Te mana vai noa
’O te fa’aro’o ana’e ’e te parau a te Atua ’o tē fa’a’ī i tō tātou vārua roto tē nava’i nō te turu ia tātou—’ia matara nō tātou tōna mana.
I te hi’ora’a vau i te mau ha’api’ira’a a tō tātou peropheta here, te peresideni Russell M. Nelson, ’ua ’ite mai au i te hō’ē ta’o tāna i fa’a’ohipa pinepine i roto i te mau a’ora’a e rave rahi. Teie ta’o, ’o te mana ïa.
I roto i te ’āmuira’a rahi mātāmua i muri mai i te pāturura’ahia ’oia ’ei ’āpōsetolo, ’ua paraparau te peresideni Nelson nō ni’a i te mana. 1 ’Ua tāmau ’oia i te ha’api’i nō ni’a i te mana i roto i te mau matahiti. Mai te pāturura’ahia te peresideni Nelson ’ei peropheta nō tātou, ’ua ha’api’i ’oia nō ni’a i te parau tumu nō te mana—te mana iho ā rā o te Atua—’e nāhea e matara ai te reira nō tātou. ’Ua ha’api’i ’oia nāhea e nehenehe ai ia tātou ’ia fa’a’ohipa i te mana o te Atua ’a tāvini ai i te ta’ata, 2 nāhea te tātarahapara’a e tītau nei i te mana o Iesu Mesia ’e tāna tāra’ehara i roto i tō tātou orara’a, 3 ’e nāhea te autahu’ara’a—te mana ’e te ha’amanara’a a te Atua—e ha’amaita’i nei i te mau ta’ata atoa’ e rave ’e e ha’apa’o i te mau fafaura’a ’e ana. 4 ’Ua parau pāpū te peresideni Nelson ē, tē mani’i nei te mana o te Atua i ni’a i te mau ta’ata ato’a tei fāri’i i tō rātou ’ōro’a hiero ’ia ha’apa’o rātou i tā rātou fafaura’a. 5
’Ua putapū ta’a ’ē au i te hō’ē fā tā te peresideni Nelson i hōro’a i te ’āmuira’a rahi nō te ’Ēperēra 2020. ’Ua a’o mai ’oia ’ia « tuatāpapa ’e ’ia pure nō te ha’api’i rahi atu ā nō ni’a i te mana ’e te ’ite i hōro’ahia mai ia ’outou—’aore rā, ’o tē hōro’ahia mai ia ’outou ». 6
’Ei pāhonora’a i teie ’ōpuara’a, ’ua tuatāpapa vau ’e ’ua pure ’e ’ua ’apo mai au i te tahi mau mea ha’amaita’i nō ni’a i te mana ’e te ’ite tei hōro’ahia mai iā’u—’aore rā ’o tē hōro’ahia mai iā’u.
E ’ere i te mea ’ōhie ’ia māramarama i te mea e rave ’ia matara mai te mana o te Atua i roto i tō tātou orara’a, tā’u rā i ’ite, e noa’a ’ia rave maoti te tuatāpapara’a i te reira i roto i tō tātou ferurira’a ’e te purera’a i te Vārua Maita’i ’ia ha’amāramarama mai. 7 ’Ua hōro’a Elder Richard G. Scott i te hō’ē tātarara’a pāpū nō te mana o te Atua : ’o « te pūai nō te rave rahi atu ā i te mea ’o tā tātou e nehenehe e rave nō tātou iho ». 8
E mea faufa’a tumu te fa’a’īra’a i tō tātou ’ā’au ’e tō tātou vārua i te parau a te Atua ’e tae noa atu i te fa’aro’o ia Iesu Mesia, nō te fa’a’ohipa i te mana o te Atua nō te tauturu ia tātou i roto i teie mau tau fifi rahi. Mai te mea e’ita tātou e tītau i te parau a te Atua nā reira ato’a te fa’aro’o ia Iesu Mesia i te hōhonu o tō tātou ’ā’au, e riro tō tātou ’itera’a pāpū ’e te fa’aro’o i te manuia ’ore, ’e penei a’e ’o te ’ere tātou i te mana tā te Atua e hina’aro e hōro’a ia tātou. ’Aita e nava’i te fa’aro’o ’o ni’a noa. ’O te fa’aro’o ana’e ’e te parau a te Atua ’o tē fa’a’ī i tō tātou vārua roto tē nava’i nō te turu ia tātou—’ia matara nō tātou tōna mana.
I te ha’api’ira’a māua te tuahine Johnson i tā māua mau tamari’i, ’ua fa’aitoito māua ia rātou tāta’itahi ’ia ha’api’i i te ha’uti i te hō’ē ’upa’upa. E fa’ati’a noa rā māua i tā māua mau tamari’i ’ia haere i te mau ha’api’ira’a ’upa’upa mai te peu e rave rātou i tā rātou tuha’a ’e e ha’api’ipi’i rātou i te mahana tāta’itahi. I te hō’ē mahana mā’a, ’ua hina’aro roa tā māua tamāhine ’o Jalynn ’ia haere e ha’uti ’e tōna mau hoa, ’aita rā ’oia i ha’api’ipi’i i tāna piana. Nō te mea ’ua fafau ’oia e ha’api’ipi’i 30 minuti, ’ua mana’o ’oia e tu’u i te hō’ē tai’o uāti, nō te mea ’aita ’oia i hina’aro ’ia hau atu i te hō’ē noa a’e minuti.
