Etetal ilo Meram an Kraist

Jān Elder Kazuhiko Yamashita

Rikakpilōklōk eo Kein Karuo ilo Pacific Area Presidency

Em̧ōj an mootļo̧k de jiljino allōn̄ ilo iiō in. Ewi wāween ami kar bōk koņaami ilo 2020 Jibadbad eo an Eria? Kōjatdikdik bwe, kom̧ij mōņōņō ilo Jibadbad eo an Eria ilo iiō in im kom̧ij en̄jake ami etetal ilo meram eo an Kraist kōn jibadbad in.

Jibadbad eo an Eria ilo iiō in epidodoļo̧k ilo kalimjōke jān kar iiō ko m̧oktaļo̧k im ej pedped ioon Jisōs im kapilōk eo n̄an “Etetal ilo Meram an Kraist.” Kōnke Jisōs Kraist ej kūr kōj n̄an erom̧ juon wōt Ippān, jej aikuj etetal ilo meram eo An.

Etetal ilo Meram eo

Kōmij rōjan̄ kom̧ n̄an ļoor Jisōs Kraist aolep iien. Jab etetal ilo marok.

Iiō ko ļo̧k, ke ikar jokwe ilo Utah, ikar bōk juon kūlaaj in ski in bon̄. N̄an kōkōm̧anm̧anļok kapeel ko aō, aolep iien ij ļoor rūkaki eo am, ikkein ski wōt iturin ilo tulik. Ijoke, juon bon̄, ikar jab kepaake im, ilo aō jab ļōmņak kake, ikar kāālet juon iaļ eoktak. Ekar ejjeļo̧k meram n̄an jipan̄ eō loļo̧kjeņ. Jidimkijin wōt, kar jolōn̄ļo̧k eō ņai imejatoto, innām wōtļo̧k laļļo̧k im patpat kōn meja ioon sņo ko. Ļōmņak ekar em̧m̧an aō pād im kajju bar jerkak im bar jino ski im kobaļo̧k ippān rūkaki eo am im rijikuuļ ro jet. Ke kōm kar pād lowaan jikin kōppād eo rūkaki eo ej kūr eō bwe in tin lale eō make ilo kūlaaj eo. Ke ikar kalimjōk pijaaū ilo kūlaaj eo, ikar kile bwe kōļar in kūlū ekar oktak. Rūkaki eo am ekar letok jet to̧o̧l māņeeņ im ba in pād wōt ilowaan jikin kōppād eo. Ikar jab jeļā ke annan̄ in jorrāān ko ilo kūlū kōn m̧ōlo in aij rekar jino waļo̧k. Bon̄ōn eo ikar etetal ilo marok im en̄taan itok jān jorrāān eo.

Ro jeiū im jatū rejitōbōro jen kāālet n̄an etetal ilo meram.

Emen Wāween ko n̄an Etetal ilo Meram an Kraist:

Kautiej raan in Jabōt
Kappukot kōjeraam̧m̧an ko an tampeļ
Erom̧ un̄n̄are-pein make ilo jetōb im kanniōk
Jerbal ilo aiintok Israel im jerbal in karejar

Kōmij tōmak bwe kajjojo membōr im baam̧le ilo Pacific Eria remaron̄ kōm̧m̧an kōttōpar ko aer make im ko an baam̧le ikkijeen 2020 Jibadbad eo an Eria.

M̧oktata: Etetal ilo meram̧ an Kraist ilo ad kautiej raan in jabōt.

Āinwōt juon tōprak itok jān ad jab maron̄ kepaak doon kōn wōt nan̄inmej in COVID-19 ilo iiō in, eļapļo̧k iien ko ad rem̧m̧an n̄an en̄jake lan̄lōn̄ kōn gospel eo me ej kōkajoorļo̧k m̧ōko. Kōmij tōmak naan in kam̧ool ko em̧ōj aer kajoorļo̧k kōn en̄jake kein.

