Jar in Tōmak ko
Ilo ad jar ilo tōmak, jenaaj erom̧ juon m̧ōttan aorōk ilo jerbal eo an Irooj ilo An kōpooj laļ in n̄an Itok eo Kein Karuo An.
Jar eo an Elder Maynes ilo jino in m̧wen̄an in m̧oktata an kweilo̧k eo eļap ej jino bōk uwaak. Im̧we ekar itok n̄an kōj kōn ennaan ko rem̧m̧an im al ko raiboojoj. Kallim̧ur eo an Būreejtōn Russell M. Nelson bwe kweilo̧k in enaaj pād ilo ememļo̧kjeņ eo em̧ōj an jino kūrm̧ool.
Būreejtōn Nelson ekar kōjeno̧lok iiō in āinwōt “juon iien kakeememej 200 iiō ko jān ke Anij Jemād im Nejin Jitōnbōro, Jisōs Kraist, raar waļo̧kļo̧k n̄an Josep Smith ilo juon visōn.” Būreejtōn Nelson ekar kajjitōk ippād n̄an kōm̧m̧ane juon ad make karōk n̄an kōpooj kōj make n̄an kweilo̧k in, eo kakeememej e ekar ba enaaj kar “juon oktak eļap kilaan ilo bwebwenato an Kabun̄ in, im ijo kuņami eaorōk.”1
Āinwōt n̄a, bōlen kom̧ kar ron̄ ennaan eo an im kar kajjitikin eok make, “Ilo wāween ta ijo kuņaō eaorōk?” Bōlen kwaar riiti im kar jar kōn iien ko an Jepļaaktok eo. Bōlen, eļapļo̧k jān m̧okta, kwaar riiti bwebwenato ko kōn jejjo iien ko ke Anij Jemān ekar kwaļo̧k kadkadin Eo Nejin Jitōnbōro. Bōlen kwaar riiti waanjon̄ak ko ke Rilo̧mo̧o̧r eo ekar kōnono n̄an ajri ro nejin Jemedwōj Ilan̄. Ijeļā ikar kōm̧m̧ane aolepān men ko im elōn̄ļo̧k.
Ikar lo eoon in jipan̄ ko ilo riit ko aō kōn priesthood eo an Anij im peļļo̧k eo an tōre in bōk eddo in. Ikar etta ke ikar kile bwe m̧aanjabpopo eo aō n̄an kweilo̧k in ekar juon oktak eļap kilaan ilo bwebwenato eo aō wōt make. Ikar en̄jake oktak ko ilo būruō. Ikar en̄jake kam̧m̧oolol eo ekāāl. Ikar en̄jake aō obrak kōn lan̄lōn̄ ke kar kajjitōk ippa n̄an bōk koņaō ilo keemem e Jepļaaktok in ej wōnm̧aanļo̧k wōt.
Ij pijaikļo̧k bwe ro jet rej en̄jake, kōnke kōn kanooj m̧aanjabpopo, ļapļo̧k lan̄lōn̄, ļapļo̧k laudin̄din̄, im ļapļo̧k kije n̄an jerbal ilo jabdewōt eddo aikuji jān Irooj.
Iien ko rōtōr jān jon̄aer jej kautieji raar jinoin kanaan eo an tōre in bōk eddo eo āliktata, eo me Irooj ej kōpooj Kabun̄ eo An im armej ro An, ro me rej ineek Etan, n̄an bōk E. Ejja m̧ōttan wōt m̧aanjabpopo eo ad n̄an itok eo An, Enaaj kotak kōj kajjojo bwe jen maron̄ ņa mejļan apan̄ ko ilo jetōb im iien ko rem̧m̧an āinwōt kar jab loi ilo jabdewōt iien ilo bwebwenato an laļ in.
