Te ta’ere a te Mesia
E nehenehe tātou e poihere i tā tātou iho ta’ere maita’i roa a’e o te fenua nei, ’e ’ia riro ’ei ta’ata ’āmui tā’āto’a mai i roto i te ta’ere mure ’ore ’o te tae mai nā roto mai i te ’evanelia a Iesu Mesia.
’Auē te nehenehe te ao tā tātou e ora nei ’e e ’ōpere nei, e nohora’a nō te mau ta’ata e rave rau, nō te mau reo, nō te mau hīro’a tumu ’e te mau ’ā’amu—ha’apararehia i roto e rave rahi hānere fenua ’e e tauatini pupu, e ta’ere faufa’a tā rātou tāta’itahi. ’Ua rau te mau tumu e ti’a i te ta’ata nei ’ia poupou ’e ’ia fa’ahanahana i te reira. Terā rā mai te mea e nehenehe te hō’ē peu i ha’api’ihia mai—terā mau mea tei tu’uhia mai i mua ia tātou nā te ta’ere, ’a pa’ari ai tātou—e tāvini ’ei pūai rahi i roto i tō tātou orara’a, e nehenehe ato’a te reira, i te hō’ē taime, e riro mai ’ei fifi rahi.
E nehenehe e mana’ohia ē, ’ua mau roa te ta’ere i roto i tō tātou ferurira’a ’e te peu, e’ita atu ra e ti’a fa’ahou e taui. Nā te hō’ē tuha’a rahi o te mau mea tā tātou e putapū, e fa’ata’a ia tātou, ’e nā roto i te reira e ’ite ai tātou i te hō’ē ti’ara’a ihota’ata. E nehenehe te reira e fa’atupu i te hō’ē fa’aurura’a rahi, ’ore atura tātou e ’ite i te mau paruparu ’aore rā, i te mau fifi tā te ta’ata i fa’atupu i roto i tā tātou iho ta’ere, nā te reira ïa e tāpe’ape’a ia tātou ’ia fa’aru’e i te tahi mau « peu tahito a tō tātou mau metua ». ’Ia fa’atumu rahi roa ana’e tātou i ni’a i te ti’ara’a ta’ere o te hō’ē ta’ata, e nehenehe te reira e tūra’i ia tātou ’ia pāto’i i te mau mana’o—te mau huru—te mau peu maita’i ’e te pae fa’aro’o.
’Ua mātau vau i te hō’ē ta’ata fa’ahiahia, tau matahiti ri’i i ma’iri a’e nei, tei tauturu ’ia fa’ahōho’a i teie parau tumu rahi nō te ta’ere myopia ’Ua fārerei mātāmua vau iāna i Singapour ’a fa’ata’ahia ai au ’ei taea’e hāhaere nō tōna ’utuāfare. E ’orometua tu’iro’o ’oia nō te Sanskrit ’e nō te Tamil, nō te fenua Initia mai ’oia. E melo nō te ’Ēkālesia tāna vahine maita’i roa ’e nā tamāroa e piti, ’ōna rā, ’aita roa atu ïa i ’āmui mai i roto i te ’Ēkālesia, ’aita ato’a i fa’aro’o rahi i te mau ha’api’ira’a o te ’evanelia. ’Ua ’oa’oa ’oia i te huru tupura’a o tāna vahine ’e nā tamāroa, ’e ’ua pāturu hope roa ’oia ia rātou i roto i tā rātou mau ’ohipa ’e te mau hōpoi’a o te ’Ēkālesia.
I tō’u anira’a e ha’api’i iāna i te mau parau tumu o te ’evanelia ’e e fa’a’ite i tō tātou mau ti’aturira’a iāna, ’ua ’ōti’ati’a ri’i ’oia i te ha’amatara’a. E ma’a taime roa i ’ite ai au ē, nō te aha : ’Ua mana’o ’oia ē, ’ia fāri’i ana’e ’oia, e riro mai ’oia ’ei ho’o ’āi’a nō tōna orara’a i ma’iri ra, nō tōna nūna’a, ’e nō tōna ’ā’amu ! I roto i tōna ferurira’a, tē huna ra ïa ’oia i tōna huru, i te mau mea ato’a tā tōna ’utuāfare i ha’api’i iāna ’ia riro, tōna faufa’a ’āi’a Initia tumu. I roto i te mau ’āva’e i muri mai, ’ua ti’a ia mātou ’ia paraparau i ni’a i teie mau fifi. ’Ua fa’ahiahia vau (’aita ra i māere !) i te huru o tō te ’evanelia a Iesu Mesia ’īritira’a i tōna nau mata i ni’a i te hō’ē hi’ora’a ta’a ’ē.