I te haerera’a ’oia nā pīha’i iho i te umu micro-ondes nō te haere i te piana, ’ua tāpe’a ’oia nō te tāumiumi i te tahi mau pitopito. ’Aita rā ’oia i tu’u i te tai’o uāti, ’ua patapata rā i te tunura’a mā’a 30 minuti, ’e fa’ahaere a’era. 20 paha minuti ha’api’ipi’ira’a, ’ua haere ’oia i roto i te piha tūtu nō te hi’o e fea minuti e toe ra, tē ura ra te umu micro-ondes.
Horo mai nei i rāpae i reira vau i te ’atu’atura’a i te ’āua, ma te tuō ē, tē pa’apa’a ra te fare. ’Ua horo vau i roto i te fare, ’e ’oia mau, tē pa’apa’a ra te umu micro-ondes.
Nō te pāruru i te fare ’eiaha ’ia pa’apa’a, ’ua tānao vau i muri i te micro-ondes nō te huti mai i te niuniu uira, ’e ’ua fa’a’ohipa vau i terā niuniu nō te tātara i te micro-ondes mai ni’a mai i te pa’epa’e. Ma te hina’aro ’ia riro ’ei ’aito nō terā mahana, ’e nō te pāruru i tō mātou fare, ’ua tāpe’a noa vau i te micro-ondes ma tōna niuniu, ’e ’ua fa’a’ohu noa i te reira ’eiaha ’ia tōtē i ni’a i tō’u tino, haere atu ra i rāpae ’e tā’ue a’era i te micro-ondes i raro. I reira, ’ua noa’a ia mātou i te tūpohe i te auahi ura i te tuiō pape.
E aha te fifi ? Te umu micro-ondes, tītauhia te hō’ē mea e ’ote i tō te reira ito, ’e mai te mea ’aita e mea i roto nō te ’ote i te ito, nāna noa iho e ’ote i terā ito, e ahu roa mai, ’e e nehenehe e ura mai, nāna noa iho ïa e pau i te auahi ’e te rehu auahi. 9 ’Ua ura roa tā mātou micro-ondes i te auahi ’e ’ua pa’apa’a nō te mea ’aita e ’ohipa i roto.
Nā reira ato’a, te feiā tē vai ra tō rātou fa’aro’o ’e te parau a te Atua hōhonu roa i roto i tō rātou ’ā’au, e noa’a ia rātou ’ia ’ote mai ’e ’ia upo’oti’a i te mau ihe auahi ’o tā te ’enemi e tāora pāpū mai nō te ha’amou ia tātou. 10 ’Aita ana’e te reira, e’ita paha tō tātou fa’aro’o, te tīa’ira’a ’e te mana’o pāpū e vai noa mai, ’e mai te umu micro-ondes ’aita e ’ohipa i roto, e pēpē ïa tātou i muri mai.
’Ua ha’api’i mai au ē, maoti te parau a te Atua hōhonu roa i roto i tō’u vārua, ’āpitihia i te fa’aro’o i te Fatu ra Iesu Mesia ’e tāna tāra’ehara, e ti’a ai iā’u ’ia fa’a’ohipa i te mana o te Atua nō te upo’oti’a i te ’enemi ’e te mau mea noa atu e tāora mai ’oia i ni’a iā’u. ’A fa’aruru ai tātou i te mau tāmatara’a, e nehenehe tātou e tūru’i i ni’a i te parau fafau a te Fatu tei ha’api’ihia e Paulo : « E ’ere ho’i te ā’au taiā tā te Atua i hōro’a mai nō tātou ; i te ’ā’au itoito rā, ’e te aroha, ’e te mana’o māramarama ». 11
’Ua ’ite tātou ē, ’ei tamari’i, ’ua « tupu [te Fa’aora], e itoito atu ra te ’ā’au, ’ī a’era ho’i i te pa’ari : ’e tē vai ra te maita’i a te Atua i ni’a iāna ». 12 ’Ua ’ite tātou ē, ’a pa’ari ai ’oia, « Tupu atura Iesu i te rahi ’e te pa’ari, ’e te herehia mai e te Atua ’e te ta’ata ato’a ». 13 ’E ’ua ’ite ato’a tātou ē, i te tau ’a ha’amata ai ’oia i tāna tāvinira’a, ’ua « ’ūmere mai ra rātou i tāna ha’api’ira’a, tē mana ra ho’i tāna parau ». 14
Nā roto i te fa’aineinera’a, ’ua tupu te Fa’aora i roto i te mana ’e ’ua noa’a iāna ’ia pāto’i i te mau fa’ahemara’a ato’a a Sātane. 15 ’A pe’e ai tātou i te hi’ora’a o te Fa’aora ’e ’a fa’aineine ai nā roto i te tuatāpapara’a i te parau a te Atua ’e te fa’ahōhonura’a i tō tātou fa’aro’o, e nehenehe ato’a tātou e fa’a’ohipa i te mana o te Atua nō te pāto’i i te mau fa’ahemara’a.
