Wāween an Priesthood eo Kōjeraam̧m̧an Jodikdik ro
Kar letok n̄an kōj iien eo em̧m̧an n̄an jerbal āinwōt enjeļ ro, n̄an kwaļo̧k gospel eo ioon aolepān laļ, im n̄an jipan̄ jetōb ko itok n̄an Kraist.
Ro jeiū im jatū, N̄aij lukkuun kam̧m̧oolol n̄an kōnono n̄an kom̧ ilo joteen in epād ilo bwebwenato kōn mennin letok eo ekwojarjar an priesthood eo im kajoor eo ekabwilōn̄lōn̄ an n̄an kōjeraam̧m̧an jodikdik ro ilo tōre in bōk eddo in. N̄aij jar bwe jekdo̧o̧ņ ta jab wānōk ko aō, Jetōb eo enaaj jipan̄ eō katakin m̧ool eo.
Būreejtōnji eo Kein Kajuon rekar kakeememej rikabwijer ro an Priesthood eo an Arōn bwe “kom̧ij mour ilo tōre an iien ko rem̧m̧an im apan̄ ko reļļap—juon tōre eo me priesthood eo em̧ōj kar kōjepļaaktok. Ewōr am̧ mālim n̄an kōm̧m̧ani kain̄i ko an Priesthood eo an Aron. Ilo am̧ lukkuun jar im erreo ilo kōjerbal mālim eo, enaaj ļap am̧ kōjeraam̧m̧an mour ko an ro rej pād ipeļakūūm̧.” 1 Āinwōt likao ro an Kabun̄ in, kar bar kakeememej kōj bwe jej “[laddik ro] rejitōnbōro nejin Anij, im E ewōr an jerbal n̄an [kōj] n̄an kōm̧m̧ane,” 2 im jej jipan̄ ilo jerbal eo An “n̄an kakūrm̧ool jab wabanban im mour indeeo an armej” (Moses 1:39).
Priesthood eo ej mālim eo n̄an kōm̧m̧ani kain̄i ko im bujen ko an gospel eo an Rilo̧mo̧o̧r eo n̄an ro rej erreo n̄an būki. Jān kain̄i kein an priesthood eo im bujen ko rekwojarjar ej itok tarlep in Kōjeraam̧m̧an ko an Pinmuur eo an Rilo̧mo̧o̧r eo me ej jipan̄ kōj kōtōprak jinekjej eo ad ekwojarjar.
Josep Smith eaar juon likao eo kar kūr in Anij n̄an kōjepļaaktok gospel eo an Jisōs Kraist im, kōn un in, kar leļo̧k priesthood eo me ekar kōjerbale n̄an kōjeraam̧m̧an aolep armej. Katak im Bujen Ko 135 ej kwaļo̧k elōn̄ kōjeram̧m̧an ko Josep ekar letok n̄an jodikdik ro ilo iien bōk eddo in. Jej riit: “Josep Smith … ekkar kōm̧m̧an eļapļo̧k, ijello̧kun wōt Jisōs, n̄an lo̧mo̧o̧r eo an armej raņ ilo laļ in, jān bar jabdewōt armej ekar mour ioon. … E eaar boklōn̄tak Bok in Mormon eo … ; kar kajedeed tarlep in gospel eo … n̄an ko̧na ko emen ilo laļ in; kar boktok revelesōn ko im kien ko me jei ilo Katak im Bujen Ko …; kar aintok elōn̄ taujin Armij ro Rekwojarjar ilo Raan Ko Āliktata … , im likūt bun̄bun̄ im juon et me ejjamin kakure” (Katak im Bujen Ko 135:3).
N̄an lukkuun jerbal āinwōt kar Josep, jej aikuj karbōb ilo erreo n̄an kōjerbal kajoor in priesthood eo an Irooj. Ke kar ukōt Bok in Mormon, Josep im Oliver Cowdery raar kōņaan peptaij, bōtaap ekar jako mālim eo ejetjet ippāer. Ilo Māe 15, 1829, raar būkwelōlō im jar im Jon Ripeptaij eaar loļo̧k er, eo ekar leļo̧k n̄an er kii ko im mālim eo an Priesthood eo an Arōn, im ba, “Ioomiro ro rikarejera, ilo etan Messaia Ij likūt Priesthood eo an Aron, eo ej kabwijer ki ko an kōjeraam̧m̧an ko an enjeļ raņ, im an gospel in ukeļo̧k eo, im an peptaij jān tulo̧k n̄an jeorļo̧k in jero̧wiwi ko” (Katak im Bujen Ko 13:1).
Kar letok n̄an kōj iien eo em̧m̧an n̄an jerbal āinwōt enjeļ ro, n̄an kwaļo̧k gospel eo ioon aolepān laļ, im n̄an jipan̄ jetōb ko itok n̄an Kraist. Jerbal in jipan̄ in ej likūt kōj ilo jerbal in ippān doon eo ippān Jon Ripeptaij, Moronai, Josep Smith, Būreejtōn Russell M. Nelson, im rijerbal ro jet an Irooj retiljek.
Jerbal in jipan̄ eo ad ilo im ippān priesthood eo An ej kōkobaiktok ro me rej wujlepļo̧k n̄an ļoor im mour kōn katak ko an Irooj kōn lukkuun jetjet, eo n̄a make ijieļā emaron̄ in pen ilo ad jelm̧ae apan̄ ko an jodikdik. Bōtaap bōrokuk ippān rijerbal rein jet an Irooj ilo kōttōprak jerbal eo An enaaj jipan̄ kōkajoor kōj ņae kapo im m̧ōņ ko an rikōjdat eo. Komaron̄ juon kōkaļļe in meram̧ n̄an aolep ro rejjab lukkuun jeļā kōn make. Meram̧ eo ilo kwe enaaj lukkuun romaak jon̄an aolep ro kwoj iiaio ippāer renaaj jeraam̧m̧an jān wōt aer m̧ōttam̧. Emaron̄ in pen jet iien n̄an kile an pād ro m̧ōttad ilo jetōb, bōtaab ij kam̧oolol n̄an jeļā bwe ij juon uwaan doulul eo an priesthood etiljek, ippān ro me imaron̄ jerbal n̄an epaakeļo̧k Kraist.
