Melkisedek Priesthood im Kii ko
Ilo Kabun̄ in mālim eo an priesthood eo ej jerbal ium̧win tōl eo an juon ritōl an priesthood eo ej kabwijer kii ko an priesthood eo.
Ikar kāālet n̄an ekōnono eļapļo̧k kōn priesthood eo an Anij, unin kōnono eo em̧ōj kadede kar ekōnono kake jān jilu rikōnono ro m̧oktaļo̧k me raar katakin kōj kōn ekōjkan an priesthood eo kōjeraam̧m̧an mour ko an jiron̄ ro, likao ro, im kōrā ro.
Priesthood eo ej juon kajoor ekwojarjar im mālim kabwijere ilo lōke ke naaj kōjerbale n̄an jerbal eo an Anij n̄an jeraam̧m̧an eo an aolep ajri ro Nejin. Priesthood eo ejjab ro me emōj kapit er n̄an juon priesthood opiij ak ro me rej kōjerbal mālim eo an. Em̧m̧aan ro rej kabwijer priesthood eo ejjab er priesthood eo. Ilo ad jab aikuj in watōk em̧m̧aan ro kar ekkapit āinwōt priesthood eo, ejetjetļo̧k watōk er āinwōt rikabwijer ro an priesthood eo.
Kajoor eo an priesthood eo ej waļo̧k jim̧or ilo Kabun̄ in im ilo doulul an baam̧le. Bōtaab kajoor in priesthood eo im mālim an priesthood eo eoktak aer jerbal ilo Kabun̄ in jān aer jerbal ilo baam̧le. Aolepān menin ej ekkar n̄an pedped in katak ko Irooj ekar ejaaki. Jibadbad eo an karōk eo an Anij ej tōlļo̧k ajri ro Nejin n̄an mour indeeo. Baam̧le ko ilo mour wabanban in rej menin aorōk n̄an karōk jab eo. Kabun̄ in ej pād n̄an leļo̧k katak eo, mālim eo, im kain̄i ko remenin aikuj n̄an kaindeeoik jemjerā ko an baam̧le ļo̧k n̄an indeeo. Kōn menin, doulul eo an baam̧le im Kabun̄ eo an Jisōs Kraist ewōr juon aer jemjerā n̄an rejetake doon. Jeraam̧m̧an ko jān priesthood eo—ko āinwōt tarlep in gospel eo im kain̄i ko āinwōt peptaij, kapene, im bōk menin letok eo an Jetōb Kwojarjar, menin letok kwojarjar an tampeļ, im m̧are n̄an indeeo—rej pād n̄an em̧m̧aan ro im kōrā ro jim̧or.1
Priesthood eo jej ekōnono kake ijin ej Melkisedek Priesthood, kar kōjepļaaktok ilo jino in Jepļaaktok eo an gospel eo. Josep Smith im Oliver Cowdery raar ekkapit jān Piter, Jemes, im Jon, ro raar kabun̄bun̄ļo̧k er make “āinwōt ro rej kabwijer ki ko an aelōn̄ in kiin̄ eo, im an tarlep in tōrean iien bōk eddo ko” (Katak im Bujen Ko 128:20). Rijilōk rein im̧aan tata raar bōk mālim jab in jān Rilo̧mo̧o̧r eo Make. Aolep mālim ko ak opiij ko jet ilo priesthood eo rej etoto ļo̧k n̄an Melkisedek Priesthood eo (lale Katak im Bujen Ko 107:5), bwe ej “kabwijer jim̧we ko an presidency, im ewōr an kajoor im maron̄ ioon aolep opij ko ilo kabun̄ in ilo aolep dettan ko an laļ” (Katak im Bujen Ko 107:8).
Ilo Kabun̄ in mālim eo an priesthood eo eļapļo̧k, Melkisedek Priesthood eo, im eo ettāļo̧k ak Priesthood eo an Aron ej kōjerbale ium̧win tōl eo an juon ritōl an priesthood, āinwōt juon bisop ak būreejtōn, eo ej kabwijer kii ko an priesthood jab eo. N̄an meļeļe kōn kōjerbal mālim an priesthood eo ilo Kabun̄ in, jej aikuj meļeļe pedped in katak eo an kii ko an priesthood eo.