I roto i teie tau ’ua ’ōpanihia te mau putuputura’a ’e e’ita atu ra e nehenehe e haere i te hiero, ’ua fa’aoti au e tāmau noa i te tuatāpapa ’e e ha’api’i rahi atu ā nō ni’a i te mana o te Atua e tae mai ia tātou ’a rave ai tātou ’e ’a ha’apa’o ai i te mau fafaura’a o te hiero. Mai tei parauhia i roto i te pure ha’amo’ara’a nō te hiero nō Kirtland, e fa’aru’e tātou i te hiero ma te mau i te mana o te Atua. 16 ’Aita e tai’o mahana e hope ai te mana o te Atua tei tu’uhia i ni’a i te feiā e rave ’e e ha’apa’o i te mau fafaura’a o te hiero ’aore rā ’aita e ’ōpanira’a nō te tītau i terā mana i roto i te hō’ē pararera’a ma’i pohe. E iti tōna mana i roto i tō tātou orara’a mai te mea noa e ’ore tātou e ha’apa’o i tā tātou mau fafaura’a ’e e ’ore tātou e ora i te orara’a e fa’ati’a ia tātou ’ia fāri’i tāmau noa i tōna mana.
’A tāvini ai māua ta’u vahine iti ’ei fa’atere misiōni i Thailande, i Laos ’e i Myanmar, ’ua ’ite mata roa māua i te mana o te Atua e tae mai i te ta’ata e rave ’e e ha’apa’o i te mau fafaura’a mo’a i roto i te hiero. E rave rahi feiā mo’a i roto i teie nā fenua e toru tei fāna’o i te moni tauturu nō te ta’ata haere hiero, nō te haere i te hiero, ’ua ’oti ia rātou i te ravera’a i te mau mea ato’a e mara’a ia rātou nā roto i tā rātou iho fa’atusiara’a ’e te fa’aineinera’a. Tē ha’amana’o ra vau i te fārereira’a i te hō’ē pupu 20 feiā mo’a nō Laos, i te taura’a manureva nō Bangkok, i Thailande, nō te tauturu ia rātou ’ia haere i te tahi atu taura’a manureva nō Bangkok, nō te rave i te manureva e reva i Hong Kong. ’Ua ’ī roa rātou i te ’ana’anatae nō teie tere tō rātou i te fare o te Fatu, e mea tīa’i rātou i terā mahana.
I te fārereira’a māua i teie nau feiā mo’a iti i tō rātou ho’ira’a mai, ’ua ’ite-pāpū-hia te pa’ari ’evanelia ’e te mana nō te reira, nō te fāri’ira’a rātou i tō rātou ’ōro’a hiero ’e te ōra’a i roto i te mau fafaura’a ’e te Atua. Pāpū roa ’ua fa’aru’e teie nau feiā mo’a i te hiero « ma te mau i [tōna] mana ». 17 ’Ua hōrō’a mai terā mana nō te rave rahi atu ā i tei roa’a ia rātou iho ’ia rave, i te pūai nō te fa’a’oroma’i i te mau fifi ti’ara’a melo o te ’Ēkālesia i tō rātou fenua ’āi’a, ’e nō te hōro’a « i te mau parau maita’i rahi roa ’e te hanahana rahi ho’i, nā roto i te parau mau », 18 ’a tāmau ai rātou i te patu i te bāsileia o te Fatu i Laos.
I te roara’a o te taime ’aita i noa’a ’ia haere i te hiero, ’ua tūru’i ānei tātou i ni’a i te mau fafaura’a tā tātou i rave i roto i te hiero nō te ha’amau i te ’avei’a pāpū ’e te taui ’ore nō tō tātou orara’a ? ’Ia ha’apa’ohia teie mau fafaura’a, e noa’a ia tātou te hi’ora’a ’e te mau tītaura’a nō ananahi, nā reira ato’a te fa’aotira’a pāpū e fa’aineine manuia nō te fāri’i i te mau mea ato’a tā te Fatu i parau mai, maoti tō tātou ha’apa’o maita’i.
Tē ani nei au ia ’outou ’ia ’imi i te mana tā te Atua e hina’aro e hōro’a ia ’outou. Tē parau pāpū nei au ē, ’a ’imi ai tātou i teie mana, e ha’amaita’ihia tātou i te māramaramara’a rahi a’e i te here o tō tātou Metua i te ao ra nō tātou.
Tē parau pāpū nei au ē, nō te here te Metua i te ao ra ia ’outou ’e iā’u nei, i tono ai ’oia i tāna Tamaiti here, ia Iesu Mesia, ’ei Fa’aora ’e ’ei Tāra’ehara nō tātou. Tē parau pāpū nei au nō Iesu Mesia, tei iāna te mana ato’a, 19 ’e tē nā reira nei au i te i’oa o Iesu Mesia, ’āmene.