Nā roto i te hō’ēra’a o te ’ā’au e noa’a mai ai te mana i te Atua
’Ia ’imi ana’e tātou i te tāhō’ē o te ’ā’au, e riro tātou i te ti’aoro i te mana o te Atua nō te fa’ahope i tā tātou mau tauto’ora’a.
’Ua parau te metua vahine o Gordon iāna ē, mai te peu e fa’aoti ’oia i tāna ’ohipa i te fare, e hāmani ’oia i te hō’ē pai. Tāna pai au roa a’e. Nāna noa. Haere a’era Gordon e rave i te reira mau ’ohipa, ’āre’a te metua vahine, ’ua fa’aineine ïa i te pai. Tae mai nei tōna tuahine ’o Kathy ’e te tahi hoa i te fare. ’E ’ua ’ite i te pai ’e ’ua ani ihora te tahi nā rāua.
Nā ’ō atu ra Gordon : « ’Aita, nā’u terā pai. ’Ua tunu māmā nā’u, e mea ’ohipahia i noa’a mai ai ».
Riri atu ra Kathy i tōna taea’e. E mea ha’apa’o noa ’oia iāna iho, ’aita e ’ōpere. E aha, e pau iāna terā pai tā’āto’a ?
Ma’a hora i muri iho, i te ’īritira’a Kathy i te ’ūputa pere’o’o nō te fa’aho’i i tōna hoa, tē vai ra i ni’a i te pārahira’a e piti horoi tei tūfetu-nehenehe-hia, e piti pātia nā ni’a ’e e piti tāpū pai rahi maita’i i roto i te merēti. ’Ua fa’ati’a Kathy i teie ’ā’amu i te ’ōro’a hunara’a o Gordon nō te fa’a’ite i tōna ineine ’ia taui ’e ’ia hāmani maita’i i te ta’ata ’aita e aura’a i te tahi taime.
I te matahiti 1842, tē fa’aitoito ra te feiā mo’a i te patu i te hiero nō Nauvoo. I muri iho i te ha’amaura’ahia te Sōtaiete Tauturu i te āva’e Māti, ’ua haere pinepine te peropheta Iosepha i tā rātou mau rurura’a nō te fa’aineine ia rātou nō te mau fafaura’a mo’a ’e te fa’atāhō’ē ’o tā rātou e fātata i te rave i roto i te hiero.
I te 9 nō Tiunu, ’ua nā ’ō te peropheta « e ha’api’i atu ’oia nō ni’a i te aroha[.] ’Āhani e riri mai Iesu Mesia ’e [te mau] melahi ia tātou nō ni’a i te mau mea ānia, nāhea atu ra ïa tātou ? E mea tītauhia ’ia vai tō tātou aroha ’e ’ia vaiiho noa i te mau mea iti na’ina’i ». Tē parau fa’ahou ra te peresideni Semita : « E mea ’oto nō’u ’aita te fa’ahoara’a hope atu ā—’ia māuiui te hō’ē melo, e māuiui ato’a te tā’āto’ara’a—nā roto i te hō’ēra’a o te ’ā’au e noa’a mai ai te mana i te Atua ». 1
’Ua taparuru roa vau i teie parau iti mai te uira te huru. Nā roto i te hō’ēra’a o te ’ā’au e noa’a mai ai te mana i te Atua E ’ere teie nei ao mai tā’u e hina’aro nei. E rave rahi mea tā’u e hina’aro e fa’ataui ’e e ha’amaita’i atu ā. ’E ’aita e ha’avare, e rave rahi pāto’ira’a i tā’u mau tīa’ira’a, ’e i te tahi taime e tae mai te mana’o paruparu. ’Aita i maoro a’enei, ’ua ui au i roto iā’u i teie mau uira’a : Nāhea vau e nehenehe ai e māramarama maita’i a’e i te ta’ata ’ati a’e iā’u ? E aha tē rave nō te fa’atupu i terā « hō’ēra’a o te ’ā’au » e mea ta’a ’ē roa ho’i tātou ? E aha te mana nō ’ō mai i te Atua e matara mai, mai te mea e tāhō’ē ri’i ā vau i te ta’ata ? I roto i teie uiuira’a o te ’ā’au, ’ua noa’a mai e toru mana’o. Penei a’e e tauturu ato’a te reira ia ’outou.
