Mga Sukaranan sa Ebanghelyo

Ang Atong Langitnong Amahan Gusto nga Kita Magmalipayon

Kon kita mohinumdom sa plano sa Dios sa kalipay, kita makakaplag og kalipay bisan kon lisod ang kinabuhi.

Sa wala pa kita matawo dinhi sa yuta, nagpuyo kitang tanan kauban sa atong Langitnong Amahan isip Iyang mga anak nga espiritu. Siya mipresentar og plano aron sa pagtabang sa Iyang mga anak nga makat-on ug molambo. Pinaagi sa Iyang plano, kita mamahimong mas sama Kaniya ug mahimong takos aron makatagamtam og kinabuhing dayon. Kini nga plano posible tungod sa Anak sa Dios, si Jesukristo, kinsa mianhi aron mag-antos sa atong mga sala, kansang sakripisyo gitawag og Pag-ula.

Plano sa Langitnong Amahan gitawag og plano sa

kalipay (tan-awa sa Alma 42:8),
kaluwasan (tan-awa sa Moises 6:62),
katubsanan (tan-awa sa Jacob 6:8), o
kaluoy (tan-awa sa Alma 42:15).

Sama sa makita niini ug sa uban nga mga kasulatan, ang Langitnong Amahan gusto nga kita mahimong sama Kaniya, mobalik ngadto Kaniya, ug tinuoray nga mahimong malipayon (tan-awa sa Moises 1:39).

Mianhi Kita sa Yuta aron Makakat-on ug Molambo

Ang Dios mipadala kanato dinhi sa yuta, diin kita makaangkon og pisikal nga lawas (tan-awa sa Genesis 1:26–27). Kita nagkinahanglan og mga lawas aron sa pagtabang kanato nga masinati ang kinabuhi dinhi sa yuta.

Ang Dios nasayod nga kita dili mobati og kalipay sa tanang panahon. Makasinati kita og mga kasagmuyo, kasakit, ug gani kamatayon. Apan pinaagi sa mga hagit sa kinabuhi, ang Langitnong Amahan nagtabang kanato nga makakat-on ug molambo.

Mihatag usab ang Dios kanato og kabubut-on, ang abilidad sa pagpili tali sa maayo ug sa dautan. Siya mitugot kanato nga makapili alang sa atong kaugalingon unsay atong hunahunaon ug buhaton. Siya mihatag kanato sa mga kasulatan ug buhi nga mga propeta aron motabang kanato nga makat-on sa pagpili unsa ang matarong (tan-awa sa Abraham 3:25).

Paningkamot aron Mamahimong sama ni Jesukristo

Ang Dios wala mopadala kanato sa kalibotan nga walay usa ka ehemplo nga sundon (tan-awa sa Juan 13:15). Siya mipadala sa Iyang Anak, si Jesukristo, aron mopakita kanato sa dalan. Aron makat-on unsaon sa pagsunod Kaniya, makabasa kita sa mga kasulatan aron makat-on kon si kinsa Siya ug unsa ang Iyang nahimo atol sa Iyang kinabuhi dinhi sa yuta. Makabuhat usab kita sa atong pinakamaayo aron mamahimong sama ni Kristo pinaagi sa pagtuman sa Dios ug paghigugma sa uban.

Kon makahimo kita og mga kasaypanan, mangayo kita og pasaylo ug mosalig sa gahom sa Pag-ula ni Jesukristo sa pagtabang kanato nga mausab. Mahimo kitang magmalipayon samtang maningkamot kita sa matag-adlaw nga mas mahisama Kaniya.

Ang Kamatayon Dili mao ang Kataposan

Kon kita mamatay, ang atong mga espiritu moadto sa kalibotan sa espiritu. Didto kita magpadayon sa pagkat-on samtang mangandam alang sa Pagkabanhaw.

Panahon sa Pagkabanhaw, ang atong mga lawas ug mga espiritu mahiusa. Ang atong mga lawas mahimong hingpit, ug kita dili na mag-antos og kamatayon o sakit. (Tan-awa sa Alma 11:44–45.) Sama nga si Jesukristo namatay ug nabuhi pag-usab, kitang tanan mabuhi pag-usab.

Kon ang Dios mohukom kanato, Iyang ikonsiderar ang atong mga binuhatan ug ang atong mga tinguha. Kon kita naningkamot sa pagtuman sa mga sugo ug mga saad nga atong gihimo ngadto sa Langitnong Amahan, nan makapuyo kita pag-usab uban Kaniya.

Kinabuhi uban sa Dios ug sa Atong mga Pamilya didto sa Langit

Sa celestial nga gingharian, kita magpuyo uban sa Dios ug ni Jesukristo. Mahimo usab kita nga makapuyo didto uban sa atong mga pamilya hangtod sa kahangtoran kon kita gibugkos ngadto kanila. Kita makakaplag og kalinaw, kalipay, ug kapahulayan (tan-awa sa Mosiah 2:41).

Ang atong kinabuhi dinhi sa yuta mahimo nga malisod usahay, apan kon kita mosunod ni Jesukristo, kita makakaplag og kalipay niining kinabuhia ug mahangturong kalipay sa kinabuhi nga moabot.

Unsa ang Gisulti diha sa mga Kasulatan mahitungod sa Plano sa Kalipay?

Ang paagi nga kita nagpakabuhi importante. Ang Dios mohukom ug moganti kanato sumala sa atong mga hunahuna ug mga binuhatan (tan-awa sa Alma 41:3).

Si Satanas mao ang kaaway sa atong kalipay. Mosulay siya sa pagtintal kanato nga gamiton sa kasaypanan ang atong kinabuhi dinhi sa yuta ug sa pagpakasala. Gusto siya nga kita mauyamot sama kaniya (tan-awa sa 2 Nephi 2:27).

Kon kita makaangkon og hugot nga pagtuo sa plano sa Dios alang kanato, kita makaangkon og kalinaw bisan unsa pa ang mga pagsulay nga atong giatubang. Makapanglantaw kita sa pagpuyo uban sa Dios hangtod sa kahangtoran. (Tan-awa sa Doktrina ug mga Pakigsaad 59:23.)

Tanang buhat sa art, gawas sa pinakatuo, ni J. Kirk Richards