’Imi i te Mesia i tō mau mana’o ato’a na
Nō te ’aro i te fa’ahemara’a, tītauhia ’ia rave maita’i ’e ’ia ha’apa’o maita’i i tōna orara’a tā’āto’a. ’Ia ’ite mai rā ’outou ē, ’ua ineine te Fatu nō te tauturu ia tātou.
I roto i tāna hīmene fahanahana, tē nā ’ō ra te Salamo :
« E Iehova, ’ua hi’opo’ahia vau e ’oe ’e ’ua ’iteahia ho’i au.
« ’Ua ’ite ’oe i ta’u pārahira’a i raro e ta’u ti’ara’a i ni’a ; ’ua ’ite ’oe i tō’u nei mana’o i te ātea ’ē ra.
« ’Ua pāheru ’oe i tō’u haere’a ’e ta’u ta’otora’a i raro, ’e ’ua ’ite ’oe i ta’u mau haere’a ato’a nei ». 1
I roto i teie pehepehe, tē ārue nei te Salamo i te hīro’a hanahana o te Fatu nō te ’ite hope, inaha ho’i ’ua ’ite mau ’oia i te huru ato’a o tō tātou vārua. 2 Nō te ’itera’a ’oia i te mau mea ato’a e tītauhia nō tātou i roto i teie orara’a, tē tītau manihini nei te Fa’aora ia tātou ’ia ’imi Iāna i tō tātou mau mana’o ato’a ’e ’ia pe’e Iāna ma tō tātou ’ā’au ato’a. 3 E noa’a mai te parau fafau ē, e ti’a ia tātou ’ia haere i tōna māramarama ’e e ārai tāna arata’ira’a i te fa’aurura’a o te pōiri i roto i tō tātou orara’a. 4
Te ’imira’a i te Mesia i tō tātou mau mana’o ato’a ’e te pe’era’a Iāna ma tō tātou ’ā’au ato’a, tītauhia ïa ’ia fa’atū’ati i tō tātou mana’o ’e te hina’aro i ni’a i tōna. 5 Tē fa’ahiti nei te mau pāpa’ira’a mo’a i te reira fa’atū’atira’a ’ei « itoito ā i te Fatu nei ». 6 Nō teie ’avei’a, tītauhia e tāmau noa tātou i te fa’atere i tō tātou orara’a mai te au i te ’evanelia a te Mesia ’e i te rōtahi i te mau mahana ato’a i ni’a i te mau mea maita’i. 7 I reira noa tātou e fa’atupu ai i « te hau a te Atua, ’o tei hau ’ē atu i te ’ite ta’ata nei » ’e ’o tē « fa’aitoito mai i tō [tātou] ’ā’au, ’e tō [tātou] mana’o i te Mesia nei ia Iesu ». 8 Nā te Fa’aora iho i parau i te mau peresibutero o te ’Ēkālesia i te ’āva’e Fepuare 1831 : « ’A fa’aherehere na i teie nei mau mea i roto i tō ’outou na mau ’ā’au, ’e ’ia vai noa ho’i te hanahanara’a ’e te hanohanora’a o te mure ’ore i ni’a i tō ’outou na mau ferurira’a ». 9
Noa atu ā tā tātou mau tauto’ora’a tāmau e ’imi i te Fatu, e nehenehe te mau mana’o ti’a ’ore e tomo i roto i tō tātou ferurira’a. ’Ia vaiiho-noa-hia te reira mau mana’o ’e ’ia tītauhia ’ia fa’aea roa mai, e nehenehe te reira mau hina’aro i tō tātou ’ā’au e arata’i ia tātou i te mea e riro mai tātou i roto i teie orara’a, ’e i te hope’a, i te faufa’a ’āi’a e noa’a mai ia tātou i te tau mure ’ore. 10 ’Ua tūra’i Elder Neal A. Maxwell i teie parau tumu i te hō’ē taime ’a nā ’ō ai ’oia : « Nā te hina’aro… e fa’aoti i te huru o te fa’ahope’ara’a, ’o te tumu ato’a ïa ‘e rave rahi ho’i tei parauhia, e iti rā tei mā’itihia’ ». 11
’Ua tāmau noa tō tātou mau peropheta tahito ’e te ’āpī i te fa’aha’amana’o ia tātou ’ia pāto’i i te fa’ahemara’a ’eiaha tō tātou maura’a pae vārua ’ia ’ore ’e ’ua ta’a ’ore atu ra, ’e ’ua tuatuāihu ’e ’ua māui i roto i te orara’a.