Ippānļo̧k ro m̧ōttad im baam̧le eo ad, Jetōb Kwojarjar eo ej juon eo em̧ool tata im eo m̧ōttad eo jemaron̄ lōke. Bōtaap n̄an maron̄ kūrtok jemjerā eo An ejjab jem̧lo̧k, jej aikuj likūt kōj make ilo jekjek ko im jikin ko ijo Enaaj kōņaan bwe jen pād ie. Menin emaron̄ ijjino ilo im̧ōko im̧ōd make ilo ad jerbal n̄an kōm̧m̧ani jikin ko rekwojarjar kōn bōk koņaad ilo ekkatak jeje ko rekwojarjar raan otemjeļo̧k im jar āinwōt juon baam̧le im, eo eaorōk tata, ilo ad make ekkatak jeje ko rekwojarjar im jar ippad make.
Kar jinoin iiō in, kar letok n̄an eō juon iien em̧m̧an eo ekaitoktoklimo im ettā n̄an jipan̄ leddik eo jatū, Oceane, eddōkļo̧k ilo iaļ in bujen eo kōn bōk kūr eo n̄an peptaij im kakūrm̧ool juon iaan menin aikuj ko kar kōmeļeļeik n̄an deļo̧n̄e laļ selestial. Ekar to̧relikļo̧k iien peptaij eo an juon allōn̄, m̧ae iien eo ikar ekkapit juon pris, n̄an letok n̄an eō iien eo em̧m̧an n̄an kōm̧m̧ane kain̄i eo, ilo an leddik ro jatim kar barāinwōt bōk iien eo em̧m̧an n̄an jerbal ium̧win ijjitōn̄ eo an priesthood eo im jutak āinwōt rikam̧ool ro. Ke kōm kar jutak iturejet ko an dān eo im kar kōppopo n̄an tulo̧k ilo dān eo, ikar kile an laudin̄din̄, āinwōt an jetjet n̄an eo aō. Im iaar en̄jake aō juon wōt ippan, ilo lo ke e ej kōm̧m̧ane kāālet eo ejim̧we. Iien in em̧m̧an n̄an kōjerbal priesthood eo ekar aikuji aō kōļapļo̧k jtiljek kōjparoke im kadikļo̧k bajjōk ilo aō mour kōn gospel eo. N̄an maron̄ kōppopo, ikar etal n̄an tampeļ aolep raan ilo wiik jab eo, kar rie jinō, jibū, im leddik eo jatū, n̄an kōm̧m̧ani peptaij ko kōn ro remej.
En̄jake in ekar katakin eō eļap kōn priesthood eo im ekōjkan aō maron̄ kōjerbale ilo erreo. Ijeļa bwe aolep ro rej kabwijer priesthood eo remaron̄ en̄jake ejja men ko iaar en̄jaki eļan̄n̄e jej ļo̧o̧r waanjon̄ak eo an Nipai n̄an “etal im kōm̧m̧ane.” (lale 1 Nipai 3:7). Jejjab maron̄ kōm̧m̧an jabdewōt im kōtmene Irooj n̄an kōjerbal kōj ilo jerbal eo An eļap. Jejjab aikuj jab kōttar an ro me rej aikuj jipan̄ eo ad n̄an kappukōt kōj; ej ad eddo āinwōt rikabwijer ro an priesthood eo n̄an waanjon̄ak im jutak āinwōt rikam̧ool ro an Anij. Eļan̄n̄e jej kōm̧m̧ani jokāālet ko me rej bōbrae kōj jān eddōkļo̧k indeeo eo ad, jej aikuj oktak kiiō. Setan enaaj kididāp an kajjieon̄ n̄an dapij kōj ilo juon jekjek in kanniōk eo ad ilo kappukōt m̧ōņōņō ko reļem waan. Bōtaap ijeļā bwe n̄e jej likūtļo̧k kijejeto, kappukōt ro renaaj rie kōj, im ukweļo̧k kajjojo raan, tōprak in kōjeram̧m̧an ko renaaj ļap im mour ko ad renaaj oktak n̄an indeeo ilo ad wōnm̧anļo̧k ilo iaaļ in bujen in.
Ijeļā bwe en̄in ej Kabun̄ eo em̧ool an Jisōs Kraist, eo ej ad Rilo̧mo̧o̧r im ekar kōmaron̄ Rijilōk ro an kōn kii ko an priesthood eo, ro rej kōjerbal n̄an tōl kōj, eļaptata ilo raan ko rapan̄, im n̄an kōpooje laļ in n̄an ro̧o̧ltok eo An.
Ijeļā bwe Josep Smith ekar rikanaan eo an Jepļaaktok eo im bwe Būreejtōn Nelson ej ad rikanaan emour rainin. Ij kajjitōk ippād wōj aolep n̄an ekkatak kōn mour ko an rikabwijer rein reļļap im kappukōt n̄an kōkōm̧anm̧anļo̧k kōj make raan otemjeļo̧k bwe jen maron̄ pojak n̄an ioon ad Rikōm̧anm̧an. Ilo etan Jisōs Kraist, Amen.