2020
Fa’anahora’a hōro’ara’a i’oa a te misiōnare: ’ōhie, vitiviti
Novema 2020

Fa’anahora’a hōro’ara’a i’oa a te misiōnare: ’ōhie, vitiviti

E mea ’ōhie a’e i teienei nō te mau melo ’ia tauturu i tō rātou mau hoa ’ia fārerei i te mau misiōnare, maoti te mau tauira’a i roto i te fa’anahora’a hōro’ara’a i’oa a te misiōnare nō te mau melo. ’Ua fa’ata’ahia te ’ohipa hōro’ara’a i’oa nō te fa’atū’ati ’oi’oi i te mau misiōnare ’e te mau melo hōro’a i’oa, ’ia nehenehe ia rātou ’ia fa’anaho i te hō’ē ’itera’a, ’o tē tauturu i te mau hoa o te mau melo ’ia fa’aō maita’i a’e i roto i te mau ha’api’ira’a ’evanelia tā te mau misiōnare e vauvau mai.

Teie te huru tōna terera’a:

  1. ’Ia fāri’i ana’e tō ’outou hoa ’aore rā, te ta’ata mātauhia, ’ia fārerei i te mau misiōnare, e fa’a’ī ’outou i te hō’ē parau hōro’ara’a i’oa i roto i te fa’anahora’a ’āfa’ifa’i a te melo ’aore rā, i roto i te ChurchofJesusChrist.org/referrals. E nehenehe ato’a ’outou e vaiiho i te ha’amāramaramara’a nō te fārerei ia ’outou ’e i te hō’ē parau nā te mau misiōnare.

  2. ’Ia oti te parau i te hāponohia, e fārerei mai te hō’ē tuahine misiōnare fa’ata’ahia nō te tauturu i te hōro’ara’a i’oa ia ’outou. E tu’u ’oia i te i’oa i hōro’ahia i te vāhi tano, ’e e tauturu ’oia ia ’outou ’ia fārerei i te mau misiōnare nō reira.

  3. E fāri’i ato’a te mau misiōnare nō te reira vāhi i te mau ha’amāramaramara’a nō ni’a ia ’outou ’e te i’oa i hōro’ahia. Nā roto i te reira e ti’a ai ia ’outou ’ia paraparau i te mau misiōnare i te huru ’e i te mau hina’aro o te hoa tā ’outou i hōro’a te i’oa. E nehenehe ’outou e paraparau ia rātou nāhea ’ia tauturu i tō ’outou hoa ’ia fāri’i i te hō’ē ’itera’a rahi. E nehenehe ato’a ’outou e mā’iti ’ia fa’aō ato’a i roto i te mau ha’api’ira’a misiōnare mai tā ’outou e hina’aro.

« Ua ha’api’ihia te mau misiōnare ē, te mau ta’ata ato’a i hōro’ahia mai te i’oa nā te hō’ē melo, e fa’arirohia rātou ’ei ’ohipa faufa’a rahi », te parau ïa a Elder Marcus B. Nash nō te Hitu ’Ahuru. « ’Ia fāri’i ana’e te mau misiōnare i te hō’ē ta’ata tei hōro’ahia mai te i’oa, ’ua ha’api’ihia rātou ’ia ani ia ’outou nāhea e ti’a ai ia rātou ’ia tauturu maita’i a’e i tō ’outou hoa. ’Ia ’ohipa ’āmui ana’e te mau melo ’e te mau misiōnare, e fa’auru te Fatu ia rātou nō te fa’atupu i te hō’ē ’itera’a faufa’a nō te tauturu i tō ’outou mau hoa ’ia ha’afātata mai ia Iesu Mesia. »

’Ua hōro’ahia teie mauha’a ’ohipara’a ’āpī i roto e 33 reo.

Nene’i