Digital Lamang: Mga Young Adult
Pag-ampo aron Masayod sa Kamatuoran ug ang Akong Wala Damhang Tubag
Nakahukom ako sa kataposan sa pagbasa sa Basahon ni Mormon aron masayod kon kini tinuod ba. Ug nakadawat ako og wala damha nga tubag sa dihang nangutana ako sa Langitnong Amahan.
Sa dihang ako usa ka tin-edyer, ang akong presidente sa Young Men midapit sa batan-ong mga lalaki sa among ward nga humanon og basa ang Basahon ni Mormon sa kataposan sa tuig.
Wala nako dawata ang kana nga pagdapit. Kasagaran ako usa ka tawo kinsa andam sa pagsagubang sa bisan unsang hagit, apan ako anaa sa ubos kaayo nga kahimtang sa espirituhanon nga paagi.
Sa makapaikag nga paagi, atol niining higayona, “nangandam” ako nga moserbisyo og misyon, apan ako naobligar lang ug walay tiunay nga tinguha sa pagbuhat sa ingon. Huyang ang akong pagpamatuod, ug giingnan nako ang akong kaugalingon nga moserbisyo lamang ako aron mahimong malipayon ang akong mga ginikanan. Nakahukom ako nga human sa akong misyon, sabton nako ang mga butang sa akong kaugalingon. Tuohan nako ang unsay gusto nakong buhaton ug buhaton kini nga walay pakabana sa uban.
Bisan og ako naningkamot gayod sa akong mga buluhaton sa eskwelahan niadtong higayona, nahulog ako sa kahimtang sa espirituhanon nga katapol. Mibati ako nga layo kaayo sa Dios nga ako misugod sa pagkuwestiyon kon buhi ba gayod Siya. Ako adunay mga pagduhaduha kalabot sa katinuod sa Basahon ni Mormon ug sa tawag ni Joseph Smith nga mahimong propeta. Nanglimbasog ako sa pagbati og maayo sa kaugalingon ug pagkasilag sa kaugalingon, ug ako walay lig-on nga pagtuo kabahin sa katuyoan sa kinabuhi.
“Ako diha sa kinangitngitan nga bahin sa kahiladman” (Mosiah 27:29), mao nga ako adunay gamay ra nga tinguha sa pagbasa sa Basahon ni Mormon.
Pagbasa nga may Katuyoan
Usa ka gabii, nagbasa ako og nobela sa dihang miabot ang usa ka impresyon kanako nga ako nagtuo ug nasayod sa tibuok nakong kasingkasing nga gikan kadto sa Espiritu. Nakaplagan nako ang akong kaugalingon nga naikag gayod og maayo sa istorya niini nga libro, ug dayon ang hunahuna misantop kanako nga ako wala gayod nakatuon sa Basahon ni Mormon sa seryoso nga paagi—nga dili ingon ka seryoso samtang ako nagbasa ug namalandong niini nga libro.
Natun-an nako ang Basahon ni Mormon sa dili seryoso nga paagi, naghimo og mubo nga mga sulat, ug nag-ampo mahitungod niini sa makadaghang higayon kaniadto, apan nagkulang ako og usa ka mahinungdanong bahin sa pahimangno ni Moroni diha sa kataposang kapitulo sa Basahon ni Mormon: sa pagpangutana “sa kinasingkasing, uban sa tinuod nga katuyoan” (Moroni 10:4). Nasayod ako nga kini mao ang hingpit nga higayon alang kanako sa pagpangutana pag-usab sa akong Amahan sa Langit alang sa mga tubag. Mibati ako og espirituhanong kagutom, ug niini nga higayon ang tubag sa tinuod importante kanako. Wala makaamgo niini, miabot ako sa usa ka importanteng higayon nga kinahanglang mohimo og espirituhanon nga desisyon, diin ang akong hugot nga pagtuo sa ebanghelyo nag-agad sa pagkahibalo kon ang Basahon ni Mormon tinuod ba o dili.
Sa samang gabii nga nadawat nako kana nga impresyon, nagsugod ako sa pagbasa sa Basahon ni Mormon—apan adunay katuyoan niining higayona.
Karon nga mahinamon sa pagdawat sa imbitasyon sa akong lider sa Young Men ug humanon ang pagbasa sa kataposan sa tuig, gibasa nako ang akong kopya nga ang gidak-on masulod sa bulsa [pocket-size] sa matag posible nga oportunidad: sakay sa tren, atol sa pagsakay og bus padulong sa eskwelahan, taliwala sa mga klase, taliwala sa mga buluhaton, sa dili pa ug human sa mga pagpangaon, ug sa dili pa matulog. Sa matag posible nga mga oportunidad, magbasa ako. Ug sa matag higayon nga magbasa ako, padayon akong nag-ampo: “Kinahanglan akong masayod. Kinahanglan akong masayod.”
