Kakai Lalahi Kei Talavoú
Fakakaukau ki he Ngaahi Taimi Fakapoʻuli mo Fakataʻelata Ko Iá
Laʻitā mei he Getty Images
Kuo tau aʻusia kotoa ha ngaahi ʻaho fakapoʻuli mo fakataʻelata ʻa ia ʻoku tau ongoʻi ai ʻoku ʻikai pē tonu ha meʻa ia. Lolotonga e ngaahi taimi ko iá te tau ala fehuʻi loto, “Ko e hā ʻoku hoko mai ai ia kiate aú? Ko e hā ʻoku hoko ai he taimi ní? Te u kātekina fēfē ʻeni?” Meʻa mālié, kuo ʻikai ke tau tuenoa. Te tau lava ʻo falala ki he tataki ʻofa ʻa ʻetau Tamai Hēvaní.
ʻI heʻeku kei siʻí, naʻá ku faʻa lāunga pea fehuʻia e faingataʻa ne u fehangahangai mo iá—pea toki hoko ha meʻa naʻá ne liliu ʻeku moʻuí ʻo taʻengata: naʻá ku ʻi ha fakatuʻutāmaki, pea ne mole kotoa ai e ʻuluʻulutuhu ʻi hoku nima toʻohemá. Neongo ʻene faingataʻa ke kātekina iá, naʻe akoʻi au ʻe he faingataʻa ko iá ke falala ki he Tamai Hēvaní. Pea neongo e meʻa kotoa, naʻá ku ako ke fakatuʻamelie mo houngaʻia pea ke ʻoua te u foʻi. Naʻe liliu fakaʻaufuli ha meʻa ʻiate au, pea ne u ongoʻi e founga ne fakahoko mai ai ʻe he Tamai Hēvaní ʻEne ʻofá kiate kitautolú mo tataki kitautolu ʻi he ngaahi faingataʻa ʻoku tau fepaki mo ia ʻi he moʻuí. Te ke lava ʻo lau ʻeku talanoá ʻi he tatau fakaʻilekitulōnika ʻo e makasini ko ʻení.
ʻOku fakamanatu mai foki ʻe Sulieta ʻi heʻene fakamatala he peesi 44, te tau lava ʻo fiefia ʻi he lotolotonga ʻo e ngaahi faingataʻá pea hanganaki ki he kahaʻú ʻi he tui. ʻI he ngaahi fakamatala ʻoku maʻu fakaʻilekitulōnika peé, ʻoku fakamanatu mai ʻe Litia ke tau kumi e taumuʻa ʻo ʻetau ngaahi faingataʻá. Ko e ngaahi faingataʻá ʻoku tokoni ke tau hoko ʻo hangē ko ʻetau Tamai Hēvaní. Pea ʻi he peesi 48, ʻoku fakamoʻoni ʻe Pilikitoni neongo ʻe lava ʻe he Fakamoʻuí ʻo fakamoʻui hotau ngaahi laveá, kau ai ʻetau ngaahi pole mo e tuʻunga moʻui lelei fakaʻatamaí, ka ko e taimi ʻe niʻihi ʻoku fiemaʻu—pea ʻoku sai ʻaupito pē—ke kole tokoni ki he niʻihi kehé.
ʻOku ou ʻilo ʻaki hoku lotó kotoa ko e faingataʻa kotoa—ko e ngaahi taimi fakapoʻuli mo fakataʻelata kotoa ʻi heʻetau moʻuí—ʻe lava ʻo iku ia ki ha taumuʻa toputapu pea ʻoku fakaleleiʻi mo liliu kitautolu ʻe he taumuʻa ko iá ke tau lava ʻi ha ʻaho ʻo hoko ʻo haohaoa hangē ko ʻetau Tamai Hēvaní.
ʻOfa atu,
Jennifer