’A fāri’i i te ananahi ma te fa’aro’o
E riro te ananahi ’ei mea hanahana nō rātou tei ineine ’e ’o te tāmau noa i te fa’aineine ’ia riro ’ei mau mauha’a i roto i te rima o te Fatu.
E riro teie ’ei pō e ’ore e mo’ehia. E au mau tuahine here, tē ’oa’oa nei au ’ia tae mai i rotopū ia ’outou. ’Ua feruri pinepine au ia ’outou i te roara’a o te mau ’āva’e i ma’iri a’enei. ’Ua hau ’outou i te va’u mirioni ta’ata. E ’ere i te nūmera ana’e ’o te mana pae vārua rā nō te taui i te ao nei. ’Ua ’ite au ia ’outou i te ravera’a i te reira mau, i roto i teie ma’i pe’e.
Te tahi pae o ’outou tē ’imi nei i te mau tauiha’a varavara ’aore rā, i te hō’ē ’ohipa ’āpī. Te ha’apa’ora’a i te mau tamari’i ’e te hi’opo’ara’a i te mau ta’ata tāpiri mai. ’Ua fāri’i te tahi pae i te mau misiōnare tei ho’i ’oi’oi mai, ’e ’ua fa’ariro te tahi pae i tō ’outou fare ’ei mau pū ha’api’ipi’ira’a misiōnare. ’Ua fa’a’ohipa ’outou i te mau rāve’a ’āpī nō te tū’ati atu i te ’utuāfare ’e i te mau hoa, nō te aupuru i te feiā tei mo’emo’e, ’e nō te tuatāpapa i te Mai, pe’e mai ’e vetahi ’ē. ’Ua ’itehia ia ’outou i te mau rāve’a ’āpī nō te fa’ariro i te sābati ’ei mea hina’arohia. ’E ’ua hāmani ’outou i te mau pāruru vaha—e rave rahi mirioni !
Ma te ’ā’au aroha ’e te here mau, tē toro nei tō’u ’ā’au i te mau vahine e rave rahi nā te ao ato’a nei, tei pohe tō rātou mau ta’ata herehia e rātou. Tē ’oto nei mātou ’e ’o ’outou. ’E tē pure nei mātou nō ’outou. Tē ’ārue nei ’e tē pure nei mātou nō te feiā ato’a e rohi nei ma te rohirohi ’ore nō te pāruru i te ea o vetahi’ ē.
’Outou e te feiā ’āpī tamāhine, e mea fa’ahiahia ato’a ’outou. Noa atu te rahi o te mārōra’a e māni’i nei i ni’a i te mau tahua tūreiara’a tōtiare, e rave rahi o ’outou tei ’ite mai i te mau rāve’a nō te fa’aitoito ia vetahi ’ē ’e ’ia fa’a’ite i te māramarama o tō tātou Fa’aora.
E te mau tuahine, ’ua riro mau ’outou pā’āto’a ’ei mau aito ! Tē fa’ahiahia nei au i tō ’outou pūai ’e tō ’outou fa’aro’o. ’Ua fa’a’ite ’outou ē, i roto i te mau tupura’a fifi, ’ua tāmau noa ’outou ma te itoito. Tē here nei au ia ’outou, ’e tē ha’apāpū atu nei au ē, tē here nei te Fatu ia ’outou ’e tē ’ite nei ’oia i te ’ohipa rahi tā ’outou e rave nei. Māuruuru ! ’Ua fa’a’ite fa’ahou ā ’outou ē, ’o ’outou mau te ti’aturira’a o ’Īserā’ela !
Tei roto mau ia ’outou te mau tīa’ira’a a te peresideni Gordon B. Hinckley nō ’outou, ’a hōro’a mai ai ’oia i « Te ’Utuāfare : E Poro’i i tō te Ao Nei » a 25 matahiti i teienei, i roto i te putuputura’a rahi a te Sōtaiete Tauturu i te ’āva’e Tetepa 1995. 1 E aura’a faufa’a mau tōna mā’itira’a ’ia hōro’a i teie poro’i faufa’a i te mau tuahine o te ’Ēkālesia. Nā roto i te ravera’a i te reira, ’ua ha’apāpū te peresideni Hinckley i te mana e ’ore e ti’a ’ia monohia o te mau vahine i roto i te fa’anahora’a a te Fatu.
