Elder L. Todd Budge
Tauturu piti i roto i te ’Ēpisekōpora’a Fa’atere Rahi
I muri a’e 18 ’āva’e i te tāvinira’a ’ei hui mana fa’atere rahi Hitu ’Ahuru, ’ua pāturuhia te ’ēpisekōpo L. Todd Budge ’ei tauturu piti i roto i te ’Ēpisekōpora’a Fa’atere Rahi. ’Ua mono ’oia i te ’ēpisekōpo Dean M. Davies, tei pi’ihia ’ei hui mana fa’atere rahi Hitu ’Ahuru.
’Ua riro te ’ēpisekōpo Budge ’ei ta’ata fa’atere i te fare ha’api’ira’a teitei nō Brigham Young i te matahiti 1984 ’e te hō’ē parau tū’ite i roto i te fa’arava’ira’a faufa’a. ’Ua rave ’oia i te ’ohipa nō te Taiete Bain & Tāpōnē ; Citibank, N.A. ; ’e GE Capital i te fenua Tāpōnē ’e i Atlanta, Georgia, i te fenua Marite. ’Ua riro mai ’oia ’ei peresideni ’e ’ei ta’ata fa’atere rahi nō Tokyo Star Bank Limited i te matahiti 2003, ’e ’ua tāvini ’oia ’ei peresideni nō te tōmite fa’atere o te fare moni mai te matahiti 2008 tae atu i te matahiti 2011. ’Ua tāvini ato’a ’oia ’ei melo nō te tōmite fa’atere nō Hawaiian Airlines.
I te hō’ē taime i roto i tōna orara’a, a feruri ai te ’ēpisekōpo Budge i te tauira’a tōro’a, ’ua fāri’i ’oia i te tahi mau parau a’o faufa’a rahi. « Tē hina’aro nei mātou i te mau ta’ata parau ti’a i roto i te ’ohipa ’imira’a faufa’a », te parau ïa a te hō’ē ti’a arata’i iāna, ma te parau atu ē, e hōro’a mai tōna haere’a tōro’a e rave rahi rāve’a nō te a’o ’e nō te tauturu i te ta’ata.
Nā roto i te tōro’a ’ohipa o te ’ēpisekōpo Budge, ’ua roa’a iāna e rave rahi rāve’a nō te rirora’a ’ei ta’ata fa’auru nō te maita’i i roto i te ’ohipa ’imira’a faufa’a i te ao nei, mai te ’īritira’a i te mau ’ūputa nō te fa’a’ite i te ’evanelia i Tāpōnē, i reira ho’i tōna tāvinira’a ’ei misiōnare i roto i te misiōni nō Fukuoka i Tāpōnē. I muri a’e, ’ua tāvini ’oia ’ei peresideni nō te misiōni nō Tokyo, Tāpōnē.
« Te parau ’āpī maita’i o te ’evanelia », tāna i ha’api’i, « e ’ere ïa i te hō’ē parau fafau nō te hō’ē orara’a ’aore e ’oto ’e te pe’ape’a i roto, hō’ē rā orara’a tei ’ī i te ’ōpuara’a ’e te aura’a—e orara’a i reira tō tātou mau ’oto ’e tō tātou mau ’ati e ’horomi’ihia i roto i te ’oa’oa o te Mesia ra’ [Alama 31:38]. »1
’Ua fanauhia ’o Lawrence Todd Budge i te 29 nō Tītema 1959, i Pittsburg, California, i te fenua Marite. ’Ua mātau ’oia ia Lori Capener i tō rāua matahiti mātāmua i te fare ha’api’ira’a teitei nō Brigham Young. Ua fa’aipoipo rāua i te matahiti 1981 i roto i te hiero nō Logan Utah. E ono tamari’i tā rāua.
Hou tōna pi’ira’a ’ei Hui mana fa’atere rahi Hitu ’ahuru, ’ua tāvini te ’ēpisekōpo Budge ’ei Hitu ’ahuru ārea, ’ei peresideni titi, ’ei pāpa’i parau fa’atere nō te titi, ’ei peresideni nō te Feiā ’Āpī Tamāroa nō te titi, e ’ei peresideni pupu peresibutero.