Ilo Jeptōm̧ba 1840, Rikanaan Josep Smith im rikakpilōklōk ro an ilo Būreejtōnji eo Kein Kajuon rekar kōmlet laajrak in “Jerbal eo an Irool ilo raan kein āliktata, ej juon wāween ko reļļap im enan̄in ļe ilōn̄in meļeļe ko ilo mour in kanniōk in. Aiboojoj ko an rej jet ko epen likūt ilo naan, im ejjeļo̧k jabdewōt men emaron̄ ļapļo̧k jān aiboojoj ko an. Ej unin kōnono eo me ekar kam̧ōņōņōik im im̧we rikanaan ro im em̧m̧aan ro rejim̧we jān kōm̧anm̧an eo an laļ laļtak n̄an epepen ālkin epepen n̄an tōre in; im em̧ool tōre in bōk eddo eo an tarlep in iien ko, n̄e aolep men ko me rej ilo Kraist Jisōs, men̄e ilo lan̄ ak ioon laļ, renaaj koba ippān doon ilo E, im n̄e aolep men ko renaaj bar jepļaak, āinwōt kar kōnono jān aolep rikanaan ro rekwojarjar jān jino in laļ; bwe ilo ie enaaj bōk jikin kūrm̧ool eo aiboojoj an kallim̧ur ko kar kōm̧m̧ani n̄an ro jim̧m̧aer, ilo an waļo̧ktok ko an kajoor eo an Ijo Eutiej Tata renaaj ļap, aiboojoj, im lo̧udin̄din̄. …”
Rekar etal wōt im ba: “Jej en̄jake kōņaan wōnm̧aanļo̧k im kobaik kajoor ko ad n̄an kalōk Aelōn̄ in Kiin̄ eo, im kajutak Priesthood eo ilo tarlep im aiboojoj eo aer. Jerbal eo me ekar aikuj in dedeļo̧k ilo raan ko āliktata ej juon iaan aorōk ko reļļap, im naaj menin aikuj n̄an kōjerbal kajoor, kapeel, tōļan, im maron̄ an Armej ro Rekwojarjar, bwe en maron̄ dāpilļo̧k kōn aiboojoj eo im wōj eo kar kōmeļeļeik jān rikanaan [Daniel] [lale Daniel 2:34–35, 44–45]; im kōn menin naaj aikuji wujlepļo̧k eo an Armej ro Rekwojarjar, n̄an kōtōprak jerbal ko me reļļap im aiboojoj.”2
Elōn̄ iaan meļeļe ko kōn ta eo jenaaj kōm̧m̧ane im n̄āāt eo jenaaj kōm̧m̧ane ilo kwaļo̧k men ko an Jepļaaktok eo rejjan̄in de waļo̧k. Kōn menin Būreejtōnji eo Kein Kajuon em̧ool ilo raan ko jinoin kar jeļā jet iaan jon̄an im m̧wilaļ in jerbal eo Irooj ekar likūt im̧aad. Erkein rej jejjo iaan waanjon̄ak ko kōn ta eo jejeļā renaaj bōk jikier:
Kōn Armej ro Rekwojarjar An, Irooj enaaj leļo̧k menin letok eo an gospel eo An “n̄an aolep laļ, im bwij ko, im lo ko, im armej.”3 Tōkōnaļiji im kabwilōn̄lōn̄ ko renaaj wōnm̧aanļo̧k wōt n̄an jerbale juon m̧ōttan—āinwōt naaj kajjojo “ri eo̧n̄ōd armej”4 ro rej jerbal in karejar kōn kajoor im ļapļo̧k tōmak.
Kōj āinwōt armej enaaj ļapļo̧k ad ippān doon ibwilijin ļapļo̧k in jottāān. Jenaaj koba ilo kōkajoorļo̧k in jetōb an kumi ko im baam̧le ko robrak kōn meram in gospel eo.
Jon̄an ke juon laļ ejjab tōmak enaaj kile Kabun̄ eo an Jisōs Kraist im Armej ro Rekwojarjar ilo Raan Ko Āliktata im kile kajoor eo an Anij ioon. Rikaļoor ro retiljek im peran ejjamin naaj mijak, ettā, im jeļo̧k kōlaborbor bōk ioer etan Kraist ilo mour ko aer raan otemjeļo̧k.
Innām, ekōjkan, an kajjojo iaad bōk koņaad ilo jerbal in eo ekabwilōn̄lōn̄ im ļap? Būreejtōn Nelson ekar katakin kōj ekōjkan n̄an eddōkļo̧k ilo kajoor in jetōb. N̄e jej bōk ukweļo̧k āinwōt juon iien em̧m̧an elem̧ōņōņō kōnke kōn eddōkļo̧k in tōmak eo ad bwe Jisōs ej Kraist eo, n̄e jej meļeļe im tōmak bwe Jemedwōj Ilan̄ ej ron̄jake aolep ad jar, n̄e jej kajjieon̄ n̄an pokake kien ko, jej eddōkļo̧k ilo ad kajoor n̄an bōk wōnm̧aanļo̧k wōt revelesōn. Jetōb Kwojarjar eo emaron̄ erom̧ eo m̧ōttad iien otemjej. Juon en̄jake in meram eo enaaj pād ippād jekdo̧o̧n n̄e laļ eo ipeļaakid ej erom marokļo̧k.
