Tē paraparau nei tātou nō te Mesia
’A iti ai te ao nei i te paraparau nō Iesu Mesia, e paraparau rahi ana’e nōna.
Tē fa’a’ite atu nei au i tō’u here ia ’outou, e tō mātou mau hoa here ’e te mau hoa ti’aturi. ’Ua fa’ahiahia vau i tō ’outou fa’aro’o ’e te itoito i roto i te mau ’āva’e i ma’iri iho nei, ’a ha’ape’ape’a ai teie ma’i pe’e i tō tātou orara’a ’e ’a rave ai i te mau melo faufa’a rahi o te ’utuāfare ’e te mau hoa here.
I roto i taua pu’e tau pāpū ’ore ra, ’ua fāri’i au i te hō’ē māuruuru ta’a ’ē nō tō’u ’itera’a mau ’e te pāpū ē, ’o Iesu te Mesia. ’Ua fāri’i ānei ’outou i te reira ? Tē vai nei te mau fifi i ni’a ia tātou tāta’itahi, terā rā, i te mau taime ato’a, i mua ia tātou, tē vai ra ’oia tei parau ma te ha’eha’a ē : « О vau te ’ē’a, ’e te parau mau, ’e te ora ». 1 ’A fa’aruru ai tātou i te hō’ē tau fa’aāteateara’a pae tino ia tātou iho ’ia vetahi ’ē, ’aita roa atu tātou e fa’aruru i te hō’ē tau fa’aāteateara’a pae vārua ia tātou iho ’e iāna, ’o tē tāmau noa nei i te tāparu ia tātou ma te here, « haere mai iā’u nei ». 2
Mai te hō’ē feti’a arata’i i roto i te hō’ē ra’i māramarama, e tūrama Iesu Mesia i tō tātou haere’a. ’Ua haere mai ’oia i te fenua nei i roto i te hō’ē fare vaira’a ’ānimara ha’eha’a roa. ’Ua ora ’oia i te hō’ē orara’a maita’i roa. ’Ua fa’aora ’oia i te feiā ma’i ’e ’ua fa’ati’a fa’ahou i tei pohe. ’Ua riro ’oia ’ei hoa nō tei mo’ehia. ’Ua ha’api’i mai ’oia ia tātou ’ia rave i te maita’i, ’ia ha’apa’o, ’e ’ia here i te tahi ’e te tahi. ’Ua pohe ’oia i ni’a i te tātauro, ’e ’ua ti’afa’ahou mai ma te hanahana e toru mahana i muri a’e, ’o te fa’ati’a ia tātou ’e te feiā tā tātou i here, ’ia ora i ’ō atu i te mēnema. Nā roto i tōna aroha ’e te maita’i fāito ’ore, ’ua rave ’oia i ni’a iāna iho i tā tātou mau hara ’e tō tātou māuiui, ’ua hōro’a mai i te fa’a’orera’a hara ’ia tātarahapa ana’e tātou ’e te hau i roto i te mau vero o te orara’a. ’Ua here tātou iāna. Tē ha’amori nei tātou iāna. Tē pe’e nei tātou iāna. ’O ’oia te tūtau nō tō tātou vārua.
Te vāhi huru ’ē, ’a tupu ai taua ti’aturira’a pae vārua ra i te rahi i roto ia tātou, tē vai nei e rave rahi ta’ata i te fenua nei e mea iti roa tō rātou ’itera’a nō ni’a ia Iesu Mesia, ’e i roto i te tahi mau tuha’a fenua o te ao nei, i reira te porora’ahia tōna i’oa e rave rahi tenetere, tē iti nei te fa’aro’o ia Iesu Mesia. ’Ua ’ite te feiā mo’a itoito nō Europa i tō rātou ti’aturira’a i te topara’a i roto i tō rātou mau fenua i te roara’a o nā ’ahuru matahiti. 3 Te fifi rā, i te fenua Marite nei, te ’ōtohe ato’a ra te fa’aro’o. ’Ua fa’a’ite mai te hō’ē tuatāpapara’a ’aita i maoro a’enei, i roto i nā 10 matahiti i ma’iri a’e nei e 30 mirioni ta’ata i Marite tei fa’aru’e i te ti’aturira’a i te ti’ara’a Atua ’o Iesu Mesia. 4 ’Ia hi’ohia i te ao ato’a nei, tē tohu ra te tahi atu tuatāpapara’a ē, i roto i nā ’ahuru matahiti i muri nei, e hau atu i te tāta’i piti te rahira’a ta’ata e fa’aru’e i te ha’apa’ora’a fa’aro’o i te rahira’a ta’ata e tāpe’a noa i te reira. 5
’Oia mau, tē fa’atura nei tātou i te ti’ara’a o te ta’ata tāta’itahi ’ia mā’iti, terā rā, ’ua parau pāpū mai tō tātou Metua i te ao ra ē : « ’O tā’u Tamaiti here teie, ’a fa’aro’o iāna ». 6 Tē fa’a’ite pāpū nei au ē, e tae mai te mahana e tu’u ai te mau turi ato’a i raro ’e e fā’i ai te mau arero ato’a ē, ’o Iesu te Mesia. 7
Nāhea tātou i te pāhono i tō tātou ao e taui nei ? ’A tāu’a ’ore ai te tahi pae i tō rātou fa’aro’o, tē ’imi nei te tahi pae i te parau mau. ’Ua rave tātou i te i’oa o te Fa’aora i ni’a ia tātou iho. E aha atu ā tā tātou e ti’a ’ia rave ?