E aroha atu
Tē tai’o nei te Iakoba 2:17 « E ha’amana’o i tō ’outou mau [taea’e ’e mau tuahine], mai tō ’outou ha’amana’ora’a ia ’outou ihora, ’e e aroha atu i te mau ta’ata ato’a, ’e e hōro’a noa atu ho’i i tā ’outou tao’a, ’ia riro ato’a rātou ’ei feiā tao’a mai ia ’outou te huru ». Tāui ana’e i te ta’o ra tao’a ’ei aroha—e hōro’a noa atu ho’i i tō ’outou aroha ’ia riro ato’a rātou ’ei feiā tao’a mai ia ’outou te huru.
Pinepine tātou i te feruri i te mā’a ’e te moni ’ei tao’a, penei a’e rā te mea tei hina’aro-rahi-hia a’e i roto i tā tātou tāvinira’a, ’o te aroha ïa.
’Ua parau a’enei tō mātou peresideni Sōtaiete Tauturu : « Tā’u… e parau ia ’outou… e fa’aherehere noa vau i tō ’outou i’oa… E hi’o vau ia ’outou i tō ’outou huru maita’i roa a’e… E’ita roa atu vau e parau i te parau au ’ore nō ni’a ia ’outou, ’o tē ’ore e fa’ateitei ia ’outou. Tē ani nei au ia ’outou ’ia nā reira ato’a mai iā’u, i te mea ho’i ē, ’aita e ha’avarera’a, ’ua ri’ari’a vau ’o te ’ino’ino ’outou iā’u ».
’Ua nā ’ō Iosepha Semita i te mau tuahine i terā ’āva’e Tiunu ra nō 1842 :
« ’Ia fa’aite ana’e mai te ta’ata i te maita’i iti noa ’e te here iti noa i ni’a iā’u, e aha pa’i ïa tō te reira mana i ni’a i tō’u ferurira’a…
« … ’Ia rahi tō tātou fātatara’a i tō tātou Metua i te Ao ra, e rahi ato’a tō tātou ineine e hi’o aroha atu i te mau vārua tei ro’ohia i te ’ati—[e tae mai te mana’o] e amo ia rātou i ni’a i tō tātou tapono, ’e e fa’aru’e ’ē atu i tā rātou mau hara i muri. [Tā’u nei a’ora’a, nō] teie Sōtaiete tā’āto’a—mai te mea e hina’aro ’outou ’ia aroha mai te Atua ia ’outou, ’a aroha atu ïa i te tahi ’e te tahi ». 2
E parau a’o ta’a ’ē teie nā te Sōtaiete Tauturu. ’Eiaha e ha’avā te tahi i te tahi ’e ’eiaha terā mau parau hōhoni. Fa’aherehere ana’e i tō te tahi ’e tō te tahi i’oa, ma te hōro’a i te tao’a nō te aroha. 3
Fa’a-swing [tārē] i tō ’outou va’a
I te matahiti 1936, e pupu hoe mātau-’ore-hia nō te fare ha’api’ira’a tuatoru nō Washington tei reva i Heremani nō te tata’u i roto i te mau ha’uti Olympique. E taime fifi rahi nō te Topatarira’a rahi. E mau tamāroa ’utuāfare ha’eha’a teie, nā tō rātou mau ’oire heru mīnera ’e te tāpū rā’au i hōro’a i te tahi ma’a moni nō te reva i Berlin. ’Ia hi’ohia e mana’ohia ē, e’ita e haere ’ia tata’u, ’ua tupu rā te tahi ’ohipa i roto i te hoera’a. I roto i te ’ohipa hoera’a, e parauhia te reira te « swing » Fa’aro’o mai i teie tātarara’a i roto i te buka ra The Boys in the Boat [Nā tamāroa i ni’a i te va’a] :
E ’ohipa tē tupu i te tahi mau taime, e mea pa’ari ’ia fa’atupu ’e e mea pa’ari ’ia fa’ata’a atu. E parauhia te reira te « swing [’ua tārē] ». E tupu te reira i te taime noa e hoe pauroa te ta’ata ma te tāhō’ē, ’aita e topara’a hoe ’ē.
E mea tītauhia ’ia tāpe’ape’a noa te mau ta’ata hoe i tō rātou ti’amāra’a hāhape ’e i te hō’ē ā taime ’ia pāpū ia rātou tō rātou ’aravihi tāta’itahi. ’Aita te mau tata’ura’a i rēhia ana e te pupu hō’ē noa huru ta’ata. Te pupu maita’i ra, e ’āno’ira’a maita’i ïa—tē vai ra te rautī ’arora’a, tē vai ra tē fa’aherehere, te vai ra tē ’aro, tē vai ra tē fa’ahau. ’Aita e ta’ata hoe faufa’a a’e i te tahi, e mau maita’i ana’e nō te va’a, terā rā, nō te hoe ’āmui maita’i, e mea tītauhia i te ta’ata tāta’itahi ’ia fa’atano i ni’a i te mau hina’aro ’e te ’aravihi o te tahi atu mau pu’era’a—e ti’i te ta’ata rima poto i mua ri’i atu, ’e te ta’ata rima roa i muri ri’i mai.
