Lo Jikin Kone Jān Ļan̄ ko an Mour
Jisōs Kraist im Pinmuur eo an rej jikin kone eo me jej aolep aikuji, mekarta ļan̄ ko me rej den̄ōttok mour ko ad.
Ilo kar lukwōn 90 ko, ilo iiō in kaļōj ko aō, ikar m̧ōttan Fourth Company eo an Santiago Fire Department eo ilo Chile. Ke ikar jerbal ijo, ikar jokwe ilo im̧ōn ikkune eo āinwōt m̧ōttan rijerbal in bon̄. Epaakeļo̧k jem̧lo̧k in iiō eo, kar jiron̄ eō bwe ikar iakuj in pād ilo im̧ōn ikkun eo ilo Joteen eo Im̧aan Nuiō eo kōnke ilo raan jab eo ekar eitōn enan̄in aolep iien ewōr idin̄ ko. Kōn bwilōn̄, ikar uwaak “M̧ool in?”
Ekwe, ij keememej kōttar ippān rijerbal ro m̧ōtta ke, ilo lukōn bon̄, kabokbok ko rekar jino kabbokļo̧ki ilo downtown Santiago. Kōm kar jino atbakoj doon kōn kōjeraam̧man kōn iiō eo ekāāl. Ejjab to beeļ ko ilo im̧ōn ikkune eo rekar jino jan̄, kalikkar bwe ekar wōr juon idin̄. Kōm kar bōk kein jerbal ko am im kelōn̄lo̧k n̄an waan ikkun ko. Ilo iaļ eo am̧ ļo̧k n̄an idin̄ eo, ke kōm kar eļļāļo̧k jen jarlepju ko rej keemem e niuiō eo, ikar kile bwe ekar ļap aer jab inepata im rekar anemkwoj. Raar ineem̧m̧an im lem̧ōņōņōik bon̄ōn jōm̧ar eo emeņeņ. Bōtaap juon jikin epaak, armej ro kōm kar ekairir n̄an jipan̄ raar pād ilo juon jorrāān ļapļap.
En̄jake in ekar jipan̄ eō kar kile bwe men̄e ilo mour ko ad remaron̄ ilo iien ko meeoeo, iien eo enaaj itok n̄an kōj kajjojo n̄e jenaaj jelm̧ae apan̄ ko im ļan̄ ko jab kōtmeni me renaaj kwaļo̧k jon̄ak ko ad reļļap tata kōn maron̄ in kōmmaanwa eo ad. Apan̄ ko ilo ānbwin, kōļmenļo̧kjeņ, baam̧le, im jerbal, jorrāān ko rej make waļo̧k; im men ko jet an mour ak mej rej wōt jet iaan waanjon̄ak ko an ļan̄ ko me jenaaj jelm̧ai ilo mour in.
N̄e jej jelm̧ae ļan̄ kein, emakijkij ad ioon en̄jake ko an ebbwer ak mijak. Būreejtōn Russell M. Nelson eaar ba, “Tōmak eo eaar kalibubuik mijak”—tōmak ilo ad Irooj Jisōs Kraist (“Let Your Faith Show,” Liahona, May 2014, 29). Āinwōt aō kar lo ļan̄ ko me rekar jelet mour ko an armej, ikar kōjem̧ļo̧ke bwe jekdo̧o̧n ta kain ļan̄ rōt eo ej luko̧rko̧re kōj—jekdo̧o̧n ta eļan̄n̄e ewōr juon uwaak n̄an e ak eļan̄n̄e ewōr juon jem̧lo̧k enaaj itok—ewōr wōt juon jikin kone, im ej juon wōt n̄an aolep kain ļan̄ ko. Jikin kone in emake wōt kar elletok in Jemedwōj Ilan̄ ej ad Irooj Jisōs Kraist im Pinmuur eo An.
