Jos I Apdeitem Ol Intaviu Kwestin blong Tempol Rekomen

Niusrum

I nomata se ol standet blong go insaed long tempol oli stap semmak, olgeta jenis ia oli kam blong helpem ol Lata-dei Sent blong rere long wan moa gud wei blong stap wosip insaed long ol tempol.

Presiden Russel M. Nelson blong Jos Ia blong Jisas Kraes blong Ol Lata-dei Sent i stap gohed blong lukluk moa blong mekem tempol wosip blong ol memba i kam gud moa, long Sandei blong las sesen blong namba 189 Medel Yia Jeneral Konfrens blong Jos. Hem i bin ridim mo apdeitem wan lis blong ol kwestin we bae oli askem long ol memba blong Jos taem oli wantem kasem wan tempol rekomen.

Ol kwestin blong tempol rekomen, oli bin mekem i kam klia moa, o oli bin stretem blong i go stret wetem ol nid mo ol situesen blong ol pikinini blong God. Ol niufala jenis ia oli mekem samting i kam klia moa, be oli no jenisim wanem wan i mas mekem blong i stap klin inaf blong go insaed long tempol.

Jenis ia long ol kwestin blong tempol rekomen oli haelaetem sam long ol samting we i moa impoten taem ol Lata-dei Sent oli rere gud blong go insaed long tempol.

Tempol rekomen i givim raet long wan Lata-dei Sent blong go insaed long ol tempol blong Jos. Wan adalt memba blong Jos i gotru long tufala intaviu blong save kasem wan tempol rekomen—faswan, wetem wan memba blong lokol bisoprik, mo afta, wetem wan memba blong stek presidensi (wan lida blong rijin). Rekomen ia, i laef blong 2 yia taem.

I gat wan limit yus tempol rekomen blong olgeta we oli gat 11 yia i go antap, mo oli kasem taem oli gat intaviu wetem wan lokol bisop. Hemia i letem ol Lata-dei Sent, plante taem ol yang man mo ol yang woman, blong oli tekpat long ol baptaes insaed long tempol. Rekomen ia i laef blong wan yia taem.

“Rij samting we i stap olsem hat blong king blong Kambak ia blong gospel blong Jisas Kraes, [rod ia blong putumbak fulwan Jos Ia blong Jisas Kraes long wol ia], hem i tabu tempol,” Presiden Nelson i talem.¹

“Blong wan i stap klin inaf blong go insaed long haos blong Lod i askem blong yu rere plante long saed blong spirit. Be wetem help blong Lod, evri samting i posibol. Long sam wei, hem i moa isi blong bildim wan tempol bitim blong bildimap wan pipol we i rere blong go long tempol. Blong wanwan i stap klin inaf, i nidim blong wan i jenisim fulwan maen mo hat blong kam moa olsem Lod, blong i stap olsem wan ones sitisen, blong i stap olsem wan moa gud eksampol, mo i wan moa tabu man o woman.”²

Ol Kwestin blong Tempol Rekomen

Ol kwestin blong intaviu ia, oli mekem i kam pablik blong mekem se evri memba, i nomata wanem yia blong hem, i save andastanem moa wanem i nid blong mekem blong save wosip insaed long tempol, mo blong stap rere blong go insaed long tempol.

Ol kwestin blong intaviu ia blong kasem tempol rekomen oli stap andanit ia: Ol toktok long 11 kwestin, oli bin jenisim.

?Yu yu gat fet long, mo yu yu gat wan testemoni abaot God, Papa we I No Save Finis; abaot Pikinini blong Hem, Jisas Kraes; mo abaot Tabu Spirit?
?Yu yu gat wan testemoni abaot Atonmen blong Kraes mo wok blong Hem olsem Sevya mo Ridima?
?Yu yu gat wan testemoni long saed blong Kambak blong gospel blong Jisas Kraes?
?Yu yu sastenem Presiden blong Jos Ia blong Jisas Kraes blong Ol Lata-dei Sent olsem profet, sia mo reveleta, mo olsem wan man ia nomo long wol ia we i gat atoriti mo i gat raet blong yusum evri prishud ki?

?Yu yu sastenem ol memba blong Fas Presidensi mo Kworom blong Olgeta Twelef Aposol olsem ol profet, sia, mo reveleta?

?Yu yu sastenem ol nara Jeneral Atoriti mo ol lokol lida blong Jos?
Lod i bin talem se, evri samting, oli mas “mekem long klin fasin” long fored blong Hem (Doktrin mo Ol Kavenan 42:41).

?Yu yu traehad blong stap laef long klin fasin long ol tingting mo long ol aksen blong yu?

?Yu yu stap obei long loa blong jastiti?
?Yu yu stap folem ol tijing blong Jos Ia blong Jisas Kraes long ol praevet mo pablik aksen blong yu wetem ol memba blong famli blong yu, mo wetem ol nara man?
?Yu yu stap sapotem o promotem eni tijing, praktis, o doktrin we i agensem hemia blong Jos Ia blong Jisas Kraes blong Ol Lata-dei Sent?
?Yu yu stap traehad blong kipim Sabat dei i tabu, tugeta long hom mo long jos; yu stap go long ol miting blong yu; yu stap rere blong, mo yu stap klin inaf blong tekem mo kakae sakramen? ?Yu yu stap laef i stret wetem ol loa mo ol komanmen blong gospel?
?Yu yu stap traehad blong stap ones long evri samting we yu stap mekem?
?Yu yu stap pem ful taeting?
?Yu yu stap andastanem mo stap obei long Tok blong Waes?
Yu yu gat sam mane o sam narafala samting we yu mas pem i go long hasban/waef blong yu blong fastaem, o yu yu gat eni mane blong pem long saed blong ol pikinini blong yu? Sapos yes, yu yu stap pem gud ol mane ia, o yu yu stap mekem ol samting we yu mas mekem long olgeta?
?Yu yu stap kipim ol kavenan we yu bin mekem insaed long tempol, olsem blong stap werem gamen blong tempol olsem we oli givim instraksen long yu long endaomen?
?I gat eni series sin, o nogud fasin insaed long laef blong yu we yu nidim blong stretem wetem ol prishud atoriti olsem pat blong yu blong sakem sin?
?Yu yu ting se yu yu klin inaf blong go insaed long haos blong Lod mo tekempat long ol odinens blong tempol?

Presiden Nelson i bin talem bakegen long ol Lata-dei Sent se ol taem blong ol open haos blong ol tempol we oli bin anaonsem, o oli stap bildim yet long ol eria blong olgeta, bae i wan impoten janis blong tijim ol lokol komuniti abaot wanem mo from wanem i gat wosip insaed long ol tempol.

“Plante fren we oli no fet blong yumi, bae oli tekpat long ol tua ia insaed long ol tempol ia, mo bae oli lanem wan samting abaot ol blesing blong tempol. Mo sam long ol visita ia, bae oli wantem tumas blong save moa,” hem i talem. “Sam, bae oli gat tru tingting mo askem hao oli kwalifae from ol blesing blong tempol. Olsem ol memba blong Jos, yumi nid blong yumi mas rere blong ansarem ol kwestin blong olgeta. Yumi save eksplenem se ol blesing blong tempol oli stap long eniwan mo evri pipol we bae oli mekem olgeta oli rere.”³