Mga Tingog sa mga Santos sa Ulahing mga Adlaw
Panalangin sa Akong mga Katigulangan
Sa dihang akong nadawat ang akong patriyarkal nga panalangin, ang akong kasingkasing napuno sa gugma alang sa akong mga katigulangan.
Litrato pinaagi ni Richard M. Romney
Natawo ko sa Cameroon, ang yuta sa akong mga katigulangan. Dayon milalin ko ngadto sa France, diin ko nagpuyo, nag-eskwela, ug nagtrabaho isip nars sa nagkalain laing ospital sa Paris. Ako karon nagpuyo sa Montreal, diin nagtrabaho gihapon ko isip usa ka nars.
Nagpangita ko sa tinuod nga Simbahan ni Jesukristo sulod sa mga katuigan. Sa dihang akong nahimamat ang mga misyonaryo didto sa Paris, ang Espiritu Santo mipamatuod kanako nga sa kataposan akong nakaplagan ang akong gipangita—Ang Simbahan ni Jesukristo sa mga Santos sa Ulahing mga Adlaw. Napuno ko sa tumang kalipay nga nagtuo ko nga naa na gyod ko sa langit! Determinado ko sa pagsunod sa ebanghelyo sa hingpit.
Gitudloan ko sa pagsiksik sa akong mga katigulangan ug sa paghimo sa mga ordinansa alang kanila diha sa templo. Sa dihang akong nadawat ang akong patriyarkal nga panalangin, gisultihan ko nga ako mahimong usa ka manluluwas sa Bukid sa Zion ug magdala og kaluwasan ngadto sa akong pamilya. Ang akong kasingkasing napuno sa gugma alang kanila; dili nako mahimong pakyason sila. Sukad niadto, makugihon kong mitrabaho sa family history ug sa genealogy.
Nasayod gyod ko nga natawo ko sa usa ka harianong pamilya sa Cameron, ang Pamilyang Bamoun. Ang sulti sa karaan ug sa sugilanon nag-ingon nga kining mga tawhana naggikan sa Assyria ug nasagolan sa ubang mga tawo atol sa ilang paglalin. Sila mitipig sa ilang genealogy ug misulat sa ilang kasaysayan sukad sa AD 1300. Ang mga dokumento anaa sa librarya sa harianong palasyo. Taliwala sa daghan pang kasaysayan, kini nagsulti og sugilanon sa apohan sa tuhod sa akong inahan nga si Fon-gouhouo, kinsa mihari gikan sa 1818 hangtod sa 1863.
Nakabalik ako sa akong yutang natawhan, ug isip usa ka sakop sa pamilyang Bamoun, gihatagan ko og acces niining mga dokumento. Mibisita usab ako sa hari, nakigkita sa uban nga mga opisyal sa gobyerno, ug namulong ngadto sa mga awtoridad mahitungod sa Simbahan ug sa kaikag niini sa kasaysayan sa pamilya. Mapasalamaton ko nga, salamat sa gipahiuli nga ebanghelyo, makahimo ko sa akong bahin sa pagpanalangin sa akong yutang natawhan ug sa akong mga katigulangan.