Elder Thierry K. Mutombo

Ritōl Eutiej Jiljilimjuonn̄oul an Kabun̄ in

Elder Thierry K. Mutombo ekar wōr an kam̧ool ekajoor kōn gospel in ke ekar bōk kūr in mijen eo an ke ekar likao. Kar peptaij ippān baam̧le eo an ke ekar 10 an iiō, ekar bōk kam̧ool kōn wāween eo ekajoor gospel eo ekar ukōt baam̧le eo an.

Ak men̄e ekar kappopo n̄an mijen ilo Côte d’Ivoire Abidjan Mijen, ekar jab kajoor kam̧ool eo an kōn Bok in Mormon. Ejjan̄in kar riiti m̧oktaļo̧k.

Bisop eo eim̧we an Thierry ekar kūr e n̄an riiti Bok in Mormon aolep raan m̧okta jān an em̧m̧akūt n̄an mijen eo an. Ekar leļo̧k n̄an Thierry juon ki n̄an m̧on jar eo ijo bwe en ekkatak ie ilo aeņōm̧m̧an.

Thierry ekar riit aolep raan n̄an jilu allōn̄. Jān iien eo ekar deļo̧n̄e jikin mijen, ekar jab wōt bōk juon kam̧ool ekajoor kōn Bok in Mormon, ak ekar barāinwōt ijjino juon iminene in ekkatak me ekar jipan̄ e āinwōt juon mijinede.

“Kein jerbal eo em̧m̧an tata ewōr ippād n̄an bōktok armej n̄an meram in gospel eo im aintok ejepelōklōk an Israel ej Bok in Mormon,” ekar ba.

Thierry Kasuangi Mutombo ekar ļotak ilo Kinshasa, Democratic Republic of the Congo, ilo Jānode 31, 1976, jān Antoine Kasuangi Mutombo im Marie Theresa Matsanga Mutombo. Ekar m̧areik Tsyayi Nathalie Sinda ilo juon m̧are ilo kien ilo Nobōm̧ba 29, 2002 eo. Raar tokālik liāp ilo Johannesburg South Africa Tampeļ ilo Nobōm̧ba 19, 2004. Ewōr jiljino nejier ajri ro.

Elder Mutomba ekar kadiwōjļo̧k ilo 2010 jān University in Cepromad kōn juon degree ilo business management im ilo 2012 kōn juon degree in bachelor ilo human resources management. Ekar jerbal n̄an Kabun̄ in ilo Democratic Republic of the Congo āinwōt juon mānija ilo Family History im Human Resources Departments im āinwōt juon supervisor ilo Materials Management Department.

Ilo iien eo ekar jerbal āinwōt juon Ritōl Eutiej Jiljilimjuonn̄oul, Elder Mutombo ekar jerbal āinwōt juon būreejtōn ilo Maryland Baltimore Mijen. M̧oktaļo̧k ekar jerbal āinwōt juon stake būreejtōn, rikakpilōklōk ilo būreejtōnji an stake, ritōl eo an mijen ilo ward, Jabōt Jikuuļ rūkaki, im rijeje eo eutiej an stake.