Kii ko an Melkisedek Priesthood eo an aelōn̄ in kiin̄ eo kar leļo̧k jān Piter, Jemes, im Jon, bōtaab ekar jab kadedeļo̧k jepļaaktok eo an kii ko an priesthood eo. Jet kii ko an priesthood eo rekar itok tokālik. Ālkin aje eo an tampeļ eo kein kajuon an tōre in bōk eddo in ilo Kirtland, Ohio, jilu rikanaan ro—Moses, Elias, im Elijah—rekar kōjepļaaktok “ki ko an tōrean bōk eddo jab in,” ekoba kii ko reiokļo̧k aiintok Israel im jerbal in tampeļ ko an Irooj (lale Katak im Bujen Ko 110), āinwōt an Būreejtōn Eyring lukkuun kōmeļeļeiki.
Waanjon̄ak eo ļap tata jeļā kake an jerbal eo an kii ko ej ilo kōm̧m̧ane kain̄i ko an priesthood eo. Juon kain̄i ej juon jerbal ekwojarjar ej kalikkar an bujen ko kōm̧m̧an im kallim̧ur an kōjeraam̧m̧an ko. Ilo Kabun̄ in aolep kain̄i ko rej kōm̧m̧an ium̧win mālim eo an ritōl eo an priesthood eo ej kabwijer kii ko n̄an kain̄i jab eo.
Juon kain̄i eļap wōt an ekkā an kōm̧m̧an jān armej ro me em̧ōj kar aer ekkapit n̄an juon opiij ilo priesthood eo ej jerbal ium̧win tōl eo an juon eo ej kabwijer kii ko an priesthood eo. N̄an waanjon̄ak, rikabwijer ro an elōn̄ opiij ko an Priesthood eo an Aron rej kōm̧m̧ane ilo kain̄i eo an kwojkwoj eo ium̧win kii ko im tōl eo an bisop eo, eo ej kabwijer kii ko an Priesthood eo an Aron. Ejja pedped in katak eo wōt ej jerbal n̄an kain̄i ko an priesthood eo me kōrā ro rej kōm̧m̧ani ilo tampeļ. Mekarta n̄e kōrā ro rejjab kabwijer juon opiij ilo priesthood eo, rej kōm̧m̧ani kain̄i ko rekwojarjar an tampeļ ium̧win kōmālim eo an būreejtōn eo an tampeļ, eo ej kabwijer kii ko n̄an kain̄i ko an tampeļ.
Bar juon waanjon̄ak an mālim eo an priesthood eo ium̧win tōl eo an juon eo me ej kabwijer kii ko rej katak ko an em̧m̧aan ro im kōrā ro kar kūr n̄an katakin gospel eo, men̄e ilo kūlaaj ko ilo ward ko aer, ak ilo jikin mijen. Waanjon̄ak ko jet rej ro me rej kabwijer jerbal ko an ritōl ilo ward eo im kōjerbal mālim eo an priesthood eo ilo tōl eo aer kōnke kōn kūr ko aer im ium̧win kōjenolo̧k eo im ium̧win tōl eo an ritōl eo an priesthood me ej kabwijer kii ko ilo ward ak stake eo. En̄in ej ekōjkan kōjerbal mālim im kajoor eo an priesthood eo im m̧ōņōņō kake ilo Kabun̄ eo an Jisōs im Armej ro Rekwojarjar ilo Raan Ko Āliktata.2
Mālim eo an Priesthood barāinwōt kōjerbal im kōjeraam̧m̧an ko an rej en̄jaki ilo baam̧le ko an Armej ro Rekwojarjar ilo Raan-ko Āliktata. Ilo baam̧le ko meļeļein aō ba ke juon rikabwijer-priesthood im juon kōrā ro em̧ōj aaer m̧are im ajri ro nejier. Ij barāinwōt kobaiktok oktak ko jān jemjerā ko jet ko āinwōt kar jeleti jān mej ak jepel.
Pedped in katak eo me mālim eo an priesthood eo emaron̄ kōjerbale wōt ium̧win tōl eo an juon eo ej kabwijer kii ko n̄an jerbal jab eo ej kanooj aorōk ilo Kabun̄ in, bōtaab menin ejjab jerbal ilo baam̧le. N̄an waanjon̄ak, juon jemān ej tōl im kōjerbal priesthood eo ilo baam̧le eo an kōn mālim eo an priesthood eo ej kabwijere. Ejjab aikuj in wōr juon tōl ak kōmālim an juon eo ej kabwijer kii ko an priesthood n̄an kōm̧m̧ane jerbal ko roktak jān doon an baam̧le eo an. Men kein ekoba kapilōk ro uwaan baam̧le eo an, kōm̧m̧ani kweilo̧k ko an baam̧le, leļo̧k kōjeraam̧m̧an ko an priesthood n̄an lio pāleen im ajri ro, ak leļo̧k kōjeraam̧m̧an ko an kōmour n̄an ro uwaan baam̧le eo ak ro jet.3 Ritōl ro reutiej an Kabun̄ in rej katakin ro uwaan baam̧le eo bōtaab rejjab kōtōbalbal jerbal eo an mālim an priesthood eo ilo baam̧le.
