Elder Dean M. Davies
Hitu ’Ahuru Hui Mana Fa’atere Rahi
’A tere ai ’oia i te fare nā te ’ohipa mai i te matahiti 1989, ’ua topa ’o Elder Dean M. Davies i roto i te hō’ē ’āueuera’a fenua i San Francisco, California, i te fenua Marite, ’e ’ua ’āueue maita’i tōna pere’o’o. I muri a’e, a feruri noa ai ’oia i te ino i taua vāhi ra, ’ua ha’amana’o a’era ’oia i te faufa’a o te patura’a i tō tātou orara’a i ni’a i te hō’ē niu pāpū.
’Ua parau ’oia ē, « ’Aore hō’ē ’o tātou e patu i tō tātou fare, te vāhi ’ohipara’a, ’aore rā, te mau fare mo’a nō te ha’amorira’a, i ni’a i te one ’aore rā, i ni’a i te ofa’ifa’i ’aore rā, ’aita e fa’anahora’a ’e e mātēria tano, » « E mata na tātou ’ia fāri’i i te tītaura’a a te Fa’aora ’ia haere Ia’na ra. E mata na tātou ’ia patu i tō tātou orara’a i ni‘a i te hō’ē niu pāruruhia ’e te pāpū. »1
’Ua tāvini ’o Elder Davies i roto i te ’Ēpisekōpora’a Fa’atere Rahi mai te ’āva’e ’Ēperēra 2012, ’e ’ua pāturuhia ’ei Hui Mana Fa’atere Rahi Hitu ’Ahuru i te 3 nō ’Ātopa 2020. ’Ua tāvini Elder Davies i roto i te ’Ēpisekōpora’a Fa’atere Rahi ’ei tauturu piti nō te ’ēpisekōpo Gary E. Stevenson, e tae roa atu i te taime a pāturuhia ai te ’ēpisekōpo Sevenson ’ei melo nō te pupu nō te Tino ’Ahuru Ma Piti ’Āpōsetolo i te 3 nō ’Ātopa 2015. I muri iho ’ua pāturuhia ’o Elder Davies ’ei tauturu mātāmua nō te ’ēpisekōpo Gérald Caussé, tei mono atu ia Elder Stevenson ’ei ’Ēpisekōpo Fa’atere Rahi ’āpī.
’Ua fanauhia ’o Dean Myron Davies i Roto Miti, Utaha, i Marite i te matahiti 1951. I muri a’e i tōna tāvinira’a ’ei misiōnare rave tāmau i roto i te misiōni nō Uruguay/Paraguay, ’ua fa’aipoipo ’oia ia Darla James i te matahiti 1973 i roto i te hiero nō Roto Miti. E 5 tā rāua tamari’i ’e e 14 mo’otua.
I te ’āva’e Tiurai 1995, ’ua ha’amata ’oia i te rave i te ’ohipa nā te ’Ēkālesia, ’ei ra’atira nō te tuha’a fa’atere nō te mau ’ōpuara’a ta’a ’ē, ’e te hōpoi’a nō te mau ’ōpuara’a ta’a ’ē, te ’ōpuara’a nō te hiero, ’e te patura’a hiero. Hou ’a rave ai ’oia i te ’ohipa i roto i te ’Ēkālesia, ’ua rave ’o Elder Davies i te ’ohipa i roto i te hō’ē taiete tapiha’ara’a nō Lancaster, Pennsylvania, e i roto i te taiete Fa’ahotura’a moni Bechtel nō San Francisco, California. Ua fāri’i ’oia i te hō’ē parau tū’ite licence nō te terera’a faufa’a fa’a’apu i te fare ha’api’ira’a tuatoru nō Brigham Young University ’e ’ua fa’aoti i te tahi ha’api’ipi’ira’a hau atu i te mau fare ha’api’ira’a teitei nō Stanford ’e nō Northwestern.
’Ua tāvini te ’ēpisekōpo Davies ’ei peresideni nō te misiōni nō Puerto Rico San Juan, ’ei tauturu peresideni misiōni, ’ei peresideni titi, ’ei tauturu peresideni titi, ’ei papa’i parau fa’atere nō te titi, ’ei melo ’āpo’ora’a teitei, ’e i roto e rave rahi ’ēpisekōpora’a.