Mga Tingog sa mga Santos sa Ulahing mga Adlaw
Maayong Pagbalik, Christine
Walo ka tuig human sa kamatayon sa akong amahan, gipahinumdoman ako sa gugma sa Dios alang kanako.
Litrato sa Templo sa London England ni Chris Wills
Ako 19 anyos pa lamang sa dihang namatay ang akong papa niadtong Hunyo 20, 2010. Kadto Adlaw sa mga Amahan sa Estados Unidos. Ang kamatayon sa akong papa nakapasagmuyo gayod kanako og maayo, ug hinay-hinay akong mihunong sa pag-adto sa akong simbahan. Unsaon man nako sa pag-adto sa simbahan ug mangayo og giya sa Dios kon wala Siya maminaw kanako sa dihang labing gikinahanglan nako Siya? Gibati nako nga gibiyaan ko Niya.
Pipila ka tuig ang milabay, mibalhin ko sa London, England, alang sa graduate school. Sa akong paglakaw padulong sa eskwelahan sa usa ka bugnaw, nag-snow nga adlaw, naminaw ko sa usa ka musika gamit ang akong mga earphone sa dihang duha ka misyonaryo miduol kanako ug mipailaila sa ilang kaugalingon.
Sila si Elder Hathaway ug Porter nangutana kon unsay akong gipaminaw. Sa dihang gisultihan nako sila nga naminaw ko sa The Book of Mormon [Ang Basahon ni Mormon] nga musikal, ang ilang mga mata midako. Ang duha ka misyonaryo mipaambit dayon sa ilang mga pagpamatuod sa basahon, nga naghatag kanako og kopya. Samtang nagsugod ako sa pagbasa sa Basahon ni Mormon, nakaamgo ako nga tingali ang Dios naghatag kanako og timailhan, nga nagsulti kanako nga panahon na aron mobalik ngadto Kaniya—apan sa bag-ong paagi.
Pagkasunod adlaw ang mga misyonaryo mitudlo kanako sa plano sa kaluwasan. Atol niana nga leksyon, miingon si Elder Porter, “Sa kataposan, kita adunay kahigayonan nga makauban pag-usab ang atong mga pamilya.” Mao kadto ang labing gamhanan nga doktrina nga akong nadungog sukad. Ako adunay kahigayonan nga makauban pag-usab ang akong papa. Nasayod dayon ako nianang tungora nga gusto kong makakat-on pa og dugang. Ang akong gugma ug pagsalig sa Dios misugod sa pagbalik sa hinay-hinay.
Niadtong Abril 15, 2018, nabunyagan ako. Kanunay nakong mahinumdoman kon unsa ka mainiton ang tubig. Kini ingon og ang Dios migakos kanako pag-ayo ug nag-ingon, “Gimingaw ko nimo, Christine. Maayong pagbalik.” Ang pagpahinumdom sa gugma sa Dios mahimayaon. Ang Hyde Park First Ward miabiabi usab kanako ug mitabang kanako sa akong panaw.
Kon kamo nangutana kanako usa ka dekada kaniadto kon ako pa bang mahimong mahalon ang Dios pag-usab, tingali moingon unta ko, “Dili!” Apan nausab kana tungod kay natudloan ako sa plano sa kaluwasan sa Dios.
Sa wala madugay, miadto ko sa Templo sa London England, nga nagdala sa ngalan sa akong amahan. Sa dihang ang usa ka tawo nabunyagan ug nakumpirmahan pinaagi sa proxy alang sa akong papa, nasayod ako nga ako mas duol na og usa ka lakang nga makauban siya pag-usab.
Nasayod ako nga mahiusa ako pag-usab sa akong amahan. Karon ang akong gugma alang sa Dios naglambo sa matag adlaw.