E nehenehe te mau ta’a-’ē-ra’a e riro ’ei faufa’a ’eiaha rā ’ei fifi. ’Ei reira noa, mai te huru ē, nā te va’a noa e tūra’i iāna. ’Ei reira noa te rohirohi e taui ai ’ei ’oa’oara’a rahi. Mai te huru te « swing » i te hō’ē pehepehe. 4
Noa atu ā te mau fifi rahi i mua ia rātou, ’ua ’itehia mai i teie pupu te swing ’e ’ua rē rātou. ’Ua ’oa’oa roa rātou i tā rātou feti’a ’auro, ’ua riro rā te tāhō’ē tā te ta’ata hoe tāta’itahi i ’ite i terā mahana ’ei taime mo’a tei vai noa ē hope noa atu tō rātou orara’a.
Tāpū ’ē i te ’ino ’a tupu ai te maita’i
I roto i te ’ārētōria o te Iakoba 5, ’ua tanu te Fatu o te ’ō vine i te rā’au maita’i i te vāhi maita’i, ’ua vi’ivi’i atu ra rā i te roara’a o te tau ’e ’ua hōro’a mai i te mā’a ’ōviri. E va’u taime tō te Fatu o te ’ō vine paraura’a : « ’Ua ’oto vau ’ia ’ere i teie nei rā’au ».
Nā ’ō a’era te tāvini i te Fatu o te ’ō vine : « ’A fa’aherehere [i te rā’au] ē maoro iti a’e. ’E ’ua parau atu ra te Fatu ; E fa’aherehere au i te reira ē maoro iti a’e ». 5
’E teie atu ra ïa te mau arata’ira’a ’o tā tātou pā’āto’a e nehenehe e fa’a’ohipa, tātou e tāmata nei i te ’ūtaru ’e i te fa’ahotu i te mā’a maita’i i roto i tā tātou iho ’ō vine iti : « E tāpū ’ē atu ’oe i te ’āma’a ’ino mai te au i te tupura’a o te ’āma’a maita’i ». 6
E’ita te tāhō’ē e tupu noa mai nā roto i te manamana ; tītauhia ’ia ’ohipa. E mea huehue ri’i, ’e i te tahi taime e mea au ’ore, ’e e tupu marū mai te reira ’a tāpū ’ē ai tātou i te ’ino mai te au i te tupura’a o te maita’i.
E ’ere roa atu tātou i te ta’ata ’ōtahi i roto i tā tātou mau tauto’ora’a fa’atupu tāhō’ē. Tē nā ’ō ra Iakoba 5 : « ’Ua haere ihora te mau tāvini ’e ’ohipa ihora ma tō rātou pūai ato’a ; ’e ’ua ’ohipa ihora ho’i te Fatu o te ’ō vine ’e rātou ato’a ». 7
E fa’aruru tātou tāta’itahi i te mau ’ohipa ha’apēpē mau, e mau mea e’ita roa atu e au ’ia tupu. E vaiiho ato’a tātou tāta’itahi, i terā taime ’e terā taime, i te te’ote’o ’e te ahaaha ’ia ha’avi’ivi’i i tā tātou hotu. ’O Iesu Mesia rā tō tātou Fa’aora i roto i te mau mea ato’a. E tae’a tōna mana i te ta’ata i raro roa ’e e nehenehe e ti’aturi i te reira i te taime e pi’i tātou iāna. Tātou pā’āto’a tē tāparu nei i te aroha nō tā tātou mau hara ’e mau hape. E hōro’a hua ’oia i te reira. ’E tē ani mai nei ’oia e ti’a ānei ia tātou ’ia hōro’a ato’a i taua aroha ra ’e te hāro’aro’a i te tahi ’e te tahi.
’Ua parau ’āfaro Iesu : « ’Ia tāhō’ē ; ’e mai te mea ’aita ’outou e riro ’ei hō’ē ra e ’ere ho’i ’outou nō’u nei ». 8 Mai te mea rā ho’i ’ua tāhō’ē tātou—mai te mea e ti’a ia tātou ’ia hōro’a i te hō’ē tāpū pai ’aore rā ’ia fa’atano i tā tātou iho mau tārēni ’ia swing maita’i roa te va’a—nōna ïa tātou. ’E e tauturu mai ’oia e tāpū ’ē i te ’ino ’a tupu ai te maita’i.
