Te u Talanoa Fēfē ki Heʻeku Fānaú fekauʻaki mo e Moʻui Lelei Fakaʻatamaí?
Ta fakatātā ʻa David Green
Founga ʻe 5 ke Kamata ha Fepōtalanoaʻaki
-
ʻOku hoko e ngaahi ongoʻi taʻefiemālié ko ha konga ʻo e moʻuí. ‘Oku sai pē ke ongoʻi ʻita, mamahi, pe hohaʻa he taimi ʻe niʻihi. ʻOku ʻikai ʻuhinga maʻu pē e ngaahi ongó ni naʻá ke fai ha fehalaaki.
-
ʻOkú ke ʻiloʻi e founga ʻoku tokoni ai e kau toketaá kapau ʻe motu ho vaʻé? ‘Oku ʻi ai foki ha kakai te nau lava ʻo tokoni atu ʻi hoʻo ngaahi fakakaukau mo e ongoʻi loto-mamahí. ‘Oku totonu ke tau kole ha tokoni ʻi he taimi ʻoku tau fie maʻu ai iá.
-
ʻOku hoko e ngaahi fehalākí ko ha konga ʻo ʻetau ako mo e tupulaki ʻi he māmaní. ʻOku ʻikai ha taha ʻe haohaoa! ‘Oku ʻofa ʻa e Tamai Hēvaní ʻiate kitautolu, ʻo aʻu ki he taimi ʻoku tau fehalaaki aí. ʻOkú Ne finangalo ke tau feinga kotoa pē.
-
ʻE lava e ngaahi ʻekitivitī ʻe niʻihi—hangē ko e fakamānava lōloá, talanoa mo ha tahá, vaʻinga sipotí, pe tā fakatātaá—ʻo tokoni ke ke ongoʻi lelei ange ʻi he taimi ʻokú ke loto-mamahi aí. ‘Oku ʻikai totonu ke tau fai e ngaahi meʻa te ne fakamamahiʻi e fanga monumanú, kitautolu, pe ko e kakai kehé.
-
Ko e taimi ʻe niʻihi ʻoku ongoʻi loto-mamahi pe hohaʻa e kakaí pea ʻikai lava ke mole atu ia. ‘Oku ʻi ai e kakai ʻe niʻihi ʻoku ʻi ai ha palopalema kehe ʻi he anga ʻenau fakakaukaú. ‘Oku ʻikai ko honau foʻui ia ʻo nautolu. ‘Oku totonu ke tau angaʻofa pea tokoni ki he tokotaha kotoa pea fai kiate kinautolu ʻo hangē ko ia ne mei fai ʻe Sīsū Kalaisí.
Ngaahi Tokoni ki he Talanoá
-
‘Oku mahuʻinga ke fehuʻi ki hoʻo fānaú fekauʻaki mo ʻenau fakakaukaú mo e ongó, pea fakafanongo moʻoni. ʻE lava ke kau ʻi he ngaahi fehuʻí ʻa e: Ko e hā ʻoku moʻua ki ai ho fakakaukaú kimui ní? Ko e hā ha ngaahi liliu ʻoku hoko ʻi hoʻo moʻuí? Kuó ke fakatokangaʻi kimuí ni mai ha ngaahi ongo foʻou? ‘Oku ʻi ai ha ngaahi fehuʻi kuó ke fie fakahoko ki ha taha?
-
‘Oku mahuʻinga e ngaahi fehuʻi ʻa hoʻo fānaú. Te nau lava ʻo tokoni ke ke ʻiloʻi e meʻa ʻoku mateuteu ho fānaú ke akó. Tali e fehuʻí ʻaki e ngaahi fakamatala tefitó, kae ʻoua ʻe fakahā fakaʻangataha ki ha kiʻi tamasiʻi e meʻa kotoa ʻokú ke ʻilo fekauʻaki mo ha kaveingá. Fakaafeʻi leva ke nau fai ha tali. Kapau ʻoku ʻikai ke toe ʻi ai haʻanau fehuʻi, mahalo naʻe feʻunga pē e ngaahi tefitoʻi fakamatalá ʻi he taimí ni. Kapau ʻoku ʻi ai hanau fehuʻi lahi ange, ʻe malava ke nau mateuteu ki ha toe ngaahi fakaikiiki.
-
Fakaʻehiʻehi mei he fakakikihi mo hoʻo fānaú fekauʻaki mo ha ngaahi ongo ʻoku nau vahevahe, neongo kapau ʻoku ʻikai fenāpasi ia mo hoʻo fakakaukaú.
-
Ko e taimi ʻe niʻihi ʻoku faingofua ange e tohí ʻi he leá. Kapau ʻoku ʻikai ola lelei e ngaahi fepōtalanoaʻakí, ʻahiʻahi fakaafeʻi hoʻo kiʻi tamasiʻí ke ne tohi pe tā fakatātā ki he anga ʻene ongoʻí.
Ngaahi Fakakaukau ki he ʻEkitivitií
-
Ki he fānau īkí, tā ha ngaahi fofonga ke fakafofongaʻi ha ngaahi ongo kehekehe pea tokoni ki hoʻo fānaú ke nau talaatu e hingoa ʻo e ngaahi ongó.
-
Tānaki mo hoʻo fānaú ha ngaahi fakakaukau ki ha lisi ʻo e ngaahi ʻekitivitī ke ʻahiʻahi ʻi heʻenau loto-mamahí.
-
Fakakaukau ki ha taha ʻoku loto-mamahi pe faingataʻaʻia ʻi ha faʻahinga founga. Ko e hā ʻe lava ke fakahoko ʻe hoʻo fāmilí ke fakahā ha ʻofa kiate kinautolu?
-
Lau pea aleaʻi e ngaahi talanoa mei he Liahona ʻa ia ne fehangahangai ai e kāingalotu ʻo e Siasí mo ha ngaahi ʻahiʻahi ʻi heʻenau tui ki he ʻOtuá.
ʻOku Ou Fie Maʻu Tokoni!
Kapau ʻokú ke ongoʻi ʻoku ʻikai ke ke lava ʻo mapuleʻi e ngaahi ongo fakaeloto mo e tōʻonga ʻa hoʻo tamasiʻí, pe ʻoku tuʻu fakatuʻutāmaki ʻenau moʻui lelei fakaʻatamaí, fetuʻutaki ki ha palofesinale moʻui lelei fakaʻatamai. (ʻOku ʻoatu ha fakamatala ʻi lalo mo e fanga kiʻi tokoni ki he founga ko iá.) ʻE lava hoʻo pīsopé ʻo tokoni ke fakafetuʻutaki koe mo e Vaʻa Tokoni ki he Fāmilí pe ko ha ngaahi maʻuʻanga fai-faleʻi ʻi homou feituʻú. ʻOku maʻu foki ʻi he, mentalhealth.ChurchofJesusChrist.org ha lisi ʻo e ngaahi fika telefoni tokoni taʻetotongi mo ha maʻuʻanga tokoni kehe. ‘Oku ʻofaʻi koe, pea ʻoku ʻikai ke ke tuenoa!