I teienei, tē hina’aro nei au ’ia ’ite ē, e aha tā ’outou i ha’api’i mai i teie matahiti. ’Ua ha’afātata atu ānei ’outou i te Fa’aora, ’aore rā, tē mana’o nei ’outou ē, ’ua ātea atu ā ’outou iāna ? ’E e aha te mana’o tā te mau ’ohipa e tupu nei, i fa’atupu i roto ia ’outou, nō ni’a i te ananahi ?
’Oia mau, ’ua paraparau mai te Fa’aora nō ni’a i tō tātou tau nā roto i te mau parau e ti’a ’ia feruri. ’Ua fa’aara mai ’oia ē, i tō tātou nei ’anotau « e ’āhuehue te mana’o o te ta’ata nei » 2 ’e e riro ato’a te feiā mā’itihia i te ha’avarehia. 3 ’Ua parau ’oia i te peropheta Iosepha Semita ē, « e rave-’ē-hia atu te hau nā ni’a atu i te ao nei » 4 ’ei reira te mau ’ino e ma’iri mai ai i ni’a i te ta’ata nei. 5
Noa atu rā i te reira, ’ua hōro’a ato’a mai te Fatu i te hō’ē ’itera’a nō te nehenehe fa’ahiahia o teie tau tu’ura’a. ’Ua fa’auru ’oia ia Iosepha Semita, te peropheta, ’ia parau ē, « te ’ohipa a te Fatu i teie mau mahana hope’a nei, e ’ohipa rahi roa ïa. E’ita tōna mau hanahana e noa’a i te fa’a’itehia, ’e e’ita tōna rahi e noa’ahia ». 6
I teienei, e’ita paha ’outou e fa’a’ohipa i te ta’o ra rahi nō te fa’ata’a i teie mau ’āva’e i ma’iri iho nei ! Nāhea tātou i te arai i te mau parau tohu fifi ’e te mau fa’a’itera’a parau hanahana nō ni’a i tō tātou ’anotau ? Ma te ’ōhie ’e te pāpū ato’a rā, ’ua parau mai te Fatu ia tātou e nāhea : « Mai te mea rā ’ua vai ineine noa ’outou e ’ore ’outou e mata’u ». 7
’Auē ïa fafaura’a e ! ’O te hō’ē ïa fafaura’a ’o tē nehenehe e taui roa i te huru nō tā tātou hi’ora’a i tō tātou ananahi. ’Aita i maoro a’e nei, ’ua fa’aro’o vau i te hō’ē vahihe e ’itera’a pāpū hōhonu, i te fāri’ira’a ē, nā roto i te ’āpitira’a te ma’i pe’e ’e te hō’ē ’āueuera’a fenua i roto i te ’āfa’a nō Roto Miti, ’ua tauturu te reira iāna ’ia ’ite ē, ’aita ’oia i ineine mai tāna i mana’o noa nā. I tō’u anira’a iāna ē, tē parau ra ānei ’oia nō tāna ha’aputura’a mā’a ’aore rā, nō tōna ’itera’a pāpū, ’ua ’ata’ata mai ra ’oia ’e nā ’ō mai ra, « ’Ē ! »
Mai te mea ’o te fa’aineinera’a tā tātou tāviri nō te fāri’i i teie tau tu’ura’a ’e i tō tātou ananahi ma te fa’aro’o, nāhea e ti’a ai ia tātou ’ia fa’aineine maita’i a’e ia tātou ?
I te roara’a o te tau, ’ua fa’aitoito mai te mau peropheta o te Fatu ia tātou ’ia ha’aputu i te mā’a, te pape, ’e te moni nō te taime nava’i ’ore. ’Ua ha’apūai atu ā te ma’i pe’e o teie taime i te pa’ari o teie parau a’o. Tē fa’aitoito nei au ia ’outou ’ia rave i te mau mea ato’a nō te fa’aineine ia ’outou i te pae tino nei. Terā rā, ’ua rahi atu tō’u māna’ona’o nō ni’a i tō ’outou fa’aineinera’a pae vārua ’e pae urupu’upu’u [émotion].
Nō ni’a i te reira, e nehenehe tātou e ha’api’i rahi mai nā roto i te tāpena Moroni. ’Ei ra’atira nō te nu’u tama’i ’āti Nephi, ’ua fa’aruru ’oia i te mau pūai pāto’i hau atu, te rahira’a o te nūmera, ’e te ’ino. Nō reira, ’ua fa’aineine ’o Moroni i tōna nūna’a nā roto e toru rāve’a faufa’a roa.
