Digital Lamang: Mga Young Adult
Pagpalig-on sa Akong Pagpamatuod sa Propeta
Mihukom ako sa pagdawat sa mga imbitasyon ni Presidente Nelson ug sa pagsuta kon tinuod ba ang iyang mga saad ngari kanato.
Pipila ka tuig ang milabay, si Elder Ronald A. Rasband sa Korum sa Napulog Duha ka Apostoles mibisita sa akong dapit aron mohatag og pagbansay sa lokal nga mga lider sa ward ug stake. Sa kataposan, mipahigayon siya og sesyon sa pagpangutana ug pagtubag diin gitugotan niya ang kongregasyon nga mangutana kaniya. Ang iyang mga tubag puno sa mga panabot ug makapadasig, apan usa ka piho nga pangutana ug tubag ang labing mahinungdanon alang kanako:
Sama sa unsa ang imong gibati sa pag-orden ni Presidente Russell M. Nelson isip ang bag-o nga propeta?
Si Elder Rasband nagpasalamat una sa tawo nga nangutana ug dayon mipadayon sa paghulagway sa iyang kasinatian. Gipasabot niya kon sa unsang paagi sa dihang una niyang nadunggan nga namatay si Presidente Thomas S. Monson (1927–2018), siya naguol mahitungod sa pagkamatay sa usa ka minahal nga propeta. Hinuon, puno usab siya sa paglaom, tungod kay nasayod siya nga giandam ang usa ka tawo sa pagdala sa responsibilidad sa propeta. Nasayod siya sa lohikal nga paagi nga si Presidente Nelson mao ang sunod nga propeta. Apan gusto usab niya nga masayran sa espirituhanong paagi—sa iyang kaugalingon—nga si Presidente Nelson mao gayod ang propeta sa Dios dinhi sa yuta.
Si Elder Rasband migahin og panahon sa pag-ampo ug pagpangamuyo sa Dios, nga nangayo og bisan unsang matang sa espirituhanon nga saksi. Sa dihang miabot na ang panahon sa pag-orden ni Presidente Nelson, si Elder Rasband mipandong sa iyang mga kamot sa iyang ulo uban sa ubang Apostoles, ug dihadiha dayon nakadawat sa espirituhanon nga kumpirmasyon nga iyang gilaoman. Miingon siya nga kini ingon og mabuntogon, ug siya nasayod uban sa hingpit nga kasegurohan nga si Presidente Nelson mao gayod ang propeta.
Human sa pagsaysay sa iyang kasinatian, si Elder Rasband dayon midasig ug mihangyo kanamo diha sa kongregasyon sa pagtuon, pag-ampo, ug paghimo sa buhat nga gikinahanglan aron makahibalo sa espirituhanong paagi (ug dili lamang sa lohikal nga paagi) nga si Presidente Nelson mao ang tigpamaba sa Ginoo.
Ang iyang imbitasyon mipabilin gayod kanako, ug sukad niadto, ako nagtinguha nga masayod sa akong kaugalingon. Naningkamot ako nga masayod—masayod gayod—nga si Presidente Nelson mao ang propeta sa Dios dinhi sa yuta.
Ug tugoti ko nga mosulti kaninyo, kini usa gayod ka talagsaon nga kasinatian.
Pagtinguha nga Masayod sa Akong Kaugalingon
Ang pagtuon ug pag-ampo adunay dakong bahin niini nga proseso. Sama pananglit, mihukom ako sa pagbasa sa tanang pakigpulong ni Presidente Nelson sa kinatibuk-ang komperensiya sukad nga nahimo siyang usa ka General Authority (adunay daghan gayod niini). Gitun-an usab nako ang tanang debosyonal nga mga pakigpulong nga iyang gihatag ngadto sa mga young adult, mga estudyante sa unibersidad, ug ubang mga nagtambong. Kini nakatabang kanako nga masayod pa og dugang kabahin ni Presidente Nelson ug sa unsay importante ngadto kaniya.
Gisiksik usab nako ang mga kasulatan alang sa giya. Usa ka bersikulo nga labing mahinungdanon mao ang Mateo 7:16, diin si Kristo naghatag kanato sa hingpit nga paagi sa pag-ila kon ang usa ka tawo propeta ba Niya: “Maila ninyo sila pinaagi sa ilang mga bunga.”