Ejja pedped in katak in wōt ej jerbal n̄e juon jemān ej jako im juon m̧am̧a ej ritōl an baam̧le eo. Liin ej tōl ilo m̧weo im̧ōn im ej kein jerbal n̄an bōktok kajoor im kōjeraam̧m̧an ko an priesthood eo n̄an baam̧le eo an kōn menin letok kwojarjar eo im liāp eo an ilo tampeļ. Ilo an jab mālim n̄an leļo̧k kōjeraam̧m̧an ko an priesthood eo me maron̄ leļo̧k wōt jān juon armej ej kabwijer jet opiij ilo priesthood eo, liin emaron̄ kōm̧m̧ane aolep jerbal ko jet an tōl baam̧le. Ilo kōm̧m̧ane āindein, liin ej kōjerbal kajoor eo an priesthood eo n̄an jeraam̧m̧an eo an ajri ro nejin ro ej tōl er ilo jerbal eo an ilo tōl baam̧le eo.4
Eļan̄n̄e baba ro rej kakūrm̧ool priesthood eo aer ilo baam̧le eo aer make, ej kōkajoorļo̧k mijen eo an Kabun̄ in jen jabdewōt men remaron̄ kar kōm̧m̧ane. Baba ro me rej kabwijer Melkisedek Priesthood eo raikuj kōjerbal mālim eo aer “jān wōt jeļā ņae, jān meanwōd, jān meoeo im ettā bōro, im jān iakwe jab ankilaan riab” (Katak im Bujen Ko 121:41). Jon̄o̧k eo eutiej n̄an kōjerbal aolep mālim an priesthood eo ej aorōk tata ilo baam̧le. Rikabwijer ro an priesthood eo raikuj kōjparok kien ko bwe renaaj bōk kajoor eo an priesthood eo n̄an leļo̧k kōjeraam̧m̧an ko n̄an ro uwaan baam̧le eo aer. Rej aikuj kōjparok jemjerā ko rem̧m̧an an baam̧le bwe ro uwaan baam̧le renaaj kōņaan kajjitōk ippāer kōn kōjeraam̧m̧an ko. Im ro jinen im jemān raikuj kōketak eļapļo̧k kōjeraam̧m̧an ko an priesthood eo ilo baam̧le eo.5
Ilo kweilo̧k kein, ilo ad pukōt juon jikin kone ekadu kitein jān n̄ūrbōktak ko ad an mour kōn juon jorrāān in kūj aolep jikin, kar katakin kōj pedped in katak ko reļļap an indeeo. Ij kōketak kajjojo iaad n̄an an mejād “juon wōt” n̄an bōk m̧ool kein an indeeo bwe ānbwin ko ad “enaaj obrak kōn meram” (3 Nipai 13:22).
Ilo kwaļo̧k eo An n̄an jarlepju ko kar je ilo Baibōļ im Bok in Mormon, Rilo̧mo̧o̧r eo ekar katakin bwe anbwin wabanban ko ad remaron̄ obrak kōn meram ak obrak kōn marok. Kōj, aaet, kōņaan obrak kōn meram, im ad Rilo̧mo̧o̧r ekar katakin kōj ekōjkan ad kōm̧m̧an bwe menin en waļo̧k. Jej aikuj ron̄jake ennaan ko kōn m̧ool ko an indeeo. Ekar kōjerbal waanjon̄ak eo kōn mejād, jān eo jej bōk meram n̄an ānbwin ko ad. Eļan̄n̄e mejād ej “juon wōt”—ilo juon bar wāween ba, eļan̄n̄e jej kalimjōk wōt ilo bōk meram im meļeļe eo—Ekar kōmeļeļeik, “aolepān ānbwinnimi enaaj obrak kōn meram” (Matu 6:22; 3 Nipai 13:22). A eļan̄n̄e mejād “enana”—bwe ej, eļan̄n̄e jej kappukōt nana im bōke n̄an ānbwinid—Ekar kakkōl, “ānbwinnōm enaaj obrak kōn marok” (eoon 23). Ilo bar juon wāween ba, meram eo ak marok eo ilo ānbwinid ej pedped ioon ekōjkan ad loe—ak bōke—m̧ool ko indeeo kar katakin kōj.
