E ara ’outou, tāmau māite ā i te pure
I teie mahana, tē fa’atae nei au i tā’u ti’aorora’a nō te pure, i te mau ta’ata ato’a nō te mau fenua ato’a ’ati a’e te ao nei.
E te mau taea’e ’e te mau tuahine, i te hepetoma hope’a nō tāna tāvinira’a i te tāhuti nei, ’ua ha’api’i Iesu i tāna mau pipi « E ara ’outou, tāmau māite ā i te pure, ’ia au ia ’outou te ora i teie nei mau mea ’ī’ino e fātata mai nei, ’e ’ia ti’a māite ’outou i mua i te aro o te tamaiti a te ta’ata nei ». 1
I rotopū i te mau mea « ’ī’ino e fātata mai nei » hou tōna tae-piti-ra’a mai, tē vai ra « te parau tama’i, ’e te ’āueue ro’o tama’i, e о’e ho’i, ’e te ma’i, ’e e ’āueue te fenua i terā vāhi, i terā vāhi ». 2
I roto i Te Parau Ha’api’ira’a ’e te mau Parau Fafau ’ua parau mai te Fa’aora, « ’E e ’ārepurepu noa te mau mea ato’a ra ; nō te mea ē, e tae mai te mata’u rahi i ni’a i te mau nūna’a ta’ata ato’a ». 3
Pāpū roa ē, tē ora nei tātou i te hō’ē taime tē ’ārepurepu nei te mau mea ato’a. E rave rahi ta’ata e mata’u nei i te tau i muri nei, ’e e rave rahi ’ā’au tei huritua i tō rātou fa’aro’o i te Atua ’e i tāna Tamaiti, ’o Iesu Mesia.
’Ua ’ī te mau parau ’āpī i te mau ’ā’amu nō te ’ohipa ’ino. Tē ha’apūrorohia nei i ni’a i te natirara te fa’a’inora’a i te pae morare. ’Ua hāmani-’ino-hia te mau mēnema, te mau fare purera’a, te mau mosque, te mau sunago ’e te mau vāhi mo’a.
’Ua ’ati fātata te ao ato’a nei i te ro’ohia i te ma’i pe’e : e mirioni o te mau ta’ata tei ro’ohia, e ’ua hau te mirioni te ta’ata tei pohe. ’Ua ha’afifihia te mau parau tū’ite nō te ha’api’ira’a, te mau purera’a fa’aro’o, te mau fa’aipoipora’a, te ’ohipa misiōnare ’e e rave rau atu ā mau ’ohipa faufa’a o te orara’a. Hau atu i te reira, e rave rahi ta’ata tei vai ’ōtahi noa ’e te mo’emo’e.
’Ua fa’atupu te mau ’ārepurepura’a i te pae fa’arava’ira’a faufa’a i te mau fifi i te mau ta’ata e rave rahi, i te mau tamari’i fifi iho ā rā a tō tātou Metua i te Ao ra.
’Ua ’ite tātou i te mau ta’ata i te fa’a’ohipara’a i tō rātou ti’ara’a nō te fa’ahuehue ma te hau, ’e ’ua ’ite tātou i te naho’a ta’ata tei fa’atupu i te ’ōrurehau.
I taua taime ato’a ra, tē tāmau noa nei tātou i te ’ite i te mau pe’ape’a ’ati a’e te ao nei.
Tē mana’o pinepine nei au ia ’outou e mamae nei, e hepohepo nei, e mata’u nei, ’aore rā e vai mo’emo’e nei. Tē ha’apāpū atu nei au ia ’outou tāta’itahi ē, ’ua ’ite te Fatu ia ’outou, ’ua ’ite ’oia i tō ’outou mau hepohepo ’e te pe’ape’a, ’e tē here nei ’oia ia ’outou—ma te maita’i ’e te hōhonu ’e a muri noa atu.
