Nagkatigulang nga Matinud-anon
Gisininaan sa Husto nga Paagi
Ang tagsulat nagpuyo sa California, USA.
Niining higayona kini mao ang among buluhaton sa pagsiguro nga siya gisininaan sa husto nga paagi.
Sukad sa mga adlaw sa among pagkabata gayod, anaa ang among inahan aron sa pagseguro nga kami gisininaan sa husto nga paagi alang sa tanang okasyon. Uban sa lima ka anak nga babaye kini daw lisod nga tahas. Kon kami nagsul-ob og karsones unya sinina diay ang gikinahanglan, pailison kami niya. Sa dihang usa kanamo nagsul-ob og nindot nga bag-ong sinina nga nagtuo kami nga dili kinahanglang sapawan og kupo bisan unsa pa ka tugnaw, moinsister gihapon siya nga tanan kanamo magsul-ob og kupo. Siya mismo kanunay nga nagsinina sa husto nga paagi, ug gisiguro niya nga kami usab mobuhat sa ingon.
Si Mama migahin sa iyang kinabuhi sa pagtudlo sa matag usa kanamo dili lamang kon unsaon sa pagsinina apan usab unsaon sa pagpuyo. Gipaambit niya ang iyang mga panabot mahitungod sa hingpit nga kalipay sa ebanghelyo ug sa iyang pagpamatuod sa kaimportante sa templo. Giklaro niya nga naglaom siya nga ang matag usa kanamo makasabot sa epekto sa mga ordinansa sa templo sa among mahangturong kalipay.
Dayon miabot ang adlaw sa dihang gikinahanglan namo nga magpundok aron sininaan si Mama alang sa paglubong. Gibiyaan na niya kini nga kalibotan alang sa sunod, human sa pagtudlo kanamo sa tanan sulod sa panahon nga gihatag sa iyaha sa pagtudlo kanamo. Kini mao ang among oportunidad sa pagpakita sa among debosyon ngadto kaniya, among pasalamat alang sa mga baroganan nga iyang gitisok sa among mga kasingkasing.
Niining higayona kini mao ang among buluhaton sa pagsiguro nga siya gisininaan sa husto nga paagi.
Sa dihang misulod kami sa lawak diin si Mama sininaan alang sa paglubong, ang iyang walay kinabuhi nga lawas ingon og haw-ang. Ang kainit sa iyang espiritu nawala na, gipulihan sa kabugnaw sa kamatayon. Samtang ang iyang mga anak nga babaye ug pipila sa iyang mga apo nga babaye mipalibot kaniya, gipasidunggan namo ang kinabuhi niining talagsaon nga babaye, nga gustong ipakita sa iyaha, sa kataposang higayon, ang among pasalamat alang sa panalangin nga siya nahimo sa among mga kinabuhi.
Kami karon unom na ka anak nga babaye: si Leah, Heather, Gaylene, Lori, Melinda, ug umagad nga babaye nga si Adrianne. Ang unom namo miporma og hugot nga sirkulo palibot ni Mama. Dayon ang among kaugalingong mga anak nga babaye mihimo og ikaduhang lingin palibot kanamo. Kining duha ka sirkulo mipahinumdom sa gugma nga namugna sa iyang kinabuhi nga gihatag niya kanamo nga gipasa namo usab ngadto sa among mga anak. Tungod sa iyang impluwensya ug sa matarong nga mga pagpili sa iyang kaliwatan, ang mga panalangin sa mga pakigsaad sa templo mapasa ngadto sa tibuok kaliwatan, nga nagpalapad pa sa mga panalangin sa mga pakigsaad sa pagkapari.
Ang iyang mga anak nga babaye moandam kaniya alang sa paglubong. Mainampingon namong gitabonan ang iyang bugnaw nga lawas uban sa mainiton nga mga bisti sa templo. Ang matag laso mainampingon nga gihigot; ang mga tsinelas gisul-ob; giseguro gayod og maayo nga ang tanang sinina anaa sa tukma nga dapit. Ang kataposang butang nga buhaton mao ang paghigot sa usa ka kataposang laso. Samtang amo kining gibuhat, nga nagseguro nga kini nindot kaayo pagkahigot kutob sa among mahimo, usa ka panumdoman ang misantop sa matag usa sa among mga hunahuna—gihigot niya kana nga laso kaniadto alang sa matag usa kanamo sa unang higayon nga misulod kami sa templo. Samtang gihigot namo ang iyang laso sa kataposang higayon, kami karon simbolikanhong mihatag og balik ngadto kaniya, uban sa mahangtorong pasalamat, sa gasa sa mga panalangin sa templo.
Samtang gitan-aw namo siya, ang matag usa kanamo napuno sa mainiton nga pagbati. Wala na mipalibot kaniya ang kabugnaw sa kamatayon. Matahom siyang tan-awon. Sayon ra ang paghunahuna kaniya nga anaa sa langit, giliyokan didto niadtong iyang gihigugma, mahinamon nga mobalik ngadto sa iyang Langitnong Amahan.
Samtang mibiya ako sa lawak, nakahunahuna ko nga ako karon nakapuyo na sa panahon sa kinabuhi sa dihang nakaatiman ko sa akong inahan. Milahutay siya hangtod sa kataposan. Matinud-anon siyang natigulang ug mipanalangin sa iyang kaliwatan pinaagi sa iyang ehemplo. Ako nanghinaot ug nag-ampo nga ako makahimo sa susama ug nga usa ka adlaw ako makabiya og susama nga kabilin alang sa akong mga anak nga babaye ug sa mga apo nga babaye.