Kōjeraam̧m̧an eo itok jān an Revelesōn Wōnm̧aanļo̧k Wōt n̄an Rikanaan ro im Revelesōn ko ad Make n̄an Tōl Mour ko Ad
Revelesōn eo ej wōnm̧aanļo̧k wōt em̧ōj bōke im ej wōnm̧aaļo̧k wōt kōn iaļ eo me Irooj ekar ejaake.
Rainin inaaj kōnono kōn an revelesōn wōnm̧aanļo̧k wōt n̄an rikanaan ro im an wōnm̧aanļo̧k wōt revelesōn ko ad make n̄an tōl mour ko ad.
Jet iien jej bōk revelesōn jekdo̧o̧n n̄e jejjab jeļā jibadbad eo an Irooj. Ejjab to m̧okta jān an kar Elder Jeffrey R. Holland bōk kūr n̄an erom̧ juon Rijilōk ilo Juun 1994, ikar en̄jake juon revelesōn ealikkar bwe naaj kūr i. Ikar juon eo ej regional representative im ekar ejjeļo̧k unin bwe in kar bōk en̄jake in. Ak ke kōm kar kōmpānien āinwōt likao mijenede ro ilo England jem̧aan ilo 1960 jimma ko, ekar ļap aō iakwe E. Ikar watōke en̄jake in ke ej juon jouj in tūriam̧o n̄an eō. Ilo iiō ko ļo̧k, eto aō ļōmņak eļan̄n̄e Irooj ekar kōpooj eō n̄an erom̧ juon junior ilo Doulul eo an Jon̄oulruo ro n̄an juon aō kar kōmpānien mijenede me ekar lukkuun tiljek ke ekar juon aō junior kōmpānien ke kom̧ro kar mijenede.1 Jet iien ij kakkōl mijenede rūm̧m̧an ded ro bwe ren jouj n̄an junior kōmpānien ro aer kōnke reban jeļā n̄aat remaron̄ erom̧ juon aer senior kōmpānien.
Ewōr aō naan in kam̧ool edim bwe Kabun̄ in ej tōl jān Rilo̧mo̧o̧r, Jisōs Kraist. E ejeļā wōn n̄an kūri āinwōt Rijilōk ro An im likūt er ilo kōllaajrak eo ejejjet. E ej barāinwōt jeļā wāween an kōpooj senior Rijilōk ro An n̄an erom̧ rikanaan im Būreejtōn eo an Kabun̄ in.
Jekar jeraam̧m̧an ke ej jibbon̄on̄ in ilo ad kar ron̄jake rikanaan eo ad ejitōnbōro, Būreejtōn Russell M. Nelson, ilo an kar kwaļo̧k juon naan in kean̄ ekabwūlōn̄lōn̄ n̄an laļ in n̄an kakeememej rubuki iiō ilo kautiej Jepļaaktok eo an tarlep in gospel eo an Jisōs Kraist.2 Kean̄ in elukkuun aorōk jān Rikanaan Nelson ekar kalikkare bwe Kabun̄ eo an Jisōs Kraist eo kar jinointata, jinoin an waļo̧k, im tōl n̄an ilju im jekļaj pedped ioon revelesōn ko rej wōnm̧aanļo̧k wōt. Naan in kean̄ in ekāāl ej jutak kōn wāween an Jemed Ilan̄ eo ej iakwe kōj kōnono n̄an kōj ajri ro Nejin.
