Ko ha Temipale Maʻa ʻItalo
ʻOku nofo ʻa e tokotaha naʻá ne faʻú ʻi ʻIutā, USA.
‘Oku ‘ikai ke ne faʻa tatali ke hū ki loto ʻi ha ʻaho!
“Fie siofia ha temipale. Te u ʻi ai ha ʻaho” (Tohi Hiva ʻa e Fānaú, 99).
Naʻe ámanaki fiefia atu ʻa ʻItalo ki he ʻaʻahi ʻa e uōtí ki he temipalé. Te nau ō ki he Temipale Recife Brazil. Naʻe houa ʻe 15 hono mamaʻó!
Naʻe mavahe pongipongia ʻa ʻItalo, mo hono taʻokete ko Henelií mo ʻena mātuʻá. ʻI heʻenau fonongá, naʻe fakakaukau ʻa ʻItalo ki ha meʻa naʻe talaange ʻe he Fineʻeikí kiate ia. Naʻá ne pehē, “Ko e taʻú ni te ke lava ʻo sio ki he fakaʻofoʻofa e temipalé ʻi tuʻá. Ko e taʻu foʻoú, te ke lahi feʻunga leva ke sio ki hono fakaʻofoʻofa ʻi lotó.”
Naʻe teʻeki ke ʻalu ʻa ʻItalo ki ha temipale kimuʻa. Ka naʻá ne mamata ʻi hono langa e temipale foʻou ʻi Fotalesá, ʻa ia ne nofo ai hono fāmilí. Naʻe fakaofo ia!
Naʻa nau afe ʻo maʻu meʻatokoni hoʻatā. Naʻe kai ʻe ʻItalo ʻene meʻatokoni manakó, ko e feijoada, ko e supo piini naʻe kai ʻaki e laisé mo e moli. Lolotonga ʻene kaí, naʻá ne fakakaukau pē ki he temipalé. ʻI he taimi ne faifai pea fakatapui ai e temipale ʻi Fotalesá, ʻe hoko ia ko ha temipale ʻe lava ʻo ʻaʻahi maʻu pē ki ai hono fāmilí. He ʻikai fie maʻu ke nau fakaʻuli mamaʻo.
Naʻe taaitō ʻa e laʻaá ʻi he taimi ne aʻu ai ʻa ʻItalo mo hono fāmilí ki he temipale ʻi Lesifé. “Que bonito!” Ko e lea ia ʻa ʻItaló. “Fakaʻofoʻofa moʻoni!” Naʻe ʻikai lava taʻofi ʻene malimalí.
‘I he pongipongi hono hokó, naʻe ʻave ʻe he Fineʻeikí ʻa ʻItalo ki he feituʻu tataliʻanga ʻa e fānaú. Naʻá ne pehē, “Neongo he ʻikai te ke lava ʻo hū ki he temipalé he taimí ni, kae sio pe te ke lava ʻo ongoʻi ha laumālie makehe lolotonga hoʻo ʻi he kelekele ʻo e tempalé.” Naʻe hū leva e toenga ʻo e fāmili ʻo ʻItaló ki he temipalé.
Naʻe tokangaʻi ʻe he kau ngāue temipale angaleleí ʻa ʻItalo mo e fānau kehé ʻi heʻenau talitali he temipalé. Ne nau lau ha ngaahi talanoa mei he Livro de Mórmon (Tohi ʻa Molomoná). Naʻe fakakaukau ʻa ʻItalo, “Ko e lau folofolá ko ha founga lelei ia ke teuteu ai ki he temipalé.” Naʻá ne ongoʻi nonga mo malu. Naʻá ne fakakaukau naʻe moʻoni ʻa e Fineʻeikí. ‘Oku nonga ʻeni.
Naʻe ʻave leva ʻe he kau ngāue temipalé ʻa ʻItalo mo e fānau kehé ke nau ʻeveʻeva takai ʻi he kelekele ʻo e temipalé. Ko e taimi ia ne fakatokangaʻi ai ʻe ʻItalo e ngaahi lea ʻi ʻolunga he hūʻanga ki he temipalé. “Santidade ao Senhor. A casa do Senhor,” ko e lea ia ne hā aí. “Māʻoniʻoni ki he ʻEikí: ko e Fale ʻo e ʻEikí.”
Naʻá ne fakakaukau, tā neʻineʻi ke u ongoʻi nonga moʻoni heni. Ko e fale ʻeni ʻo e ʻOtuá.
‘I he taimi ne ʻosi ai e ʻaʻahi ki he temipalé, naʻe foki ʻa ʻItalo mo hono fāmilí ki ʻapi. Naʻá ne loto ke manatuʻi e ongo naʻá ne ongoʻi ʻi he temipalé. Ko e hā nai te ne lava ʻo faí?
Ko e taimi ʻe niʻihi naʻe ongoʻi ʻe ʻItalo naʻá ne lava ʻo tā fakatātaaʻi lelei ange ʻene ngaahi ongó ʻi haʻane tohi fekauʻaki mo ia. Ko ia naʻá ne tā ai ha tā ʻo e temipalé? Naʻá ne fakaʻaliʻali leva ia kia Mami mo Teti.
Naʻá ne pehē, “ʻE fakamanatu mai ʻe he meʻá ni ʻa e feituʻu ʻoku ou fie ʻalu ki aí.” Naʻá ne tuku ʻa e taá ʻi hono lokí ke ne lava ʻo sio ki ai he ʻaho kotoa pē.
Naʻá ne pehē, “ʻOku ou fie mateuteu!” “He ʻoku ou fie hū ki loto ʻi ha ʻaho!” ●
Ngaahi tā fakatātā ʻa Mitch Miller