Ejjeļo̧k ejeļā ewi aitokan in nej nan̄inmej in COVID-19 im kilaan naaj jelōt kōjwōj aolep. Ijo wōt ke, jen wōnm̧aanļo̧k wōt im en̄jake lan̄lōn̄ kōn gospel eo me ej kōkajoorļo̧k m̧ōko im kabun̄ jar ilo jetōb ilo im̧ōko im̧ōd make. N̄e ejem̧ļo̧k an ajedeed nan̄inmej in COVID-19, jen jepļaak n̄an M̧ōn Jar ko iien eo jemaron̄ im m̧ōņōņō ilo ad jelm̧ae im ioon ro jet. Jen karuwaineneik ro m̧ōttad im ro rūturid n̄an ‘itok im lo’ iien jar ko ad ilo Jabōt. Jen barāinwōt lem̧ōņōņō ilo joteen ko ilo m̧ōko ijo jej ekkatak ippān doon jān bok eo etan Itok, Ļoor Eō—n̄an Kajjojo Armej im Baam̧le ko; jekdo̧o̧n n̄e ļalem ak jon̄oul wōt minit.

Ruo: Etetal ilo meram an Kraist ilo ad kappukot kōjeraam̧m̧an ko an tampeļ.

Kwoj ke kabwijer juon pepa in mālim ekāāl n̄an deļon̄e tampeļ? Men̄e jet iaami ejjab emakijkij aer maron̄ deļon̄e tampeļ, jej aikuj kabwijer pepa in mālim ekāāl n̄an deļon̄e tampeļ aolep iien. Jej aikuj kwaļo̧k bwe jej erreo im̧aan mejān Anij. Likao ran im Jiron̄ ran, kom̧ ej aikuj bar kabwijer peba in mālim n̄an deļon̄e tampeļ. Eļan̄n̄e kom̧ij etal ippān bisop eo ami im ba, “Bisop, ikōņaan kabwijer juon aō peba in mālim n̄an deļon̄e tampeļ,” enaaj jipan̄ kom̧ kōn eļap lan̄lōn̄.

Eļan̄n̄e kom̧ij jab jeļā ekōjkan loe im kōm̧m̧an ļo̧o̧k kōn menmenbwij an baam̧le eo ami, kajjitōk ippān ward ak branch ritōl eo me ej loloorjake tampeļ im baam̧le ak rijipan̄ ro. Enaaj ļapļo̧k aer m̧ōņōņō in jipan̄ kom̧.

Jilu: Etetal ilo meram an Kraist ilo ad mour kōn gospel ilo m̧ōko.

Ilo iiō in, jej jeraam̧m̧an ilo ad ekkatak Bok in Mormon ilo m̧ōko aolep raan ilo ad kōjerbal bok eo etan Itok, Ļoor Eō—n̄an Kajjojo Armej im Baam̧le ko. Kōmij kōketak aolep membōr ro ilo aolepān Eria in, n̄an ejaake juon iminene etiljek n̄an ekkatak Bok in Mormon ilo m̧ōko aolep raan.

N̄an kakobaba, Doulul eo an Likao ro im Doulul eo an Jiron̄ ro, kōmij kōketak kom̧ n̄an bōk koņaami ilo Būrookraam̧ eo ekāāl an Ajri im Jodikdik ro.

Emen: Etetal ilo meram an Kraist ilo ad aiintok Israel im jerbal in karejar.

Ekōjkan ami kar erļoke kūr eo n̄an “Itok im Lo,” “Itok im Jipan̄” im “Itok im Pād Wōt”? Men kein rej kein jerbal ko relukkuun pidodo im jeminene kaki n̄an kūr ro jet n̄an itok n̄an Kraist. Kōmij kajjitōk ippāmi n̄an kōjebali kūr kein, jerbal aolep iien ippān mijinede ro me rej jerbal aolep raan, im ritōl ro im mijenede ro an ward eo.

Likao ran, jeaikuji jipan̄ eo ami! Āinwōt an Būreejtōn Russell M. Nelson kar ba, ko̧mij ritariņae ro an Irooj. Kom̧ij jetōb ro kar kāālet er. Kōmij rōjan̄ kom̧ aolep n̄an etal im mijen im jerbal n̄an Irooj. Elōn̄ ro m̧ōttad indeeo ro rej kōttar kom̧ n̄an jipan̄ boktok er n̄an mour indeeo.