Te fa’aineinera’a o te peresideni Russell M. Nelson
E tae mai te hō’ē tuha’a nō tā tātou pāhonora’a ’ia ha’amana’o ana’e tātou e mea nāhea tō te Fatu arata’ira’a i te peresideni Russell M. Nelson i roto i te mau ’āva’e nā mua a’e i tōna pi’ira’ahia ’ei Peresideni nō te ’Ēkālesia. ’A paraparau ai ’oia hō’ē matahiti hou tōna pi’ira’a, ’ua ani te peresideni Nelson ia tātou ’ia tuatāpapa hōhonu atu i mau fa’ahorora’a e 2 200 o te i’oa Iesu Mesia i tāpurahia i roto i te Arata’i nō te mau tumu parau. 8
E toru ’āva’e i muri mai, i roto i te ’āmuira’a rahi nō ’Ēperēra, ’ua fa’ata’a mai ’oia nāhea, ’oia ato’a ma tōna nā ’ahuru matahiti i te rirora’a ’ei pipi itoito, teie tuatāpapara’a hōhonu nō ni’a ia Iesu Mesia i te ha’aputapūra’a iāna. ’Ua ani te tuahine Wendy Nelson iāna nō ni’a i te mea tei tupu i ni’a iāna. ’Ua pāhono ’oia, « ’ua riro vau ’ei ta’ata ta’a ’ē » E ta’ata ta’a ’ē ’oia ? E 92 matahiti tōna, e ta’ata ta’a ’ē ? ’Ua fa’ata’a te peresideni Nelson ē :
« ’Ia hōro’a ana’e tātou i te taime nō te ha’api’i mai nō ni’a i te Fa’aora ’e tāna tusia tāra’ehara, e hutihia tātou [iāna] ra…
« …E ti’a i tō tātou mana’o ’ia ha’amau-pāpū-hia i ni’a i te Fa’aora ’e tāna ’evanelia ». 9
’Ua parau te Fa’aora, « ’a hi’o mai iā’u nei i tō mau mana’o ato’a na ». 10
I roto i te hō’ē ao ’ohipa, te pe’ape’a, ’e te mau tauto’ora’a fa’ahiahiahia, e tāpe’a noa tātou i tō tātou ’ā’au, tō tātou ferurira’a, ’e tō tātou mau mana’o i ni’a iāna, ’o ’oia tō tātou ti’aturira’a ’e te fa’aorara’a.
Mai te mea ’ua tauturu te hō’ē tuatāpapara’a ’āpī o te Fa’aora ’ia fa’aineine i te peresideni Nelson, e’ita ānei te reira e tauturu ato’a ia tātou ’ia fa’aineine ?
Nō te ha’apāpūra’a i te i’oa o te ’Ēkālesia, ’ua ha’api’i mai te peresideni Nelson ē : « Mai te mea ’ua tītauhia ia tātou ’ia fāri’i i te mana o te tāra’ehara a Iesu Mesia—nō te tāmā ’e nō te fa’aora ia tātou, nō te ha’apūai ’e nō te fa’arahi ia tātou, ’e i te pae hōpe’a nō te fa’ateitei ia tātou—tītauhia ia tātou ’ia ’ite pāpū iāna ’ei tumu nō taua mana ra ». 11 ’Ua ha’api’i mai te peresideni Nelson ia tātou ē, te fa’a’ohipa-tāmau-ra’a i te i’oa ti’a o te ’Ēkālesia, e ’ohipa iti ha’iha’i paha ’ia hi’ohia, e ’ere roa atu ïa i te hō’ē ’ohipa ha’iha’i, e tarai te reira i te ao nō ananahi.