Juon raan kar jem̧aan, Būreejtōn Spencer W. Kimball ekar kwaļo̧k en̄jake ko me ij en̄jaki rainin. Ekar ba: “Ilo aolep men otemjeļo̧k, me … jej aikuj lukkuun kam̧m̧oolol [kake] ej bwe lan̄ ko rej ilo m̧ool peļļo̧k im bwe kabun̄ eo an Jisos Kraist me ekar jepļaaktok ej pedped ioon ejm̧aan in revelesōn. Revelesōn eo ej wōnm̧aanļo̧k wōt ej ilo m̧ool mour eo an gospel eo an Irooj im Rilo̧mo̧o̧r, Jisōs Kraist eo emour rainin.”3
Rikanaan Enoch ekar baj loe wōt raan kein me jej mour ie kiiō. Irooj ekar kwaļo̧k n̄an Enoch jerawiwi ko reļļap me enaaj pedjaake aolep jikin im kar kanaan kōn “en̄taan ko reļļap” me renaaj waļo̧k. Mekarta, Irooj ekar kallim̧ur, “A armej ro Aō I naaj oņaake er.”4 “Im wānōk I naaj jilkinļo̧k jān lan̄, im m̧ool I naaj jilkinļo̧k jān laļ, n̄an kam̧ool kōn Nejū Iaar Make Keotake.”5
Būreejtōn Ezra Taft Benson ekar katakin kōn kajoor eļap bwe Bok in Mormon, ej dilepān kabun̄ in ad, ekar jepļaaktok n̄an laļ in ilo an kakūrm̧ool naan ko Irooj ekar jiron̄ Enoch. Jemān im eo Nejin im enjeļ ro im rikanaan ro rekar waļo̧k n̄an Rikanaan Josep Smith rekar “bōk tōl jān lan̄ n̄an kōjepļaaktok aolep kajoor ko remenin aikuj n̄an aelōn̄ in kiin̄ eo.”6
Josep Smith ekar bōk revelesōn ālkin revelesōn. Jet iaer rekar kwaļo̧ki ilo iien kweilo̧k in. Elōn̄ revelesōn ko Rikanaan Josep ekar bōki ko me ekar kōjparoki n̄an kōj im repād ilo Katak im Bujen ko. Aolep bok ko rekwojarjar an Kabun̄ in epād ie ļōmņak im ankilaan Irooj n̄an kōj ilo epepen in āliktata .7
N̄an kakkobaba ikkijeen pedped in jeje ko rekwojarjar me remenin aorōk, jejeraam̧m̧an kōn an revelesōn ko wōnm̧aanļo̧k wōt n̄an rikanaan ro remour. Rikanaan ro rej “rijipan̄ ro kar kūr jān Irooj, kar kōmālim er n̄an kōnono ilo Etan.”8
Jet revelesōn relukkuun ļap aer aorōk, im ko jet rej kōļapļo̧k meļeļe eo ad kōn m̧ool ko rekwojarjar me remenin aikuj im ej letok tōl ilo raan kein.9
Eļap ad kam̧m̧oolol kōn revelesōn eo me kar leļo̧k n̄an Būreejtōn Spencer W. Kimball ilo an kar kōmālim priesthood eo im kōjeraam̧m̧an ko an tampeļ n̄an aolep em̧m̧aan ro reerreo me rej membōr in Kabun̄ in ilo Juun 1978.10
Ikar jerbal ippān elōn̄ jon̄oulruo ro me rekar pād im bōk koņaer ilo iien eo me revelesōn in eaorōk ekar bōk jikin. Kajjojo iaer, ilo aō bwebwenato ippān kajjojo iaer, rekar kam̧oole tōl in jetōb eo ekajoor im an kakobaik tōl in jetōb eo me Būreejtōn Kimball im er rekar en̄jake. Elōn̄ rekar ba bwe revelesōn in eļap an kajoor rekar bōke m̧oktaļo̧k ak ālkin iien eo.11
Rein iaam me kōmij kiiō jerbal ilo Doulul eo an Jon̄oulruo Rijilōk ro kōm jeraam̧m̧an ilo raan kein ilo an revelesōn ko raorōk ko em̧ōj aer itok n̄an rikanaan ro raan kein.12 Būreejtōn Russell M. Nelson eo ellakar juon rijipan̄ eo kar kūri jān Irooj eļaptata ilo an kautiej revelesōn ko n̄an jipan̄ baam̧le ko kalōk jikin likpejn̄ak in tōmak ko aer ilo m̧ōko m̧ōer, kobaik Israel eo ekar ejeplōklōk ilo jim̧or jait ko ilo ran̄ōl eo, im kōjeraam̧m̧an membōr ro em̧ōj aer bōk menin letok kwojarjar eo kōn kain̄i ko rekwojarjar an tampeļ.
