Luk wetem Ol Niu Ae, Harem wetem Ol Niu Sora, Toktok wetem Wan Niu Maot

I Kam long Allistair B. Odgers

Eria Seventi

Elda Marvin J. Ashton blong Kworom blong Olgeta Twelef Aposol i talem: “Samting we i nambawan mo bae i talemaot klia gud se yumi stap progres mo stap kam long Kraes, hem i wei we yumi stap tritim ol nara pipol.”¹

Taem yumi gat pikja blong Kraes i stap long fes blong yumi, mo yumi stap lukluk ol narawan tru long ol ae blong Kraes, bae yumi gat moa paoa blong luk pikja blong Kraes long fes blong ol narawan. Hemia bae i mekem se yumi gat moa filing blong tritim ol narawan i gud moa.

Yumi nid blong laef wetem wanem i bitim wanem we yumi stap luk—mo yumi nid blong stap laef long wan wei we i go bitim wanem yumi stap andastanem mo wanem yumi wantem luk i hapen long laef; taem bae yumi mekem hemia bae yumi save stap luk ol narawan anda long wan niu laet.

Taem yumi stap faenemaot mo tingting long wan niu wei blong stap tritim ol pipol, yumi save askem yumiwan: ?Yumi stap luk Golaeat blong yumi i bigwan tumas blong yumi kilimdaon hem, o winim hem? O ?Yumi stap luk samting olsem we Deved i bin luk samting? ?Yumi luk samting olsem we yumi stap luk tru long ol ae God—se Golaeat i bin bigwan tumas, mekem se bae yumi no save mestem hem?

Wetem invitesen ia blong ‘wok strong’ blong kam antap long fasin we yumi stap tritim ol narawan, mi hop se yumi no kam wari tumas blong ol samting we yumi mas kam antap insaed long laef blong yumiwan bakegen. Plis, tingbaot se moa yumi kam antap, bae yumi luk plante moa gud samting long fasin blong ol narawan.

1. Olsem wanem nao yumi toktok, mo olsem wanem nao yumi tritim wanwan long yumi, i sem fasin ia nao we yumi toktok mo tritim Kraes. I no gat samting i defren.

Yumi evriwan i toktok mo mekem samting i defren, be yumi mas lukaotem ol defren wei blong ‘luk’ ol narawan, mo yumi mas lukaotem ol moa gud wei blong toktok wetem olgeta.

Yufala i no mas kros. Sapos yumi raet, bae yumi no nid blong kros; mo sapos yumi rong, yumi no mas kros.

Elda Lynn G. Robbins blong Olgeta Seventi i talem: “Kros, hem i wan joes. Hem i abaot fridom blong mekem joes. I semmak olsem eni nara desisen we yumi jusum blong mekem. Yumi nid blong tingting hevi abaot desisen ia blong jusum blong no kros long man. Smol brata blong fasin blong stap kros, hem i blong no stap glad nating abaot wan samting; haf brata blong fasin blong stap kros, hem i blong save faet hariap, o fasin blong stap kwaet wetem kros, mo bigfala brata blong fasin blong stap kros, hem i fasin blong stap kros mo no save kontrolem kros.”²

Yes. Yumi evriwan i gat ol rong, ?be hao nao yumi stap tritim ol narawan? I moa gud yumi kavremap ol rong blong neba blong yumi wetem wan blangket blong jareti, from se maet bae yumi nidim bigfala tenet blong kavremap ol rong blong yumi.

Matiu 25:40 i talem: Taem we yufala i mekem olsem long wan brata blong mi we i daon moa long ol narafala brata blong mi, we i daon moa long ol narafala brata blong mi, be i olsem we yufala i mekem long mi nomo.

Mekem se, sapos yumi kros, o yumi stap leftemap voes blong yumi, o gat ol rabis tiun long fasin blong toktok, o sapos yumi no gat kaen fasin, yumi no stap mekem kaen fasin ia long wanwan long yumi nomo, be tu, yumi stap mekem kaen fasin ia long Lod Jisas Kraes. Yumi save talem se lav blong yumi long Kraes bae i hae semmak long lav we yumi gat long man o woman ia we yumi no laekem nating.

2. ?Olsem wanem nao, Saemon, Man Farisi ia, i bin tritim Jisas Kraes i defren long woman ia we oli stap tokbaot long parabol insaed long Luk, japta seven?