Hō’ē parau fafau nō tō ’outou fa’aineinera’a
Tē fafau atu nei au ia ’outou ē, ’ia fa’aineine ana’e ’outou ia ’outou iho, mai te peresideni Nelson, e riro ato’a ’outou ’ei mea ta’a ’ē, ma te feruri hau atu nō ni’a i te Fa’aora, te paraparaura’a pinepine a’e nōna ’e ma te ’ōti’ati’a ’ore. ’A ’ite marū noa ai ’outou iāna, ’e ’a rahi noa ai tō ’outou here iāna, e tahe mai tā ’outou mau parau ma te au māite, mai tā te reira e rave ra ’a paraparau ai ’outou nō ni’a i te hō’ē o tā ’outou mau tamari’i ’ore rā, hō’ē hoa rahi. E iti mai tō te feiā e fa’aro’o ra ia ’outou i te paraparau mai ’aore rā i te tāu’a ’ore ia ’outou ’e ’ia ha’api’i rahi mai nā roto mai ia ’outou.
Tē paraparau nei ’outou ’e ’o vau nei nō Iesu Mesia, e nehenehe rā paha tā tātou e ha’amaita’i ri’i atu. Mai te mea e fa’aiti tō te ao nei i te paraparau nō ni’a iāna, ’o vai ïa tē paraparau hau atu nō ni’a iāna ? ’O tātou ïa ! E te tahi atu mau keretetiāno itoito !
Paraparaura’a nō te Mesia i roto i tō tātou mau fare
Tē vai ra ānei te mau hōho’a nō te Fa’aora i roto i tō tātou mau fare ? Tē paraparau pinepine ra ānei tātou i tā tātou mau tamari’i nō ni’a i te mau parabole a Iesu ? « E au te mau ’ā’amu o Iesu mai te hō’ē mata’i ’o tē pupuhi nei i ni’a i te mau ’ārahu o te fa’aro’o i roto i te ’ā’au o tā tātou mau tamari’i ». 12 ’Ia ui mai tā ’outou mau tamari’i i te mau uira’a ia ’outou, ’a feruri pāpū i te ha’api’i i te mea tā te Fa’aora i ha’api’i. ’Ei hi’ora’a, mai te mea e u’i mai tā ’outou tamari’i, « pāpā, nō te aha tātou e pure ai ? » E nehenehe ’outou e pāhono, « e uira’a maita’i roa te reira. Tē ha’amana’o ra ’oe i te taime ’a pure ai Iesu ? E paraparau tāua nō te aha ’oia i pure ai, ’e e mea nāhea tōna purera’a ».
« Tē paraparau nei tātou i te Mesia, tē ’oa’oa nei tātou i te Mesia, ’ia ’ite tā tātou mau tamari’i i te tumu e hi’ohia atu e rātou nō te matarara’a i tā rātou mau hara ». 13
Paraparaura’a nō te Mesia i te fare purera’a
Tē parau ato’a ra teie ’īrava ē, « tē a’o nei tātou i te parau a te Mesia ». 14 I roto i tā tātou mau purera’a ha’amorira’a, e fa’atumu tātou i ni’a i te Fa’aora ia Iesu Mesia ’e i te hōro’a nō tāna tusia tāra’ehara. E ’ere te aura’a ē, e’ita tā tātou e nehenehe e fa’ati’a i te hō’ē ’itera’a nō roto mai i tō tātou iho orara’a, ’aore rā, e fa’a’ite i te mau mana’o nō roto mai ia vetahi ’ē. Noa atu ē, e paraparau tātou nō ni’a i te ’utuāfare ’aore rā te tāvinira’a ’aore rā te mau hiero, ’aore rā, te hō’ē misiōni i ma’iri a’e nei, e ti’a i te mau mea ato’a i roto i tā tātou ha’amorira’a ’ia toro atu i ni’a i te Fatu ’o Iesu Mesia.