I te mau pō ato’a, ’ia pure ana’e au, e ani au i te Fatu ’ia ha’amaita’i i te feiā ato’a tei teimaha i te māuiui, i te pe’ape’a, i te vai-’ōtahi-noa-ra’a, ’e te ’oto. ’Ua ’ite au ē, tē fa’atāvevo ato’a nei te tahi atu mau ti’a fa’atere o te ’Ēkālesia i teie huru pure. ’Ei ta’ata hō’ē ’e ’ei ’āmuitahira’a, tē haere nei tō mātou ’ā’au ia ’outou na, ’e tā mātou mau pure, tē haere nei ïa i te Atua ra i tō ’outou i’oa.
E rave rahi mahana i te matahiti i ma’iri a’e nei tō’u pārahira’a i te pae apato’erau hiti’a o te rā o te fenua Marite, i te māta’ita’ira’a i te mau pū ’ā’amu nō Marite ’e nō te ’Ēkālesia, ’e te haerera’a i te mau putuputura’a ’e tā tātou mau misiōnare, ’e tā tātou mau melo, ’e te fārereira’a i te feiā fa’atere o te hau fenua ’e o te mau pū ’ohipara’a.
I te sābati 20 nō ’Ātopa, ’ua paraparau vau i roto i te hō’ē putuputura’a rahi i pīha’i iho ia Boston, Massachusetts. ’A paraparau ai au, ’ua tūra’ihia vau ’ia parau ē, « tē tāparu nei au ia ’outou ’ia pure nō teie fenua, nō tō tātou mau ti’a fa’atere, nō tō tātou nūna’a ’e nō te mau ’utuāfare e ora nei i roto i teie nūna’a rahi tei ha’amauhia e te Atua ». 4
’Ua parau ato’a vau ē, tei ni’a o Marite ’e e rave rahi nūna’a o te fenua nei, i te tahi atu ma’ara’a purūmu fifi, ’e e hina’aro rātou i tā tātou mau pure. 5
’Aita vau i fa’aineine i teie mau parau tāparu. ’Ua puta mai teie mau parau i roto iā’u ’a fāri’i ai au i te Vārua ’ia muhumuhu mai iā’u ’ia ani i te mau ta’ata ato’a i reira, ’ia pure nō tō rātou fenua ’e tō rātou mau ti’a fa’atere.
I teie mahana, tē fa’atae nei au i tā’u ti’aorora’a nō te pure, i te mau ta’ata ato’a nō te mau fenua ato’a ’ati a’e te ao nei. Noa atu te huru o tā tātou pure ’aore rā, ’o vai tā tātou e pure atu, ’a fa’a’ohipa i tō ’outou fa’aro’o—noa atu te huru o tō ’outou fa’aro’o—’e ’a pure nō tō ’outou fenua ’e nō tō ’outou mau ti’a fa’atere o te nūna’a. Mai tā’u i parau i te ’āva’e ’Ātopa i ma’iri a’e nei i Massachusetts, tē ti’a nei tātou i teie mahana i te hō’ē ma’ara’a purūmu rahi i roto i te ’ā’amu, ’e tei roto te mau nūna’a o te fenua nei i te hina’aro rahi i te hō’ē fa’aurura’a ’e te hō’ē arata’ira’a hanahana. ’Eiaha nō te poritita ’aore rā, nō te ture. Nō te hau rā ’e nō te fa’aorara’a e tupu i ni’a i te mau vārua o te ta’ata ’e i te vārua ato’a o te fenua— tō rātou mau ’oire, e tō rātou mau mata’eina’a—nā roto i te Ari’i o te hau ’e te tumu o te mau ora ato’a, te Fatu ’o Iesu Mesia.
I te mau ’āva’e i ma’iri a’e nei, ’ua fāri’i au i te mana’o ē, te rāve’a maita’i roa a’e nō te tauturu i te huru o te ao nei, i teie taime, maori rā, ’ia tu’u te mau ta’ata ato’a i tō rātou ti’aturira’a i ni’a i te Atua ’e ’ia fāriu i ni’a iāna nā roto i te pure ’ā’au tae mau. Te fa’aha’eha’ara’a ia tātou iho ’e te ’imira’a i te fa’aurura’a o te ra’i nō te fa’a’oroma’i ’aore rā, nō te upo’oti’a i ni’a i te mau mea e tīa’i mai nei ia tātou, terā ïa tā tātou rāve’a pāpū a’e nō te haere i mua i roto i teie mau pu’e tau fifi.