Sa dihang nabasa nako kini, nakaamgo ako nga ang labing maayo nga paagi aron masayod kon si Presidente Nelson ba usa ka propeta mao ang pagsunod sa iyang mga pagtulon-an ug dayon bantayan ang mga bunga. Mihukom ko nga tun-an ang matag pakigpulong sa kinatibuk-ang komperensiya nga gihatag ni Presidente Nelson sukad nahimong propeta ug sa pag-ila og dili mominos usa ka butang sa matag pakigpulong nga iyang gisugo kanato sa pagbuhat. Ania ang pipila lang ka ehemplo:
-
Oktubre 2020: “Samtang magtuon kamo sa inyong mga kasulatan sa mosunod nga unom ka bulan, moawhag ako kaninyo sa paghimo og lista sa tanan nga gisaad sa Ginoo nga Iyang buhaton alang sa nakigsaad nga Israel. … Pamalandongi kini nga mga saad. Hisgoti kini uban sa inyong pamilya ug mga higala. Dayon sunda ug tan-awa kini nga mga saad nga matuman diha sa inyong kaugalingong kinabuhi.”1
-
Abril 2020: “Magpuasa kita, mag-ampo, ug mohiusa pag-usab sa atong [hugot nga] pagtuo. Mainamp[o]on kitang mangamuyo alang sa kahupayan gikan niining tibuok kalib[o]tan nga pandemic.”2
-
Oktubre 2019: “Ako moawhag ninyo nga mainampoong magtuon sa tanang mga kamatuoran nga inyong mahibaloan mahitungod sa gah[o]m sa pagkapari. … Samtang magtubo ang inyong pagsab[o]t ug samtang magpakita kamo og [hugot nga] pagtuo sa Ginoo ug sa iyang gah[o]m sa pagkapari, ang inyong abilidad sa pag-angkon niining espiritwal nga bahandi nga giandam sa Ginoo kaninyo magkadako.”3
-
Abril 2019: “Ilha unsa ang nagpugong kaninyo sa paghinulsol. Ug dayon, pag-usab! Paghinulsol!”4
-
Oktubre 2018: “Mosaad ko kaninyo nga kon kita mobuhat sa atong labing maayo sa pagpahiuli sa saktong ngalan sa Simbahan sa Ginoo, Siya kansang Simbahan mao kini mobu[bo] sa Iyang gah[o]m ug mga panalangin diha sa mga ulo sa mga Santos sa Ulahing mga Adlaw, sa mga paagi nga wala nato makita sukad.”5
-
Abril 2018: “Mohangyo ko kaninyo sa pagpalambo sa inyong espirituhanong kapasidad sa pagdawat og pagpadayag.”6
Samtang girebyo nako kini nga mga pagdapit gikan ni Presidente Nelson, nakaamgo ako nga wala nako giseryoso kining tanan sa dihang una nako kining nadunggan. Sa pipila ka higayon, nakalimtan gani nako gayod ang pagdapit. Mihukom ako nga mobuhat og mas maayo ug mohimo og piho nga mga tumong alang sa akong kaugalingon aron mosunod sa tambag ni Presidente Nelson.
Isip resulta, nakasinati ako og daghang bunga. Gibati nako ang dugang nga gahom sa pagkapari; Gibati nako nga mas suod sa akong pamilya; ug gibati nako nga mas duol sa akong Manluluwas, si Jesukristo. Dili gayod ako hingpit ug adunay daghan pa gihapon nga kinahanglan buhaton aron sa pagsunod sa tanang tambag ni Presidente Nelson, apan ang akong mga paningkamot hangtod karon mihimo lang sa akong kinabuhi nga mas maayo.
Akong Tubag
Aron masabtan ang mga tubag nga akong nadawat, nahimong mapuslanon alang kanako ang pagtuon sa mga pagtulon-an mahitungod sa personal nga pagpadayag gikan ni Elder David A. Bednar sa Korum sa Napulog Duha ka Apostoles. Siya mipahisama sa unang sundanan sa pagpadayag ngadto sa pagpasiga og suga, nga magtugot sa kahayag sa pagpuno sa kwarto dihadiha dayon. Sa samang paagi, ang pagpadayag mahimong kalit lang nga moabot, sa usa ka higayon. Ug ang ikaduha nga sundanan sa pagpadayag gipahisama niya sa pagsubang sa adlaw, diin ang kahayag moabot sa mas hinayhinay ug kanunay nga paagi.7
Maingon nga si Elder Rasband adunay “kasinatian sama sa pagpasiga og suga” sa dihang gipandong niya ang iyang mga kamot sa ulo ni Presidente Nelson ug mibati og dili ikalimod nga saksi nga si Presidente Nelson mao ang propeta sa Dios.
Alang kanako, samtang akong gitun-an ang mga pagtulon-an ni Presidente Nelson, akong namatikdan nga hinay-hinay nga nagsubang ang adlaw.
Samtang nagtuon ako, samtang nag-ampo ako, ug samtang gihimo nako ang unsay gihangyo ni Presidente Nelson nga buhaton nako, ang akong hugot nga pagtuo mitubo “pagtul[o]n-an human sa usa ka pagtul[o]n-an, lagda human sa usa ka lagda” (tan-awa sa 2 Nephi 28:30). Tingali wala ako makasinati og dihadiha dayon nga pagpadayag sama sa pagpasiga og suga, apan isip resulta sa akong pag-ampo ug pagtuon, tinud-anay akong makasulti nga ako adunay hugot nga pagtuo nga si Presidente Nelson mao ang propeta sa Ginoo dinhi sa yuta.
Ang pagpangita og mga tubag sa atong mga pangutana magkinahanglan og paningkamot sa atong bahin, apan nasayod ako nga kitang tanan makadawat og personal nga saksi sa balaang tawag ni Presidente Nelson ug mga tubag sa bisan unsang uban pang mga pangutana nga mahimong anaa kita mahitungod sa ebanghelyo.
Sa tibuok niini nga kasinatian, nakakat-on ako ug nakaangkon og dako kaayo nga hugot nga pagtuo. Ug ako mapasalamaton sa kahangtoran nga ang Ginoo mipanalangin kanato og mga propeta sa modernong panahon dinhi sa yuta. Nasayod ako nga kon kita mopatalinghog sa ilang mga pulong, dagkong mga panalangin ang giandam alang kanato ug sa atong mga pamilya.