’Ei fa’ahōho’ara’a, ’ia pe’e tātou i te fa’ahemara’a, mai te huru te reira i te hō’ē ’āuri ’ōvahine i pīha’i iho i te hō’ē tao’a ’āuri. E pūai ’ite-’ore-hia tō te ’āuri ’ōvahine nō tē ’ume mai i te tao’a mētara ’e nō te tāpe’a pūai i te reira. E ’ore te mana o te ’āuri ’ōvahine i ni’a i te reira ’ia fa’aāteahia te tao’a mētara i te reira. Nō reira, mai te ’āuri ’ōvahine ’aita tōna mana i ni’a i te tao’a ’āuri ātea, ’ia pāto’i tātou i te fa’ahemara’a, e mōrohi te reira ’e e ’ore tō te reira mana i ni’a i tō tātou ferurira’a ’e tō tātou ’ā’au, ’e i muri mai, i ni’a i tā tātou mau ’ohipa.
Tē fa’aha’amana’o nei te reira iā’u i te hō’ē ’ohipa tā te hō’ē melo ha’apa’o maita’i o te ’Ēkālesia i fa’a’ite mai i te mātāmua ra. ’Ua nā ’ō mai teie melo ē, i te arara’a ’oia i te hō’ē po’ipo’i, ’ua puta mai te hō’ē mana’o ti’a ’ore i roto i tōna ferurira’a, e mana’o ’aita i tupu a’enei ’e e mea tīa’i-’ore-hia. Noa atu ā ’ua hitimahuta roa ’oia i te reira, i reira ra ’oia i te pāto’ira’a i te reira, i te nā-’ō-ra’a iāna iho ’e i terā mana’o ē : « ’Aita ! » ’e ’ua mono atu ra te reira i te hō’ē mea maita’i nō te fa’afāriu ’ē i tōna ferurira’a i te reira mana’o au ’ore. ’Ua parau mai ’oia ē, i te fa’a’ohipara’a ’oia i tōna ti’amāra’a morare ma te parauti’a, ’ua mo’e ’oi’oi te reira mana’o ’ino ’e te tītau-’ore-hia.
I te pi’ira’a Moroni i te ta’ata ’ia ti’aturi i te Mesia ’e ’ia tātarahapa, ’ua a’o ’oia ia rātou ’ia haere mai i te Fa’aora ma tō rātou ’ā’au ato’a, ma te ’īriti i ni’a ia rātou te mau mea faufau ato’a. Hau atu, ’ua tītau manihini Moroni ia rātou ’ia ani i te Atua, ma te fē’a’a ’ore, ’eiaha rātou ’ia topa i roto i te fa’ahemara’a. 14 Nō te fa’a’ohipa i teie mau parau tumu i roto i tō tātou orara’a, tītauhia hau atu i te ti’aturira’a noa ; e mea tītauhia ’ia fa’atano i tō tātou ferurira’a ’e tō tātou ’ā’au i ni’a i teie mau parau tumu hanahana. E tītau teie fa’atanora’a i te tauto’ora’a tāmahana ’e te tāmau, tā tātou iho, ta’a ’ē noa atu te tūru’ira’a i ni’a i te Fa’aora, inaha e’ita tō tātou mau ’opara’a ti’a ’ore e mōrohi atu rātou iho. Nō te ’aro i te fa’ahemara’a, tītauhia ’ia rave maita’i ’e ’ia ha’apa’o maita’i i tōna orara’a tā’āto’a. ’Ia ’ite rā ’outou ē, ’ua ineine te Fatu nō te tauturu ia tātou i roto i tā tātou mau tauto’ora’a, ma te parau fafau i te mau ha’amaita’ira’a fa’ahiahia ’ia tāpe’a māite tātou ē tae noa atu i te hope’a.