Ejjeļo̧k iaad ej deeor jān jelm̧ae ļan̄ kein. Hilamōn, juon rikanaan ilo Bok in Mormon, ekar katakin kōj men in: “Kememej, kememej, bwe ej ioon ejm̧aan in ad Ri Pinmuur, eo ej Kraist, eo Nejin Anij, bwe kom̧ij aikuj kalek pedped ko ami; bwe n̄e devil enaaj jilkintok kōto ko an rekajoor, aaet, mōdi ko an ilo aire, aaet, n̄e aolep wōt dekā im lan̄ rekkajoor an renaaj bun̄it eok, enaaj ejjeļo̧k an kajoor ioom̧ n̄an kinōōrļo̧k laļļo̧k eok n̄an ron̄ in būrom̧ōj im wo ejjeļo̧k jem̧ļo̧kin, kōnke ejm̧aan eo kom̧ ar ekkal ioon, eo ej pedped em̧ool, pedped eo eļan̄n̄e armej rej ekkal ioon rej jamin bun̄” (Hilamōn 5:12).
Elder Robert D. Hales, eo ekar wōr an make en̄jake ko kōn niknik ilo ļan̄ ko, kar ba: “En̄taan ej an aolep, ekōjkan ad en̄jake kōn en̄taan ej an juon make. En̄taan emaron̄ letok n̄an kōj ilo juon iaan wāween kein ruo. Emaron̄ erom juon en̄jake in kōkajoorļo̧k im karreoik koba ippān tōmak, ak emaron̄ in juon kajoor in kakkure ilo mour ko ad eļan̄n̄e ejjeļo̧k ippād tōmak eo ilo pinmuur in en̄taan eo an Irooj” (“Your Sorrow Shall Be Turned to Joy,” Ensign, Nov. 1983, 66).
N̄an maron̄ lem̧ōņōņō kōn jikin kone eo me Pinmuur eo an Jisōs Kraist ej letok, ej aikuj in wōr ad tōmak ilo E—tōmak eo me enaaj kōmaron̄e kōj n̄an anjo̧ ioon aolep metak ko ewōr jon̄aer, kōļmenļo̧kjeņ an laļ. Ekar kallim̧ur bwe Enaaj kōmeraikļok eddo ko ad eļan̄n̄e jej itok n̄an E ilo aolep men jej kōm̧m̧ane.
“Itok n̄an Ippa,” Ekar ba, “kom̧ otemjej rej jerbal im ban, im Inaaj kakkijeik kom̧.”
“Kom̧win bōk Aō ine im likūte iaerami, im katak Ippa, bwe Ij ineem̧m̧an im ettā būruō, kom̧ naaj lo ami kakkije.
“Bwe Aō ine ej em̧m̧an, im men eo Ij ineke e mera” (Matu 11:28–30; lale barāinwōt Mosaia 24:14–15).
Kar ba bwe “n̄an juon eo me ewōr an tōmak, ejjeļo̧k kōmeļeļe ej menin aikuj. N̄an juon eo ejjeļo̧k an tōmak, ejjeļo̧k kōmeļeļe epidodo.” (Ennaan in ej n̄an kile Thomas Aquinas kake bōtaab emaron̄ nej jakoļo̧k lukkuun ennaan kōn men ko ļein kar katakin.) Ijo wōt ke, meļeļe eo ad ewōr jon̄an kōn men ko me rej waļo̧k ijin ioon laļ in, im emakijkij an ejjeļo̧k ad uwaak ko n̄an kajjitōk eo kōn etke. Etke menin ej waļo̧k? Etke menin ej waļo̧k n̄an n̄a? Ta eo ij aikuj kar ekkatak? N̄e uwaak ko rejjab waļo̧k n̄an kōj, ej iien eo me naan ko kar kwaļo̧k jān ad Rilo̧mo̧o̧r n̄an Rikanaan Josep Smith ilo Liberty Jail rej lukkuun jetjet:
“Nejū m̧aan, aenōm̧m̧an en n̄an am; mennin jum̧ae kein am im en̄taan kein am renaaj n̄an jidik wōt iien;
“Innām, eļan̄n̄e kwo naaj kijejetoiki em̧m̧an, Anij enaaj kotak eok ijo eutiej” (Katak im Bujen Ko 121:7–8).
