Kajoor eo an Bok in Mormon n̄an Ukōt Mour an Armej

Elder Benjamin M. Z. Tai

Jān Jiljilimjuonn̄oul eo

Bok in Mormon ej letok ōn ko an jetōb, ej letok juon karōk in m̧akūtkūt, im ej koneeke kōj ippān Jetōb Kwojarjar.

Ālkin etale riboot jān juon aō taktō eo ekar lale ājmour eo aō, ikar ekkatak ke ij aikuj ukōt wāween aō mour. N̄an jipan̄ eō, taktō eo ekar je tok juon laajrak ikkijeen m̧ōņā ko kijō im aō kōmoururi ānbwinnū, eo me, n̄e inaaj kālet n̄an ļoore, enaaj ukōt eō n̄an juon armej ājmourrur.

Eļan̄n̄e kōj kajjojo jej etale kōj make ilo mour in jetōb, ta eo jenaaj ekkatak kake kōn kōj make? Ta okoktak ko me taktō eo ad ilo jetōb enaaj letok āinwōt uno in kōmour? Bwe jen erom̧ wōn eo me jej aikuj erom̧, emenin aorōk bwe jen jeļā ta eo n̄an kōm̧m̧ane im kōm̧m̧ane ta eo jejeļā kake.

Jisōs Kraist ej Taktō eo Etijem̧ļo̧k.¹ Kōn Pinmuur eo An, Ej kōmour kinej ko ad, ej bōk ioon en̄taan ko ad, im kōmour buruwōd erup.² Kōn An jouj mōjņo̧ ko ad remaron̄ erom̧ kajoor.³ Ej kūr kōj n̄an ļoor E⁴ ilo ad ekkatak kōn E, ron̄jake naan ko An, im etetal ilo ettā in Jetōb eo An.⁵ Ekar kallim̧ur n̄an jipan̄ kōj⁶ ilo jerbal in oktak tok in eaitok kitien, eo me ej ukōt kōj im boktok lan̄lōn̄ eo ejjeļo̧k jem̧ļo̧kin.⁷

Rilo̧mo̧o̧r ekar letok n̄an kōj Bok in Mormon āinwōt juon kein jerbal ekajoor n̄an jipan̄ ilo oktak tok. Bok in Mormon ej letok ōn ko an jetōb, ej letok juon karōk in m̧akūtkūt, im ej koneeke kōj ippān Jetōb Kwojarjar. Kar je bok in n̄an kōj,⁸ epād ie naan ko an Anij⁹ im ej kwaļo̧k n̄an kōj kadkadid, jibadbad, im mejān kajjik eo ad.¹⁰ Ippānļo̧k Baibōļ eo, Bok in Mormon ej kam̧ool kōn Jisōs Kraist¹² im ej katakin kōn wāween ad maron̄ jeļā m̧ool im erom̧ āinwōt E.

Brother Saw Polo ekar 58 an iiō dettan ke ekar jino jeļā kōn jepļaaktok eo an gospel eo an Jisōs Kraist. Ke ikar ioon e, eto an jerbal āinwōt juon branch būreejtōn ium̧win jejjo iiō, ak ikar jeļā ke ejjan̄in kar riiti Bok in Mormon kōnke ekar ejjeļo̧k ilo kajin eo an Burmese. Ke ikar kajjitōk ippān ekōjkan an kar jeļā ke bok in em̧ool ilo an jab riiti, ekar uwaak ke eto an kar ekkatak jān pija ko ilo bok eo etan Bwebwenato ko an Bok in Mormon im lale kōmeļeļe ko, ilo an kōjerbal tikjinede n̄an ukōt naan in Pālle ko, im jeik ta ko me ej ekkatak. Ekar kōmeļeļeik, “Aolep iien aō katak, ij jar kōn ta eo ikar ekkatak kake, im ikkein en̄jake aeņōm̧m̧an im lan̄lōn̄, ļōmņak eo aō emeļak, im buruō emera. Ikar en̄jake bwe Jetōb Kwojarjar ej kam̧ool n̄an eō bwe em̧ool. Ijeļā bwe Bok in Mormon ej naan an Anij.”

