COVID-19: Ennaan in Tōl, Kemour, im Kōjatdikdik
Membōr ro rej kam̧ool kōn lo pein Irooj jekdo̧o̧ņ ta ilo iien in an oktak ko, inepata, im jerata.
E ekar pād Ippa Moktaļo̧k; E ej pād Ippa Kiiō
Ke ikar jijōt ilo m̧weo im̧ō kajjieo̧n̄ n̄an kadikļo̧k aō leln̄o̧n̄ kōn ta eo ej waļo̧k ilo laļ in, ikar baj elōkļo̧k jōnōļ eo aō im kar lo menin: “Elōn̄ im lōn̄ mijak ko me rej itok n̄e jej jerkak kajjojo raan ilo laļ in, ak kōn tōmak ilo katak ko an gospel eo, jemaron̄ likūt juon ne im̧an eo juon. … Tōmak iien otemjej ej anjo̧ ioon mijak.”
Ikar jeļā bwe ikar bōk juon aō make revelesōn ekajoor im bwe Jemādwōj Ilan̄ ekar letok n̄an eō kōn ta ko ij je ilo jōnōļ eo aō make jān elōn̄ iiō ko m̧oktalo̧k. Ikar jeraam̧m̧an kōn juon iien aeņōm̧m̧an im kōn jeļā eo bwe Jemedwōj Ilan̄ ekar pād ippa m̧oktaļo̧k, im E ej pād ijin ippa kiiō.
Danette Gray, Utah, USA
Jetōb Kwojarjar eo Emaron̄ Jerbal Ilo Online
Ikar bōk im̧we n̄an ijjino kōm̧m̧ani kūlaaj ko an jemenere ilo kurup in video chat ko. Ruo raan m̧okta jān an jukjuk in pād eo am kar kabōjrak an armej itok itak, kūlaaj eo am ekar kōm̧m̧ane katak eo an ilo online kein kajuon.
Jejjo iaan ro jineer im jemeer rekar kobatok ilo kūlaaj eo amim, ekoba ro rekar jab membōr. Ikar dāpij dānin kemjaaļaļ ke kōm kar ekkatak jān Mosaia jepta 2 ippān doon. Kōm kar aolep en̄jake Jetōb eo ilo amim kar ekkatak bwe jerbal n̄an ro jet ej barāinwōt jerbal n̄an Anij. Ekar ļap aō ekkatak kōn bōk im kile revelesōn an juon make. Jetōb Kwojarjar enaaj kwaļo̧k m̧ool eo an gospel eo ilo elōn̄ jekjek ko. Jekdo̧o̧n ta eo ej waļo̧k ilo laļ in, ejjeļo̧k men emaron̄ kabōjrak an wōnm̧aanļo̧k jerbal eo an Jemādwōj Ilan̄ n̄an lo̧mo̧o̧r eo an ro Nejin jān eddōkļo̧k.
Marites Pineda, Mindanao, Philippines
Kōm Ejjan̄in Joļo̧k juon Raan in Jemenere
Men̄e kōn aolep men ko rekar waļo̧k kōn nan̄inmej in coronavirus eo, ij m̧ōņōņō in ba bwe kōm ejjan̄in joļo̧k juon raan in Jemenere! Katakin kūlaaj eo aō ilo video chat ekōm̧m̧an jejjo apan̄ ko, bōtaab em̧m̧an ippa alooje an ro jineer im jemeer im ajri ro reddik jatier ron̄jake kōmeļeļe ko amim. Em̧m̧an ippa bwe ej letok juon ļōmņak in wōnm̧aanļo̧k im juon iminene n̄an baam̧le ko am, im eļaptata an em̧m̧an ippa bwe jemaron̄ wōnm̧aaļo̧k wōt im kwaļo̧k kam̧ool n̄an doon kōn Jisōs Kraist im iakwe eo An n̄an kōj.
Mandi Crandell, Yigo, Guam
Jerbal n̄an Ro ilo Rejet ko Jim̧or an Rōn̄ōl eo
Ikar jerbal āinwōt juon sister mijenede ilo Missouri Independence Mission ke kweilo̧k ko an Kabun̄ in rekar kabōjraki im kōm ekar jino kōjenoļo̧k kōm jān armej im pād wōt ilo jikin jokwe ko amim. Kōm kar kōjerbal tslboon ko amim im kamputōr ko n̄an ennaan wōt ippān membōr ro im n̄an tōpar ro kōm ekar jerbal ippāer, ro rekar jab jar aolep iien.
