Ngaahi Fehuʻi mo e Talí
ʻE founga fēfē haʻaku fiefia ʻi he lotú ʻi he taimi ʻoku ʻi ai ai haʻaku palopalema mo e kakai ʻi aí?
Ko Koe Pē Te ke Lava ʻo Mapuleʻi Koé
He ʻikai te u lava ʻo mapuleʻi e niʻihi ʻoku mau feohí, naʻa mo e kau mēmipa kehé, ka te u lava ʻo mapuleʻi au mo e anga ʻeku fakafeangai ki he ngaahi tūkungá. Naʻá ku fakatokangaʻi ko e ʻalu ki he lotú ko ha meʻa pē ia ʻiate au mo e ʻOtuá, kae ʻikai ko ha taha kehe. Ne u fakamanatu maʻu pē kiate au naʻe ʻikai feʻunga ki he ʻOtuá pe kiate au ke tuku ʻeku moʻui ʻaki e ongoongoleleí.
ʻElika Y., taʻu 18, Hauaiʻi, USA
Fakaʻapaʻapaʻi e Tokotaha Kotoa
‘Oku tau omi kotoa mei ha puipuituʻa kehekehe mo ha ngaahi founga kehekehe hono ohi hake kitautolú. ʻOku ʻikai ke ke teitei ʻiloʻi e meʻa ʻoku foua ʻe he kakaí.
Lōkani B., taʻu 15, ʻOlikoni, USA
Talanoa ki Hoʻo Kau Takí
‘Oku ʻikai totonu ke ke ʻalu ki he lotú koeʻuhí ko ha taha. ‘Oku totonu ke ke ʻalu koeʻuhí ko hoʻo tui kia Kalaisí. Te u fie fokotuʻu atu foki ke ke talanoa ki hoʻo pīsopé.
ʻAsa D., taʻu 15, Uāsingatoni, USA
ʻOfa ʻo Hangē Ko ia Ne Fai ʻe Sīsuú
Naʻe folofola ʻa Sīsū Kalaisi ʻo pehē, “Mou feʻofaʻaki kiate kimoutolu; … hangē ko ʻeku ʻofa kiate kimoutolú. … ʻI he meʻá ni ‘e ‘ilo ai ‘e he kakai kotoa pē ko ‘eku kau ākonga ‘a kimoutolu” (Sione 13:34–35). Naʻe tokoni ʻeni ke mahino kiate au kuo pau ke u ʻofa ki he niʻihi kehé ʻo tatau ai pē pe ko hai kinautolu, ʻo hangē pē ko hono ʻofaʻi au ʻe he Fakamoʻuí, pea mo e kotoa ʻeku ngaahi tōnounoú mo e fehalākí.
ʻEma F., taʻu 15, Seiko, ʻĀsenitina
Fiefia ʻi Ho Fāmili Fakauótí
Neongo kuó u fefaʻuhi mo e ngaahi ongo loto-mamahi pe tāufehiʻa ki he kāingalotu ʻo e Siasí, ka kuó u toe fakatokangaʻi lahi ange ʻa e tokolahi ʻo e kakai ai ʻoku nau tokanga mai kiate aú. Kuo tokoni ia ke u fiefia ʻi he lotú koeʻuhí ko e fiefia ʻoku ou maʻu ʻi hoku uooti fakafāmilí. ʻE ʻi ai maʻu pē ha kakai ai ʻoku nau ʻofaʻi koe.
Sofia D., taʻu 16, Pilisitolo, ʻIngilani