Mau parau fafau a te mau peropheta
’Aita ā paha tātou i te vāhi tā tātou i hina’aro, ’e ’aita ā tātou nei i te vāhi e ti’a atu tātou. Tē ti’aturi nei au e tae mai te tauira’a tā tātou e ’imi ra, i roto ia tātou iho ’e i roto i te mau pupu tei roto tātou, ’aita i pāpū roa nā roto ānei i te porora’a onoono, e mea pāpū a’e paha nā roto i te tāmatara’a onoono i te mau mahana tāta’itahi ’ia hāro’aro’a te tahi i te tahi. Nō te aha ? Nō te mea tē patu nei tātou ia Ziona—e mau ta’ata « hō’ē ā tō rātou ’ā’au ’e hō’ē ā tō rātou mana’o ». 9
’Ei vahine nō te fafaura’a, e fa’aurura’a rahi tātou. E ’itehia te reira fa’aurura’a i te mau taime ato’a o te mau mahana, ’ia ha’api’i ana’e tātou ’e te tahi hoa, ’ia fa’ata’oto tātou i te tamari’i, ’ia paraparau tātou i te ta’ata i pīha’i iho ia tātou i roto i te pere’o’o mata’eina’a, ’ia fa’aineine tātou i te tahi fa’a’ite’itera’a ’e te hō’ē hoa rave ’ohipa. E mana tō tātou nō te fa’aātea ’ē i te mana’o ha’avā ta’ata ’e nō te patu i te tāhō’ē.
E ’ere te Sōtaiete Tauturu ’e te Feiā ’Āpī Tamāhine i te mau piha noa. E nehenehe ato’a te reira e riro ’ei taime e’ita e mo’ehia, i reira te mau vahine ta’a ’ē mau e ta’uma ai i ni’a i te hō’ē ā va’a nō te hoe ē tae roa atu e ’itehia mai te swing. Tē pūpū nei au i teie anira’a : ’a ti’a ’ei pūai ’āmui ’o tē nehenehe e taui i te ao nei ’ei mea maita’i. Tā tātou fa’auera’a i fafau, ’o te aupurura’a ïa, te fa’ateiteira’a i te mau rima tautau, te amora’a i te mau ta’ata e tāfifi ra, i ni’a i tō tātou tua ’aore rā i roto i tō tātou rima. E ’ere i te mea ’ōhie ’ia ’ite e aha tē rave, e mea pāpū rā e mau mea e pāto’i i te mau hina’aro pipiri, ’e tītauhia ia tātou ’ia tāmata. E fāito pūai tā’ōti’a ’ore tō te mau vahine o teie ’Ēkālesia nō te taui i te sōtaiete. E ti’aturi pae vārua hope tō’u nei ē, ’ia ’imi ana’e tātou i te hō’ēra’a o te ’ā’au, e riro tātou i te ti’aoro mai i te mana o te Atua e fa’ahope roa i tā tātou mau tauto’ora’a.
I te fa’ahanahanara’a te ’Ēkālesia i te heheura’a nō te matahiti 1978 nō ni’a i te autahu’ara’a, ’ua hōro’a te peresideni Russell M. Nelson i te hō’ē ha’amaita’ira’a peropheta pūai rahi : « ’O tā’u nei pure ’e te ha’amaita’ira’a ’o tā’u e vaiiho i ni’a i te ta’ata ato’a e fa’aro’o mai nei, ’ia upo’oti’a tātou i te mau teimaha ato’a nō te mana’o ha’avā ma te haere ti’a i te aro o te Atua ra—’e i te tahi ’e te tahi—i roto i te hau ’e te au maita’i roa ». 10
’Ia fa’atumu tātou i ni’a i teie ha’amaita’ira’a a te peropheta ma te fa’a’ohipa i tā tātou mau tauto’ora’a ta’ata hō’ē ’e mau tauto’ora’a pupu, nō te fa’arahi i te tāhō’ē i roto i te ao. Tē vaiiho nei au i tō’u ’itera’a pāpū nā roto i teie mau parau i roto i te pure ha’eha’a ’e te mōrohi ’ore a te Fatu Iesu Mesia : « ’Ia riro rātou ato’a ’ei hō’ē ; mai ia ’oe, e tā’u Metua, i roto iā’u nei ra, ’e mai iā’u ho’i i roto ia ’oe na, ’ia hō’ē ato’a rātou i roto ia tāua ». 11 I te i’oa o Iesu Mesia, ’āmene.