I te hō’ē taime i te fare tāpe’ara’a nō Liberty ’aita tō Iosepha Semita ’e tō tōna nā hoa mau ’āuri te ti’amāra’a i te hō’ē noa a’e mea maori rā tō rātou mau mana’o, ’ua hōro’a mai te Fatu i te parau a’o e tauturu ia rātou nā reira ato’a te hō’ē parau fafau e tano ato’a ia tātou nei :
« ’Ia ’ī noa ato’a ho’i tō ’outou mau ’ā’au i te aroha i te mau ta’ata ato’a, ’e i te ’utuāfare fa’aro’o, ’e ’ia fa’a’una’una noa te tai’ata ’ore i tō ’outou mau ferurira’a i te mau taime ato’a ; ’ei reira tō ’outou ti’aturira’a e pūai roa ai i mua i te aro nō te Atua…
« ’E e riro te Vārua Maita’i ’ei ’āpiti nō ’outou i te mau taime ato’a, ’e tō ’outou sepeta ’ei sepeta taui ’ore nō te parauti’a ’e te parau mau ». 13
’A nā reira ai tātou, e tāmau noa te mau mana’o mo’a i te fa’anehenehe i tō tātou ferurira’a ’e e arata’i te mau hina’aro mā ia tātou i te mau ’ohipa parauti’a.
’Ua fa’aha’amana’o ato’a Moroni i tōna mau ta’ata ’eiaha tō rātou tai’ata e ha’apau ia rātou. 14 Te ta’o ra tai’ata ’o te hō’ē ïa hia’ai pūai roa ’e te hina’aro ti’a ’ore i te hō’ē mea. 15 E pū’ohu te tai’ata i te mau mana’o pōiri ato’a ’aore rā te mau hina’aro ’ino e fa’arōtahi i te ta’ata i ni’a i te mau peu pipiri ’aore rā te maura’a i te mau mea o teie nei ao ’e ’aita atu ra e rave i te maita’i, e hāmani maita’i, e ha’apa’o i te mau fa’auera’a a te Atua ’e te reira mau mea. E ’ite-pinepine-hia te reira i roto i te mau mana’o tino nei o te vārua. ’Ua fa’ata’a mai te ’āpōsetolo Paulo i te tahi o teie mau mana’o, mai te mau peu faufau, te tai’ata, te tāiroiro, te ’iria, te fei’i, ’e te mau mea mai te reira. 16 Ta’a ’ē noa atu te huru ’ino o te tai’ata, e’ita tātou e nehenehe e ha’amo’e ē, tē fa’a’ohipa nei te ’enemi i te reira ’ei mauiha’a tama’i huna ’e te fa’ahema i ni’a ia tātou, i te ’umera’a ia tātou ’ia rave i te hō’ē mea hape.
E au mau taea’e, e au mau tuahine, tē parau pāpū nei au ē, ’ia tūru’i tātou i ni’a i te papa nō te fa’aorara’a, te Fa’aora o tō tātou vārua, ’e ’ia pe’e tātou i te parau a’o a Moroni, e rahi atu ā tō tātou ’aravihi nō te ha’avī i tō tātou mau mana’o, e mea pāpū roa. Tē ha’apāpū nei au ia ’outou ē, e tupu tō tātou pa’ari pae vārua i te rahi ma te vitiviti rahi roa, e taui atu ra tō tātou ’ā’au ’e e riro rahi ato’a atu ra tātou mai ia Iesu Mesia. Hau atu, e pūai atu ā ’e e tāmau noa atu te fa’aurura’a a te Vārua Maita’i i roto i tō tātou orara’a. ’Ei reira te mana o te mau fa’ahemara’a a te ’enemi i te iti noa mai i ni’a ia tātou, e orara’a ’oa’oa atu ra ïa ’e te mā ’e te ha’amo’ahia tō tātou.