I roto i te rahira’a o te mau ta’ere tei ha’amauhia e te ta’ata, e ’itehia te maita’i ’e te ’ino, te patura’a ’e te ha’amoura’a.
E rave rahi mau fifi o tō tātou nei ao e hope’ara’a ïa nō te ’arora’a i rotopū i te feiā mana’o ’e te peu ta’a ’ē nō roto mai i tā rātou ta’ere. Terā rā, e mou ’oi’oi noa te mau ’arora’a ’e te mau ’ārepurepura’a ato’a ’āhiri te ao nei e fāri’i noa i tāna « ta’ere tumu », te ta’ere tā tātou i fāri’i ’aita i maoro roa a’e nei. Nō ’ō mai teie ta’ere i te tau o tō tātou orara’a hou te tāhuti nei. ’O te ta’ere teie a Adamu ’e a Enoha. E ta’ere teie tei niuhia i ni’a i te mau ha’api’ira’a a te Fa’aora i te ’āfara’a o te tau, ’e e roa’a fa’ahou te reira i te mau vahine ’e te mau tāne ato’a i tō tātou nei ’anotau. E mea ta’a ’ē te reira. ’O te ta’ere tei hau i te rahi i te mau ta’ere ato’a ’e nō roto mai te reira i te fa’anahonahora’a nō te ’oa’oa, tei pāpa’ihia e te Atua, ’e tei pāruruhia e te Mesia. E tāhō’ē ’oia, ’eiaha rā e fa’a’amahamaha E fa’aora ’oia ’eiaha rā e fa’a’ino.
Tē ha’api’i nei te ’evanelia a Iesu Mesia ia tātou ē, tē vai nei te fā i roto i te orara’a. E ’ere tō tātou taera’a mai i’ō nei mea nā roto i te hō’ē ’ati rahi ’aore rā, te hō’ē hape i te ao nui ! Tei ’ō nei tātou nō te hō’ē tumu.
’Ua tanuhia teie ta’ere i roto i te ’itera’a pāpū ē, tē vai nei tō tātou Metua i te ao ra, tē vai mau nei ’oia, ’e tē here nei ’oia ia tātou tāta’itahi. ’O tātou tāna « ’ohipa ’e [tōna] hanahana ». 1 Tē ’ati nei teie ta’ere i te ha’api’ira’a o te faufa’a ’aifāito. ’Aita e fa’anahora’a pupu ’aore fāito ta’ata. Inaha ho’i, e mau taea’e ’e e mau tuahine tātou, e mau tamari’i vārua nā tō tātou nā Metua i te ao ra—mau. ’Aita e mana’o fa’a’ino, ’aore rā, e ferurira’a « e pāto’i mātou ia rātou » i roto i te ta’ere rahi a’e i te mau ta’ere ato’a. ’O tātou pā’āto’a « tātou ». ’O tātou pā’āto’a « rātou ». Tē ti’aturi nei tātou ē, e hōpoi’a nā tātou ’e e ti’a’aura’a nō tātou iho, te tahi ’e te tahi, te ’Ēkālesia, ’e tō tātou ao. E mea faufa’a roa te hōpoi’a ’e te ti’a’aura’a i roto i tō tātou tupura’a i te rahi.
Te aroha, te aupurura’a mau mai tā te Mesia, ’o te tumu mau ïa o teie ta’ere. E māna’ona’o pāpū tātou i te mau hina’aro o tō tātou mau ta’ata tupu, i te pae tino ’e i te pae vārua, ’e e ’ohipa tātou i ni’a i te reira mau mana’o. E fa’a’ore te reira i te mana’o ’ino ’e te riri rahi.
Tē fana’o nei tātou i te hō’ē ta’ere o te heheura’a, fa’atumuhia i ni’a i te parau a te Atua ’a fāri’ihia ai e te mau peropheta (’e ’o tā te Vārua Maita’i iho e hi’opo’a nō tātou tāta’itahi). E nehenehe te mau ta’ata ato’a e ’ite i te hina’aro ’e i te mana’o o te Atua.
Tē pāruru nei teie ta’ere i te parau tumu o te ti’amāra’a. E mea faufa’a roa te ti’ara’a ’ia mā’iti nō tō tātou tupura’a ’e tō tātou ’oa’oa. E mea faufa’a te mā’itira’a ma te pa’ari.
