Mau parau rarahi nō roto mai i te 190ra’a o te ’āmuira’a rahi nō ’Atopa

I roto i te pāpū ’ore, e rave rahi milioni ta’ata tei ’itehia ia rātou te hō’ē taime hau i roto i te ’āmuira’a rahi tei tupu i te 3–4 nō ’Ātopa 2020. ’Ua fa’afāriu te feiā fa’atere o te ’Ēkālesia ia tātou i ni’a ia Iesu Mesia nā roto i te mau parau poro’i o te hō’ēra’a ’e te here, te ti’aturira’a ’e te fa’aorara’a, ’e te hau i roto i te ’ōpuara’a hanahana.

’Ua ha’api’i mai te peresideni Russell M. Nelson ia tātou nāhea ’ia fāri’i i te mau ha’amaita’ira’a o te rirora’a ’ei mau ta’ata nō te Atua.

« ’A mā’iti ai ’outou ’ia vaiiho i te Atua ’ia upo’oti’a i roto i tō ’outou orara’a, e ’ite ’outou ē, e Atua nō te mau semeio tō tātou Atua’ [Moromona 9:11] ».—te peresideni Russell M. Nelson (’a hi’o ’api 92).

E rave rahi ta’ata a’o tei paraparau mai nō ni’a i te tupura’a o te ta’ata iho nā roto i te pe’era’a ia Iesu Mesia, te ti’aturira’a iāna, ’e te fa’aha’eha’ara’a i to tātou hina’aro i mua i tōna.

« ’A fariu ai tātou ma te ha’eha’a i mua ia [Iesu Mesia], e fa’arahi ’oia i tō tātou ’aravihi nō te taui. »—Becky Craven (’a hi’o ’api 58)

Fa’ahou ā, ’ua ha’afifi te coronavirus ’āpī i te mea tā tātou i ’ite ’e i fa’aro’o i roto i te ’āmuira’a. Terā rā, nā roto i te ’itera’a hau atu, ’ua tupu mai te hō’ē hi’ora’a ātea rahi a’e, a fa’atumu ai te feiā a’o ’eiaha i ni’a iho noa i te ti’aturira’a, i ni’a iho ato’a rā i te hō’ē hāro’aro’ara’a rahi a’e i te fa’anahora’a a te Atua nō tō tātou ’oa’oara’a mure ’ore.

« E riro te mau tāmatara’a o te ha’api’ira’a o te tāhuti nei ’ei mau ’ohipa faufa’a rahi nō tō tātou tupura’a mure ’ore. Tē pure nei au ’ia ha’api’i mai tātou i te mau ha’api’ira’a faufa’a rahi tā te mau ’itera’a pa’ari ana’e e nehenehe e ha’api’i mai ia tātou. »—Elder David A. Bednar (’a hi’o ’api 8)

Nā roto i te mau ’arepurepura’a sotiare e tupu nei i te mau vāhi e rave rahi o te ao nei, tē fa’ahapa nei te feiā fa’atere i te fa’aau-’ore-ra’a i te nūna’a ’ē, ’e te hāmani-’ino-ra’a. ’Ua pi’i mai rātou ia tātou, te feiā mo’a nō te mau mahana hope’a nei, ’ia riro ’ei hō’ē i roto i te parau ti’a, ’ia ’imi i te hō’ēra’a i roto i te raura’a, ’e ’ia tauturu i te patura’a i te hō’ē sotaiete mōrare ’e te here.

« Tē ora nei tātou i roto i te hō’ē taime ’āmahamahara’a rahi. E nehenehe tātou e riro ’ei pūai nō te fa’ateitei ’e nō te ha’amaita’i i te tā’āto’ara’a o te tōtaiete ».—Elder Quentin L. Cook (’a hi’o ’api 18)

’A ora fa’ahou ai ’outou i te ’āmuira’a nā roto i teie nene’ira’a parau, tē ti’aturi nei mātou ē, e fāri’i fa’ahou ’outou i te ti’aturira’a ’e te fa’aurura’a tā ’outou i fāri’i i te taime mātāmua, ’e e fāri’i fa’ahou i te mau mana’o ’āpī nā roto i tā ’outou tuatāpapara’a i roto i te mau ’āva’e i muri nei.