Ko e hā ʻoku ʻi he Puhá?
Naʻe futefute ʻa ʻEiva ʻi hono nofoʻangá. Naʻá ne fanongo ki he lea ʻene faiako Palaimelí. Ka naʻe ʻikai lava ʻa ʻEva ʻo tokanga. Ko e meʻa pē naʻá ne fakakaukau ki aí ko e puha ʻi he lalo sea ʻo Sisitā ʻOpaí.
Naʻe kofu ʻaki ia e pepa ngingila lanu pulū. Naʻe ʻi ai ha līpine lanu koula ʻi ʻolunga. Ko e hā nai ʻeni? Naʻe punou lahi hifo ʻa ʻEva ki lalo. Naʻá ne sio fakamamaʻu ki he puhá. Naʻá ne fakaʻamu ke ne lava ʻo sio ki loto ʻi he pepa ngingilá. Naʻe ʻikai ke ne lava ʻo faʻa tatali ke ʻilo pe ko e hā ʻoku ʻi lotó.
Ne faifai pea toʻo hake ʻe Sisitā ʻOpai e puhá. Naʻá ne hili ia ʻi hono fungá.
Naʻe pehē ʻe Sisitā ʻOpai, “ʻOku ʻi loto ʻi he puhá ni ʻa e taha ʻo e ngaahi fakatupu maʻongoʻonga taha ʻa e Tamai Hēvaní.” “Sio ki loto. Pea paasi holo ia kae ʻoua ʻe lea ki ha meʻa.” Naʻá ne ʻave e puhá kia Noa.
Naʻe fakaava māmālie hake ʻe Noa e puhá. Naʻá ne sio ki loto ki he puhá. Naʻá ne malimali. Naʻá ne ʻave leva e puhá kia Sune.
Naʻe sio pē ʻa ʻEva ʻi he vakai ʻa e taha kotoa. Naʻe fakaava kotoa ʻe hono kaungāmeʻá ʻa e puhá. Naʻa nau sio ki loto. Naʻa nau malimali.
Ko e hā leva ʻe fuʻu mahuʻinga ki he Tamai Hēvaní? Pea ʻe founga fēfē ha hao ha meʻa mahuʻinga pehē ʻi ha kiʻi puha siʻisiʻi fau pehé?
Ne faifai pea hokosia e taimi ʻo ʻEvá. Naʻá ne toʻo hake e tāpuni ngingilá peá ne sio ki loto. Ko ha sioʻata! Naʻe sio ʻa ʻEva ki he sioʻata ʻi he puhá. Naʻá ne vakai ki hono fofongá.
Naʻe malama e fofonga ʻo ʻEvá. Ko e taha nai ia e ngaahi fakatupu maʻongoʻonga taha ʻa e Tamai Hēvaní? Naʻe ʻofa lahi pehē nai ʻa e Tamai Hēvaní ʻiate ia?
Naʻe malimali ʻa ʻEva. Naʻá ne ongoʻi loto-māfana mo fiefia. Ne hangē ia ha fuʻu fāʻofua. Ko ha fāʻofua lahi mei he Tamai Hēvaní. Naʻá Ne ʻofa moʻoni ʻiate ia! Naʻá ne hoko ko e taha ʻo ʻEne ngaahi fakatupu maʻongoʻonga tahá. ●
Tā fakatātaaʻi ʻe Patricia Geis