Tē ha’apāpū nei te mau pāpa’ira’a mo’a i te mau pure tei hōro’ahia e Iesu ’e tae noa atu i tāna mau ha’api’ira’a nō ni’a i te pure i roto i tāna tau tāvinira’a i te tāhuti nei. Tē ha’amana’o ra ’outou i te pure a te Fatu :
« E tō mātou Metua i te ao ra, ’ia ra’a tō ’oe i’oa.
« ’Ia tae i tō ’oe ra hau. ’Ia ha’apa’ohia tō ’oe hina’aro i te fenua nei, mai tei te ao ato’a na.
« Hō mai i te mā’a e au ia mātou i teie nei mahana.
« ’E fa’a’ore mai i tā mātou hara, mai ia mātou ato’a e fa’a’ore i tei hara ia mātou nei.
« ’E ’eiaha e fa’aru’e ia mātou ’ia ro’ohia-noa-hia e te ’ati, e fa’aora rā ia mātou i te ’ino : Nō ’oe ho’i te hau, ’e te mana, ’e te hanahana, ’e a muri noa atu. ʼĀmene ». 6
Teie pure nehenehe fa’atumuhia, fa’ahiti-pinepine-hia i roto i te orara’a keretetiāno, tē fa’a’ite pāpū nei ïa ē, e mea tano ’ia ani ’āfaro ti’a ē, « E tō mātou Metua i te ao ra » nō te fāri’i i te mau pāhonora’a nō te mau mea e ha’ape’ape’a nei ia tātou. Nō reira, e pure ana’e tātou nō te hō’ē arata’ira’a hanahana
Tē ani manihini nei au ia ’outou ’ia pure tāmau noa. 7 E pure nō tō ’outou ’utuāfare. E pure nō te mau ti’a fa’atere o te mau nūna’a. E pure nō te mau ta’ata itoito i mua roa i roto i te mau ’arora’a i teie taime i te mau ’ati tōtiare, arutaimareva, poritita, ’e i te pae ihiora, e ha’afifi nei i te mau ta’ata ato’a nā te ao ato’a nei, te feiā moni ’e te feiā veve, te feiā ’āpī ’e te feiā pa’ari.
’Ua ha’api’i mai te Fa’aora ia tātou ’eiaha e tā’ōti’a i te ta’ata tā tātou e pure nō rātou. ’Ua parau ’oia, « aroha atu i tō ’outou mau ’enemi; e fa’aora atu i tei tuhi mai ia ’outou, e hāmani maita’i atu i te feiā e riri mai ia ’outou; e pure ho’i i te feiā i parau ’ino mai ’e tei hāmani ’ino mai ia ’outou ». 8
I ni’a i te tātauro nō Karavaria, i reira Iesu i pohe ai nō tā tātou mau hara, ’ua fa’a’ohipa ’oia i te mea tāna i ha’api’i ’a pure ai ’oia, « E tā’u Metua, e fa’a’ore mai i tā rātou hara, ’aore ho’i rātou i ’ite i tā rātou e rave nei ». 9
Te purera’a ma te ’ā’au tae nō te feiā e nehenehe e parauhia ē, e ’enemi nō tātou, e fa’a’itera’a te reira nō tō tātou ’itera’a ē, e nehenehe te Atua e taui i tō tātou ’ā’au ’e i tō vetahi ’ē. E ha’apūai te reira huru pure i tō tātou hina’aro ’ia fa’atupu i te mau tauira’a e tītauhia i roto i tō tātou iho orara’a, tō tātou ’utuāfare ’e tō tātou ’oire.
Noa atu te vāhi tei reira ’outou te orara’a, te reo tā ’outou e paraparau, ’aore rā, te mau tītaura’a tā ’outou e fa’aruru, e fa’aro’o ’e e pāhono te Atua ia ’outou nā roto i tāna iho ravera’a ’e i tōna ra taime. Nō te mea e mau tamari’i tātou nāna, e nehenehe tātou e haere atu iāna ra nō te ’imi i te tauturu, te tāmāhanahana, ’e i te hō’ē fa’a’āpīra’a i te hina’aro ’ia fa’atupu i te hō’ē ta’a-’ē-ra’a maita’i i roto i te ao nei.
