Lele, Siosi!
ʻOku nofo ʻa e tokotaha naʻá ne faʻú ʻi Kololato, USA.
“Tau feleleʻi ʻi he fakakukafi ʻa e fakapuepue kuo tofi ʻi hotau ʻaó” (Hepelū 12:1).
Naʻe mamao ʻa Siosi ʻi heʻene māmālie hifo mei heʻene tōtoó. Ko e ʻahó ni naʻe fai ai e lova lahí! Naʻe lau māhina ʻene nofo ʻamanaki ki he ʻaho ko ʻení. Ka naʻe ongoʻi helaʻia ʻa Siosi kae ʻikai fiefia lolotonga ʻene fakamalohisino teuteú.
Naʻe fehuʻi ange hono taʻokete ko Kilisitiná, “ʻOku fēfē?” Naʻá ne tangutu hifo mo Siosi ʻi he musié ke faofao hona vaʻé.
Naʻe peheange ʻe Siosi ʻi heʻene ala ki hono louhiʻi vaʻé, “ʻOku ou fuʻu ongosia he ʻahó ni.”
Naʻá ne puke pea naʻe pau ke ne liʻaki ako ʻi ha ngaahi ʻaho. Ko ia naʻá ne ʻā fuoloa ʻanepō ʻo fakakakato ʻene ngāue fakaakó.
Naʻe pehē ʻe Siosi, “ʻOfa pē he ʻikai ke u tukuhifo ʻetau timí.”
Naʻe talaange ʻe Kilisitina, “Fai pē ʻa e lelei taha te ke lavá. “Hangē ʻoku ʻai ke kamata!”
Naʻe tōtō atu e ongo tamaiki fefiné ke kau fakataha mo ʻena timí. ʻI heʻenau tuʻu laine mo e kau lova kehé, naʻe kuikui ʻa Siosi peá ne fakamanava loloa. Naʻá ne ʻilo naʻe fakafalala ange ʻene timí kiate ia ke ne lele vave, ʻo hangē ko ia naʻá ne faʻa faí. ʻE fakapapauʻi ʻe he taimi lova mei he toko nima tuʻukimuʻa ʻi heʻenau timí pe ʻe kau ʻenau timí ki he lova lahí. Ne teʻeki maau ʻene tuʻu ki hono tuʻungá mo e pā ʻa e faná ke kamata e lová.. Pā! Naʻe mahiki atu ʻa e kau lová mei he laine kamatá pea nau lele ki muʻa.
Naʻe mafao atu ʻe Siosi hono ongo nimá pea fakalalahi ʻene mangá. Naʻá ne ʻilo naʻe fie maʻu ke ne muʻomuʻa ʻi he kamatá kapau ʻokú ne fie ʻuluaki. ʻI he kamatá, ne lava ʻa Siosi ʻo tulituli hake ki he kau lova kehe naʻe takí. Ka ʻi heʻene feinga ke lele vave angé, naʻe ʻikai ke ne lava.
Naʻe fakamanava loloa lahi ange ʻa Siosi. Naʻe ʻikai pē ke ne lava ʻo hiki hono vaʻé ke vave ange. Naʻe kamata ke fakalaka hake ʻiate ia ʻa e kau lova ne ʻi hono tuʻá. Ko e angamahení ko Siosi naʻe faʻa fakalaká! Mahalo ʻoku totonu ke u holomui au, ko ʻene fakakaukau iá.
Naʻe sio ʻa Siosi ki he kelekelé ʻi heʻene fanongo hake ki he fakalaka hake ha tokotaha lova ʻe taha. Naʻe pehē ange ʻa e tokotaha lová ʻi heʻene lele haké, “Lele, Siosi!” Naʻe sio hake ʻa Siosi. Peá ne malimali. Ko e taha ia ʻi heʻene timí.
“Te ke lava pē koe!” ko e lea ange ia ha tokotaha kehe ʻi heʻene timí ʻi heʻene fakalaka haké. Ne fakalaka tahataha hake e timi ʻa Siosí, ʻi heʻenau fakalotolahiʻi ia ke hoko atu ʻene lelé.
Naʻe ongoʻi ʻe Siosi ha loto-lahi. Mahalo he ʻikai ke ne kau ʻi he toko nima tuʻukimuʻá ka te ne kei lava pē ʻo fakaʻosi e lová. Naʻá ne tokanga ki heʻene mangá pea ʻikai ke ne tuʻu kae ʻoua leva kuó ne kolosi ʻi he tepí.
“Kātaki kapau ne ʻikai ke u … tokoni ke tau … kau ʻi he lova hokó,” ko ʻene lea ange ia mo e fakatau ʻene mānavá.
“Naʻe kau ʻetau timí!” Ko e lea ange ia e faiako ʻa Siosí ʻi heʻene lele atu ki he tamaiki fefiné. Naʻe pasipasi e tokotaha kotoa ʻi he timí, pea naʻe fāʻofua ʻa Kilisitina ʻia Siosi.
ʻI he tūʻulutui ʻa Siosi he pō ko iá ke lotú, naʻá ne fakakaukau ki he founga ne tokoniʻi ai ia ʻe heʻene timí. Naʻe fakaivia ia ʻe heʻenau ngaahi leá ke ne kei lele pē ʻi he taimi naʻá ne fie holomui aí.
Naʻe sio hake ʻa Siosi ki he fakatātā ʻo Sīsū ne tautau ʻi ʻolunga hono mohengá. Naʻá ne fakakaukau, ʻoku fakahoko ʻe Sīsū ʻa e meʻa tatau maʻatautolu. Naʻá ne malimali ʻi heʻene fakakaukauloto ki hono fakalotolahiʻi ia ʻe he Fakamoʻuí. “Lele, Siosi! ʻOku ou ʻi heni ke tokoniʻi koe.”
Naʻe fakamālō ʻa Siosi ki he Tamai Hēvaní ʻi Heʻene tokoni ʻi he lele he lova ʻo e moʻuí. Naʻá ne ongoʻi te ne lava ʻo fakahoko ha meʻa pē ʻi hono fakalotolahiʻi ia ʻe Sīsuú! ●
Tā fakatātaaʻi ʻe Guy Francis