Elda Jemes E. Talmage i tijim: “Hem i bin kastom blong taem bifo blong mas tritim wan ges we i hae tumas wetem wan saen we i soem se oli luklukgud long hem; olsem blong welkamem hem wetem wan kis blong welkam, blong givim wota blong wasemaot das long leg, mo oel blong putum long hea blong hed mo hea blong mustas.”³

Saemon i bin wan Farisi; wan memba blong grup blong relijin ia we i strong blong stap folem gud loa blong Moses. Man we i gat kaon, insaed long parabol, we i gat kaon blong 50 koen, hem i Saemon ia nao (Luk 7:41–47).

Saemon i no bin givim wota long Jisas blong Hem i wasem leg blong Hem, mo Saemon i no bin givim wan kis long Hem, mo Saemon i no bin putum oel long hed blong Hem. Saemon i lavem Jisas i smol nomo. Be, bae yumi mas tingbaot se Saemon i bin nidim tu blong kasem fogivnes, olsem we yumi evriwan i nidim.

Woman ia, we i bin mekem sin, i woman ia we i gat kaon long 500 koen long parabol ia. Hem i bin wasem leg blong Sevya wetem wota blong ae blong hem, mo i bin waepem drae leg wetem hea blong hed blong hem; hem i stap kiskisim leg blong Sevya mo i putum senta long leg blong Sevya. Hem i bin lavem Sevya tumas.

Taem yumi stap soem se yumi lavem mo gat tingting long Lod Jisas Kraes, bae yumi filim we Hem i fogivim yumi. Taem yumi kasem fogivnes blong Lod, insaed long yumi, bae i gat moa filing blong lavem mo givim seves long Hem. Kraes i bin fogivim woman ia fulwan, mo Hem tu i bin lavem woman ia fulwan. Ol sin blong woman ia, i nomata se oli bin plante, Lod i bin fogivim olgeta (ves 48).

Sapos yumi, olsem wan pipol, yumi stap fogiv i smol nomo, nao yumi lavem man i smol nomo.

3. Sapos yumi no save lan blong fogivim ol narawan, bae God i no save fogivim yumi (Mak 11:24–26).

Fogivnes i wan samting we i had, i gat denja mo i gud tu.

I had from fasin blong yumi, olsem ol man.
I gat denja, from se hem i fosem yumi blong tekem responsabiliti blong progres long fiuja, mo
I gud from se i mekem yumi kam fri blong mekem se yumi kam wan man o woman we i kam gud moa.

Oli bin talem: taem yumi no gat fasin blong fogiv, i olsem we yumi stap stikim yumiwan wetem posen, mo afta, yumi stap wet se nara man o woman nao bae i ded.

So–?Hao nao bae mi mekem taem wan i mekem wan rong samting?

Doktrin mo Ol Kavenan 121:43–44 i givim ol step blong folem blong lukaot long sin blong wan narawan

Lukluk kwik long sin ia mo long wan klia fasin. Hem i impoten blong yu mas tok strong mo semtaem yu mas stret.
Yusum paoa blong Tabu Spirit blong fesem hemia; yu no yusum fasin blong yu blong stap kros.
Soem lav we i moa bigwan.
Gol blong yumi i no blong go long ol man mo tok mo talem nogud man, kilim olgeta o mekem olgeta oli harem nogud. Be, yumi mas stap fetful long God; mo yumi mas stap tru mo stap protektem man o woman ia we i bin mekem mistek.

Fogivnes i no jes blong fogivim wan we i bin mekem sin o i bin spolem yumi, be tu, hem i blong fogivim ol narawan we oli no bin mekem wanem we yumi filim se oli sapos blong mekem.

Ol pipol, ol fren, mo famli bae oli mekem yumi harem nogud, mo wanwan taem, bae oli lego yumi; be hao yumi stap filim abaot olgeta, mo hao yumi stap mekem o tritim olgeta, bae i semmak nomo olsem we yumi stap filim o tritim Jisas Kraes. Hemia tu bae i wan ril tes abaot huia nao ril yu.

Ol brata mo sista. Mi no gat silva o gol, be long nem blong Jisas Kraes, mi stap invaetem yumi evriwan blong yumi girap long wan moa level, mo luk ol pikinini blong God wetem ol niu ae . . . blong yumi harem samting wetem ol niu sora . . . Blong yumi toktok wetem wan niu maot o lanwis, blong mekem se yumi save soem, tru long fasin we yumi stap toktok mo tritim ol narawan, se i tru we yumi bin jenisim laef blong yumi i go long Kraes.