E mea pinepine e’ita e nava’i te purera’a nō te parauti’a, te hau, tei veve, ’e tei ma’ihia, I muri a’e i tō tātou tūturira’a i roto i te pure, e ti’a ia tātou ’ia ti’a i ni’a ’e ’ia rave i te nehenehe ia tātou ’ia rave nō te tauturu—nō te tauturu ’ia tātou iho ’e ia vetahi ’ē. 10
’Ua ’ī te mau pāpa’ira’a mo’a i te mau hi’ora’a nō te mau ta’ata fa’aro’o tei ’āpiti i te pure i te ’ohipa nō te fa’atupu i te hō’ē ta’a-’ē-ra’a i roto i tō rātou iho orara’a ’e i roto i te orara’a o vetahi ’ē. I roto i te Buka a Moromona, ’ei hi’ora’a, tē tai’o nei tātou nō ni’a ia Enosa. ’Ua ’itehia ē, « fātata e piti i ni’a i te toru o te tuha’a o tāna buka poto roa tē fa’ata’a nei i te hō’ē pure, ’aore rā, i te rahira’a pure, ’e tē fa’ati’a nei te fāito e aha tāna i rave nō te mau pāhonora’a tāna i fāri’i ». 11
E rave rahi hi’ora’a tā tātou nō ni’a i te huru o tō te pure fa’atupura’a i te ta’a-’ē-ra’a i roto i te ’ā’amu nō tā tātou iho ’Ēkālesia, ma te ha’amata nā ni’a i te pure reo pūai a Iosepha Semita i roto i te hō’ē uru rā’au tāpiri mai i te fare o tōna nā metua i te pu’e tau fa’atupura’a rā’au nō te matahiti 1820. Ma te ’imi i te fa’a’orera’a hara ’e te arata’ira’a pae vārua, ’ua ’īriti te pure a Iosepha i te mau ra’i. I teie mahana, ’o tātou te feiā fana’o o Iosepha te peropheta, ’e o te tahi atu feiā mo’a ha’apa’o i te mau mahana hope’a nei, tāne ’e te vahine tei pure ’e tei ’ohipa nō te tauturu i te fa’ati’ara’a i te ’Ēkālesia a Iesu Mesia i te Feiā Mo’a i te mau Mahana Hope’a nei.
Pinepine au i te feruri i te mau pure a te mau vahine ha’apa’o maita’i mai ia Mary Fielding Smith, tei arata’i ma te itoito ’e nā roto i te tauturu a te Atua, i tōna ’utuāfare nā roto mai i te hāmani-’ino-ra’a i Illinois, nō te haere mai i te vāhi hau, i roto i teie ’āfa’a, i reira tōna ’utuāfare i te tupura’a i te pae vārua ’e i te pae tino. I muri a’e i tōna purera’a i ni’a i tōna nā turi, ’ua ’ohipa ’oia ma te itoito nō te upo’oti’a i tōna mau fifi ’e ’ua ha’amaita’i i tōna ’utuāfare.
Nā te pure e fa’ateitei ia tātou, ’e e ha’aputuputu ia tātou ’ei mau ta’ata, ’ei mau ’utuāfare, ’ei ’Ēkālesia, ’e ’ei ao. Nā te pure e fa’auru i te feiā ihi ora ’e e tauturu ia rātou ’ia ’itehia te mau patia ’e te mau rā’au ’o tē fa’a’ore i teie ma’i pe’e. Nā te pure e tāmāhanahana i te feiā tei mo’e tei herehia e rātou. E tauturu te reira ia tātou ’ia ’ite ē, e aha tē rave nō tō tātou iho pārurura’a.