Nō rātou tei topa i roto i te fa’ahemara’a nō te hō’ē noa atu tumu, ’e tē pārahi ra i roto i te mau ’ohipa parauti’a ’ore, tē ha’apāpū nei au ia ’outou ē, tē vai nei te ’ē’a nō te ho’i mai, tē vai nei te tīa’ira’a i roto i te Mesia. Ma’a matahiti i ma’iri, ’ua fāna’o vau i te paraparau i te hō’ē melo iti nō Te ’Ēkālesia a Iesu Mesia i te Feiā Mo’a i te mau Mahana Hope’a nei tei nā roto i te hō’ē taime fifi rahi i roto i tōna orara’a, i muri iho i te ravera’a i te hō’ē ’ōfatira’a ture rahi. I te ’itera’a vau iāna, ’ua ’ite roa vau i te ’oto i roto i tōna mata, ’āpitihia i te ’ana’ana o te tīa’ira’a i ni’a i tōna hōho’a. E ’itehia i ni’a iāna te ’ā’au ha’eha’a ’e te taui. I riro na ’oia ’ei keresetiano itoito mau ’e ’ua ha’amaita’i-rahi-hia ’oia e te Fatu. Terā rā, ’ua vaiiho ’oia i te hō’ē noa iho mana’o ti’a ’ore ’ia tomo i roto i tōna mana’o, ’e ’ua tāmau noa atu ra. ’A vaiiho noa ai ’oia i teie mau mana’o i te tomo mai, ’ua a’a-roa-hia i roto i tōna ferurira’a ’e ’ua ha’amata i te tupu hōhonu i roto i tōna ’ā’au. Rave a’enei ’oia mai te au i teie mau hina’aro ti’amā ’ore, ’e ’ua rave atu ra i te mau fa’aotira’a tei ha’apa’o ’ore i te mau mea faufa’a roa a’e i roto i tōna orara’a. ’Ua parau mai ’oia ē, ’āhani ’oia i ’ore i vaiiho i terā mana’o ma’ama’a ’ia ha’amata, e’ita ïa ’oia e vai pāruru ’ore ’e te pe’e i te mau fa’ahemara’a a te ’enemi—e mau fa’ahemara’a tei fa’atae mai i te ’oto rahi roa i roto i tōna orara’a, nō te hō’ē a’e tau.
’Aua’a a’e rā, mai te tamaiti pūhura iroto i te parabole tu’iro’o o te ’evanelia a Luka, ’ua ho’i fa’ahou mai ra tōna iho huru mau ’e ’ua ara mai i teie rereioa. 17 ’Ua fa’a’āpī ’oia i tōna ti’aturi i te Fatu ’e ’ua tupu te ’ā’au marū mau ’e ’ua tae mai tōna hina’aro i te hope’a e ho’i mai i roto i te nana o te Fatu. I terā mahana, ’ua putapū māua to’opiti i te here tāra’ehara a te Fa’aora nō tātou. I te hope’a o tā māua ’āparaura’a, ’ua putapū roa tō māua ’ā’au, ’e tae mai i teie mahana, tē ha’amana’o nei au i te ’oa’oa ’ana’ana i ni’a i tōna hōho’a mata ’a fa’aru’e ai ’oia i tō’u piha tōro’a.
E au mau hoa, ’ia pāto’i tātou i te mau fa’ahemara’a iti, ’o tē tae pinepine nei ma te tīa’i-’ore-hia i roto i tō tātou orara’a, e mauha’a tano a’e ïa tā tātou nō te ’ape i te mau ’ōfatira’a ture teimaha. Mai tā te Peresideni Spencer W. Kimball i parau : « E mea varavara te hō’ē ta’ata i te ō i roto i te hara rahi ma te ’ore e ha’amata nā ni’a i te fatira’a i raro a’e i te mau hara na’ina’i nā mua, ’e nā te reira e ’īriti i te ’ūputa i te hara rahi a’e… [’Aita] te hō’ē fenua mā [e] ’ī tā’ue noa i te ’aihere ». 18
