Naʻe ʻi ai ha Palani Kehe ʻa e ʻEikí Maʻamaua
ʻAtá mei he Getty Images
Ne u faʻa mavahe mei ʻapi ʻi he 8:00 a.m. pea foki mai ʻi he tuʻuapoó hili ʻeku ngāue ʻaho kakato pea ʻalu ʻo kalasi poʻuli. Naʻá ku faʻa kē mo hoku husepāniti ko Tanielá ʻi he kiʻi taimi siʻi naʻá ma nofo fakataha aí. Naʻe kovi ʻa e ngaahi tuʻunga ne ʻi aí. Ne ofi ʻaupito ke ma māvae.
ʻI ha efiafi Sāpate ʻe taha hili haʻama kē, naʻe pehē mai ʻe Taniela, “Mahalo ʻoku totonu ke ta toe ofi ange ki he ʻOtuá.” ʻI he ʻaho hono hokó, lolotonga e nofo ʻa Taniela ʻi ʻapi ʻo tokangaʻi homa fohá, ne tukituki mai ha ongo faifekau ʻi homau matapaá.
‘I he taimi ne mau kamata talanoa ai mo e ongo faifekaú, ne ʻikai ke u tui ki he meʻa kotoa naʻá na akoʻí. Ka naʻe hili ha ngaahi fealēleaʻaki, ne kamata ke ma ongoʻi ha meʻa. Naʻe ʻikai ke ma ʻilo pe ko e hā, ka naʻá ma pehē naʻe “fakaofo” ia, ko ha ongo ʻo e nonga mo e faaitaha. Te ma ongoʻi ia hili e mavahe ʻa e ongo faifekaú. Ne ma ʻiloʻi ai naʻá ma fiemaʻu lahi ange e ongo ko iá ʻi homau ʻapí.
ʻI hono ueʻi au mo Taniela ʻe he pōpoaki ʻa e ongo faifekaú fekauʻaki mo e mahuʻinga ʻo e fāmilí, ne fakaʻau ke ma vāofi ange ʻi heʻema nofo-malí. Ne u fakaʻamu ʻe hoko ʻeku ʻalu ki he akó ko ha meʻa ke maʻu ai ha tuʻunga lelei ange ʻi heʻeku ngāué. Ka ne ma fakakaukau ke tokanga taha ki homa fāmilí, feohi lahi ange, pea maʻu ha fānau tokolahi ange. Naʻá ku nofo mei he akó mo ʻeku ngāué, pea hoko ko e sekelitali ʻa Taniela ʻi heʻene pisinisi tāmate ʻinisēkité.
Hili ha meimei māhina ʻe tolu mei heʻemau fuofua talanoa mo e ongo faifekaú, naʻe papitaiso pea hilifakinima kimaua. Naʻe liliu lahi ʻema moʻuí. Ne kamata ke ma moʻui ʻaki e fono ʻo e vahehongofulú. Ne kamata ke ma lotu ʻi ʻapi pea ʻi he ngāueʻangá fakataha mo e kau ngāue ʻa Tanielá. Ne kamata ke ma ngāue ʻi he Siasí. Naʻe tupulaki e pisinisi ʻa Tanielá pea naʻe fiemaʻu ke ne fakangāueʻi ha kau ngāue tokolahi ange.
Hili ha taʻu ʻe taha ʻema papitaisó, naʻá ma ʻalu ki he temipalé ke silaʻi kimaua. Hili ha ngaahi ʻaho siʻi ʻema silá, ne u ʻiloʻi naʻá ku feitama.
‘Oku ʻikai faingofua e ngaahi ʻaho Sāpaté kiate kimautolu. Naʻe ʻalu vave ʻa Taniela ki he ngaahi fakataha alēlea māʻolungá. Naʻe pau ke u teuteuʻi toko taha ʻema fānau ʻe toko tolú ki he lotú. Ka naʻe lahi homau taimi fakataha ʻi he kotoa ʻo e uiké. Ko ia neongo ʻemau mavahevahe he taimi ʻe niʻihi ʻi he ʻaho Sāpaté ʻi heʻemau tauhi ki he ʻEikí, ʻoku ma ʻiloʻi ʻoku tāpuekina kimaua.
Kuó ma maʻu ha fakamoʻoni, ʻi he taimi ʻokú ma fakahoko ai ʻema tafaʻakí, ʻe lava ʻe he ʻEikí ʻo tokoniʻi kimaua, pea maʻu e ngaahi tāpuakí. Kuó ma maʻu ʻo lahi ange ʻi he meʻa ne ma ʻamanaki ki ai ʻi heʻema ngaahi palaní. Naʻe ʻi ai ha ngaahi palani lelei ange ʻa e ʻEikí maʻamaua.