E terera’a ’āpī nō te mau mea
Tē ani nei au ia ’outou ’ia fāriu hau atu i tō ’outou ’ā’au, te ferurira’a ’e te vārua i tō tātou Metua i te ao ra ’e i tāna tamaiti ’o Iesu Mesia.
E te mau taea‘e ’e te mau tuahine here, ‘ua riro teie nā mahana ’āmuira’a ’ei nā mahana hanahana roa ! ’Ua ti’a tō’u mana’o i tō Elder Jeffrey R. Holland ’A fa’ahiti ai ’oia, ’ua fa’auruhia te mau poro’i, te mau pure, ’e te pehe ato’a e te Fatu. Tē mauruuru nei au nō te feiā ato’a tei tauturu mai nā roto i te mau rāve’a rau.
I te roara’a o te mau fa’anahora’a, ’ua feruri au ia ’outou tē fa’aro’o ra i te ’āmuira’a. ’Ua ani au i te Fatu ’ia tauturu mai iā’u ’ia hāro’aro’a i te mea tā ’outou e feruri ra, e ha’ape’ape’a ra, ’aore rā, e tāmata nei i te fa’atītī’aifaro. ’Ua uiui au ē, e aha tā’u e parau nō te ’ōpani i teie ’āmuira’a, ’o tē tono ia ’outou ma te mana’o maita’i nō ni’a i te ananahi ’o tā’u i ’ite e hina’aro te Fatu ’ia ’ite ’outou.
Tē ora nei tātou i roto i te hō’ē tau tei ’ite-ātea-hia e te mau peropheta e rave rahi tenetere i teienei. E tau tu’ura’a teie e ’ore roa hō’ē ha’amaita’ira’a pae vārua e ’īriti-’ē-hia i te feiā parauti’a. 1 Noa atu te ’ārepurepu o te ao nei, 2 tē hina’aro nei te Fatu ’ia « hi’o tātou i mua ma te tīa’ira’a ’oa’oa ». 3 E mata nā tātou ’eiaha e fa’a’ohu noa i tō tātou huira i roto i te mau ha’amana’ora’a nō nanahi ra. Tē haere nei te ha’aputuputura’a o ’Īserā’ela i mua. Nā te Fatu e arata’i nei i te mau ’ohipa o tāna ’Ēkālesia, ’e e fa’atupu te reira i tāna mau ’ōpuara’a hanahana.
Tā ’outou ’e tā’u tītaura’a, ’o te ha’apāpūra’a ïa ē, e fa’atupu tātou tāta’itahi i tō tātou pūai hanahana. I teie mahana e mea pinepine tātou i te fa’aro’o i te parau nō te « terera’a ’āpī o te mau mea ». Mai te mea e hina’aro mau ’outou e pe’e i te hō’ē terera’a ’āpī nō tā ’outou mau mea, tē ani nei au ia ’outou ’ia fāriu atu i tō ’outou ’ā’au, te ferurira’a ’e te vārua i tō tātou Metua i te ao ra ’e i tāna tamaiti ’o Iesu Mesia. ’Ia riro te reira ’ei terera’a ’āpī nō tā ’outou mau mea.
’A pe’e i te terera’a ’āpī nō tā ’outou mau mea nā roto i te tātarahapara’a i te mau mahana ato’a. ’A ’imi ’ia vai vi’ivi’i ’ore hau atu i roto i te mana’o, te parau ’e te ’ohipa. Aupuru ia vetahi ’ē. Tāpe’a noa i te hō’ē hi’ora’a ātea mure ’ore. ’A rave maita’i i tō ’outou mau pi’ira’a. ’E noa atu tā ’outou mau tāmatara’a, e au mau taea’e ’e e au mau tuahine here, ’a ora i te mahana tāta’itahi ’ia ineine hau atu ’outou nō te fārerei i tō ’outou Rahu nui. 4
Nō reira tē vai nei tō tātou mau hiero. E fa’aineine te mau ’ōro’a ’e te mau fafaura’a a te Fatu ia tātou nō te ora mure ’ore, te ha’amaita’ira’a rahi a’e i te mau ha’amaita’ira’a ato’a a te Atua. 5 Mai tā ’outou i ’ite, nō te ma’i pe’e o te TŌVI, ’ua tītauhia ia tātou ’ia tāpiri i tā tātou mau hiero nō te hō’ē tau poto. I muri iho, ’ua ha’amata mātou i te ’īriti marū noa ’e ma te fa’aau māite. I roto i te tuha’a 2 tei ha’amauhia i teienei i roto i te mau hiero e rave rahi, ’ua tauatini feiā fa’aipoipo tei tā’atihia, ’e ’ua tauatini tei fāri’i i tō rātou iho ’ōro’a hiero i roto noa i nā ’āva’e i ma’iri a’e nei. Tē tīa’i nei tātou i te mahana e nehenehe ai i te mau melo ti’amā ato’a o te ’Ēkālesia e tāvini fa’ahou ai i tō rātou mau tupuna ’e e ha’amori i roto i te hō’ē hiero mo’a.
I teienei, tē ’oa’oa nei au i te fa’aara atu i te mau fa’anahora’a nō te pātura’a e ono hiero ’āpī ’o tē pātuhia i te mau fenua i muri nei ; Tarawa, Kiribati ; Port Vila, Vanuatu ; Lindon, Utaha ; Greater Guatemala City, Guatemala; São Paulo East, Peretīria ; ’e Santa Cruz, Bolivia.
’A patu ai ’e ’a ’atu’atu ai tātou i teie mau hiero, tē pure nei mātou ’ia patu ’e ia ’atu’atu ’outou ia ’outou iho, ’ia nehenehene ’outou ’ia ti’amā nō te tomo i roto i te hiero mo’a.
I teienei, e au mau taea’e ’e e au mau tuahine here, tē ha’amaita’i nei au ia ’outou ’ia ’ī ’outou i te hau ’o te Fatu ’o Iesu Mesia. Tōna hau tei ni’a atu i te hāro’aro’ara’a o te mau ta’ata tāhuti ato’a. 6 Tē ha’amaita’i nei au ia ’outou i te hō’ē hina’aro ’e i te ’aravihi rahi a’e ’ia ha’apa’o i te mau ture a te Atua. Tē fafau atu nei au ē, mai te mea e nā reira ’outou e niniihia mai te mau ha’amaita’ira’a i ni’a ia ’outou, tae noa atu i te itoito rahi a’e, te heheura’a rahi a te ta’ata iho, te au māite maita’i atu i roto i tō ’outou ’utuāfare, ’e te ’oa’oa, noa atu i roto i te pāpū ’ore.
E mata nā tātou i te haere ’āmui i mua nō te fa’atupu i tā tātou pi’ira’a hanahana—i te fa’aineinera’a ia tātou iho, ’e te fa’aineinera’a i te ao nei nō te tae-piti-ra’a mai o te Fatu. ’O tā’u ïa pure, ’e tō’u tāpa’o here ia ’outou, i te i’oa ’o Iesu Mesia, ’āmene.