I te fa’aineinera’a ’oia nō te rave i tāna misiōni i ni’a i te fenua nei, ’ua fa’ahi’o te Fa’aora Iesu Mesia i te faufa’a rahi nō te pāto’i-tāmau-ra’a i te mau mea ato’a e nehenehe e fa’ataui i tō tātou mana’o e fa’atupu i tō tātou fā mure ’ore. I muri mai e rave rahi ’arora’a manuia ’ore a te ’enemi, tei tāmata i te fa’ahahi ’ē Iāna i tāna misiōni, ’ua tīahi ’āfaro atu te Fa’aora i te diabolo i te nā-’ō-ra’a : « E haere ’ē atu ’oe, e Sātane… Faʼaru’e ihora te diabolo iāna, ʼe inaha, e mau melahi tei haere mai ʼe ’ua tauturu mai ra iāna ». 19
E ti’a ānei ia ’outou, tō’u mau taea’e ’e mau tuahine, ’ia feruri e aha tē tupu mai te mea e noa’a mai ia tātou te pūai ’e te itoito nō ’ō mai i te Fa’aora nō te parau ē « ’Aita » ’e « E haere ’ē atu ’oe », i te mau mana’o vi’ivi’i ’ore terā taime mātāmua mau e tae mai te reira i roto i tō tātou ferurira’a ? E aha te huru o te reira i ni’a i te mau hina’aro o tō tātou ’ā’au ? Nāhea tā tātou mau ’ohipa i muri iho i te reira e tāpe’a ai ia tātou i pīha’i iho i te Fa’aora ’e ’ua noa’a atu ra te fa’aurura’a tāmau o te Vārua Maita’i i roto i tō tātou orara’a ? ’Ua ’ite au ē nā roto i te pe’era’a i te hi’ora’a o Iesu, e ’ape tātou i te mau ’ohipa ’oto rahi ’e te mau ravera’a au ’ore e fa’atupu i te mau fifi ’utuāfare ’e te au ’ore, te mana’o ’ino i te manava ’e te mau ’opara’a, te ravera’a i te parauti’a ’ore ’e te hāmani ’ino, te topara’a i raro a’e i te mau hia’ai fa’atītī ’e te mau mea ato’a e pāto’i i te mau fa’auera’a a te Fatu.
I roto i tāna poro’i rahi ’e te putapū nō ’Ēperēra i teie matahiti, ’ua parau fafau tō tātou peropheta here ē, te Peresideni Nelson ē, te mau ta’ata ato’a tei ineine i te « fa’aro’o iāna »—fa’aro’o ia Iesu Mesia—’e i te ha’apa’o i tāna mau fa’auera’a, « e ha’amaita’ihia [rātou] i te mana hau atu nō te ārai i te fa’ahemara’a, te mau ’arora’a, ’e te mau paruparu » ’e e rahi atu ā tō tātou ’aravihi nō te putapū i te ’oa’oa, noa atu ā te mau ’āoira’a nei. 20
Tē parau pāpū nei au ia ’outou ē, te mau parau fafau a tō tātou peropheta here, ’o te mau parau ïa a te Fa’aora iho. Tē ani nei au i te tā’āto’ara’a ’ia « fa’aro’o iāna » i tō tātou mau mana’o ato’a ’e ’ia pe’e Iāna ma tō tātou ’ā’au ato’a ’ia noa’a mai te pūai ’e te itoito nō te parau « ’Aita » ’e « E haere ’ē atu ’oe » i te mau mea ato’a e nehenehe e fa’atae i te ’oa’oa ’ore i roto i tō tātou orara’a. ’Ia nā reira tātou, tē parau fafau nei au ē, e tono mai te Fatu i te tahi atu ā fāito o tōna Vārua Mo’a nō te ha’apūai ia tātou ’e nō te tāmāhanahana, ’ia riro tātou ’ei ta’ata ’ā’au mai tō te Fatu iho ’ā’au. 21
Tē hōro’a nei au i tō’u ’itera’a pāpū ē, tē ora nei Iesu Mesia ’e nā roto Iāna e nehenehe tātou e upo’oti’a i ni’a i te mau fa’aurura’a ’ino a te ’enemi ’e e manuia i te fa’aineinera’a nō te ora a muri noa atu ’e te Fatu ’e i mua i te aro o tō tātou Metua here i te Ra’i. Tē parau pāpū nei au i teie mau parau mau ma tō’u here ato’a ia ’outou ’e i tō tātou Fa’aora nehenehe, tōna i’oa tā’u e parau hanahana nei ma te tura ’e ma te ’ārue a muri noa atu. Tē parau nei au i teie mau mea nā roto i te i’oa o Iesu Mesia, ’āmene.