Alang sa mga Ginikanan

Ang Plano sa Kaluwasan ug Pagsalig diha sa Ginoo

Minahal nga mga Ginikanan,

Inyong magamit ang mosunod nga mga artikulo ug ilang mga hulagway aron makasugod og mga panaghisgotan uban sa inyong pamilya ug tabangi sila nga makasabot sa importante nga mga hilisgotan sama sa plano sa kaluwasan, kasaysayan sa Simbahan, ug pagsalig diha sa Ginoo.

Mga Panaghisgotan sa Ebanghelyo

Plano sa Kaluwasan

Gamita ang “Mga Sukaranan sa Ebanghelyo” sa pahina 6 sa pagtudlo sa inyong mga anak mahitungod sa plano sa kaluwasan. Hisgoti kon sa unsang paagi nga ang kahibalo sa plano sa kaluwasan mopanalangin kaninyo ug sa inyong pamilya. Ikonsiderar ang pagpadrowing sa inyong mga anak og mga hulagway sa plano sa kaluwasan ug tugoti ang matag usa nila nga mopasabot sa lain-laing bahin niini.

Mga Panalangin sa Pagtuon sa Kasaysayan sa Simbahan

Samtang magbasa kamo sa artikulo diha sa pahina 30, hisgoti uban sa inyong mga anak kon sa unsang paagi nga makaangkon usab sila og mas lig-on nga pagpamatuod pinaagi sa pagkat-on og dugang pa mahitungod sa kasaysayan sa Simbahan. Unsa nga mga istorya o mga kasinatian gikan sa kasaysayan sa Simbahan nga inyong ikapaambit sa inyong pamilya aron matabangan sila sa pag-atubang sa ilang mga pagsulay nga adunay hugot nga pagtuo?

Salig sa Ginoo

Basaha ang kasinatian ni Brother Milton Camargo sa pahina 39. Samtang mohisgot kamo niini uban sa inyong mga anak, ikonsiderar ang pagpangutana: giunsa sa pagpakita sa misyonaryo ang iyang pagsalig sa Dios? Unsaon ninyo sa pagpakita ang inyong pagsalig sa Ginoo? Unsa ang pipila ka mga paagi nga kamo napanalanginan samtang kamo misalig sa Dios?

Pagtubag sa Pag-abuso

Gamita ang mga ideya diha sa artikulo sa pahina 20 aron makat-on kon unsaon sa pag-ila sa pag-abuso, pagpugong niini, ug pagtudlo sa mga bata kon unsaon sa pagpanalipod sa ilang kaugalingon.

Lingaw-lingaw sa Pamilya nga Pagtuon

Ako Mogiya Kaninyo

Doktrina ug mga Pakigsaad 78:17–18

Ang Ginoo mogiya kanato kon kita maminaw Kaniya pinaagi sa Iyang mga propeta. Apan ang mga mensahe sa kalibotan mahimong magkasumpaki ug makalibog. Magdula isip usa ka pamilya sa dula nga “Buhata ang akong Buhaton ug Dili ang Akong Gisulti,” sama sa gihulagway sa ubos.

1. Pagpili og usa ka tawo nga mahimong instruktor.

2. Mosulti ang magtutudlo og usa ka aksyon samtang mobuhat sa lahi nga aksyon. Pananglitan, ang magtutudlo moingon, “Ipakpak ang inyong mga kamot,” apan mohikap hinoon siya sa iyang bukton.

3. Ang mga sakop sa pamilya kinahanglang mobuhat kon unsa ang gibuhat sa instruktor, dili ang unsay gisulti sa magtutudlo.

4. Balika ang dula, nga magpuli-puli isip ang instruktor.

Panaghisgotan: Naglisod ba kamo sa pagsunod sa instruktor? Usahay ang mga instruksyon sa kalibotan makalibog, apan ang mga sugo sa Ginoo klaro. Unsay atong mabuhat aron maminaw sa Ginoo samtang Siya naggiya kanato?

Gisumiter ni Lisa Thomas

Karong Bulana sa Alang sa Kalig-on sa mga Kabatan-onan nga Magasin

Takos ba Ako?

Gamita ang istorya niining batan-ong babaye sa pagtudlo sa inyong mga tin-edyer mahitungod sa kaisog, hiyas, ug sa gahom sa Pag-ula ni Jesukristo sa usa ka sitwasyon sa pag-abuso.

Nganong Kinahanglan Ka nga Magmalipayon

Kon ang panahon lisod, si Jesukristo naghatag kanato og mga rason nga magmalipayon. Tudloi ang inyong pamilya kon sa unsang paagi si Jesukristo nagsuporta niadtong kinsa motuo diha Kaniya.

Mga Pangutana ug mga Tubag

Ang inyong batan-on nanlimbasog ba sa pagsalig sa kaugalingon? Basaha ang makatabang nga mga sugyot gikan sa kabatan-onan sa tibuok kalibotan kon sa unsang paagi sila mahinumdom sa ilang bili.

Niining Bulana sa Higala nga Magasin

Tabang sa Dali, Sunod Kanako

Tugoti ang inyong anak nga mangulo sa home evening o sa pagtuon sa kasulatan gamit ang usa ka kalihokan gikan sa “Makalingaw nga Panahon sa Kasulatan.” Makakita usab kamo og sinemana nga mga ideya sa pagtudlo sa gagmayng mga bata diha sa “Makalingaw nga Panahon sa Kasulatan alang sa Gagmayng mga Bata.”

Mga Pioneer sa Matag Yuta

Basaha ang mahitungod sa usa ka batang lalaki didto sa Tonga kinsa mao lamang ang miyembro sa Simbahan sa iyang eskwelahan. Midako siya nga nahimong usa ka presidente sa Nuku’alofa Tonga Temple.

Pagkat-on mahitungod sa Plano sa Dios

Basaha ang istorya sa kasulatan karong bulana nga mahitungod sa panan-awon nga nakita ni Joseph Smith diha sa Doktrina ug mga Pakigsaad 76. Mahimo usab kamong magdula sa board game nga plano sa kaluwasan isip pamilya.

Mga kapanguhaan sa Pag-abuso

Gamita ang istorya nga “Gitago nga Monyeka nga Papel” aron makig-istorya sa inyong mga anak mahitungod sa kalainan tali sa mga sekreto ug mga surprisa. Kini naglakip sa usa ka pahina mahitungod sa pagpugong ug pagkaayo gikan sa pag-abuso.