Jej aikuj ļoor kūr eo an Rilo̧mo̧o̧r eo n̄an kappukōt im kajjitōk n̄an meļeļe m̧ool eo an indeeo. Ej kallim̧ur bwe Jemedwōj ilo Lan̄ ej m̧ōņōņō in katakin jabdewōt eo m̧ool ko rej kappukōti (lale 3 Nipai 14:8). Eļan̄n̄e jej ikdeelel e menin im kōm̧m̧an bwe mejād en juon wōt n̄an bōk er, Rilo̧mo̧o̧r eo ej kallim̧ur bwe m̧ool ko an indeeo “naaj peļļo̧k” n̄an kōj (lale 3 Nipai 14:7–8).
Ilo jum̧ae, Setan ej ikdeelel n̄an kapok ļōmņak eo ad ak kōjbwābweik kōj ilo men ko raorōk āinwōt wāween an priesthood eo an Anij jerbal. Rilo̧mo̧o̧r eo ekar kakkōl kōn kain “rikanaan ro reriab, ro rej itok n̄an kom̧ ilo kilin sip, ak ilowa rej kidu oļip rellāj” (3 Nipai 14:15). Ekar letok n̄an kōj idajon̄jon̄ in em̧m̧an tata n̄an jipan̄ kōj kāālet m̧ool eo jān ibwilijin katak ko roktak me remaron̄ kapok kōj: “Kom̧ naaj jeļā er jān leen ko aer,” Ekar katakin (3 Nipai 14:16). “Wōjke em̧man e ban jebar im e nana leen, barāinwōt wōjke e nana e ban jebar im em̧m̧an leen” (eoon 18). Kōn menin, jej aikuj kappukōt tōprak ko—“leen ko”—an pedped in katak ko me kar katakin im armej ro me rej katakin er. Bwe ej uwaak eo em̧m̧an tata n̄an elōn̄ iaan kein jum̧ae ko jej ron̄ ņae Kabun̄ in im katak ko an im kakien ko im ritōl. Ļoor idajon̄jon̄ eo Rilo̧mo̧o̧r eo ekar katakin: Kappukōt leen ko—tōprak ko.
N̄e jej ļōmņak kōn le ko leen gospel eo im Kabun̄ eo an Jisōs Kraist kar kōjepļaaktok, jej lem̧ōņōņō ilo ekōjkan an Kabun̄ in, ilo mour ko an ro uwaan rej mour, kar ererakļo̧k jān jarlepju ko ijo jokwe ie ilo ijoko retoļe Ituiōn̄ n̄an enan̄in aolepān ro uwaan elōn̄ļo̧k jān 16 milien rej jokwe ilo laļ ko jet ijello̧kin United States. Kōn eddōkļo̧k jab in, jekar en̄jake ļapļo̧k eo ilo maron̄ eo an Kabun̄ in n̄an jipan̄ ro uwaan. Jej jipan̄ ilo kōjparok kein ko, ilo kakūrm̧ool eddōk ko ad n̄an kwaļo̧k gospel eo kōjepļaaktok, ilo aiintok Israel, im ilo kalōk tampeļ ko ilo aolepān laļ in.
Jej tōl jān juon rikanaan, Būreejtōn Russell M. Nelson, eo tōl eo an Irooj ekar kōjerbal n̄an kōttōprak eddōkļo̧k eo jekar en̄jake ilo aolepān elōn̄ļo̧k jān ruo iiō ko in an tōl. Kiiō jenaaj jeraam̧m̧an n̄an ron̄ jān Būreejtōn Nelson, eo enaaj katakin kōj ekōjkan ad kōļapļo̧k eddōkļo̧k eo ad ilo Kabun̄ in kar kōjepļaaktok an Jisōs Kraist ilo iien kein reppen.
Ij kam̧ool kōn m̧ool kein im koba ippāmi ilo jar kōn rikanaan eo ad, eo jenaaj ron̄jake, ilo etan Jisōs Kraist, amen.