’A tahi ’ua tauturu ’oia ia rātou ’ia hāmani i te mau vāhi pārurura’a nō rātou—’ua parau ’oia i te reira te « mau ha’apūra’a ». 8 Te piti, ’ua fa’aineine ’oia i te « ferurira’a ’o te ta’ata ’ia ha’apa’o i te parau a te Fatu ». 9 ’E te toru, ’aita ’oia i fa’aea i te fa’aineine i tōna mau ta’ata—i te pae tino ’aore rā, i te pae vārua. 10 E hi’o ana’e tātou i teie nā parau tumu e toru.
Parau tumu nūmera hō’ē : E hāmani i te mau vāhi ha’apūra’a.
’Ua ha’apa’ari Moroni i te ’oire tāta’itahi o te ’āti Nephi nā roto i te mau patu, te mau pāruru ’e te mau papa’i. 11 ’Ia haere mai te ’āti Lamana e ’aro ia rātou, « e maere rahi tō ratou i reira, nō te pa’ari o te ’āti Nephi i te fa’aineinera’a i tō rātou mau ha’apūra’a ra ». 12
’Oia ato’a tātou, ’ia ’ū’ana ana’e te ’ārepurepura’a ’ati a’e ia tātou, e ti’a ia tātou ’ia hāmani i te mau vāhi i reira tātou e pāruruhia ai, i te pae tino ’e i te pae vārua. ’Ia riro ana’e tō ’outou fare ’ei tunato nō te fa’aro’o—i reira te Vārua e pārahi ai—e riro mai tō ’outou fare ’ei rēni pāruru mātāmua.
’Oia ato’a te mau titi ’o Ziona, « e vāhi ha’apūra’a nō te vero » 13 nō te mea, ’ua arata’ihia rātou nā te feiā tei mau i te mau tāviri autahu’ara’a ’e tei fa’a’ohipa i te mana autahu’ara’a. ’A tāmau noa ai ’outou i te pe’e i te a’o a te feiā tā te Fatu i ha’amana nō te arata’i ia ’outou, e fāri’i ’outou i te pārurura’a rahi a’e.
Te hiero—te fare o te Fatu—e vāhi ïa nō te ha’apūra’a ’aita e fa’aauhia i te tahi atu. I reira, e fāri’i ’outou e te mau tuahine, i te mana autahu’ara’a nā roto i te mau fafaura’a o te autahu’ara’a mo’a tā ’outou e rave. 14 I reira, e tā’atihia tō ’outou ’utuāfare nō te tau a muri atu. Tae roa mai i teie matahiti, noa atu te fifi ’ia haere i te hiero, ’ua hōro’a mai tō ’outou ’ōro’a hiero i te ti’ara’a ia ’outou ’ia fāri’i tāmau i te mana o te Atua nā roto i tō ’outou fa’aturara’a i tā ’outou mau fafaura’a iāna.
E parau ’ōhie noa, hō’ē vāhi ha’apūra’a, ’o te huru vāhi ato’a ïa e nehenehe ’outou e fāri’i i te Vārua Maita’i ’e ’ia arata’ihia nāna. 15 ’Ia vai ana’e te Vārua Maita’i i pīha’i iho ia ’outou, e nehenehe ’outou e ha’api’i i te parau mau, noa atu ē, tē ’aro ra te reira i te mau mana’o rarahi e vai ra. ’E e nehenehe ’outou e feruri pāpū i te mau uira’a nō ni’a i te ’evanelia i roto i te hō’ē huru tupura’a i te pae heheura’a.
Tē ani nei au ia ’outou, e tō’u mau tuahine here, ’ia hāmani i te hō’ē fare ’ei vāhi pāruruhia. ’E tē fa’a’āpī nei au i tā’u anira’a ia ’outou ’ia fa’arahi i tō ’outou hāro’aro’ara’a i te mana autahu’ara’a, ’e i te mau fafaura’a ’e te mau ha’amaita’ira’a o te hiero. Te mau vāhi pāruruhia i reira ho’i ’outou e haere ai, e riro ïa te reira ’ei tauturu ia ’outou ’ia fāri’i i te ananahi ma te fa’aro’o.
