M̧ōttan ko Rem̧m̧an jān M̧ōttan eo Kein Kajuon in 190th Kweilo̧k eo Eļap

Būreejtōn Russell M. Nelson ekar wōr juon an ennaan ealikkar ilo kweilo̧k eo eļap: “Ron̄jake E.”

“Jej pukot, ilo jabdewōt wāween jemaron̄e, n̄an ron̄jake Jisōs Kraist, eo ej kōnono n̄an kōj kōn kajoor im jerbal in karejar eo an Jetōb Kwojarjar,” Būreejtōn Nelson ekar katakin.

“Unleplep eo an menin im aolep kweilo̧k ko reļļap ej n̄an jipan̄ kōj ron̄jake E” (peij 7).

Ilo juon kweilo̧k eo eļap kar pedped wōt ioon Visōn eo M̧oktata im Jepļaaktok eo, kar katakin kōj bwe jemaron̄ ron̄jake E, āinwōt an kar Joseph Smith kar ilo Bukun Wōjke ko Rekwojarjar. Jepooļ kōj kōn men ko rejelōt kōj jān nan̄inmej in ej ajedeed ilo laļ in im ejelōt milien armej ro, kar katakin kōj n̄an ron̄jake E kōn tōl ilo inepata ko ad. Reim̧aanļo̧k n̄an juon ilju eo emeram n̄an jim̧or Kabun̄ in im kajjojo iaad, kar katakin kōj n̄an kōkāāl kijejeto ko ad n̄an ron̄jake E im n̄an ļoor E.

“Elōn̄ m̧ōttan ko reim̧we ilo kweilo̧k eo eļap an Eprōļ 2020 in,”Būreejtōn Nelson ekar ba, “… maron̄ kōkaduikļo̧k kōn naan ko ruo rekwojarjar: ‘Ron̄jake E.’ Jej jar bwe ami jibadbad en ilo Jemādwōj Ilan̄, eo ekar ba naan ko, im n̄an eo Nejin Ejitōnbōro, Jisōs Kraist, enaaj juon menin ememļo̧kjeņ eaorōk kōn aolep men ko me em̧ōj aer waļo̧k.”

Ilo ami ekkatak ennaan ko an kweilo̧k in im pukōt “n̄an ron̄, n̄an eo̧ron̄, im ron̄jake naan ko an Rilo̧mo̧o̧r,” kom̧ naaj lo kallim̧ur eo an rikanaan eo kūrm̧ool ilo mour eo ami kōn an “dikļo̧k mijak im ļapļo̧kk tōmak” (peij 114).

• Būreejtōn Nelson ej kwaļo̧k kadkad in kakōļļe eo ekāāl n̄an Kabun̄ in ilo peij 73.

• Būreejtōn Nelson ej kwaļo̧k kadkad in juon naan in kean̄ kōn Jepļaaktok eo ilo peij 91.

• Būreejtōn Nelson ej tōl juon iien ippān doon ekwojarjar an aolepān laļ in ilo peij 92.

• Būreejtōn Nelson ekar bar kōjjeļā kōn rruwalitōk tampeļ ko rekāāl ilo peij 115.

• Ekkatak eļapļo̧k kōn wāween eo jemaron̄ jipan̄ ro jet #Ron̄jakeE ilo HearHim.ChurchofJesusChrist.org.

Pija ko ilo Māākjin In

Kōmij kajjieon̄ likūt ilo jeje kajjojo kweiļo̧k eo eļap kōn pija ko kōmij kwaļo̧ki. Ilo an kajjojo kweilo̧k jej uwaan, pija ko ilo māākjin in ej kwaļo̧k jet iaan jekjek kein rekāāl me kweilo̧k ej kwaļo̧k.

Ilo kakkobaba n̄an pija ko jān kadiwōjļo̧k eo, kom̧ naaj lo pija ko jān Tampeļ Square eo eaiboojoj (men̄e ejkab ejjeļo̧k kobban kōn COVID-19 im jerbal in ekkal), im kobaļo̧k ippān pijaan jin̄n̄a ko kōn Jepļaaktok eo an gospel in im membōr ro rej letok pija ko aer make ilo aer pād im make ron̄jake kweilo̧k eo ipeļaakin laļ in.