E ta’ere nō te ha’api’ira’a mai ’e nō te tuatāpapara’a. E ’imi tātou i te ’ite ’e i te pa’ari ’e i te mea maita’i a’e i roto i te mau mea ato’a.
’O te ta’ere nō te fa’aro’o ’e nō te ha’apa’o. Te fa’aro’o ia Iesu Mesia ’o te parau tumu mātāmua ïa o tā tātou ta’ere, ’e te ha’apa’o i tāna mau ha’api’ira’a ’e te mau fa’auera’a ’o te hope’ara’a ïa. Nā te reira e hōro’a mai i te ha’avīra’a iāna iho.
’O te ta’ere nō te pure. Tē ti’aturi nei tātou ē, e’ita te Atua e fa’aro’o noa mai ia tātou, e tauturu ato’a mai rā ’oia ia tātou.
’O te ta’ere nō te mau fafaura’a ’e te mau ’ōro’a, nō te mau ture mōrare teitei, nō te tusia, nō te fa’a’orera’a i te hapa ’e te tātarahapa, ’e nō te ’atu’atura’a i te hiero o tō tātou tino. Tē fa’a’ite nei teie mau mea ato’a i tō tātou pūpūra’a ia tātou i te Atua.
E ta’ere fa’aterehia e te autahu’ara’a, te mana nō te rave nā roto i te i’oa o te Atua, te mana o te Atua nō te ha’amaita’i i tāna mau tamari’i. E fa’ateitei ’e e tauturu te reira i te mau ta’ata ’ia riro ’ei mau ta’ata maita’i a’e, ’ei feiā fa’atere, ’ei mau metua vahine, ’ei mau metua tāne, ’e (ei mau hoa maita’i a’e— ’e e ha’amo’a te reira i te ’utuāfare.
Tei roto i teie ta’ere te mau temeio mau e rave rahi, te ta’ere tahito roa a’e i te mau ta’ere ato’a, e ravehia nā roto i te fa’aro’o ia Iesu Mesia, te mana o te autahu’ara’a, te pure, te ha’amaita’ira’a i te ta’ata iho, te fa’afāriura’a mau ’e te fa’a’orera’a hara.
E ta’ere nō te ’ohipa misiōnare. E faufa’a rahi tō te mau vārua ta’ata.
I roto i te ta’ere a te Mesia, e fa’ateiteihia te mau vahine i tō rātou ti’ara’a ti’a ’e te mure ’ore. E ’ere rātou i te tītī nā te mau tāne, mai tei roto i te mau ta’ere e rave rahi i roto i te ao i teie mahana, e mau ’āpiti hope rā ’e te ’aifāito i’ō nei ’e i roto i te ao a muri a’e.
E turu teie ta’ere i te mo’ara’a o te ’utuāfare. Te ’utuāfare ’o te fa’anahora’a niu o te tau a muri atu. E mau’ara’a maita’i te mau huru tusia ato’a nō te maita’i o te ’utuāfare, nō te mea, mai tei ha’api’ihia, « ’aore e manuiara’a ’ē atu e nehenehe e fa’a’āfaro i te manuia ’ore i roto i te fare ». 2 I roto i te fare e ravehia ai tā tātou mau ’ohipa maita’i a’e, ’e e tae’ahia ai tō tātou ’oa’oa rahi a’e.
I roto i te ta’ere a te Mesia tē vai ra te hi’ora’a ātea—’e hō’ē fa’atumura’a ’e te arata’ira’a mure ’ore. E hi’o teie ta’ere i te mau mea vai maoro ! Nō roto mai te reira i te ’evanelia a Iesu Mesia, e ’evanelia mure ’ore, ’e ’o tē fa’ata’a nei nō te aha, e aha, ’e i hea, tō tātou orara’a. (E mea matara, e ’ere i te mea ’ōpani.) Nō roto mai teie ta’ere i te fa’a’ohipara’a i te mau ha’api’ira’a a tō tātou Fa’aora, nō reira, e tauturu te reira i te hōro’ara’a i te rā’au fa’aora e hina’aro-rahi-hia nei e tō tātou nei ao.
