Fa’ahitira’a parau nō ni’a i te ’ōro’a nō te hiero

’Ua hōro’a mai te Peresidenira’a Mātāmua i te poro’i i muri nei i te 20 nō Tiurai 2020, nō ni’a i te mau tauira’a o te ’ōro’a hiero :

« Te mau ha’api’ira’a mo’a, te mau parau fafau ’e te mau ’ōro’a o te hiero, nō tahito mai ā te reira, ’e e arata’i te reira i te mau tamari’i a te Atua iāna ra, a rave ai rātou i te tahi atu mau fafaura’a, ’e ’a ha’api’i mai ai rātou i te tahi atu mau mea nō ni’a i tāna fa’anahora’a, ’e tae noa atu i te ’ohipa a te Fa’aora ’o Iesu Mesia.

« Nā roto i te fa’aurura’a, e rave rahi taime te tauira’a te mau rāve’a ha’api’ira’a i roto i te hiero, tae roa mai i te mau taime i ma’iri a’e nei, nō te tauturu i te mau melo ’ia māramarama ’e ’ia ora maita’i atu i te mau mea tā rātou i ha’api’i mai i roto i te hiero.

« Hō’ē tuha’a o te ’itera’a o te hiero, ’o te ravera’a ïa i te mau fafaura’a mo’a, ’aore rā, te mau parau fafau, i te Atua. Te rahira’a o te ta’ata ’ua mātau rātou i te ’ohipa tāpa’o ’o tē ’āpe’e i te ravera’a i te mau fafaura’a fa’aro’o (mai te pure, te utuhira’a i te ta’ata i te bāpetizora’a). E ’āpe’e ato’a te mau ’ohipa tāpa’o i te ravera’a i te mau fafaura’a o te hiero.

« Ma te māna’ona’ora’a i te mau ta’ata ato’a, ’e hō’ē hina’aro nō te ha’amaita’i i te ’itera’a ha’api’ira’a hiero, ’aita i maoro a’e nei, ’ua fāri’ihia te tahi mau tauira’a nō te ’ōro’a hiero. Nō te mo’a o te mau ’ōro’a o te hiero, tē ani nei mātou i tō tātou mau melo ’e te mau hoa ’eiaha e rave i te ’aitauira’a ’aore rā, i te ’āparaura’a i te ta’ata nō ni’a i teie mau tauira’a. Tē ani nei rā mātou i te mau melo o te ’Ēkālesia ’ia tīa’i i te mahana e ho’i ai rātou ’e e ’āmui hope roa ai i roto i te ’ohipa mo’a o te hiero nā roto i te pure ’e nā roto i te māuruuru. »