E toru ’ahuru matahiti i ma’iri a’e nei, ’ua parau mai te peresideni Dallin H. Oaks nō ni’a i te hō’ē rata tāna i fāri’i nā « te hō’ē ta’ata e parau ra ē, ’ua haere ’oia i roto i te hō’ē purera’a ’ōro’a ’e ’ua fa’aro’o hō’ē ’ahuru e ma hitu ’itera’a pāpū, ma te fa’aro’o ’ore ’ia fa’ahitihia te Fa’aora ». 15 I muri iho, ’ua parau mai te peresideni Oaks, « e mea fa’atina roa paha teie tātarara’a, [terā rā] tē fa’ahiti atu nei au i te reira nō te mea e fa’aha’amana’ora’a te reira ia tātou ». 16 ’Ua ani mai ’oia ia tātou ’ia paraparau rahi atu nō Iesu Mesia i roto i tā tātou mau a’ora’a ’e mau ha’api’ira’a. Tē hi’o nei au ē, tē fa’atumu rahi noa atura tātou i ni’a i te Mesia i roto i tā tātou mau purera’a a te ’Ēkālesia. E tāmau noa ma te feruri māite i roto i teie mau tauto’ora’a maita’i roa.
Paraparaura’a nō te Mesia ia vetahi ’ē
’Ia vai matara noa tātou, ’ia vai ineine hau atu nō te paraparau nō ni’a i te Mesia i te feiā e hā’ati nei ia tātou. ʼUa parau te peresideni Russell M. Nelson, « ʼua ineine te mau pipi mau a Iesu Mesia ’ia ti’a atu, ’ia parau ma te taiā ’ore, ’e ’ia riro ’ei feiā ta’a ’ē atu i te mau ta’ata o te ao nei ». 17
I te tahi taime, tē feruri nei tātou ē, e mea ti’a i te hō’ē ’āparaura’a i te hō’ē ta’ata ’ia arata’i mai iāna i te fare pure ’aore rā, ’ia fārerei i te mau misiōnare. ’A vaiiho i te Fatu ’ia arata’i ia rātou mai tā rātou e hina’aro, ’āre’a rā tātou, e feruri rahi atu tātou i tā tātou hōpoi’a ’ia riro ’ei reo nōna, ma te feruri tāmau ’e te matara noa nō tō tātou fa’aro’o. ’Ua ha’api’i mai ’o Elder Dieter F. Uchtdorf ia tātou ē, ’ia ani mai te hō’ē ta’ata ia tātou nō ni’a i tō tātou hope’a hepetoma, e ti’a ia tātou ’ia ’pāhono ma te ’oa’oa ē, e mea au roa nā tātou ’ia fa’aro’o i te mau tamari’i Paraimere ’ia hīmene, « tē tāmata nei au ’ia riro mai ia Iesu ». 18 E fa’a’ite ana’e ma te marū i tō tātou fa’aro’o i te Mesia. Mai te mea e fa’a’ite mai te hō’ē ta’ata i te hō’ē fifi tōna i roto i tōna iho orara’a, e nehenehe tātou e parau ē, « e Ioane, Mary, ’ua ’ite ’oe ē, tē ti’aturi nei au ia Iesu Mesia. ’Ua feruri au i te hō’ē mea tāna i parau, ’o tē nehenehe e tauturu ia ’oe ».
’Ia vai matara hau atu i ni’a i te mau rāve’a tūreiara’a tōtiare ma te paraparaura’a nō ni’a i tō ’outou ti’aturi i te Mesia. E fa’atura te rahira’a ta’ata i tō ’outou fa’aro’o, mai te mea rā e vahavaha mai te hō’ē ta’ata i tā ’outou mau parau, nō ni’a i te Fa’aora, ’a fa’aitoito i roto i tāna parau fafau : « E ao tō ’outou ’ia fa’a’ino mai te ta’ata ia ’outou i te mau ’ino ato’a nei… nō’u. E utu’a rahi ho’i tā ’outou i te ao ra ». 19 Mea ha’ape’ape’a a’e nā tātou ’ia riro ’ei mau pipi nāna, i te « herehia » nā tā tātou iho mau pipi. ’Ua a’o mai ’o Petero ē : « ’Ia vai ineine ā ’outou ’ia parau atu i te ta’ata ato’a ’ia ui mai ia ’outou i te ti’aturi i roto ia ’outou na ». 20 Paraparau ana’e tātou nō te Mesia.
Te Buka a Moromona ’o te hō’ē ïa fa’a’itera’a pūai nō Iesu Mesia. Fātata te mau ’api ato’a tē fa’a’ite nei nō te Fa’aora ’e tāna misiōni hanahana. 21 ’Ua ’ī tōna mau ’api i te hāro’aro’ara’a nō tōna tāra’ehara ’e te aroha. ’Ei ’āpiti nō te Faufa’a ’Āpī, te tauturu nei te Buka a Moromona ia tātou ’ia hāro’aro’a maita’i a’e nō te aha te Fa’aora i haere mai ai e fa’aora ia tātou, ’e e nāhea e nehenehe ai ia tātou ’ia haere mai iāna ra ma te pāpū.
