Fakafiefiaʻi hono Fakafoki Mai e Ongoongoleleí
Ngaahi fakakaukau ki he ʻekitivitī faingofua maʻa e fāmilí mo ha ngaahi kulupu kehe
Laʻi tā ʻo e fānau ʻoku nau tā valivali mo e kakai ʻi he pātí mei he Getty Images
Taʻu ʻe uangeau kuohilí, naʻe ʻalu ha kiʻi tamasiʻi taʻu 14 ki he vaotaá mo ha ngaahi fehuʻi. Ne fakaava ʻe he ngaahi tali naʻá ne maʻú ʻa e matapā ki hono Fakafoki Mai e Siasi ʻo e ʻEikí. ‘I hono fakamanatuá, ʻe lava ʻo fulihi e ngaahi fakakaukau ko ʻení ke feʻunga ki hono fakaʻaongaʻi ʻe he ngaahi fāmilí, ngaahi kulupu ʻa e toʻu tupú, uōtí, pe koló.
Polokalama Hiva mo e Fakamatala
ʻIloʻi e ngaahi hiva mo e potufolofola te ke lava ʻo fokotuʻutuʻu ke fakahoko e talanoa hono Fakafoki Mai ʻo e ongoongoleleí. ʻE lava ʻo toʻo ʻeni mei he Siosefa Sāmita—Hisitōliá, ʻū potufolofola kehe, mo ha ngaahi himi fekauʻaki mo hono Fakafoki mai ʻo e ongoongoleleí mei he tohi himí mo e Tohi Hiva ʻa e Fānaú. Fakaafeʻi e kakaí ke nau tokoni ke lau e ngaahi kongá mo fai e hivá. Kapau ʻe lava, fakakaukau ke ʻai ha kiʻi tamasiʻi taʻu 14 ke ne lau e ngaahi lea ʻa Siosefa Sāmitá.
Fakaʻaliʻali ʻAati
Fakaafeʻi ha kakai ke nau tā ha ʻaati fekauʻaki mo hono Fakafoki mai ʻo e ongoongoleleí. ʻE lava ke kau heni e ngaahi tā valivalí, ngaahi tā fakatātaá, tā tongitongí, ʻū taá, mo e alā meʻa pehē. Kole ange ke nau fili ha meʻa ne hoko pe kaveinga mei hono Fakafoki mai ʻo e ongoongoleleí ki heʻenau ʻaātí. Fakataimi-tēpileʻi ha taimi mo ha feituʻu ke fakaʻaliʻali fakataha kotoa ai pea fakaafeʻi ha niʻihi kehe ke nau omi ʻo mamataʻi.
‘Ekitivitī Vaoʻakau Tapú
Kumi ha feituʻu nonga mavahe mei he ngaahi fakahohaʻá, ʻo hangē ko ia ne fai ʻe Siosefá. Fakakaukau ki ha feituʻu ʻi tuʻa ʻo kapau ʻoku ʻi ai ha feituʻu ofi mai ki ho ʻapí. Lau e fakamatala ʻa Siosefa Sāmita ki heʻene ʻalu ki he Vaoʻakau Tapú ke lotú. Fakaafeʻi mai ha niʻihi ke vahevahe e founga ne nau maʻu ai ha fakamoʻoni ki hono Fakafoki Mai ʻo e Ongoongoleleí pe ngaahi aʻusia ʻi hono tali ʻe he Tamai Hēvaní ʻenau lotú.
Faeasaiti Makehe
Kole ki ha taha ke ne teuteuʻi ha fakamatala kau ki ko hono to e Fakafoki… Fakafoki mai ʻo e ongoongoleleí. ʻE lava ke ʻomi ha taki ʻo e Siasí, faiako talēnitiʻia, pe ha taha puipuituʻa lelei ʻi he hisitōlia ʻo e Siasí ke hoko ko e tokotaha leá. Fakaafeʻi e ngaahi kaungāmeʻá pe kaungāʻapí ke nau ako kau ki hono Fakafoki mai ʻo e ongoongoleleí mo ʻene ʻuhinga kiate kitautolu he ʻaho ní.
Mālohi ʻo e Folofolá
Tānaki fakataha mai e tokotaha kotoa mo ʻenau folofola fakatāutahá. Naʻe ako ʻe Siosefa Sāmita e folofolá, ʻo tui te ne maʻu ha ngaahi tali. Lau fakataha e Sēmisi 1:5. Naʻe pehē ʻe Siosefa ne tō loloto e ngaahi leá ni “ʻaki ʻa e fuʻu mālohi lahi ki [hono] lotó” (Siosefa Sāmita—Hisitōlia 1:12). Fakaafeʻi e niʻihi ne nau kaú ke vahevahe ha ngaahi veesi folofola ʻoku ongo mālohi kiate kinautolu pe kuó ne ʻomi ha tali ki heʻenau ngaahi fehuʻí.
Laka Fakaʻaliʻali
Fokotuʻutuʻu ha kiʻi laka fakaʻaliʻali mo ha niʻihi fakafoʻituitui pe kulupu kehekehe ʻo fakafofongaʻi ha ngaahi meʻa kehekehe ne hoko, ngaahi moʻoni ne fakahā, pe ngaahi tāpuaki ʻo hono Fakafoki mai ʻo e ongoongoleleí. Kapau ʻe faingamālie, fakaafeʻi e tokotaha pe kulupu takitaha ke vahevahe e mahuʻinga ʻo e meʻa ne hokó, moʻoní, pe tāpuaki ne nau fakafofongaʻí. Mahalo te ke lava ʻo fokotuʻu ha laka fakaʻaliʻali maʻá e fānaú pē.
Taimi Sio Faiva
Aleaʻi ʻa e meʻa te ke lava ʻo ako fekauʻaki mo e lotú mei he sīpinga ʻa Siosefá. Vahevahe ʻa e ongo ʻokú ke maʻu ʻi hoʻo fetuʻutaki mo e Tamai Hēvaní.
Tā ʻo e kiʻi tamasiʻi ʻoku lau folofolá faitaaʻi ʻe Stacey Johnson
Tā ʻo e tamaí mo e fohá ʻi he tablet faitaaʻi ʻe Korene Knight