Men̄e elōn̄ armej ro ilo m̧ool rej tōmak ilo Jisōs Kraist, kajjitōk eo eaorōk ej eļan̄n̄e jej tōmak E im eļan̄n̄e jej tōmak men ko me Ej katakin kōj im kajjitōk ippād n̄an kōm̧m̧ani. Bōlen juon emaron̄ ļōmņak, “Ta eo Jisōs Kraist ejeļā kōn ta eo ej waļo̧k n̄an n̄a? Ekōjkan An jeļā ta eo ij aikuji n̄an m̧ōņōņō?” Em̧ool, ekar ad Ripinmuur im Rijojomar eo me rikanaan Aiseia ekar kōnono kake ke ekar ba:
“Armej raar kajekdo̧o̧n im joļo̧k e; juon armej in būrom̧ōj, im ekar jeļā liaajlōļ. …
“E m̧ool ekar ineek en̄taan ko ad, im bōkļo̧k būrom̧ōj ko ad. …
“A em̧ōj wākare E kōn jero̧wiwi ko ad, imi kakinejnej E kōn bōd ko ad: kaje eo an adwōj aenōm̧m̧an ear pād ioon, im kājmour kōj kōn depetpet ko An” (Aiseia 53:3–5).
Rijilōk Paul ekar barāinwōt katakin kōn Rilo̧mo̧o̧r eo, ba, “Eo ear make bōk ļo̧k jero̧wiwi ko ad ilo ānbwinnen ioon wōjke eo, bwe, ke em̧ōj ad mej n̄an jero̧wiwi, jen mour n̄an kwōjarjar; im kōn kinej ko kōnjan ar kemour kom̧” (1 Piter 2:24).
Men̄e iien en̄taan eo an Piter make ekar epaaktok, naan ko an rekar jab obrak kōn mijak ak ebbwer; ijello̧kin, ekar katakin Armej ro Rekwojarjar n̄an “lan̄lōn̄,” em̧ool men̄e raar “en̄taan kōn elōn̄ men in mālejjon̄.” Piter ekar kapilōk kōj n̄an keememej bwe “mālejjon̄ [ad] tōmak, … men̄e mālejjon̄ e kōn kijeek,” enaaj tōlļo̧k n̄an “aiboojoj im nōbar ilo waaktok an Jisōs Kraist” im n̄an “lo̧mo̧o̧ren [ad]” (1 Piter 1:6–7, 9).
Piter ekar wōnm̧aanļo̧k wōt:
“Jitōnbōro, kom̧win jab bwilōn̄ kōn men in kijeek enaaj itok bwe en mālejjon̄ kom̧. āinwōt eļan̄n̄e men eo ekāāl ej waļo̧k n̄an kom:
“A kom̧in lan̄lōn̄, kōn ami bōk m̧ōttan en̄taan ko an Kraist, bwe ilo kwaļo̧k An aiboojoj kom̧win lan̄lōn̄ kōn lan̄lōn̄ e kanooj ļap” (1 Piter 4:12–13).
Būreejtōn Russell M. Nelson ekar katakin “Ro rekwojarjar rej m̧ōņōņō ium̧win jabdewōt jekjek. … N̄e mour ko ad rej pedped wōt ilo karōk in lo̧mo̧o̧r eo an Anij … im Jisōs Kraist im gospel eo An, jemaron̄ en̄jake lan̄lōn̄ jekdo̧o̧n ta eo ej waļo̧k—ak ejjab waļo̧k—ilo mour ko ad. Mōņōņō ej itok jān im kōn E. E ej unjen aolep m̧ōņōņō” (“Joy and Spiritual Survival,” Liahona, Nov. 2016, 82).