E te mau taea’e ’e te mau tuahine, tē fa’aitoito atu nei au ia ’outou ’ia tāta’i piti tā ’outou fafaura’a ’ia pure. Tē fa’aitoito atu nei au ia ’outou ’ia pure i roto i tō ’outou mau vaira’a tauiha’a, tā ’outou hahaerera’a i te mau mahana ato’a, tō ’outou mau fare, tā ’outou mau pāroita, ’e tō ’outou ’ā’au i te mau taime ato’a. 12
Nā ni’a i te i’oa o te feiā fa’atere o te ’Ēkālesia a Iesu Mesia i te Feiā Mo’a i te mau Mahana Hope’a nei, tē ha’amāuruuru nei au ia ’outou nō tā ’outou mau pure nō mātou. Tē fa’aitoito nei au ia ’outou ’ia tāmau noa i te pure ’ia ti’a ia mātou ’ia fāri’i i te fa’aurura’a ’e te heheura’a nō te arata’i i te ’Ēkālesia nā roto i teie pu’e tau fifi.
E nehenehe te pure e taui i tō tātou iho orara’a. Ma te tūra’ihia e te pure ’ā’au tae, e nehenehe tātou e ha’amaita’i ’e e tauturu ia vetahi ’ē ’ia nā reira ato’a.
’Ua ’ite au i te pūai o te pure nā roto i tō’u iho mau ’itera’a. ’Aita i maoro a’e nei, ’o vau ana’e tō roto i tō’u piha tōro’a. Nō oti noa atura te rāpa’aura’a i tō’u rima. E mea ’ere’ere ’e te nīnamu, ’ua oru ’e te māuiui. ’A pārahi ai au i mua i tā’u ’iri ’ohipara’a, ’aita tā’u e nehenehe e ārai i te mana’o i ni’a i te mau mea faufa’a, nō terā māuiui.
’Ua ani au i te Fatu ’ia tauturu mai iā’u ’ia ārai i tō’u ferurira’a, ’ia ti’a iā’u ’ia fa’aoti i tā’u ’ohipa. ’Ua ti’a mai au i ni’a ’e ’ua ho’i fa’ahou i mua i te ’āpapara’a parau i ni’a i tā’u ’iri ’ohipara’a. Fātata i terā iho taime, ’ua tae mai te māramarama ’e te mana’o ārai i roto i tō’u ferurira’a, ’e ’ua ti’a iā’u ’ia fa’aoti i te mau ’ohipa rū i mua iā’u.
E nehenehe te huru tupura’a ’ārepurepu o te ao nei e fa’atupu i te mana’o paruparu, nō te rahi o te mau fifi ’e te mau tītaura’a. Terā rā, tē fa’a’ite pāpū nei au ē, mai te mea e pure tātou ’e e ani i te Metua i te Ao ra i te mau ha’amaita’ira’a ’e te arata’ira’a e tītauhia, e ’ite tātou e nāhea ’ia ha’amaita’i i tō tātou ’utuāfare, i te mau ta’ata tupu, i te mau ’oire, ’e i te mau fenua ato’a tei reira tātou i te orara’a.
’Ua pure te Fa’aora ’e i reira « haere atura ma te hāmani maita’i » 13 nā roto i te fa’a’amura’a i tei veve, te hōro’ara’a i te itoito ’e te pāturura’a i te feiā e hina’aro ra, ’e te torora’a i te rima i roto i te here, te fa’a’orera’a hapa, te hau, ’e te ha’amāha i te rohirohi o te feiā ato’a e haere mai iāna ra. Tē tāmau noa nei ā ’oia i te toro mai i te rima ia tātou nei.
Tē ani nei au i te mau melo ato’a o te ’Ēkālesia, ’e tō tātou mau ta’ata tupu ’e te mau hoa nō te tahi atu mau pupu fa’aro’o nā te ao nei, ’ia rave mai tā te Fa’aora i ha’api’i atu i tāna mau pipi: « E tena na, e ara ’outou, ’e e tāmau māite ā i te pure nō te hau, nō te tāmāhanahana, nō te pārurura’a, ’e nō te mau rāve’a nō te tāvini te tahi i te tahi. 14
’Auē te fa’ahiahia te mana o te pure, ’e ’auē te faufa’a tā tātou mau pure fa’aro’o i te Atua ’e i Tāna Tamaiti Here i roto i te ao nei i teie mahana! ’A ha’amana’o ’e e ’oa’oa tātou i te mana nō te pure. I te i’oa ’o Iesu Mesia, ’āmene.