’Auē ïa ha’amaita’ira’a ’ia riro ’ei tuha’a nō teie huru orara’a rahi ’e te hanahana ! Nō te riro ’ei tuha’a nō te reira, te ta’ere rahi roa a’e i te mau ta’ere ato’a, e tītauhia ’ia taui. ’Ua ha’api’i mai te mau peropheta ē, e mea tītauhia ’ia vaiiho i muri i te mau mea ato’a nō roto mai i tā tātou mau ta’ere tahito tei ’ore e tū’ati i te ta’ere a te Mesia. E ’ere rā te reira i te fa’aru’era’a i te mau mea ato’a i muri. ’Ua ha’apāpū ato’a mai te mau peropheta ē, tē anihia nei ia tātou, tāta’itahi ’e te tā’āto’ara’a, ’ia hōpoi mai i tō tātou fa’aro’o ’e te mau tāreni ’e te ’ite—te mau mea maita’i ato’a i roto i tō tātou orara’a ’e i tā tātou iho mau ta’ere—na muri iho ia tātou, ’e ’a vaiiho i te ’Ēkālesia « ’ia ’āmui mai » nā roto i te parau poro’i o te ’evanelia. 3
E ’ere roa te ’Ēkālesia a Iesu Mesia i te Feiā Mo’a i te mau Mahana Hope’a nei i te hō’ē tōtaiete nō te pae tō’o’a o te rā ’aore rā, hō’ē ’ohipa ta’ere Marite. E hō’ē ’Ēkālesia nō te ao ato’a nei, mai tei riro noa nā. Hau atu i te reira, nō te ra’i mai. Tē hōpoi mai nei te mau melo ’āpī ’ati a’e te ao nei i te faufa’a, i te raura’a, ’e i te ’oa’oa i roto i tō tātou ’utuāfare e tupu tāmau noa nei i te rahi. Tē tāmau noa nei te Feiā Mo’a i te mau Mahana Hope’a nei nā te mau vāhi ato’a i te fa’ahanahana i tā rātou iho mau faufa’a ai’a ’e te mau ’aito, i teienei rā, e tuha’a ato’a rātou nō te hō’ē mea hau roa atu i te rahi. E tauturu te ta’ere a te Mesia ia tātou ’ia hi’o ia tātou iho mai te au i tō tātou iho huru mau, ’e mai te mea e hi’ohia nā roto i te hi’o o te ora mure ’ore, tāmarūhia e te parauti’a, e ravehia te reira nō te fa’arahi i tō tātou ti’ara’a ’ia fa’atupu i te fa’anahora’a rahi o te ’oa’oa.
Nō reira, e aha tei tupu i ni’a i tō’u hoa ? ’Ua ha’api’ihia ’oia i te mau ha’api’ira’a ’e ’ua tomo mai i roto i te ’Ēkālesia. ’Ua tā’atihia tōna ’utuāfare nō te tau ’e nō te tau a muri atu i roto i te hiero nō Sydney. E mea iti roa tāna i fa’aru’e—’e ’ua fāri’i i te maita’i nō te mau mea ato’a. ’Ua ’itehia iāna ē, e nehenehe noa ā tāna e fa’ahanahana i tōna ’ā’amu, ’ia te’ote’o noa ā i tōna huitupuna, i tāna pehe ’e te ori ’e te mau pāpa’ira’a, tāna mā’a, i tōna fenua ’e i tōna nūna’a. ’Ua ’itehia iāna ē, ’aita e fifi ’ia fa’aō mai i te mea maita’i a’e o tāna ta’ere i roto i te ta’ere rahi a’e i te mau ta’ere ato’a. ’Ua ’itehia iāna ē, ’ia hōpoi mai ’oia i te mea tei tū’ati i te parau mau ’e i te parauti’a mai roto mai i tōna orara’a tahito i roto i te orara’a ’āpī, e tauturu te reira ’ia ha’amaita’i i tāna auhoara’a ’e te feiā mo’a ’e ’ia tauturu ’ia tāhō’ē i te mau ta’ata ato’a i roto i te tōtaiete o te ra’i ra.
’Oia mau, e nehenehe tātou pā’āto’a e poihere i tā tātou mau ta’ere maita’i roa a’e nō te ao nei, ’e ’ia tāmau noa i te ’āmui i roto i te ta’ere tahito roa a’e i te mau ta’ere ato’a—te mātāmua, te hope’a, te ta’ere mure ’ore nā roto mai i te ’evanelia a Iesu Mesia. ’Auē te nehenehe o te faufa’a ai’a tā tātou pā’āto’a e hōro’a nei. I te i’oa ’o Iesu Mesia, ’āmene.