Aaet, epidodo n̄an ba men kein n̄e jej jab pād ilo ioļapļap in juon ļan̄ jān n̄an mour im kōjerbali ilo ļan̄ eo. Bōtaab āinwōt juon jeiūm̧ im jatūm̧ m̧aan, ij kōtajdikdik kom̧ maron̄ en̄jake bwe ij m̧ool in kōņaan kwaļo̧k ippāmi ewi jon̄an an aorōk n̄an jeļā bwe Jisōs Kraist im Pinmuur eo an rej jikin kone eo me jej aolep aikuji, jekdo̧o̧n ta ļan̄ ko me rej lukwo̧rko̧re mour ko ad.
Ijeļā bwe jej aolep ajri ro nejin Anij, bwe Ej iakwe kōj, im bwe jejjab makeļo̧k. Ij kūr kom̧ n̄an itok im loe bwe E emaron̄ kōmeraikļo̧k eddo ko ami im erom jikin kone eo kom̧ij kappukōte. Itok im jipan̄ ro jet lo jikin kone eo me rej kanooj jan̄nuwaade. Itok im pād ippām ilo jikin kone in, eo enaaj jipan̄ kom̧ jum̧ae ļan̄ ko an mour. Ejjeļo̧k pere ilo būruō bwe eļan̄n̄e kom̧ij itok, kom̧ naaj loe, kom̧ naaj jipan̄, im kom̧ naaj pād wōt.
Rikanaan Alma ekar kam̧ool kōn men kein n̄an ļeo nejin Hilamōn: “Ijeļā bwe jabdewōt eo enaaj likūt aer lōke ilo Anij naaj rejetake er ilo mālejjon̄ ko aer, im inepata ko aer, im en̄taan ko aer, im naaj kōjerkak er ilo raan eo āliktata.” (Alma 36:3).
Rilo̧mo̧o̧r Make ekar ba:
“Būruōmi ren aenōm̧m̧an … ; bwe kanniōk otemjej ej pād ilo Peiū; ikōn̄ wōt im jeļā ke N̄a Anij. …
“Kōn menin, jab mijak em̧ool n̄an mej; bwe ilo laļ in ami lan̄lōn̄ ej jab dipiio, ak ilo N̄a ami lan̄lōn̄ ej dipiio” (Katak im Bujen Ko 101:16, 36).
Al eo “Be Still, My Soul,” eo ekar un̄ur būruō ilo elōn̄ iien ko, ewōr juon an ennaan kōn kaenōm̧m̧an n̄an jetōb ko ad. Naan ko rej kōnono āinwōt in:
Kwōn tōt wōt, aō jetōb: Awa eo karōk n̄an eok em̧ōkaj an itok
N̄e jenaaj indeeo pād ippān Irooj,
N̄e inepata, būrom̧ōj, im mijak rej jako,
Būrom̧ōj meļo̧klo̧k, iakwe eo erreo tata an lan̄lōn̄ ko rej jepļaaktok.
Kwōn tōt wōt, aō jetōb: N̄e oktak im dān in kōmejaaļaļ ko rej eļļāļo̧k,
Aolep ineem̧m̧an im jeraam̧m̧an jenaaj ioon doon ilo jem̧lo̧k in. (Hymns, no. 124)
Ilo ad jelm̧ae ļan̄ ko an mour, ijeļā bwe eļan̄n̄e jej kōm̧m̧ane kijejeto eo ad em̧m̧an tata im kōjatdikdik ioon Jisōs Kraist im Pinmuur eo An āinwōt ad jikin kone, jenaaj jeraam̧m̧an kōn deeor, kaenōm̧m̧an, kōkajoor, anjo̧, im aenōm̧m̧an eo jej kappukōte, kōn jeļā ilo būruōd bwe ilo jem̧lo̧k in tōre eo ad ioon laļ in, jenaaj ron̄ naan ko an M̧aajta eo: “Em̧m̧an am̧ kōm̧m̧an kwō karijera em̧m̧an im tiljek: … kwōn deļo̧n̄ ilo lan̄lōn̄ an am̧ irooj” (Matu 25:21). Ilo etan Jisōs Kraist, Amen.