Bōk Koņaami ej men eo m̧oktata.

Jet iaami remaron̄ en̄jake bwe men kein reppen. N̄an tōpar kōttōpar ko, jen jino kōn men ko repidodo. Jen jipan̄ doon.

Ilo ennaan eo an eo ej taitōļ “Pukkot Ekkatak kōn Tōmak”, jān Elder Bednar ekar kōnono kōn juon bwebwenato ilo Kallim̧ur M̧okta im ekar katakin kōj bwe:

Bōk koņaad ej n̄an kōmourur tōmak. Ajri ro nejin Israel raar ineek teptep in bujen eo. Raar itok n̄an Reba Jordan. Kallim̧ur eo bwe renaaj kar kijoone ioon āne em̧ōrā. N̄aat eo dān eo ekar jepeļļo̧k? Ke ne ko neer rekar tutu. Rekar etetal ilo reba eo—rekar jerbale tōmak eo aer. Kajoor ekar itok ālkin aer kar jerbale tōmak eo aer—dān eo ekar jepeļļo̧k. (“Seek Learning by Faith” [address to Church Educational System religious educators, Feb. 3, 2006], lds.org/media-library)

Jibadbad eo an Eria ej ami kōttōpar.

2020 Jibadbad eo an Eria ej ami kōttōpar. Ejjab wōt an Eria Būreejtōnji eo n̄an kōjerbale jibadbad in. Etke ejaam wōr an Eria Jibadbad?

Jerbal eo an juon rikanaan in Hibru etto ekar jerbal āinwōt ribokto boktak ennaan an Anij im n̄an kwaļo̧k ankilaan Anij. Amos ekar kajoor ilo an kar kam̧ool ke ekar ba, “Ilo m̧ool Irooj Jeova e jab kōm̧m̧an jabdewōt n̄e ab Ej kwaļo̧k pepe eo An n̄an ro ri karejeran, ri kanaan ro” (Amos 3:7).

Rikanaan ro raan kein ewōr aer eddo ejja in wōt. Rej kōnono n̄an kōj āinwōt aer bōk im̧we jān Jetōb Kwojarjar eo im ba n̄an kōj kōn ankilaan Anij. Eļan̄n̄e rejjab, ta eo jenaaj kar kōm̧m̧ane? “Ijo ejjeļo̧k visōn ie, armej rej jebwābwe” (Jabōn Kōnnaan 29:18). Jān ennaan ko an rikanaan ro, jemaron̄ jeļā ta eo Anij ej kōtmene jān kōj. Būreejtōnji eo Kein Kajuon im Doulul eo an Jon̄oulruo Rijilōk ro rekar letok n̄an kōj naan in kōmeļeļe ko rekāāl im juon tōl ekāāl. Rekar kwaļo̧k visōn eo aer. Kōn kapilōk jān er, kōm kar ejaake 2020 Jibadbad eo an Eria. 2020 Jibadbad eo an Eria ej kōmejajaik visōn eo im men ko raorōk tata an rikanaan ro. Kōm kar kōm̧m̧ane jibadbad in ālkin am kar kappukot im̧we, ālkin kōmeļeļe eo eaitok, im kōn jar em̧ool.

Būreejtōn Russell M. Nelson ekar kallim̧ur, “Likūt wōt Rilo̧mo̧o̧r ilo ioļapļap in karōk ko ami. Iien otemjej kajjitōk ippam̧ make im jar n̄an kajjitok ippān Jemam̧ ilan̄, ‘Ta eo imaron̄ kōm̧m̧ane n̄an erom̧ āinwōt Jisōs Kraist?’ Ilo am̧ kōm̧m̧ane menin kajjojo raan, kabwilōn̄lōn̄ ko renaaj waļo̧k.” (A special message for children and youth at the beginning of a Face to Face event with Elder Gerrit W. Gong—Children and Youth: Nobōm̧ba 17, 2019)