha’api’ira’a. E taime tō’u nō te pārahi e tō’u ’utuāfare nō te mau tau’a parau mata ’e mata E taime rahi tō’u nō te tāvini.
’Ua tae mai e rave rahi mau ha’amaita’ira’a ’e te mau ’ite pae vārua i roto noa nā 10 mahana i muri iho i te a’o a te peropheta.
Lealofa Foulds—Orara’a i teie taime
’Ua ti’aturi noa vau i te fa’anahora’a nō te ha’apaera’a mā’a ’A pa’ari ai au, ’ua ha’api’ihia vau ē te ha’apa’era’a mā’a mai te hō’ē ïa pure tera rā ’e te hō’ē atu fa’atusiara’a. Te ravera’a ma te fa’aro’o, e ha’apae tātou i te ’amu i te mā’a ’e te inu i te pape, ’o tei riro ’ei fa’atusiara’a na’ina’i nō te fāri’i i te mau pāhonora’a i tā tātou mau uira’a ’aore rā i te tauturu ’o tā tātou e nehenehe e hina’aro.
’Ua riro te ’arora’a i te hina’aro e fa’ahaere i te hō’ē tuha’a iti parau ’āpī ’aore rā te hi’ora’a i te mau parau poro’i ’āpī ’ei mea ’ōhie i te hope’a. I te hope’a o te ha’apaera’a, ’aita vau i ’ite noa ’ua taui tā’u mau ’ohipa mātāmua, ’ua rahi roa ato’a rā tō’u taime nō te fa’aea i pīha’i iho i te feiā tā’u i here mau.
I roto i nā 10 mahana, ’ua ’ite au iā’u i te ’āmuira’a atu i te mau fa’a’oa’oara’a maita’i ’e tā’u tamari’i, i te vaiiho-noa-ra’a iāna ’ia fa’aea i ni’a i te paruai. Noa atu e mea tītauhia ’ia fa’aea noa i ni’a i te paruai, ’ua tā’ōti’ahia i teienei ’e ’ua tōhorahia nō te fa’a’iti mai i te mau ravera’a ’ino.
Mea au nā’u ’ia ti’a i te reira taime. E mea faufa’a a’e tō mātou taime i teienei, nō te mea ’aita te reira e fāitohia i te pae hi’ora’a ’e te aura’a. ’Aita vau e hina’aro e ma’iri i teie mau taime fa’ahiahia ’e tō’u hoa fa’a’ipoipo ’e tā’u tamāhine nō te mea ’ua ’ohipa roa vau i te tamatara’a i te ha’aparare i te reira i ni’a i te rēni.
I teienei, nō te feiā tā’u i here tei ia rātou tō’u taime : tō’u Fa’aora ’e tō’u ’utuāfare.