Lokol Pej
Sefti Insaed long Ol Japel, Hem I Responsabiliti blong Evri Lata-dei Sent
Apdeit long ol sekiuriti gaedlaen i blong save fesem ol situesen we oli stap jenis raon long wol
Jos Ia blong Jisas Kraes Ia blong Ol Lata-dei Sent i bin jenisim ol gaedlaen blong hem blong save helpem ol lida mo ol memba blong hem blong stap sef taem oli stap insaed long propeti blong Jos. “Ol situesen we oli stap jenis raon long wol” oli tingting biaen long jenis ia, mo Prisaeding Bisoprik blong Jos i bin raetem wan leta i go long ol lida blong Jos.
“Ol gaedlaen ia, oli stap blong help blong tijim ol lida mo ol memba long wei blong mekem se ol bilding blong Jos mo ol aktiviti oli moa sef;” leta ia we Prisaeding Bisop Gérald Caussé mo ol kaonsela blong hem oli saenem, we oli Bisop Dean M. Davies mo Bisop W. Christopher Waddell. “Mifala i stap invaetem ol lida blong oli tokbaot ol gaedlaen ia insaed long ol wod kaonsel mo ol stek kaonsel, mo blong oli yusum olgeta blong tijim ol memba, olsem we i nid, blong lukluk long ol lokol wari we i stap. Ol lida oli mas yusum ol gaedlaen ia long wan stret fasin, mo oli mas save gud ol lokol loa we oli stap.”
Ol gaedlaen ia, oli lidim ol Lata-dei Sent blong dipen long ol lokol loa long taem blong imejensi, mo i givim tingting blong samfala praktis blong ol memba oli folem blong stap sef moa. Sam long olgeta i blong savegud wanem i stap gohed raon long olgeta, blong stap kwaet, blong kam wan fren mo gat respek long evriwan we i kam visit, blong wan i no stap hemwan insaed long bilding blong Jos, mo blong stap folem ol kwaet toktok blong Tabu Spirit blong lidim wan long stret ples mo blong stap sef. Ol gaedlaen ia oli save helpem tu ol lida blong fesem gud taem we wan man, woman o wan grup i kam blong spolem wosip seves.
Ol gaedlaen ia oli en wetem kaonsel long wei blong fesem taem we wan i stap sut, o i kam faet. Ol instraksen ia, olgeta olsem ol polis mo ol sekiuriti ofisa nao oli stap tijim, mo oli stap olsem ol aksen we oli moa stret blong folem long ol kaen situesen ia. Ol lida mo ol memba oli kasem instraksen blong rod, haed o faet, i dipen long situesen.
Ron. Ronwe kwiktaem long wan ples we i sef, we i stap kolosap. Muv kwiktaem i go long wan doa blong kamaot mo aot long bilding i go kasem wan sef ples. Aot kwaet nomo, we yu no pulum tingting blong hem we i kam faet. Ol adalt oli mas meksua se i gat wan i lukaot long ol pikinini, mo oli mas kaontem evriwan. No gobak long bilding o long wan ofis o klasrum blong karem ol propeti blong yuwan. No tekem eni samting we bae polis i save ting se i wan masket.
Haed. Sapos i no posibol blong yu ronwe long wan sef ples, haed blong man we i kam faet i no save luk yu. Sapos i posibol, klosem, lokem, mo blokem ol doa blong klasrum, ofis o ol nara rum we yu stap haed long hem. Tanem laet i of, mekem mobaelfon i go long saelen, mo stap daon long floa mo longwe long ol windo. Sapos oli stap sut wetem masket, hemia bitwin polis mo olgeta we oli kam faet, evriwan insaed long bilding i stap insaed long ol rum we oli blokem gud, i go kasem taem we polis i letem olgeta oli kamaot.
Faet. Olsem wan las samting blong mekem, sapos i no gat taem blong ron, o haed, faetbak agensem man we i kam faet. Yusum eni samting we i stap we yu save yusum, mo faet blong stopem hem we i kam blong faet. Sapos i gat ol narawan oli stap, oganaesem yufala blong difendem yufala.