N̄an men bwe in boub wōt, ikar kālet n̄an kōm̧m̧an jet aō menmenbwij ko an baam̧le, men̄e ekar to an bin aō lo āt ko rekāāl. Ke ikar kōpeļļo̧ke FamilySearch, ikar lo juon kōjeļļā kōn juon rekoot ej kōttar n̄an kobaiki ilo menmenbwij eo aō. Rekoot in juon ekar tōl eō n̄an jeļā kōn 70 armej ro ilo menmenbwij eo aō. Ālikin ļalem raan ko, ekar jab bar ikutkut aō ellol et. Ālikin ļok raan eo, kōm ekar lo bwe em̧ōj kōtļo̧k kōm n̄an jepļaak n̄an jikin kabijuknen. Ij burom̧ōj bwe ij tōn rool, bōtaab ij barāinwōt en̄jake jeram̧m̧an bwe ikar maron̄ jerbal n̄an baam̧le eo aō ilo jim̧or turājet ko ruo an rōn̄ōļ eo ilo iien in epen.
Kim Nielson, Oregon, USA
Kōm̧m̧ane Ijo Koņaad n̄an Konm̧aanļo̧k wōt Jerbal eo an Irooj
Ke mijenede ro ilo eria eo amim rekar bōk ennaan eo n̄an pād wōt ilo m̧oko im̧weer, kōm ekar kajjieon̄ kōm̧m̧ane ijo koņaamim, kūrtok juon m̧ōttam n̄an ekkatak kōn Kabun̄ in. Mijenede ro rekar kwaļo̧k katak ko aer ilo taļeboon ko ippān eo m̧ōttam. Kōm ekar en̄jake kajoor eo an Jetōb ilo m̧oko im̧ōm, jej kam̧m̧oolol kōn kein jerbal kein elōn̄ ippād rainin. Ej juon men em̧m̧an kōn ad lo bwe jerbal eo an Irooj ej wōnm̧aanļo̧k wōt men̄e kōn aolep apan̄ kein ilo laļ in.
Elaina Reich, Washington, USA
Rilo̧mo̧o̧r eo Ej Ron̄ Ad Al
Ikar jerbal āinwōt juon Church-Service mijenede ilo burokūraam̧ eo an PathwayConnect ilo Kyiv Ukraine Stake. Ritōl ro an burokūraam̧ eo rekar kāālet n̄an katakin aolepemim ro rej tōl ilo iien aiintok doon an rijikuul bwe kōm en maron̄ kōm̧m̧ani ilo mejatoto. Ilo jejjōt in raan eo tok juon, kien eo ekar kōjjeļāik bwe aolep ren pād wōt ilo m̧ōko im jab em̧akūtkūt ilo Kyiv.
Em̧m̧an ippa iien eo ilo am aiin doon n̄an PathwayConnect. Im em̧m̧an ippa iien eo aiin doon n̄an kabun̄jar im al ippān doon ilo m̧ōko ilo raan in Jabōt. Ij kam̧oolol kōn kōjatdikdik in me ijo ruo ak jilu rej koba ilo Etan, E ej pād ijo. Ejjeļo̧k juon ejeļā eo ewi toon ad naaj pād wōt m̧ōko im jab em̧akūtkūt ilo Kyiv, bōtaab jejeļā bwe Rilo̧mo̧o̧r enaaj ron̄ ad al.
Kateryna Serdyuk, Kyiv, Ukraine
“Ej Iien n̄an Bōkļo̧k Baam̧le eo Am”
Ke nuuj ko rej kwaļo̧k kōn nan̄inmej in Covid-19, ikar en̄jake bwe rekar kōļapļap kake. Innām ilo raan ko tokālik, ekar jino nana aō mour m barāinwōt ikūm̧kūm̧ kōn ilju im jakļaj eo an laļ in ad.
Juon jibbon̄ ikar jab maron̄ bar jepļaak im bar kiki im ikar jijet im kōļmenļo̧kijeņ kōn ta unin men in. Innām aeņōm̧m̧an ekar itok. Jetōb ekar katakin eō bwe Irooj em̧ōj an letok juon menin letok n̄an eō. “Ej iien n̄an bōkļo̧k baam̧le eo am,” eaar ba.
Mour in eļap boub ie. Nan̄inmej in ej ajedeed ilo laļ in ekar letok juon iien n̄an baam̧le in amim n̄an ļōmņak kōn ta eo eaorōk: Gospel eo an Jisōs Kraist. Imaron̄ kadiwōjļo̧k ļōmņak ko renana kōn men ko rej waļo̧k ilo laļ in im ļōmņak wōt n̄an katakin ajri ro nejū n̄an reiļo̧k n̄an Kraist. Jemedwōj Ilan̄ ej ļōmņak kōn kōj. Eļapļo̧k aō en̄jake menin jān kar jinoin.