Parau tumu nūmera piti : ’A fa’aineine i tō ’outou vārua ’ia ha’apa’o maita’i i te parau a te Atua.
’Ua rave tātou i te hō’ē ’ohipa faufa’a nō te fa’aroa atu i te orara’a ’e i te maita’i o te hiero nō Roto Miti.
’Ua fē’a’a ri’i te mana’o o te tahi mau ta’ata nō ni’a i te faufa’a nō te ravera’a i te mau ’ohipa ta’a ’ē. Terā rā, i te ’āueuera’a te fenua i Roto Miti nei i te fāito e 5.7 i te ’ōmuara’a o teie matahiti, ’ua ’āueue maita’i teie hiero mo’a, e ’ua topa roa te pū i ni’a i te ti’i o te melahi Moroni ! 16
Mai te niu o te hiero nō Roto Miti e tītauhia ’ia nava’i te pa’ari, ’ia ore e fifi i roto i te mau ’ati o te nātura, e ti’a ato’a i tō tātou niu pae vārua ’ia pa’ari maita’i. I muri iho, ’ei fa’ahōho’ara’a, ’ia āueue ana’e te fenua o tō tātou orara’a, e nehenehe tātou e « mau māite ma te ’āueue ’ore » nō tō tātou fa’aro’o. 17
’Ua ha’api’i mai te Fa’aora ia tātou nāhea ’ia fa’arahi i tō tātou fa’aro’o nā roto i te ’imira’a i te « ’ite, ’oia ïa, nā roto ho’i i te ha’api’i ’e nā roto ato’a i te fa’aro’o ». 18 E ha’apūai tātou i tō tātou fa’aro’o ia Iesu Mesia, ’ia tauto’o ana’e tātou i te ha’apa’o i tāna mau fa’auera’a ’e « ’ia ha’amana’o tāmau noa iāna ». 19 Hau atu i te reira, e tupu i te rahi tō tātou fa’aro’o i te mau taime ato’a e fa’a’ohipa tātou i tō tātou fa’aro’o iāna. ’O te aura’a ïa te parau ē, e ha’api’i mai nā roto i te fa’aro’o.
’Ei hi’ora’a, i te mau taime ato’a e fa’aro’o tō tātou nō te ha’apa’o i te mau ture a te Atua—noa atu ē, tē ta’ahi mai ra te mana’o o te ta’ata ia tātou—’aore rā, i te mau taime ato’a e pāto’i tātou i te ’āreareara’a ’aore rā, i te mau mana’o e fa’ahanahana i te tāpūra’a i te fafaura’a, e fa’a’ohipa tātou i tō tātou fa’aro’o, ’e nā te reira e fa’arahi i tō tātou fa’aro’o.
Hau atu i te reira, e mea iti roa te mau mea e patu i te fa’aro’o hau atu i tā te tuatāpapara’a i te Buka a Moromona e patu. ’Aita e buka ’ē atu e fa’a’ite nei nō Iesu Mesia ma te pūai ’e te māramarama. ’Ua ’ite tōna mau peropheta fa’auruhia e te Fatu, i tō tātou tau, ’e ’ua mā’iti rātou i te ha’api’ira’a tumu ’e te mau parau mau ’o tē tauturu hau a’e ia tatou. Te Buka a Moromona tō tātou arata’i fa’aora i te mahana hope’a nei.
Parau mau, tō tātou pārurura’a hope’a, nō roto mai ïa i tō tātou tā’amura’a ia tātou iho i tō tātou Metua i te ao ra ’e ia Iesu Mesia. Hō’ē orara’a ’aita e Atua, ’o te hō’ē ïa orara’a tei ’ī i te mata’u. Hō’ē orara’a ’e te Atua, ’o te hō’ē ïa orara’a tei ’ī i te hau. Te reira nō te mea ïa e tae mai te mau ha’amaita’ira’a vārua i te feiā ha’apa’o maita’i. Te fāri’ira’a i te heheuraa o te ta’ata iho, ’o te hō’ē ïa o te ha’amaita’ira’a rahi a’e o te reira mau ha’amaita’ira’a.
