Lokol Pej
80 Lita blong Peint
Stat long taem we mi muv i go long eria ia, mi bin filim nogud se hospital i no stap long gudfala kondisen. Ruf i brok, peint i semwan we oli putum taem oli bin bildim hospital ia plante yia i pas finis, mo ol matres oli olfala tumas, semmak wetem ol tawel mo ol kaliko blong kavremap ol bed.
Long Jenuware 2019, mi disaed se bae mi mas mekem wan samting. Mi go long hospital mo mi toktok wetem sam memba blong ofis blong hospital. Mi bin askem sapos i gat eni wei we ol memba blong Jos Ia blong Jisas Kraes oli save help. Oli talem long mi se wan nara oganaesesen i bin donetem sam peint, be i no gat man blong pentem wol.
Blong pentem hospital i wan gudfala wei blong givim seves long komuniti blong mifala, be taem mi jekem peint, i no gat inaf nating blong pentem ful hospital. Mi kalkuletem smol mo faenem se bae mifala i nidim wan nara 80 lita blong peint.
Long taem blong branj presidensi miting blong mifala long Fraedei naet, mi bin askem branj presiden blong mi sapos mifala i save pentem hospital olsem wan seves aktiviti, mo sapos bae mifala i save donetem sam moa peint. Hem i givim ful sapot, mo i talem se bae mifala i save donetem wan nara 10 lita, we i gud tumas, be i no inaf.
Taem mifala i stap mekem plan blong aktiviti ia, mi luksave se distrik blong Tanna i gat eit branj; mo hospital seves i kavremap ful distrik, i no jes branj blong mifala nomo. Lenakel i branj we i moa smol insaed long distrik, mo sapos mifala i save givim 10 lita, maet ol nara branj tu oli save mekem semmak. Sapos wanwan branj i donetem 10 lita, bae hemia i kavremap ol 80 lita we mifala i bin nidim.
Long nekis Mandei, i bin gat distrik miting wetem evri branj presiden. Mi bin serem plan we mi bin gat from hospital. Wanwan i disaed se bae oli joen mo bae oli donetem 10 lita blong peint, mo tu, bae sam memba blong wanwan branj bae oli mekem wok blong pentem hospital.
Long namba 6 Epril 2019, mifala i bin pentem hospital. Wanem we i bin stat olsem wan smol seves projek blong branj, i tanem i kamaot olsem wan bigfala seves blong distrik.
Bifo mifala i bin stat, mifala i bin askem maneja blong hospital blong talem smol toktok. I gat wota long ae blong hem taem hem i talemaot sapraes blong hem, mo tangkyu blong hem from seves blong mifala. Evri wokman mo sikman blong hospital oli bin talem se, hemia i bin fas taem we oli luk wan Jos i mekem wan bigfala seves olsem.
Stat long taem we seves projek ia i tekples long namba 6 Epril, ol misinari blong mifala oli bin baptaesem moa long 50 pipol insaed long branj blong mifala. Yumi neva save se ol aksen blong seves blong yumi bae i tajem laef blong man long wanem wei; bae i no tajem nomo olgeta we yumi givim seves long olgeta, be tu, olgeta we oli stap lukluk yumi givim seves.