ʻOkú Ne Finangalo ke u Fiefia
ʻAtá mei he Getty Images
ʻI he taimi ne leleakiʻi ai au ki he loki fakatuʻutāmakí ʻi he hōloa hoku ongo maʻamaʻá, ne u fakakaukau ko e fakaʻosinga ia ʻeku moʻuí. Naʻe teʻeki ke u mateuteu fakaeloto pe fakalaumālie ki he ngataʻangá, ka naʻe vaivai hoku sinó. Naʻe faingataʻa ki hoku fāmilí ke nau vakai ki he tūkunga ne u ʻi aí, ka naʻa nau poupou mālohi kiate au, pea ne u monūʻia ke toe moʻui.
Naʻe ʻikai ʻosi ai hoku ngaahi faingataʻaʻiá. Talu mei ai, ne pau ke u moʻui pē ʻi ha maʻamaʻa ʻe taha mo ha hui tuʻa ne ʻikai hangatonu. ‘Oku mamahi mo faingataʻa e ʻaho kotoa pē. Ne tuʻo taha ʻeku fakakaukau ne mei lelei ange ʻeku maté ʻi he hokohoko atu e faingataʻaʻiá. Ne u ongoʻi vaivai, ʻo ʻikai fakaesino pē, kae fakaʻatamai mo fakalaumālie foki. Ne siva ʻeku ʻamanakí mo e loto-falalá. Ne kamata ke u fakasītuʻaʻi e kakai ʻi heʻeku moʻuí ne nau fakalotolahiʻi aú. Ka naʻe ʻikai ke teitei foʻi hoku fāmilí ʻiate au. Ne nau ʻofaʻi mo tokangaʻi au, pea naʻe hokohoko atu hono poupouʻi au ʻe hoku fāmilí. Ka neongo ia, ne u ongoʻi he ʻikai lelei hoku kahaʻú ʻo hangē ko ia ne u fakaʻānauá.
Ne u ongoʻi loto mamahi ʻi ha pō ʻe taha. Ne u pehē ne fiemaʻu ke u lau hoku tāpuaki fakapēteliaké. Ne u loʻimataʻia ʻi he momeniti ne u lau ai e ngaahi laine ʻuluakí, “ʻOku tokanga mo ʻofa ʻetau Tamai ʻi Hēvaní kiate koe. ʻOkú Ne finangalo ke ke fiefia ʻi he moʻuí ni.”
‘I he momeniti ko iá, ne u ʻiloʻi ai ne tokonaki moʻoni ʻe he Tamai Hēvaní ha kahaʻu lelei moʻoku mo ha ngaahi tāpuaki fakaofo ke u hanganaki ki ai ʻi heʻeku muimui he hala ʻokú Ne finangalo ke u fou aí.
Naʻe ʻafioʻi ʻe heʻetau Tamai Hēvani te tau faingataʻaʻia kotoa, ko ia naʻá Ne tuku mai ai Hono ʻAlo ko Sīsū Kalaisí, ke mamahi pea fakafiemālieʻi kitautolu. Ko hono lahi fau ia ʻo ʻEna ʻofa kiate kitautolú. Mahalo te u kei faingataʻaʻia pē he ʻaho kotoa ʻo ʻeku moʻui ʻi he māmaní, ka ʻoku ou ʻilo te Na ʻofa maʻu pē ʻiate au pea ʻe fakahoko kotoa ʻEna ngaahi talaʻofá ʻo kapau te u piki maʻu pea muimui kiate Kinaua.