Pagkadawat sa Akong Wala Damhang Tubag
Usa ka adlaw ang akong pamilya ug ako miadto sa Manila Philippines Temple, apan nakalimot ako sa pagdala sa akong rekomend sa templo. Apan dala nako ang akong gamay nga kopya sa Basahon ni Mormon, busa milingkod ako sa usa ka dapit nga hulatanan ug mipadayon sa pagbasa. Matag karon ug unya, mohunong ako aron sa pagdayeg sa katahom sa templo—sa kandelabra, sa hagdanan, sa mga bentana nga adunay kolor [stained-glass windows], ug sa mga tawo nga misulod ug migawas nga adunay balaang pagtahod gayod uban sa dakong gugma alang sa Ginoo sa ilang mga kasingkasing.
Sa usa ka punto samtang nagbasa ako, nakadawat ako og klaro kaayo nga impresyon sa akong hunahuna gikan sa Espiritu. Sa dihang miabot kini, namulong kini kanako sa daghang nagkalain-laing mga ang-ang. Nakuratan gayod ako sa dihang miabot kini nga mas tul-id akong milingkod. Mibati ako og gamhanan gayod nga pagbati nga ako dili mahimong mobaliwala niini isip usa ka lumalabay nga hunahuna o emosyon.
“Totoo ‘to,” mao ang akong nadungog sa akong hunahuna.
Usa ka yano apan halawom nga pamahayag sa akong lumad nga pinulongan, Tagalog, nga nagpasabot, “Tinuod kini.”
Tinuod Kini
Nakadawat ako og kumpirmasyon nga ang Basahon ni Mormon tinuod—nga kini mao ang pulong sa Dios. Sa kataposan nasayran nako kini sa tibuok nakong kasingkasing tungod kay nasayod ako nga ang impresyon naggikan sa langit.
Apan dili kana ang tanan nga akong nakat-onan.
Nagtubo, nakabasa ako sa Basahon ni Mormon ug nakakat-on mahitungod sa ebanghelyo sa Iningles. Sa pagkatinuod, atol sa unang pipila ka tuig sa akong kinabuhi, ako mas maayo nga namulong ug nakasabot sa Iningles kay sa Tagalog. Apan ang pagkadawat niining wala damha nga espirituhanong impresyon sa Tagalog—ang pinulongan nga lumad sa akong nasod—namulong og kamatuoran sa akong kasingkasing.
Nasayod ako nianang higayona nga ang Dios nakaila kanako sa tinuod gayod ug personal nga paagi.
Nasayod ako nga Siya buhi gayod. Nasayod ako nga Siya namulong sa akong pinulongan, nga Siya nahigugma kanako, ug nga Siya nakahibalo sa akong mga panglimbasog ug mga kahuyang. Nakabaton ako niana nga kumpirmasyon, apan adunay laing butang nga kinahanglan gayod nakong masayran, busa gitinguha nako ang tubag dihadiha dayon: “Langitnong Amahan, tinuod ba gayod nga propeta si Joseph Smith?” Ang pagbati miabot pag-usab, niining higayona sa mas gamhanan nga paagi ngadto sa akong kasingkasing: “Totoo ‘to!”
Nasayran dayon nako nga si Joseph Smith usa ka propeta sa Dios. Nakakita siya sa Amahan ug sa Anak. Pinaagi ni Joseph Smith, ang ebanghelyo ni Jesukristo gipahiuli sa kahingpitan niini.
Pagkadako nga kalinaw ug kahupayan ug kahibalo ang akong nadawat! Nianang higayona, gusto ko nga modagan ngadto sa mga nataran sa templo, nga magwara-wara sa akong gamay nga kopya sa Basahon ni Mormon diha sa hangin ug mosinggit, “Totoo ‘to! Totoo ‘to!” Mibati ako sama ni Alma sa dihang miingon siya, “Unsa nga hingpit nga kalipay, ug unsa ka kahibulongan nga kahayag ang akong nakita” (Alma 36:20).
Pagkahibalo sa Kamatuoran
Human niini nga kasinatian, ang akong rason sa pag-adto og misyon nausab dihadiha dayon. Sa wala madugay ang akong mga papeles nasumiter na, ug nadawat nako ang akong tawag nga moserbisyo sa Colorado, USA. Mahinamon kaayo ako. Nasayod ako nga adunay usa ka tawo didto nga nagsinati sa unsay akong naagian—nga nangamuyo alang sa tabang ug dakong tinguha alang sa kalipay ug kamatuoran. Ug nasayod ako nga pinaagi sa ebanghelyo ni Jesukristo, makakaplag sila niana nga tabang ug kalipay, ingon nga ako nakakaplag.
Nanghinaot ako nga kitang tanan makahibalo nga: “Totoo ‘to!”