Ke oktak ko raorōk n̄an kōjeraam̧m̧an m̧ōko kar jino kōjeļļā kake ilo Oktoba 2018 kweiļo̧k eo eļap, “bwe ilo ekōnono ko an Ko̧o̧njeļ eo an Būreejtōnji eo Kein Kajuon im Doulul eo an Jon̄oulruo Rijilōk ro ilo tampeļ, … ālkin an rikanaan eo ad ejitōn bōro kajjitōk ippān Irooj kōn revelesōn … , juon kam̧ool ekajoor kar bōke jān aolep.”13
Ilo iien eo, revelesōn ko jet me rej iookļo̧k kain̄i ko rekwojarjar an tampeļ kar kar bōki ak rejjan̄in kōjeļļā kaki ak jino kōm̧m̧ani.14 Tōl in ekar ijjino kōn revelesōn in kanaan n̄an Būreejtōn Russell M. Nelson im kam̧ool elur im ekajoor n̄an ro rej bōk koņaer ilo jerbal in kain̄i ko an tampeļ. Būreejtōn Nelson ej lukkuun kobaiktok sister ro rej tōl Doulul ko an Kōrā ro, Doulul ko an Jiron̄ ro, im doulul ko an Būraimere. Tōl eo āliktata, ilo tampeļ, n̄an Būreejtōn eo Kein Kajuon im Doulul eo an Jon̄oulruo Rijilōk ro rekar lukkuun ejetōbtōb im lukkuun kajoor. Kōm kajjojo kar jeļā bwe em̧ōj am kar bōk ļōmņak, ankilaan, im ainikien Irooj.15
Ij kwaļo̧k ilo m̧ool bwe revelesōn eo ej wōnm̧aanļo̧k wōt em̧ōj bōke im ej wōnm̧aaļo̧k wōt kōn iaļ eo me Irooj ekar ejaake. Ij kam̧ool bwe kean̄ in ekāāl Būreejtōn Nelson ekar kwaļo̧k ke ej jibbon̄ ej juon revelesōn n̄an kōjeraam̧m̧an aolep armej.
Jej kūr Aolep n̄an Kobatok ilo Tebōļ in Kwojkwoj an Irooj
Jej barāinwōt kwaļo̧k an ikdeleel buruōm n̄an bar koba ippān doon ippān ro eto aer apan̄ kōn naan in kam̧ool ko aer, eto aer jab bar kobatok, ak em̧ōj kar bukweļo̧k etaer jān rekoot ko an Kabun̄ in. Kōm ej ikdeleel n̄an kwojkwoj ippami “kwōjkwōj ioon naan ko an Kraist” ilo tebōļ an Irooj, n̄an ekkatak men ko jej aolep aikuj kōm̧m̧ani.16 Kōmij aikuj kom̧! Kabun̄ in ej aikuj kom̧! Irooj ej aikuji kom̧! Jar eo am ilo buruōm ej bwe kom̧ naaj kobatok ippam n̄an Kabun̄jar n̄an Rilo̧mo̧o̧r eo an laļ in. Kōm jeļā bwe jet iaami remaron̄ kar jelm̧ae metak ilo en̄jake, kalijōkļo̧k, im m̧wil ko jet me rejjab an Kraist. Kōm barāinwōt jeļā bwe jet iaami rekar jelm̧ae idajon̄jon̄ ko n̄an tōmak ko aer me remaron̄ jab lukkuun ļap kam̧m̧oolol kaki, meļeļe, ak ņa mejļaer.
Jet iaan membōr ro eļap kōjadikdik kake er im retiljek rekar en̄taan kōn idajon̄jon̄ in tōmak ko aer ium̧win juon tōre. Em̧m̧an ippa bwebwenato eo an W. W. Phelps, eo me ekar etal jān Kabun̄ in im kar kam̧ool ņae Rikanaan Josep Smith ilo juon jikin ekajet ilo Missouri. Ālkin an kar ukweļo̧k, ekar jeje n̄an Josep, ijeļā bwe jekjek eo ipād ie, kwojeļā kake, im Anij ejeļā kake, im ikōņaan bwe in bōk lo̧mo̧o̧r eļan̄n̄e ro m̧ōtta renaaj jipan̄ eō.”17 Joseph ekar jeorļo̧k an bōd, im bar kōjerbale, im ekar jeje ilo iakwe, “Ro m̧ōttad jinoin rej barāinwōt ro m̧ōttad āliktata.”18
Ro jeiū im jatū, jekdo̧o̧n jekjek ta eo kom̧ pād ie, jouj im jeļā bwe Kabun̄ in im membōr ro an rej bar karuwaineneiktok kom̧!
