Ngaahi Vaka ʻi he Folofolá

ʻOku lahi e ngaahi folofola ʻoku talanoa kau ki ha ngaahi vaka! Ko e hā ʻokú ke ako mei he ngaahi talanoa ko ʻení?

Ko hai Au?

Fakatauhoa e tokotaha takitaha ʻi laló mo honau talanoá.

Naʻe fakatokanga mai ʻa e ʻOtuá kiate au te Ne lōmakiʻi ʻa e māmaní. Naʻá Ne folofola mai ke foʻu ha fuʻu vaka lahi ne ui ko ha ʻaʻake ke lava hoku fāmilí mo e fanga monumanú ʻo hao moʻui.
Naʻá mau ʻi ha vaka mo Sīsū ʻi he taimi ne tō mai ai ha matangi. Naʻe lolomi ʻe Sīsū ʻa e matangí mo e ngaahi peaú.
Naʻá ku foʻu mo hoku tokouá ha ʻū vaka ke fononga ai ki ha fonua ʻo e talaʻofá. Naʻá ku kole ki he ʻOtuá ke fakaulo ha ngaahi maka ke fakamaama homau vaká.
Naʻe ʻikai lava homau vaká ʻo tau he naʻe ʻaisi ʻa e taulangá! Naʻá ku taki ʻemau kulupú ʻi he lotu ʻo kole tokoni ki he ʻOtuá. Naʻe mafahifahi ʻa e ʻaisí ʻo lahi feʻunga pē ke lava homau vaká ʻo hū atu ai.

Noa
Kau akonga ‘a Sīsuú
Ko e tokoua ʻo Sēletí
Lusi Meki Sāmita

Ko Hono Foʻu ‘e Nīfai ha Vaka

Fakaʻaongaʻi e fakamatala ko ʻení ke fakafaivaʻi ha ngaahi konga ʻo e 1 Nīfai 17.

Tokotaha fakamatala: Hili e fononga e fāmili ʻo Nīfaí ʻi he feituʻu maomaonganoá, ne nau aʻu ki ha tahi. Naʻe fakahā ʻe he ʻEikí kia Nīfai ke ngaohi ha ngaahi meʻangāue pea foʻu ha vaka.

[ʻOku foʻu ʻe Nīfai. ʻOku lue mai ʻa Leimana mo Lēmiuela ki ai.]

Nīfai: Ongo taʻokete, mo haʻu ʻo tokoni mai ke foʻu hotau vaká!

Leimana: ʻIkai! ʻOku ʻikai ke ke ʻiloʻi e founga hono foʻu ha meʻa pehē.

Lēmiuela: ʻOkú ke vale, ʻo hangē pē ko ʻetau tamaí.

Nīfai: ʻE tataki kitautolu ʻe he ʻEikí ki ha fonua ʻo e talaʻofa, ʻo hangē pē ko ʻEne tataki e kakai ʻo Mōsesé. ‘Oku ou loto mamahi ʻi he ʻikai ke mo tui ki he ngaahi talaʻofa ʻa e ʻOtuá.

Leimana: [tafoki fakaʻita kia Lēmiuela] Ta lī ia ki loto tahi!

[ʻOku feinga ʻa Leimana mo Lēmiuela ke na puke ʻa Nīfai, ka ʻoku holomui ʻa Nīfai.]

Nīfai: Te u lava ʻo fai ha meʻa pē kuo fekauʻi au ʻe he ʻOtuá ke fai.

[ʻOku mafao atu ʻe Nīfai hono nimá kia Leimana mo Lēmiuela. ʻOku kamata ke na tetetete peá na tō hifo ʻo tūʻulutui.]

Leimana: Naʻá ku ongoʻi e mālohi ʻo e ʻEikí!

Lēmiuela: Ne u ongoʻi foki ia! Naʻá ne luluʻi au!

[ʻOku tokoniʻi kinaua ʻe Nīfai ke na tuʻu ki ʻolunga.]

Nīfai: ʻOku ou fakaʻamu te mo tui ki he ʻOtuá. Tau fakaʻosi fakataha leva e vaka ko ʻení.

Tokotaha fakamatala: Naʻe fakakakato ʻe Nīfai mo hono fāmilí e vaká pea nau folau ki he fonua ʻo e talaʻofá.

Foʻu Haʻo Vaka Pē ʻAʻau

Ko ha ngaahi fakakaukau ʻeni ki hono foʻu ha ʻū vaka kehekehe. Ko e hā ha ngaahi fakakaukau ʻe lava ke ke maʻu?

Fakaʻaongaʻi e kili ʻo ha konga ʻāvoka ko e sino ʻo e vaká.
Fakapipiki pe tepiʻi fakataha ha ongo vaʻakau ke hoko ko ha vaka lafalafa ʻoku lava ʻo tētē.
Tā pelu ha kiʻi vaka pepa.
Fakaʻaongaʻi e vaʻakaú mo e pepá ke teuteuʻi ha laʻi vavae ʻe tēteé.

Tā fakatātaaʻi ʻe Jared Beckstrand