Buka arata’i rahi E vai ra i roto i te roro uira

E’ita e maoro e ravehia te tauiuira’a o te Buka arata’i rahi: Te tāvinira’a i roto i te ’Ēkālesia a Iesu Mesia i te Feiā Mo’a i te Mau Mahana Hope’a nei, nā roto i te ’īritira’a o te mau mātēria mā’itihia i roto e 21 mau reo.

’Ua nene’ihia te Buka arata’i ’āpī i roto i te roro uira, nā roto i te reo Peretāne i te ’āva’e Fepuare 2020, e te tahi atu mau mātēria tei hi’opo’ahia i te ’āva’e Māti ’e te ’āva’e Tiurai. Tae mai i teie taime, 16 pene i ni’a i te 38 pene o te buka tei pāpa’i fa’ahou-hia ’e tei nene’ihia. Te mau pene e toe ra, e hi’opo’ahia ïa i roto i te mau ’āva’e i muri nei, mai te hi’opo’ara’a nō te ha’apoto ri’i mai, ’e nō te fa’a’ōhie te tai’ora’a.

I muri noa a’e i te ’āmuira’a rahi nō ’Ātopa 2020, te pene 32, « Te tātarahapara’a ’e te mau ’āpo’ora’a nō te ti’ara’a melo o te ’Ēkālesia »,’e te tahi mau tuha’a o te pene 38.6, « Te mau fa’aturera’a nō ni’a i te mau parau nō te pae morare » (’o tē pāturu i te pene 32), e ha’amata te reira i te nene’ihia i roto e 21 reo (ta’a ’ē atu te reo Peretāne). Tē ’īritihia nei ’e te fa’aineinehia nei te tahi atu mau pene nō te nene’ira’a i roto i te mau ’āva’e i muri nei, ’e i te hope’a, e riro te mau mātēria ato’a i te roa’a i roto e 35 reo.

Noa atu ē, e roa’a te buka arata’i i ni’a i te tahua natireva a te ’Ēkālesia ’e i roto i te fa’anahora’a ’āfa’ifa’i nō te Gospel Library, te mau ta’ata mātāmua i fa’ata’ahia nō teie mātēria, ’o te feiā fa’atere ïa o te ’Ēkālesia. Tē mono nei te buka arata’i i hi’opo’ahia i te Buka arata’i 1 (nā te mau peresideni titi (’e te mau ’ēpisekōpo) ’e te Buka arata’i 2 (nō te feiā fa’atere ato’a) ’e tē ’āmui nei i te mau ha’amāramaramara’a ato’a o te buka arata’i i roto hō’ē noa iho nene’ira’a.

Te fa’anahora’a nō te tuatāpapara’a o te Buka arata’i ’āpī, ’o te ’ohipa ïa nō te fa’aorara’a ’e te fa’ateiteira’a, tei roto i te reira e maha tuha’a fa’atumura’a, a haere ai tātou i te Mesia ra ’e a tauturu ai i roto i te ’ohipa a te Atua:

1. Te orara’a i te ’evanelia a Iesu Mesia

2. Te ha’apa’ora’a i te feiā nava’i ’ore

3. Te anira’a i te mau ta’ata ato’a ’ia fāri’i i te ’evanelia

4. Te tāhō’ēra’a i te mau ’utuāfare nō te tau ’a muri atu

’Ua fa’ata’ahia te mau pene nō te tauturu i te feiā fa’atere ’āti a’e te ao nei ’ia tāvini mai te tāvinira’a a te Mesia, a fa’a’ohipa ai i te mau fa’anahora’a rau, te mau fa’aturera’a, ’e te mau terera’a ’ohipa, ’e, mai te mea e tītauhia, ma te fa’aau i te reira i te mau huru tupura’a o te fenua iho.

Nā roto i te nene’ira’a o te buka arata’i i roto i te roro uira, e nehenehe ïa e tauiui, ’e e hi’opo’a i te reira a tupu noa ai te ’Ēkālesia, ’e a tauiuihia ai te mau fa’aturera’a. E riro te parau nō te tāmarūra’a ’e te fa’aaura’a i tu’uhia i roto i te buka arata’i i te tauturu i te feiā fa’atere ’e i te mau melo ’ia fa’a’ohipa maita’i i te mau parau tumu ’e te mau fa’anahora’a a te ’Ēkālesia i roto i te mau huru fāito ’āmuira’a ato’a, ’e i roto i te mau huru ’āmuira’a o te feiā mo’a nā te ao nei.