Revelesōn eo ad make n̄an Tōl mour ko Ad
Revelesōn an kajjojo armej make epojak n̄an aolep ro me rej ettā ilo aer kappukot tōl jān Irooj. Ebar aorōk āinwōt bar revelesōn in kanaan. Jitōbōn revelesōn an kajjojo armej jān Jetōb Kwojarjar ekar kōm̧m̧an bwe milien armej ren bōk naan in kam̧ool eo aer make me emenin aikuj n̄an peptaij im bōk kapen āinwōt membōr ro ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata.
Revelesōn an kajjjojo armej ej kōjeraam̧m̧an eo ekabwūlōn̄lōn̄ me kajjojo ej bōke ālkin wōt an peptaij n̄e jej “kokwōjarjar jān bōke Jetōb Kwojarjar.”19 Imaron̄ keememej juon jetōbōn revelesōn eo ejenoļo̧k ke ej 15 iiō detta. Brother eo aō ejitōnbōro ekar kappukot tōl eo jān Irooj ikkijeen wāween an uwaake jemān eo ejitōnbōro, eo ekar jab kōņaan bwe brother eo aō en etal im mijen. Ikar jar kōn juon kōttōpar em̧ool im bōk revelesōn eo aō make kōn m̧ool ko an gospel in.
Jerbal eo an Jetōb Kwojarjar.
Revelesōn an kajjojo armej ej pedped wōt ioon m̧ool ko an jetōb me kar bōk jān Jetōb Kwojarjar.20 Jetōb Kwojarjar ej rikwaļo̧k im rikam̧ool an aolep m̧ool, eļaptata kōn Rilo̧mo̧o̧r. N̄e ejjab Jetōb Kwojarjar, jejjab maron̄ lukkuun jeļā bwe Jisōs ej Kraist. Jerbal eo an elukkun aorōk n̄an kwaļo̧k kam̧ool kōn Jemān im Nejin im kōn taitōļ ko Aaer im aibojooj eo Aer.
Jetōb Kwojarjar emaron̄ im̧we aolep ilo juon wāween eo ekajoor.21 Im̧we in eban itok aolep iien m̧ae armej eo ej peptaij im bōk menin letok eo an Jetōb Kwojarjar. Jetōb Kwojarjar ej barāinwōt jerbal āinwōt juon rijipan̄ ilo jerbal in ukweļo̧k im jeorļo̧k bōd.
Jetōb eo enaaj kōnono ilo elōn̄ wāween ko rekabwūlōn̄lōn̄. Irooj ekar kōjerbal kōmeļeļe in eaibojooj:
“I naaj ba n̄an eok ilo ļōmņak eo am im ilo būruōm̧, jān Jetōb Kwōjarjar, eo enaaj itok ioom̧ im eo enaaj pād ilo būruōm̧.
“Kiiō, lo, en̄in ej jitōbōn revelesōn.”22
Men̄e an im̧we emaron̄ kabwūlōn̄lōn̄ an lukkuun kajoor, ekkā an itok āinwōt juon ainikien eo elur im emera.23 Jeje ko rekwojarjar ekoba elōn̄ waanjon̄ak ko kōn wāween an Jetōb im̧we ļōmņak ko ad, ekoba kaeņōm̧m̧an ļōmņak ko ad,24 kobrak ļōmņak ko ad,25 kōmeram ļōmņak ko ad,26 im aaet ej jilkintok juon ainikien n̄an ļōmņak ko ad.27
Jet pedped in katak ko me rej kōpooj kōj n̄an bōk revelesōn ekoba:
-
Jar im kajjitōk jitōbōn tōl. Ilo kautiej im ilo ettā jej aikuj kappukot im kajjitōk28 im kijenmej im pokake.29
-
Kōppopo n̄an bōk im̧we. Menin emenin aikuj bwe jen ineem̧m̧an ippān katak ko an Irooj im ilo ad pokake kien ko An.
-
Bōk kwojkwoj eo ilo erreo. N̄e jej kōm̧m̧ane menin, jej kam̧ool im bujen ippān Anij ke jenaaj bōk iood etan eo Nejin ekwojarjar im bwe jej keememej E im kōjparok kien ko An.