Āinwōt Brother Saw Polo, kajjojo iaad jemaron̄ ekkatak Bok in Mormon ekkar n̄an jekjek ko jepād ie. Ilo ad ikdeleel n̄an tōmak im kejo̧kļo̧kjeņ kōn katak ko ilo buruōd, jemaron̄ kajjitōk ippān Anij ilo tōmak eļan̄n̄e katak kein rem̧ool.¹² Eļan̄n̄e jej m̧ool ilo ikdeleel ko ad n̄an jeļā im kōn kōttōpar em̧ool n̄an kōm̧m̧ane, Enaaj uwaake kōj ilo buruwōd kōn Jetōb Kwojarjar. Im jān kajoor eo an Jetōb Kwojarjar jej maron̄ jeļā m̧ool eo an men otemjej.¹³ Ro rej bōk juon kam̧ool ekwojarjar kōn Bok in, jenaaj barāinwōt jeļā ejja jān kajoor in wōt bwe Jisōs Kraist ej Rilo̧mo̧o̧r an laļ in, bwe Josep Smith ej rikanaan eo An, im bwe Kabun̄ eo an Jisōs Kraist im Armej ro Rekwōjarjar ilo Raan ko Āliktata ej Kabun̄ eo em̧ōj an jepļaaktok.¹⁴

Ke ikar juon likao ikar jino mijen eo aō, ikar iuwe ilo baļuun eo im jipadōkļo̧k Australia. En̄jake ajimakeke, ikūmkūm, im jabwe aō jeļā ak ikar wūjlepļo̧k aolepān aō n̄an jerbal, ikar lukkuun aikuj kam̧ool bwe ta eo ikar tōmake em̧ool. Ikar jar im riiti jeje ko rekwojarjar kōn bōro em̧ool, ak ilo an etal wōt baļuun eo, aō pere ekar ļapļo̧k im ājmour eo ilo n̄a ekar jino nanaļo̧k wōt. Ālkin aō kar kate eō ium̧win jejjo awa, rijerbal eo ilo baļuun eo ej etetal tok ilo jikin etetal eo ilo baļuun eo im bōjrak tok kijjeen wōt jea eo aō. Ekar bōk Bok in Mormon eo jān peiū me ikar riiti. Ekar lale kōbar eo im ekar ba, “Ej juon bok eo em̧m̧an!” innem bar karooltok im etal wōt. Ikar jab bar lo e.

Ke ikar ron̄ naan kein an ilo lo̧jiln̄ū, ekar alikkar aō ron̄ im en̄jake ilo buruō, “N̄a e ijin, im Ijeļā kwopād ia. Kwon kōm̧m̧ane jon̄an wōt am̧ maron̄, bwe Inaaj kōm̧m̧ani men ko jet kwolikjab kaki.” Ilo baluun eo ilōn̄in lomaļoon Pacific, ikar bōk juon aō make kam̧ool jān aō ekkatak jān Bok in Mormon im unoojdikdik eo an Jetōb Kwojarjar bwe aō Rilo̧mo̧o̧r ekar jeļā wōn n̄a im bwe gospel eo em̧ool.

Elder David A. Bednar ekar katakin: “Ilo ad jeļā bwe gospel eo em̧ool emenin aikuj n̄an juon naan in kam̧ool. Niknik ilo m̧ool n̄an gospel eo emenin aikuj n̄an oktak tok.”¹⁵ Oktak tok emenin aikuj bwe jen “ri kōm̧anm̧an naan eo, im jab ri ron̄jake wōt.”¹⁶ Karōk in m̧akūtkūt eo an Irooj n̄an kōj—katak an Kraist—eļap katakin kake im ealikkar ilo Bok in Mormon.¹⁷ Menin ekoba:

• Kein kajuon, kōmourruri tōmak eo ad ilo Jisōs Kraist ilo ad lōke E, kōjparok kien ko An, im jeļā bwe E enaaj jipan̄ kōj.¹⁸

• Kein karuo, ukweļo̧k aolep raan kōn lipijinjin ko ad im en̄jake lan̄lōn̄ im aeņōm̧m̧an n̄e E ej jeorļo̧k ad bōd.¹⁹ Ukweļo̧k emenin aikuj bwe jen jeorļo̧k an ro jet bōd²⁰ im jipan̄ kōj wōnm̧aanļo̧k wōt. Rilo̧mo̧o̧r ekar kallim̧ur n̄an jeorļo̧k ad bōd emakijkij ilo ad ukweļo̧k.²¹