Te tahi pae o tō tātou mau hoa keretetiāno, i te tahi taime, ’aita rātou e pāpū maita’i i tō tātou mau ti’aturira’a ’e i tō tātou mau mana’o. E ’oa’oa ana’e tātou ’e ’o rātou i tō tātou fa’aro’o hō’ē ia Iesu Mesia ’e i te mau pāpa’ira’a mo’a o te Faufa’a ’Āpī tā tātou pā’āto’a e here nei. I te mau mahana i muri nei, te feiā e ti’aturi ia Iesu Mesia, e hina’aro rātou i te auhoara’a ’e te pāturura’a a te tahi ’e te tahi. 22
’A iti ai te ao nei i te paraparau nō Iesu Mesia, e paraparau rahi ana’e nōna. ’A ’ite marū noa hia ai tō tātou mau huru ’ei pipi nāna, e rave rahi ta’ata ’ati a’e ia tātou ’o tē ineine nō te fa’aro’o. ’Ia fa’a’ite ana’e tātou i te māramarama tā tātou i fāri’i nō roto mai iāna, ’ei reira tōna māramarama ’e tōna mana fa’aora pūai e ’ana’ana ai i ni’a ia rātou e hina’aro e ’īriti i tō tātou ’ā’au. ’Ua parau Iesu, « I haere mai nei au i te ao nei ’ei ti’arama ». 23
Fa’ateitei i tō tātou hina’aro e paraparau nō te Mesia
’Aita e mea e fa’ateitei i tō’u hina’aro e paraparau nō te Mesia hau atu i te ferurira’a i tōna ho’ira’a mai. Noa atu ē, ’aita tātou i ’ite a hea ’oia e ho’i mai ai, e riro te mau ’ohipa nō tōna ho’ira’a mai ’ei mau mea fa’ahiahia mau ! E haere mai ’oia i roto i te mau ata o te ra’i ma te tura ’e te hanahana ’e tāna mau melahi mo’a ra. E ’ere te tahi noa tau melahi, te tā’āto’a rā o tāna mau melahi mo’a. E ’ere teie te mau kerubi pāpāri’a-cerise, pēnihia e Raphael, e ’itehia nei i ni’a i tā tātou mau tāreta Saint-Valentin. E mau melahi teie nō te mau tenetere, e mau melahi tei tonohia mai nō te tāpiri i te mau vaha o te mau liona, 24 nō te ’īriti i te mau ’ūputa o te fare tāpe’ara’a, 25 nō te fa’aara i tōna fānaura’a tīa’i-maoro-hia, 26 nō te tāmāhanahana āna i Getesemane, 27 nō te ha’apāpū i tāna mau pipi i tōna revara’a i ni’a, 28 ’e nō te ’īriti i te fa’aho’i-fa’ahou-ra’a mai hanahana o te ’evanelia. 29
E nehenehe tā ’outou e feruri e hōpoihia ’outou i ni’a nō te fārerei iāna, i teie ānei pae ’aore rā, i ō mai ānei i te pāruru ? 30 Tāna terā parau fafau i te feiā parauti’a. E vai te reira i roto i tō tātou ferurira’a ’e ’a muri noa atu.
’Auē tō tātou māuruuru nō tō tātou peropheta here, te peresideni Russell M. Nelson, tei fa’ateitei i tō tātou hina’aro ’ia here i te Fa’aora ’e ’ia poro i tōna ti’ara’a Atua. ’O vau te hō’ē mata ’ite i te rima o te Fatu i ni’a iāna ’e i te hōro’a o te heheura’a e arata’i nei iāna. E te peresideni Nelson, tē tīa’i rū nei mātou i tā ’oe mau a’ora’a.
E a’u mau hoa here ’ati a’e te ao nei, e paraparau ana’e tātou nō te Mesia, fa’ahaere ana’e i tāna parau fafau hanahana i mua : « ’O tē fā’i iā’u i mua i te ta’ata, e fā’i ato’a vau iāna i mua i te Metua ». 31 Tē fa’a’ite pāpū nei au e Tamaiti ’oia nā te Atua. I te i’oa ’o Iesu Mesia, ’āmene.