Pedped in katak kein rej kōpooj kōj n̄an bōk, kile, ļoor unoojdikdik im tōl an Jetōb Kwojarjar. Menin ekoba “mennin aeņōm̧m̧an ko … ko rej bōktok m̧ōņōņō [im] … mour indeeo.”30
Kōppopo eo ad ilo jetōb ej lukkuun ļapļo̧k n̄e jej ekkatak jeje ko rekwojarjar aolep raan im m̧ool ko an gospel in im kejo̧kļo̧kjeņ kake ilo ļōmņak ko ad tōl eo jej kappukote. Ak keememej bwe jen kijenmej im lōke iien ko an Irooj. Tōl ej itok jān Irooj ekajoor pōtata n̄e E “ej kālet ilo elōn̄ unin n̄an katakin kōj.”31
Revelesōn ilo Kūr ko Ad im Jerbal in Ijjitōn̄ ko
Jetōb Kwojarjar enaaj barāinwōt letok revelesōn ilo kūr im jerbal in ijjitōn̄ ko ad. Ilo iminene eo aō, tōl in jetōb eaorōk ekkā an itok n̄e jej kajjieon̄ kōjeraam̧m̧an ro jet ilo ad kōm̧m̧ani eddo ko ad.
Imaron̄ keememejļo̧k āinwōt juon bisop eo edik ekar bōk juon kūr emenin aikuj jān juon ripālele em̧ōj aer m̧are ilo juon iien ejidimkij m̧okta jān aō kar kelo̧k ilo juon aō pejnej tūrāāp. Ikar kajjitōk ippān Irooj m̧okta jān aer kar tōpartok n̄an jeļā wāween aō maron̄ kōjeraam̧m̧an er. Ekar kwaļo̧k n̄an eō unin būrabōļōm eo im wāween aō aikuj ņa mejļan. Tōl in revelesōn eo ekar kōtļo̧k bwe in kakūrm̧ool eddo ko rekwojarjar ilo kūr eo aō ainwōt juon bisop jekdo̧o̧n n̄e elukkuun jabwe iien. Bisop ro ilo aolepān laļ in rej barāinwōt kwaļo̧k ejja en̄jake kein wōt me ikar iooni. Āinwōt juon stake būreejtōn, ikar jab bōk wōt revelesōn ko raorōk ak ikar barāinwōt bōk kajim̧we kōn mour eo aō make me remenin aikuj n̄an kadedeikļo̧k jibadbad eo an Irooj.
Ij kam̧ool n̄an kom̧ bwe tōl in revelesōn kōj kajjojo jemaron̄ bōki kōn ettā bōro ilo ad jerbal ilo jikin kallib an Irooj. Eiten aolep tōl ko jej bōki rej itok jān Jetōb Kwojarjar. Jet iien im n̄an jet kōttōpar, ej kajju itok jān Irooj. Ij kwaļo̧k aō kam̧ool bwe menin em̧ool. Tōl jān Kabun̄ in, aolepān Kabun̄ in, ej itok jān Būreejtōn im rikanaan eo an Kabun̄ in.
Kōm āinwōt Rijilōk ro raan kein kar letok mālim n̄an kōm n̄an jerbal im ito itak ippān rikanaan eo, Būreejtōn Nelson. Ij letok ilo tukaduin ta eo Wilford Woodruff ekar ba kōn Rikanaan Josep Smith; ebarāinwōt m̧ool menin kōn Būreejtōn Nelson. Em̧ōj aō loe “jerbal ko an Jetōb Kwojarjar ippān, im revelesōn ko an Jisōs Kraist leļo̧k n̄an e im kūrm̧ool ko an revelesōn ko.”32
Kajjitōk eo aō in ilo ettā rainin ej bwe kajjojo iaad jenaaj kappukot revelesōn ko rej wōnm̧aanļo̧k wōt n̄an tōl mour ko ad im ļoor Jetōb āinwōt ad kabun̄ jar n̄an Anij Jemed ilo etan ad Rilo̧mo̧o̧r, Jisōs Kraist, eo me ij kwaļo̧k aō kam̧ool ilo etan Jisōs Kraist, amen.