• Kein kajilu, kōm̧m̧an im kōjparok bujen ko ippān Anij kōn kain̄i ko āinwōt peptaij. Menin enaaj dāpij kōj ilo iaļan bujen eo me ej tōl n̄an Ippān.²²

• Kein kemān, bōk mennin letok eo an Jetōb Kwōjarjar. Menin letok in ej kōtļo̧k ad dāpij jem̧jerā eo an juon eo ej karreoik kōj, kaeņōm̧m̧an, im tōl kōj.²³

• Kein kōļalem, niknik n̄an jem̧ļo̧kin ilo ad bun̄ m̧aanļo̧k im dim ilo ad kwojkwoj aolep raan ioon naan ko an Kraist.²⁴ Ilo ad kwojkwoj ioon Bok in Mormon im jirōk likatōttōt n̄an katak ko an, jemaron̄ anjo̧ jān kapo ko im bōk tōl im kōjparok ilo aolepān mour ko ad.²⁵

Ilo ad niknik im mour kōn katak ko an Kraist ilo mour ko ad, jenaaj eļļā jān men ko me rej bōbrae kōj jān ad ukōt mour ko ad. Jenaaj bōk revelesōn ko ad make kajjojo, im Jetōb Kwojarjar “enaaj kwaļo̧k n̄an kom̧ aolep men ko kom̧ij aikuj kōm̧m̧an,”²⁶ im “naan ko an Kraist renaaj jiron̄ kom̧ aolep men ko kom̧ij aikuj kōm̧m̧an.”²⁷

Ium̧win 20 iiō ko, Bratōr Huang Juncong ekar to an bōk dānin kadōk, kōbataat, im ikkure kōn jāān. Ke ekar jino jeļā wōn in Jisōs Kraist im gospel eo An me em̧ōj an jepļaaktok, Bratōr Huang ekar ikdeleel n̄an ukōt mour eo an n̄an baam̧le eo an me rej dikwōt. Apan̄ eo an eļaptata ekar kōbataat. Juon eo eļap an kōbataat, ekar kajjieon̄ kōbōjrake elōn̄ alen ak ejjab tōprak. Juon raan naan kein jān Bok in Mormon rekar pād ilo kōļmenļo̧kjeņ eo an: “kōn juon bōro em̧ool im kōn lukkuun kōttōpar.”²⁸ Men̄e kajjieon̄ ko kar m̧oktaļo̧k rekar jab tōprak, ekar en̄jake bōlen emaron̄ oktak kōn jipan̄ jān Jemedwōj Ilan̄ im Jisōs Kraist.

Mijenede ro rej jerbal aolep raan rekar kobaik tōmak ko aer ippān tōmak eo an im leļo̧k juon karōk in m̧akūtkūt n̄an kōbōjrak an kōbataat, ippānļo̧k ikutkut in jar im ekkatak naan ko an Anij. Kōn bōro em̧ool im lukkuun kōttōpar, Bratōr Huang ekar tiljek ilo kije im ekar lo bwe āinwōt an kar mije imminene kāāl ko me ekar kōņaan kōļapļo̧k, āinwōt ekkatak Bok in Mormon, ekar dikļo̧k an mije iminene ko me ekar kōņaan juļo̧ki.

Reilikļo̧k n̄an en̄jake eo an jān 15 iiō ko rem̧ootļo̧k, ekar kwaļo̧k, “Ijjab keememej lukkuun n̄āāt eo ikar bōjrak jān kōbataat, ak ke ikar kajjieon̄ aolep raan n̄an kōm̧m̧ani men ko ikar jeļā ke iaikuj kōm̧m̧ani n̄an karuwaineneiktok Jetōb eo an Irooj ilo mour eo aō im kar wōnm̧aanļo̧k wōt im kōm̧m̧ani, ikar jab bar kōņaan bar kōbataat im ijjan̄in bar jān iien eo. Kōn mour ekkar n̄an katak ko ilo Bok in Mormon, mour eo an Bratōr Huang ekar oktak, im ekar erom̧ juon baba eo im ļeo pālele em̧m̧anļo̧k.

