Mālō e Lelei mei Palāsila!

Ko Mako mo Paolo kimaua. ʻOkú ma fononga takai holo he māmaní ke ako fekauʻaki mo e fānau ʻa e ʻOtuá. Kau mai ʻi heʻema ʻaʻahi ki Palāsilá!

Ko Palāsila ʻa e fonua lahi taha ʻi Saute ʻAmeliká. ʻOku laka hake ʻi he kau mēmipa ʻo e Siasí ʻe toko taha miliona ʻoku nofo ai.

ʻE vavé ni pē ha ʻi ai ha temipale ʻe 11 ʻi Palāsila! Te ke lava ʻo lau ʻi he peesi K10 kau ki he fuofua ʻaʻahi ha kiʻi tamasiʻi Palāsila ki he temipalé.

Ko e lea fakafonua tefito ʻi Palāsilá ko e lea faka-Potukalí. ‘Oku puke ʻe he kiʻi taʻahine ko ʻení e Tohi ʻa Molomoná.

Ko e Vaitafe ʻAmasoní ʻa e vaitafe lōloa taha ʻi he māmaní. Pea ko e vaotā ʻAmasoní ʻoku lahi taha ʻi he māmaní! ʻOku hoko ia ko e ʻapi ki ha fanga monumanu fakaofo.

Ko e sipoti manakoa taha ʻi Palāsilá ko e soká.

‘Oku tuʻu ha fuʻu maka tā tongitongi lahi ʻo Sīsū Kalaisi ʻi ha tumuʻaki moʻunga ofi ki he kolo ko Lio ti Seneiló.

Feʻiloaki mo ha ngaahi kaungāmeʻa mei Palāsila!

‘Oku ou saiʻia he ʻalu ki he lotú mo hoku kiʻi tuofefiné mo hoku fāmilí. ‘Oku ou ongoʻi e ʻofa ʻa e Fakamoʻuí ʻi heʻeku kau mo hoku fāmilí ʻi he houalotu sākalamēnití. ʻOku ou ongoʻi foki ia ʻi heʻeku ʻi he Palaimelí. ʻOku ou ʻilo ʻoku moʻui ʻa Sīsū pea ʻokú Ne ʻofa ʻiate kitautolu.

ʻIako V., taʻu 4, mo hono tehiná, Laise, taʻu 2, Minesi Kelasi, Palāsila

Kimuʻa peá u papitaisó, naʻá ku ilifia naʻá ku melemo he naʻe ʻikai ke u lava ʻo kakau. Naʻe talamai ʻe heʻeku tamaí te u lava ʻo falala kia Sīsū ke ma feʻao. Hili iá ne u ongoʻi loto-toʻa peá u ʻilo naʻe ʻikai ke u tuenoa. Ne kau e ʻaho ne papitaiso ai aú ʻi he taha ʻo e ngaahi ʻaho lelei taha ʻo ʻeku moʻuí.

ʻAna Luʻisa M., taʻu 9, Palaná, Palāsila

Fakamālō atu ʻi hoʻo fie mamataʻi ʻa Palāsila mo kimauá. Tau toki sio!

Ngaahi tā fakatātā ʻa Katie McDee