Josep Smith ej juon waanjon̄ak kōn ekōjkan n̄an eddōkļo̧k ilo kain kajoor in jetōb in. Ekar kwaļo̧k n̄an kōj bwe jar in tōmak ej m̧ōttan eo aorōk n̄an bōk revelesōn jān Anij. Ekar jar ilo tōmak, tōmak bwe Anij Jemān enaaj kar uwaake jar eo an. Ekar jar ilo tōmak, tōmak bwe kōn wōt Jisōs Kraist enaaj kar anemkwoj jān bōd eo ekar en̄jake kōn jerawiwi ko an. Im ekar jar ilo tōmak, tōmak bwe ekar aikuj in kappukōt Kabun̄ eo an Jisōs Kraist em̧ool n̄an bōk jeorļo̧k bōd jab eo.
Ilo aolepān jerbal in karejar in kanaan eo an, Josep Smith ekar kōjerbali jar in tōmak ko n̄an bōk wōnm̧aanļo̧k wōt in revelesōn. Ilo ad jelm̧ae kapan̄pan̄ ko an rainin im ko rejjan̄in de itok, jej barāinwōt naaj aikuj in kamineneik ejja jon̄o̧k in wōt. Būreejtōn Brigham Young ekar ba, “Ijjab jeļā bar jabdewōt wāween n̄an Armej ro Rekwojarjar ilo Raan-ko Āliktata jān wōnm̧aanļo̧k wōt n̄an jar n̄an Anij n̄an kōjbwebweik im tōl armej ro an.”5
Naan kein jān jar in kwojkwoj eo ej aikuj in kōmeļeļe kōn mour eo ad aolep raan: “Keememej e iien otemjej.” “E” ej kōnono kōn Jisōs Kraist. Naan ko tok jet, “im kōjparok kien ko An,” kwaļo̧k ta meļeļe in n̄an kōj n̄an keememej E.6 Ilo ad keememej Jisōs Kraist iien otemjej, jemaron̄ kajjitōk ilo jar ejjeļo̧k ainikien, “Ta eo Enaaj kar kōņaan bwe in kōm̧m̧ane?”
Kain jar in, kar kōm̧m̧ane ilo tōmak ilo Jisōs Kraist, kar abaretok ilo tōre in iien bōk eddo in. Im enaaj pād ilo m̧ōttan eo aorōk tata kajjojo iaad enaaj kōm̧m̧ane ilo an wōnm̧aanļo̧k wōt in mejaļļo̧k. Ikar loe, āinwōt ami kar, waanjon̄ak ko rem̧m̧an an kain jar in.
Eo im̧aantata ej Josep Smith. Ekar kajjitōk ilo tōmak āinwōt an ajri ta eo Irooj ekar kōņaan bwe en kōm̧m̧ane. Uwaak eo An ekar ukōt bwebwenato an laļ in.
N̄an n̄a, juon katak aorōk ej itok jān uwaak eo an Josep n̄an kakkure ao an Setan ke Josep ekar bukwelōlō n̄an jar.
Ijeļā jān en̄jake bwe Setan im ro rikarejeran rej kajjieon̄ in kōm̧m̧an bwe jen en̄jake ke jejjab aikuj jar. Ke Josep Smith ekar kōjerbal aolep kajoor ko an n̄an jar n̄an Anij n̄an kōtļok e jān kajoor eo me ekar kajjieon̄ lukōt e, jar eo an kōn deeor ekar uwaak im Jemād Ilan̄ im Jisōs Kraist raar waļo̧kļo̧k.
Kajjieon̄ eo an Setan n̄an bōbrae ijjino eo an Jepļaaktok eo ekar kanooj in ļap kōnke jar eo an Josep ekar kanooj aorōk. Kwe im n̄a naaj wōr jijidikdik ad m̧ōttan n̄an kōm̧m̧ane ilo Jepļaaktok eo ej wōnm̧aanļo̧k wōt. Mekarta rikōjdāt eo an Jepļaaktok eo enaaj kajjieon̄ kabōjrak kōj jān jar. Waanjon̄ak in tōmak eo an Josep im kije eo an emaron̄ kōkajoorļo̧k kōj ilo uwaak eo ad. Menin ej juon iaan un ko etke jar ko aō rellōn̄ rej koba kam̧m̧oolol ko n̄an Jemedwōj Ilan̄ kōn rikanaan Josep.
Inōs ilo Bok in Mormon ej bar juon m̧ōņōkjān n̄an jar in tōmak eo aō ilo aō kajjieon̄ kōm̧m̧ane m̧ōttan eo aō ilo Jepļaaktok eo ej wōnm̧aanļo̧k wōt. Jekdo̧o̧n ta m̧ōttan eo am̧ enaaj, kwomaron̄ bōk āinwōt juon am̧ rikatakin make.