Būreejtōn Russell M. Nelson ekar kallim̧ur: “Ilo am̧ jar im lukkuun ekkatak jān Bok in Mormon aolep raan, kwonaaj kōm̧m̧ani kālet ko rem̧m̧antata—aolep raan. Ij kallim̧ur bwe ilo am̧ kejo̧kļo̧kjeņ kōn ta eo kwoj ekkatak, wūnto in lan̄ enaaj peļļo̧k, im kwonaaj bōk uwaak ko n̄an kajjitōk ko am̧ im tōl n̄an mour eo am̧ make. Ij kallim̧ur bwe ilo am̧ leļo̧k eok make aolep raan n̄an Bok in Mormon, kom̧ maron̄ lo kōjparok ņae men ko renana an raan kein, aaet ibebtok in pija ko retonoon im an̄n̄ūrlep ko rej kakkure jetōb ko ad.”²⁹

Ro m̧ōtta rejitōn bōro, Bok in Mormon ej naan an Anij, im jenaaj epaakeļo̧k E eļan̄n̄e jej katak jāne.³⁰ Ilo ad idajon̄jon̄e naan ko an, jenaaj bōk juon kam̧ool kōn m̧ool ko an.³¹ Ilo ad mour jejjet ekkar n̄an katak ko an, jeban bar “kōņaan n̄an kōm̧m̧an nana.”³² Buruōd, paaktokid, im piktokid renaaj oktak n̄an erom̧ eļapļo̧k āinwōt Rilo̧mo̧o̧r.³³ Ij kwaļo̧k aō kam̧ool em̧ool bwe Jisōs ej Kraist eo, ad Rilo̧mo̧o̧r, Ripinmuur, im eo M̧ōttad. Ilo etan Jisōs Kraist, amen.

Kakeememej ko

1. Lale Mark 2:17.

2. Lale Sam Ko 147:3; Aiseia 53:4; Matu 8:17.

3. Lale 2 Nipai 25:23; Jekab 4:7; Ether 12:27.

4. Lale Matu 19:21; Mark 10:21; Luk 18:22; 2 Nipai 31:10.

5. Lale Katak im Bujen ko 19:23.

6. Lale Aiseia 41:10.

7. Lale Mosaia 2:41; 3:19; 5:2.

8. Lale 2 Nipai 25:8, 21–22; Mormon 7:1; 8:35.

9. Lale 2 Nipai 25:7; 31:2–3.

10. Lale 2 Nipai 2:25; Alma 40.

11. Lale Aiseia 29:4, 11–18; Ezekiel 37:16–21; 2 Korints 13:1; 1 Nipai 13:38–42; 2 Nipai 3:12; 25:26.

12. Lale Alma 32:26–43.

13. Lale Moronai 10:3–5.

14. Lale kadkadin Bok in Mormon.

15. David A. Bednar, “Oktak tok n̄an Irooj,” Liaona, Nob. 2012, 109.

16. Jemes 1:22.

17. Lale 2 Nipai 31; 3 Nipai 11:31–40; 27:13–22.

18. Lale 1 Nipai 3:7; Moronai 7:33.

19. Lale Mosaia 4:3.

20. Lale Matu 18:21–35; Mark 11:25–26; Luk 6:37; 3 Nipai 13:14–15; Katak im Bujen ko 64:10; 82:1.

21. Lale Mosaia 26:30; Moronai 6:8.

22. Lale 2 Nipai 31:17–18.

23. Lale 1 Nipai 10:19; 2 Nipai 33:1; 3 Nipai 11:32; 28:11; Moronai 6:4.

24. Lale 2 Nipai 31:20.

25. Lale 1 Nipai 15:24.

26. 2 Nipai 32:5; eoon eo eaorōk kar kobaiktok.

27. 2 Nipai 32:3; eoon eo eaorōk kar kobaiktok.

28. Moronai 10:4.

29. Russell M. Nelson, “Bok in Mormon eo: Eļan̄n̄e en kar Ejjeļo̧k Elmen Nej Kar Mour eo Am̧?” Liaona, Nob. 2017, 62–63.

30. Rikanaan Josep Smith ekar ba kōn Bok in Mormon, “Juon armej enaaj epaakeļo̧k Anij jān an mour ekkar n̄an katak ko ie, jān jabdewōt bok ko jet” (Kadkadin Bok in Mormon).

31. Lale Jekab 6:7; Alma 32:26–43.

32. Alma 19:33.

33. Lale 2 Korint 5:17; Mosaia 3:19; 5:2; Alma 5:14, 19.