Mary Ostler, Nebraska, USA
Irooj Em̧ōj an Kōpooj Kōj n̄an Menin
Jinoin aer kar ba n̄an n̄a ke em̧ōj aer kabōjrak kweilo̧k ko an Kabun̄ in ilo tōrein wōt, ikar inepata jidik. Ak kiiō ke imaron̄ loe wāween an Irooj kar kōpooj kōj n̄an menin jān ippān rikanaan ro An. Ekkatak an gospel me ej pedped wōt ioon m̧ōko emaron̄ jipan̄ kōj eļļā jān iien ko reppen. Ij kam̧oolol bwe imaron̄ wōt bōk m̧ōttan kwojkwoj eo ilo raan in Jabōt ko im katak jān naan ko an rikanaan ro. Ej juon menin kaenem̧m̧an n̄an jeļā bwe m̧ae iien eo jebar maron̄ aiin doon, jemaron̄ en̄jake ejja Jetōb eo wōt.
Emma van As, Gauteng, South Africa
Em̧ōj kar Katakin Kōj Wāween Kabun̄ Jar
Ilo aō im ļāeo ippa kar bōk koņaam̧ro ilo kain̄i ko an kwojkwoj eo ilo m̧weo im̧ōm jinointata, ikar en̄jake Jetōb eo jon̄an an kajoor ke ekar pen aō al al eo kōm kar kālete. Ilo 70 jim̧a iiō ko in aō kobaļo̧k ilo kweilo̧k in jar ko, ijjab kemeemejļo̧k an ļap aō kam̧oolol kōn kōjeram̧m̧an ko em̧ōj am kar bōki kōn amim membōr im bōk koņaamim ilo Kabun̄ in an Jisōs Kraist im Armej ro Rekwojarjar ilo Raan ko Āliktata.
Em̧ōj katakin kōj kōn wāween ad kabun̄ jar im wōn eo jej kabun̄ jar n̄ane. Aaet, jej būrom̧ōj kōn ad iaieo ippān armej ro rekwojarjar m̧ōttad im jenaaj em̧ōņōņō in bar jepļaak n̄an “wāween eo m̧okta” ilo iien eo em̧ōkajtata, ak ij m̧ōņōņō kōn katak ko jej ekkatak kaki ilo iien in ilo ad ļoor kapilōk eo an rikanaan eo ilo kabun̄ jar ko ad “pedped ioon m̧ōko, Kabun̄ in ej rie”.
Susan Preator, Montana, USA
Kappukot Aeņōm̧m̧an im Ippān Doon
Kōm̧m̧an nokon in jota ko ilo m̧weo ej juon men me ļaddik eo nejū im n̄a kom̧ro ej ereim̧aanļo̧k kake aolep wiik ko. Ekijon̄ lōn̄ membōr ro, ro m̧ōttam, im mijenede ro rej ikutkut aer itok n̄an m̧weo im̧ōm. Innām men ko rekar ļap aer oktak kōn nan̄inmej in me ej ajedeed ilo laļ in. Kiiō kōmij kōm̧m̧an noko in jota an baam̧le ippān ro m̧ōttam ilo talboon. Ilo iien in ippān doon kōm kar maron̄ in kōm̧m̧ani men ko rellōn̄ me ekar kepaake kōm n̄an doon.
Ij lukkuun kam̧m̧oolol kōn rikanaan in ejitōnbōro ad, eo ekar kūr kōj aolep n̄an jitlo̧k. Elōn̄ iaad jekar maron̄ in en̄jake kajoor in ippān doon im aeņōm̧m̧an kōn menin ar waļo̧k. Ilo iien rōt in, aeņōm̧m̧an eo jej aikuji ej itok jān Rilo̧mo̧o̧r Jisōs Kraist.
Roshene McKenzie, Kingston, Jamaica
Anij Ej Pād ilo Jila eo
Ikar jino mijen eo aō ruo jimettan allōn̄ ko remootļo̧k. Kar likūt eō n̄an jerbal ilo Hermosillo, Mexico. Aolep raan ekar wōr aō iien n̄an ioon armej ro eļap aer em̧m̧an ro rekar pojak n̄an bōk gospel in em̧ōj an jepļaaktok. Ikar en̄jake bwe ikar kiiō ijjino kakūrm̧ool un eo aō ke COVID-19 ekar kakkure mije eo aō.
Eļap an kaburom̧ōjm̧ōj n̄an em̧m̧akūt jān armej ro eļap aō iakwe er, ak ikar barāinwōt en̄jake aeņōm̧m̧an im kōjparok kōnke ijeļā bwe Anij ej pād wōt ilo an kajebwebweik men otemjej. Eļap aō kam̧m̧oolol bwe elōn̄ juon ad rikanaan im Rijilōk ro n̄an tōl kōj ilo iien in. Āinwōt mijenede ro rellōn̄ ilo laļ in, ij tōmak bwe ejjab jem̧ļo̧k in mijen eo aō in. Ejjab to jān kiiō imaron̄ bar juon alen jipan̄ jerbal eo an Anij wōnm̧aaļo̧k wōt im wōnm̧aanļo̧k im āinwōt juon kein jerbal ilo pā ko Pein n̄an boktok jetōb ko n̄an ukweļo̧k.
Carolina Roman, Puerto Rico