Āinwōt Josep, Inōs ekar jar ilo tōmak. Ekar kōmeļeļeik en̄jake eo an ilo wāween in:
“Im aō eaar ean̄den; im iaar bukwelōlō im̧aan aō Rikōm̧anm̧an, im iaar kūr n̄an e ilo jar ekajoor im akweļap n̄an jetōb eo aō; im aolepān raan eo iaar kūr n̄an e; aaet, im ke bon̄ōn eo eaar itok iaar kotak wōt ainikiō bwe en tōpar lan̄ ko.
“Im eaar itok juon ainikien n̄an eō, im ba: Inōs, jero̧wiwi ko am̧ rejako jān eok, im kwōnaaj jeraam̧m̧an.
“Im n̄a, Inōs, iaar jeļā bwe Anij ejamin riab; kōn menin, aō bōd kar bōkļo̧k.
“Im iaar ba: Irooj, ekōjkan an men in kōm̧m̧an?
“Im Eaar ba n̄an eō: Kōnke tōmak eo am̧ ilo Kraist, eo kwōj jan̄in kar m̧oktaļo̧k ron̄ ak lo. Im elōn̄ iiō ko raar eļļā m̧okta jān An naaj kwaļo̧k E ilo kanniōk; kōn menin, kwōn ilo̧k, am̧ tōmak eaar kōmour eok.”7
Katak eo me ekar kōjeraam̧m̧an eō ej ilo naan kein: “Kōnke tōmak eo am̧ ilo Kraist, eo kwōj jan̄in kar m̧oktaļo̧k ron̄ ak lo.”
Josep ekar wōr an tōmak ilo Kraist n̄an etal n̄an wōjke ko im barāinwōt n̄an jar n̄an an rōļo̧k jān kajoor ko an Setan. Ejjan̄in de kar lo Jemān im Nejin, bōtaab ekar jar ilo tōmak kōn aolepān kajoor in būruōn.
En̄jake eo an Inōs ekar katakin eō ejja katakin eo aorōk. N̄e ij jar kōn tōmak, epād ippa Rilo̧mo̧o̧r eo āinwōt aō rijojomar ippān Jemān im imaron̄ en̄jake bwe jar eo aō ej tōparļo̧k lan̄. Uwaak ko rej itok. Kōjeraam̧m̧an ko būki. Ewōr aenōm̧m̧an im lan̄lōn̄ men̄e ilo iien ko reppen.
Ij keememej ke, āinwōt juon membōr kāāl in Doulul eo an Jon̄oulruo Rijilōk ro, ikar bukwelōlō ilo jar ippān Elder David B. Height. Dettan enan̄in kar detta kiiō, kōn idajon̄jon̄ ko ij kiiō en̄jaki ippa make. Ij keememej ainikien ke ekar jar. Ikar jab kōpeļļo̧k meja n̄an lale, bōtaab ainikien ekar n̄an n̄a āinwōt eļan̄n̄e ekar ettōn̄ dikdik. Ekar ekōnono ippān Jemedwōj Ilan̄ kōn lan̄lōn̄ ilo ainikien.
Imaron̄ ron̄ ilo ļōmņak eo aō m̧ōņōņō eo an ke ekar ba, “Ilo etan Jisōs Kraist.” Aō ron̄ajke ekar āinwōt eļan̄n̄e Elder Height ekar en̄jake Rilo̧mo̧o̧r eo ekar bar kapene bwe ilo iien eo ennaan eo ekar jar kake n̄an Jemen. Im ij m̧ool ekar bōke kōn juon ettōn̄ dikdik.
Maron̄ eo ad n̄an kōm̧m̧ane ijo kuņaad aorōk n̄an Jepļaaktok eo eaiboojoj ej wōnm̧aanļo̧k wōt enaaj ļapļo̧k ilo ad eddōkļo̧k ilo tōmak eo ad ilo Jisōs Kraist āinwōt ad Rilo̧mo̧o̧r im Jemedwōj Ilan̄ āinwōt Jemed eo ej iakwe. Ilo ad jar ilo tōmak, jej erom juon m̧ōttan aorōk ilo jerbal eo an Irooj ilo An kōpooj laļ in n̄an Itok eo Kein Karuo An. Ij jar bwe jooj aolep maron̄ lo lan̄lōn̄ eo ilo kōm̧m̧ane jerbal eo Ej kūr kajjojo iaad n̄an kōm̧m̧ane.
Ij kam̧ool bwe Jisōs Kraist emour. En̄in ej Kabun̄ eo im aelōn̄ in kiin̄ eo An ioon laļ in. Josep Smith ej rikanaan eo an Jepļaaktok eo. Būreejtōn Russell M. Nelson ej rikanaan eo an Irooj ioon laļ in rainin. E ej kabwijer aolep kii ko an priesthood eo ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ilo etan Jisōs Kraist, amen.