’Ua fafau mai te Fatu ē, mai te mea e ani tātou, e fāri’i tātou « i te heheura’a nā ni’a i te heheura’a ». 20 Tē fafau atu nei au ē, mai te mea e fa’arahi ’outou i tō ’outou ’aravihi nō te fāri’i i te heheura’a, e ha’amaita’i te Fatu ia ’outou i te arata’ira’a rahi nō tō ’outou orara’a ’e i te mau hōro’a ’ōti’a ’ore o te Vārua.
Parau tumu toru: ’eiaha e fa’aea i te fa’aineine.
Noa atu te maita’i ’o te mau mea ato’a, ’ua tāmau noa te tāpena Moroni i te fa’aineine i tōna mau ta’ata. ’Aita ’oia i fa’aea noa a’e. ’Aita roa ’oia i māuruuru noa a’e iāna.
’Aita te ’enemi i fa’aea noa a’e i te ’aro. Nō reira, e’ita roa tā tātou e nehenehe e fa’aea i te fa’aineine ! Rahi noa atu tō tātou rava’i ia tātou iho—i te pae tino, te pae urupu’upu’u, ’e i te pae vārua—rahi noa ato’a atu tō tātou ineine nō te pāto’i i te mau ’arora’a tāmau a Sātane.
E te mau tuahine here, e mea ’aravihi ’outou nō te hāmani i te mau vāhi fa’aeara’a hau nō ’outou iho ’e nō te feiā tā otuou i here. Hau atu i te reira, tei roto ia ’outou te hō’ē hōro’a hanahana e ti’a ai ia ’outou ’ia patu i te fa’aro’o i roto ia vetahi ’ē ma te pāpū. 21 ’E ’aita roa ’outou e fa’aea. ’Ua fa’a’ite fa’ahou ā ’outou i te reira i teie matahiti.
’A tāmau noa i te rave ! Tō ’outou mata ara i te pārurura’a i tō ’outou mau fare ’e te ueuera’a i te fa’aro’o i roto i te ’ā’au o tei herehia e ’outou, e ’ō’oti te reira i te mau hotu nō te mau u’i a muri a’e.
E au mau tuahine here, ’ua rau te mau mea tā tātou e tīa’i nei ! ’Ua tu’u mai te Fatu ia ’outou i’ō nei nō te mea ’ua ’ite ’oia ē, tē vai ra tō ’outou ’aravihi nō te tāu’aparau i te mau huru fifi o te tuha’a hope’a o teie mau mahana hope’a. ’Ua ’ite ’oia ē, e tāpe’a ’outou i te rahi o tāna ’ohipa, ’e e hina’aro e tauturu i te fa’atupura’a i te reira.
’Aita vau e parau nei ē, e mea ’ōhie te mau mahana i muri nei, tē fafau atu nei rā vau ia ’outou ē, e riro te ananahi ’ei mea hanahana nō rātou tei ineine ’e ’o te tāmau noa i te fa’aineine ’ia riro ’ei mau mauha’a i roto i te rima o te Fatu.
E au mau tuahine here, ’eiaha tātou e fa’aruru noa i teie pu’e tau. E fāri’i na tātou i te ananahi ma te fa’aro’o ! ’Ua riro te mau tau ’ārepurepu ’ei rāve’a nō tātou nō te haere i mua i te pae vārua. E mau taime te reira e nehenehe ai tō tātou fa’aurura’a e hau roa atu ai i te pūai i tei roto i te mau taime hau.
Tē fafau atu nei au ē, mai te mea e hāmani tātou i te mau vāhi pārurura’a, e fa’aineine i tō tātou ferurira’a nō te ha’apa’o i te parau a te Atua, ’e ’eiaha e fa’aea i te fa’aineine, e ha’amaita’i te Atua ia tātou. « E fa’aora ’oia ia tātou ; ’oia ïa, e paraparau ’oia i te hau i tō tātou vārua, ’e hōro’a mai ia tātou i te fa’aro’o rahi, ’e e fa’atupu ’oia i roto ia tātou i te ti’aturira’a i tō tātou fa’aorara’a i roto iāna ». 22
’Ia fa’aineine ana’e ’outou ’ia fāri’i i te ananahi ma te fa’aro’o, e riro teie mau parau fafau ’ei mau parau fafau nō ’outou ! Tē fa’a’ite pāpū nei au i te reira, ma tō’u here nō ’outou, ’e tō’u ti’aturi i roto ia ’outou, nā roto i te i’oa mo’a ’o Iesu Mesia ra, ’āmene.